རྒྱ་བོད་ཚིག་མཛོད་མཉེན་ཆས་ཕབ་ལེན་ས་ཡ་བརྒལ་བ། 

གནས་ཚུལ་འཁོ་སྤྲོད་པ། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་ཚོགས།

 

2018 ཟླ་1 ཚེས་26ཉིན་། འདི་ཀ་ཐའེ་ཝན་རྒྱུལ་སྤྱིའི་བོད་བརྒྱུད་ནང་བསྟན་ཞིབ་ཚོགས་ཀྱིས་གདན་ཞུས་གོ་སྒྲིག་གནང་བ་ལྟར། བོད་ཀྱི་རིག་གནས་ལ་མཛད་རྗེས་ཆེ་བའི་གློག་གླད་ཆེད་མཁས་པ་དགེ་བཤེས་བློ་བཟང་སྨོན་ལམ་ལགས་ཐའེ་ཝན་དུ་ཆེད་ཕེབས་ཀྱིས། <<བོད་རྒྱ་ཚིག་མཛོད་མཉེན་ཆས>>དངོས་སུ་དབུ་འབྱེད་བྱས་ཡོད། མཉམ་དུ་བོད་རྒྱ་ཚིག་མཛོད་མཉེན་ཆས་དང་། སྨོན་ལམ་བོད་ཀྱི་བརྡ་ཕྲིན་ཞིབ་འཇུག་ཁང་ནས་ཉེ་ཆར་ལེགས་འགྲུབ་བྱུང་བའི་འབྱུང་རྩིས་མཉེན་ཆས་གཉིས་ཀྱི་བེད་སྤྱོད་གཏོང་ཕྱོགས་དང་གལ་གནད་ངོ་སྤྲོད་གནང་།

མཛོད་སྒོའི་ཐོག་ཏུ་དགེ་བཤེས་བློ་བཟང་སྨོན་ལམ་མཆོག་གིས། དེ་སྔ་ཞིབ་འཇུག་ཚོགས་པ་དང་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་མཉམ་འབྲེལ་གྱིས་བཟོས་པའི་རྒྱ་བོད་ཚིག་མཛོད་ཉེན་ཆས་ད་བར་ཕབ་ལེན་གནང་མཁན་མང་པོ་བྱུང་ཡོད་པའི་ནང་ནས་ཁྱོན་ཡོངས་ནས་ཕྱོགས་སྡོམ་བྱ་ཐབས་བྲལ་ན་ཡང་། ཀུ་ཤུ་བེད་སྤྱོད་བྱེད་མཁན་ཁོ་ན་ས་ཡ་གཅིག་དང་དགུ་ཁྲི་བཞི་སྟོང་དགུ་བརྒྱ་དགུ་བཅུ་གོ་གསུམ་གྱིས་ཕབ་ལེན་བྱས་ཡོད་པ་དང་། དེ་ཡང་མང་ཆེ་བ་བོད་ནང་ཁུལ་ནས་ཕབ་ལེན་བྱས་ཡོད་པ་གསལ་ཡོད་ཅེས་གསུངས།

དེ་བཞིན། ཁོང་གིས་ད་ཐེངས་ཀྱི་བོད་རྒྱ་ཚིག་མཛོད་མཉེན་ཆས་ཀྱིས་ཀྱང་གཅིག་མཚུངས་བོད་ཕྱི་ནང་གི་བོད་རྒྱའི་སྐད་ཡིག་བཀོལ་སྤྱོད་གནང་མཁན་དག་གི་ཐུགས་རེ་སྐོང་ཐུབ་ངེས་ཡིན་ཞིང་། རྒྱ་བོད་དང་བོད་རྒྱའི་ཚིག་མཛོད་གཉིས་ཆར་མུ་མཐུད་ཚོགས་པ་གཉིས་བར་བཞག་པའི་སྔར་ཡོད་ཀྱི་གན་རྒྱའི་འབྲུ་དོན་གཞིར་བཟུང་ཐོག་རྒྱ་ཆེའི་བཀོལ་སྤྱོད་མཁན་དག་གི་དགོངས་འཆར་དང་དགོས་མཁོ་བཞིན་མཐུས་སྒོ་ཇེ་ཚང་དང་ལེགས་བཅོས། དུས་ནས་དུས་སུ་ནང་དོན་གསར་པ་ཁ་གསབ་བཅས་བྱ་རྒྱུ་ཡིན་ཞེས་གསུངས།

ཞིབ་འཇུག་ཚོགས་པའི་ཚོགས་གཙོ་བླ་མ་ཡེ་ཤེས་རབ་རྒྱས་ནས་ཞིབ་འཇུག་ཚོགས་པའི་ཚབ་བྱས་ནས་དགེ་བཤེས་མཆོག་ལ་འཚམས་འདྲི་དང་འབྲེལ། ད་ལྟའི་ཆར་ང་ཚོས་ཁ་ཙམ་མིན་པར་བོད་ཀྱི་ཆོས་དང་རིག་གཞུང་གི་ཆེད་ལག་ལེན་གྱི་ཐོག་ནས་མཉམ་འབྲེལ་བྱེད་པའི་དུས་ལ་བབ་ཡོད་པ་དང་། བོད་རྒྱ་ཚིག་མཛོད་དང་རྒྱ་བོད་ཚིག་མཛོད་མཉེན་ཆས་འདི་གཉིས་ནི་ཞིབ་འཇུག་ཚོགས་པའི་ལས་དོན་གལ་ཆེ་ཤོས་ཤིག་ཏུ་རྩི་བཞིན་ཡོད་པ་དང་། དེ་བཞིན་ཚང་མས་དོ་སྣང་དང་བརྒྱུད་སྤེལ་གང་རྒྱུ་གལ་ཆེན་ཡིན་ཚུལ་གསུངས།

མཛད་སྒོ་དེར། སྐུ་མགྲོན་གཙོ་བོ་དགེ་བཤེས་བློ་བཟང་སྨོན་ལམ་མཆོག་དང་། ཞིབ་འཇུག་ཚོགས་པའི་ལས་ཐོག་དབུ་འཛིན་བླ་མ་ཡེ་ཤེས་རབ་རྒྱས། དབང་སྟོད་སྤྲུལ་སྐུ་ཐུབ་བསྟན་ནོར་བུ། ཀཿཐོག་རིག་འཛིན་ཆེན་པོ། བཀྲ་ཤིས་རིན་པོ་ཆེ། དགེ་བཤེས་ཕྲིན་ལས་རྒྱ་མཚོ། སློབ་དཔོན་བསོད་ནམས་ཉི་མ་སོགས་ཞིབ་འཇུག་ཚོགས་པའི་ཚོགས་མིའི་མཁན་སྤྲུལ་དགེ་བཤེས་དགེ་འདུན་པ་དང་། ཐའེ་ཝན་གྱི་བོད་ཡིག་ལ་དོ་སྣང་གནང་མཁན་གྱི་དགེ་འདུན་པ་དང་མི་མང་། ཐའེ་ཝན་རང་གཞུང་དོན་གཅོད་ཀྱི་དྲུང་ཆེ་དོན་འགྲུབ་རྒྱལ་པོ་ལགས་དང་། ཧྥ་ཀོའུ་སློབ་གྲྭ་ཆེན་མོའི་དགེ་རྒན་ཆེན་མོ་བསོད་ནམས་དབང་རྒྱལ། བོད་ཀྱི་རིག་གཞུང་སྲི་ཞུ་ཁང་གི་འགན་འཛིན་བོད་ཀྱི་སྐད་བརྡ་རིག་པའི་ཆེད་མཁས་པ་སྐུ་ཞབས་ངག་དབང་ཕྲིན་ལས་སོགས་དང་ཞིབ་འཇུག་ཚོགས་པའི་ལས་བྱེད་མི་སྣ་བཅས་མཉམ་ཞུགས་གནང་ཡོད། ཐའེ་ཝན་གྱི་ནང་པའི་བརྙན་འཕྲིན་རྒྱུད་ལམ་ཆེ་གྲས་རིན་ཅན་འཁོར་སྐར་བརྙན་ཕྲིན་གྱིས་ཀྱང་ཡུལ་ངོས་སུ་ཆེད་གཅར་གྱིས་གསར་འགོད་བྱས་འདུག

གཅིག ༽  ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་ཚོགས་དང་སྨོན་ལམ་བོད་ཀྱི་བརྡ་ཕྲིན་ཞིབ་འཇུག་ཁང་མཉམ་འབྲེལ་གྱིས་བཟོས་པའི་སྤྱི་ཕན་རིན་མེད་མཉེན་ཆས་ཤིག་ཡིན།

གཉིས། ༽ ཚིག་མཛོད་འདིའི་ནང་དུ་བོད་རྒྱ་ཚིག་ཆེན་མོ་གཙོར་བཟུང་གིས། མཁན་ཆེན་ཚུལ་ཁྲིམས་བློ་གྲོས་ཀྱིས་གཙོ་སྒྲིག་གནང་བའི་བོད་དབྱིན་རྒྱ་གསུམ་རྒྱུན་བཀོལ་མིང་མཛོད་ཀྱི་བོད་རྒྱ་སྐད་གཉིས་དང་། སྐད་ལྔ་ཤན་སྦྱར་ཚིག་མཛོད་ཀྱི་བོད་རྒྱ་སྐད་གཉིས་ཆ་ཚང་བཅས་བསྡུས་ཡོད།

གསུམ། ༽ ཚིག་མཛོད་མཉེན་ཆས་འདིར། རྒྱ་ནག་སྐམ་སས་བཟོས་པའི་ཟོར་ཡང་ཡིག་གཟུགས་（簡體字）དང་དབྱིན་ཇིའི་དབྱངས་གསལ་ཀྱི་སྒྲ་སྦྱོར་རམ་སྦྱོར་ཀློག་(英語拼音)བཀོལ་ཡོད་པར་མ་ཟད། ཐའེ་ཝན་གྱིས་བཀོལ་སྤྱོད་བྱེད་བཞིན་པའི་སྒྲ་སྦྱོར་མ་ལག་ཀྱང་（注音符號）བཀོལ་སྤྱོད་ཆོག་པས་ཟོར་ལྕིའི་ཡི་གེ་ཞེས་གྲགས་པའི་རྒྱ་ཡིག་（繁體字）སྒྲ་སྦྱོར་ཀྱང་སྤྱད་ཡོད་པ་ནི་ད་ལྟའི་ཆར་མཉེན་ཆས་ཚིག་མཛོད་འདི་དང་། ལོ་སྔ་མར་བཏོན་པའི་རྒྱ་བོད་ཚིག་མཛོད་མཉེན་ཆས་གཉིས་ལས་མེད།

བཞི། ༽ ཚིག་མཛོད་མཉེན་ཆས་འདི་གཉིས་ཆོས་ཚོགས་ཁག་དང་སློབ་མ་གཙོས་པའི་བོད་བརྒྱུད་བསྟན་དང་བོད་ཀྱི་སྐད་ཡིག་ལ་སློབ་སྦྱོང་དང་ཡིག་སྒྱུར་སོགས་གནང་མཁན་རྣམས་ལ་ཕན་ཐོགས་ཆེན་པོ་ཡོད་ངེས་པར་མ་ཟད། ཚིག་མཛོད་འདིའི་ནང་དུ་སྤྱིར་བཏང་འཚོ་བ་དང་འབྲེལ་བའི་ཐ་སྙད་དང་ནང་ཆོས་དང་འབྲེལ་བའི་ཐ་སྙད་གཉིས་ཆར་བསྡུས་ཡོད།

ལྔ། ༽ ཚིག་མཛོད་ཕབ་ལེན་བྱ་ཡུལ། ཀུ་ཤུའི་ཁ་པར་བུམ་མཛོད་དུ་དབྱིན་ཡིག་གི་Tibetan-Chinese Dictionary བྲིས་ནས་ཕབ་ལེན་གནང་ཐུབ།

གཞན་ཕབ་ལེན་བྱ་ཚུལ་རྒྱས་པ་ནི་གཤམ་གསལ་ལྟར་ཡིན།

Android མ་ལག བོད་ནང་ནས་ཕབ་གནས། http://www.monlamit.com/sites/default/files/softwares/Tibetan_Chinese_Dictionary_com.monlam.tbCnDic2018.database4july.apk

Google ནས་ཕབ་གནས། https://play.google.com/store/apps/details?id=com.monlam.tbCnDic2018.database4july

ཀུ་ཤུ་ཁ་པར། ཕབ་གནས། https://itunes.apple.com/us/app/tibetan-chinese-dictionary/id1336428477?ls=1&mt=8

ཀུ་ཤུ་གློག་ཀླད།

http://monlamit.com/sites/default/files/softwares/Tibetan_Chinese_Dictionary_Mac_OS_X.zip

སྐར་ཁུང་རྟགས་ཅན་གློག་ཀླད།

http://monlamit.com/sites/default/files/softwares/Tibetan_Chinese_Dictionary_Win.zip

 

སྤྱི་ལོ་༢༠༡༨ ཟླ་ ༡ ཚེས་ ༢༨ ཉིན།