རྒྱ་ནག་གི་བརྟན་ལྷིང་ལ་རྒོལ་བའི་དམངས་གཙོའི་ལས་འགུལ།

ཏྲེ་ཧོར་ཐུབ་བསྟན་གྱིས།

རྒྱ་ནག་ནི་དེང་སང་འཛམ་གླིང་ཐོག་མི་གྲངས་ཆེས་མང་ཤོས་ལ་དབང་བསྒྱུར་བའི་སྲིད་དབང་སྒེར་གཅོད་རང་ལུགས་པའི་རྒྱལ་ཁབ་གཅིག་པོ་དེ་ཆགས་ཡོད། མིག་སྔར་དཀྱིལ་ཤར་དང་བྱང་ཧྥེ་གླིང་ཡུལ་གྲུ་ཁག་གི་ནང་དུ་དམངས་གཙོའི་ལས་འགུལ་དྲག
པོ་བྱུང་དང་བྱུང་བཞིན་པ་དང་། སྲིད་དབང་སྒེར་གཅོད་པ་རྣམས་མི་དམངས་ཀྱི་ལག་ཏུ་འཆི་བཞིན་པ་དེས་རྒྱ་ནག་གི་དབང་འཛིན་པར་བརྡ་ལན་གསལ་པོ་སྤྲད་ཡོད་པ་མ་ཟད། ཧ་ཅང་དངངས་སྐྲག་སྐྱེ་གཞི་ཀྱང་ཆགས་ཡོད་པ་རེད། མི་དམངས་ཀྱིས་ངོ་རྒོལ་བྱེད་པར་འཇིགས་ཏེ་དྲག་པོའི་སྲིད་ཇུས་ལག་སྟར་བྱས་པའི་སྲིད་གཞུང་ཚང་མ་མཐར་རང་ཉིད་ཀྱི་སྲིད་དབང་འགོ་རྟིང་སློག་པའི་རྒྱུ་རུ་འགྱུར་བ་གདོན་མི་ཟ་བ་ཞིག་རེད། རྒྱ་ནག་མི་དམངས་ཕལ་ཆེ་དྲག་པོའི་འཇིགས་སྐུལ་འོག་ལུས་ནས་ཡོད་ཙམ་ལས་དོན་དུ་གུང་ཁྲན་གཞུང་བློ་སེམས་དཀར་མཁན་ནི་ལོ་རེ་བཞིན་ཇེ་ཉུང་རེད། ས་ཞིང་དང་ཁང་ས་བཙན་དབང་གིས་གཞུང་བཞེས་བཏང་བའི་དོན་རྐྱེན་དང་། ལྐོག་ཟ་རུལ་སུངས་ཀྱི་དཀའ་ངལ། དྲང་བདེན་མ་ཡིན་པའི་ཁྲིམས་བཅད་སོགས་རེ་རེ་བཞིན་རྒྱ་ནག་དམར་ཤོག་ཚོགས་པའི་སྲིད་དབང་འཐོར་ཞིག་ཏུ་འགྲོ་བའི་རྒྱུ་རུ་འགྱུར་བཞིན་པ་རེད། ཉེ་བའི་ཟླ་ཤས་རིང་རྒྱ་ནག་ནང་ཁུལ་གྱི་ས་ཁུལ་ཁག་ཏུ་མི་དམངས་ཚོས་རྒྱ་ནག་གུང་ཁྲན་གཞུང་ལ་རྒོལ་གཏམ་སྤེལ་བ་དང་ངོ་རྒོལ་བྱས་པ་ཁག་ཅིག་དཔེར་མཚོན་ཙམ་དུ་བཀོད་ན།
༡
ཉིན་ཤས་སྔོན་རྒྱ་ནག་གི་གྲོང་ཁྱེར་ཞིག་གི་བར་སྣང་དུ་(་གུང་ཁྲན་ཏང་ཕབ་དགོས་)་་(མི་དམངས་ཡར་ལངས་ཤོག་)ཅེས་པའི་འབོད་ཚིག་བྲིས་པའི་ལྒང་བུ་མང་པོ་གནམ་དུ་སྤུར་བ་ལ་བརྟེན་ནས། རྒྱ་ནག་ནང་ཁུལ་གྱི་མི་མང་པོ་ཞིག་གིས་དེའི་ཐད་ལ་བསམ་ཚུལ་འདྲ་མིན་ཡོང་བཞིན་ཡོད། རྒྱུས་ཡོད་ཀྱི་མི་ཞིག་གིས་བཤད་པ་ལྟརན། གནས་ཚུལ་དེ་བྱུང་རྗེས། སྲིད་གཞུང་གི་དམག་མི་འབོར་ཆེ་ས་གནས་དེར་སླེབས་ཡོད་པ་མ་ཟད་ས་གནས་ཀྱི་མི་མང་ ཚོརའབོད་ཚིག་འཁོད་པའི་ལྒང་བུ་སྤུར་མི་ཆོག་པའི་བཙན་བཀའ་ཡང་བཏང་འདུག
༢
༦ཚེས་༣ཉིན། ཁྲིན་ཏུའུ་གྲོང་ཁྱེར་དགེ་འོས་སློབ་གྲྭ་ཆེན་མོའི་ལས་ཁུངས་ཨ་མའི་ཁང་བརྩེགས་མདུན་གྱི་བར་སྣང་ནས་བསྒྲགས་ཡིག་མང་མང་པོ་ཟགས་ཡོད་པ་དང་། ཡི་གེའི་ནང་དུ་་་(གུང་ཁྲན་ཏང་ཕབ་དགོས)་་་(མི་དམངས་ཡར་ལངས་ཤོག)་ཅེས་པའི་ཡི་གེ་འཁོད་ཡོད་པ་རེད། ད་དུང་བསྒྲགས་ཡིག་གི་མཇུག་ཏུ་་(ལངས་ཤོག་)(་་་བྲན་གཡོག་བྱེད་འདོད་མེད་པའི་མི་དམངས་ཚོ་་)(་ཁྱེད་རང་གི་སྐད་སྒྲ་འདོན་དང་ང་ཚོའི་རེ་བ་མཐོང་ཐུབ་)(་་་ང་ཚོའི་ལས་དབང་ང་ཚོ་རང་གི་ལག་ཏུ་ཡོད)སོགས་ཅེས་བྲིས་ཡོད། སྐབས་དེར་སློབ་མ་ཧ་ཅང་མང་པོས་མཐའ་སྐོར་ནས་བལྟས་ཡོད་པ་དང་། བརྡ་ལན་ཧ་ཅང་ཆེན་པོ་ཞིག་སྤྲད་ཡོད་པ་རེད། བསྒྲགས་ཡིག་དེ་དྲ་ཐོག་ཏུ་ཡོངས་སུ་ཁྱབ་པ་དང་དྲ་གྲོགས་མང་པོས་རྒྱབ་སྐྱོར་བྱས་ཡོད་པ་རེད། དེའི་ནང་གི་དྲ་གྲོགས་གཅིག་གི་བཤདཔ་ལྟར་ན་་་་ང་ཚོ་མི་རབས་གསར་བའི་དྲུག་བཞིའི་དོན་རྐྱེན་གཏན་ནས་བརྗེད་མེད། སྤྱིར་སྲིད་གཞུང་གིས་གནས་ཚུལ་བཀག་སྡོམ་བྱེད་བཞིན་ཡོད་ཀྱང་་་་དྲུག་བཞི་ལ་རྒྱུས་ལོན་བྱ་རྒྱུ་ནི་ན་གཞོན་རེ་རེས་གུང་ཁྲན་གཞུང་གི་གསང་མིག་བརྟོལ་བའི་ཆེས་གོམ་པ་དང་པོ་རེད་ཟེར།ད་དུང་གཞན་ཞིག་གིས་་་་མཐའ་གཅིག་ཏུ་རྒྱབ་སྐྱོར་ཡོད་་་་ང་ཚོ་ན་གཞོན་གྱི་སློབ་ཆེན་པ་དག་གི་སེམས་གཏིང་གི་སྐད་ཆ་རེད། གུང་ཁྲན་ཏང་། ཁྱེད་ཀྱི་ལག་ཡ་གཅིག་གིས་གནམ་ཁེབ་པར་མ་བསམ། ཁྱོད་ཀྱིས་གནས་ལུགས་འཁྱོག་བཤད་དང་མི་བདེན་རྫུན་བསྒྲིགས་ཀྱི་སྐད་ཆ་ཡིས་རྒྱ་ནག་མི་དམངས་དུས་གཏན་དུ་མགོ་སྐོར་ཐུབ་པར་མ་བསམ་ཞེས་ཟེར།
༣
ཡང་ཉེ་སྔོན་པན་ཅིན་གྱི་སྲང་ལམ་དུ་གཏོར་བའི་་(རྒྱ་ནག་མི་དམངས་བཅིངས་བཀྲོལ་དམག་ལ་སྤྲིངས་པའི་འཕྲིན)་་ཞེས་པའི་ཡི་གེ་མི་དམངས་ཚོས་དོ་སྣང་ཆེན་པོ་བྱས་ཡུལ་ཞིག་ཆགས་འདུག དེ་བཞིན་ཉེ་བའི་ཆར་རྒྱ་ནག་གི་ས་ཆ་གང་སར་ཡར་ལངས་ཀྱི་དོན་རྐྱེན་མང་པོ་བྱུང་ཡོད་པ་དང་། རྒྱ་ནག་གི་ཅྭའ་ཞྭི་ཧྥིག་གྲུའུ་གྲོང་ཁྱེར་ནང་དུ་བྱུང་བའི་རང་ལོ་ང་གཉིས་ཡིན་པའི་མི་ཞིག་གི་ཁང་པ་གཞུང་བཞེས་བཏང་བར་བརྟེན་ལོ་བཅུའི་རིང་སྲིད་གཞུང་ལ་ཞུ་གཏུགས་བྱས་ཀྱང་གྲུབ་འབྲས་མ་བྱུང་བའི་མཐར། སྲིད་གཞུང་ར་སྐོར་ནང་དུ་གས་རྫས་བཞག་ཏེ་ཚེ་སྲོག་གི་རྒོལ་ལན་སློག་ཡོད།
༤
དེ་བཞིན་ནང་སོག་གི་མི་དམངས་དང་སློབ་ཕྲུག་སྟོང་ཕྲག་བརྒལ་བས་བསྟུད་མར་ཉིན་མང་པོའི་རིང་ངོ་རྒོལ་ཁྲོམ་བསྐོར་བྱས་པ་ཚང་མས་རྒྱ་ནག་ལ་བརྡ་ལན་གསལ་པོ་སྤྲོད་དང་སྤྲོད་བཞིན་པ་རེད། མདོན་ན་རྒྱ་ནག་དམར་ཤོག་ཚོགས་པའི་སྲིད་དབང་འདི་ཡང་རྒྱལ་སྤྱིའི་ནང་གི་སྲིད་སྒེར་གཅོད་པ་གཞན་དག་བཞིན་སྔ་ཕྱི་ཞིག་མ་གཏོགས་ཤོར་རྒྱུ་ཡིན་པའི་སྔ་ལྟས་ད་ལྟ་ནས་ས་ཁུལ་གང་སར་མཐོང་རྒྱུ་ཡོད་པ་གོང་དུ་བཀོད་པ་ལྟར་རེད། འོན་ཀྱང་། དེ་དག་ནི་དཔེར་མཚོན་ཙམ་ལས་དོན་དུ་དེ་ལྟ་བུའི་གནས་ཚུལ་རིགས་ཕལ་ཆེར་ཉིན་རེར་བཞིན་རྒྱུན་ཆད་མེད་པར་བྱུང་བཞིན་པ་རེད། རྒྱ་ནག་གི་དམངས་གཙོ་ནི་བོད་དོན་དང་ཐད་ཀར་འབྲེལ་བ་ཡོད་པའི་གནད་དོན་ཞིག་ཡིན་མ་ཟད་ངོ་བོ་གཅིག་པའི་དམིགས་ཡུལ་ཞིག་ཏུ་ངོས་འཛིན་བྱེད་ཀྱང་ཆོག་པ་ཞིག་རེད། དེ་ལྟར་རྒྱ་ནག་དམངས་གཙོ་དང་ཐག་ཅི་ཙམ་ཉེ་ན་དེ་ཙམ་གྱིས་བོད་ཀྱི་བདེན་མཐའ་གསལ་ལ་ཉེ་བ་དང་། དེང་གི་རྒྱལ་སྤྱིའི་ནང་གི་འགྱུར་ལྡོག་དང་རྒྱ་ནག་ནང་ཁུལ་གྱི་གནས་སྟངས་གང་དུ་བལྟས་ཀྱང་ང་ཚོའི་རེ་བ་བཟང་ས་ནས་རྒྱག་ཆོག་པ་ཞིག་རེད།