བོད ལྷ་ཀླུ་གཉན་གསུམ།
ཕོ་རྒོད་དར་མའི་རང་གཟུགས་ཡུན་གྱིས་ཉམས།།
སྐྲ་ལོ་དུང་གི་ཁ་དོག་རིམ་གྱིས་སྐྱེ།།
སྐྱེ་རྒ་ན་འཆི་འཁོར་བའི་ངང་ཚུལ་འདིས།།
ཚེ་འདི་ཡུན་ཐུང་ཡིན་པ་ངོ་སྤྲོད་བྱུང་།།
དྲན་གཤིས་རྟ་རྒོད་འདྲ་བོ་བརྗེད་ཀྱིས་འཁྱེར།།
བརྩེ་བ་དངས་མའི་སྙིང་ཁམས་སད་ཀྱིས་བཅོམ།།
སྐྱེ་གཟུགས་མདའ་མོ་འདྲ་བོ་གཞི་ལྟར་འཁྱོག།
ཕར་བཤད་ཚིག་གི་རིན་ཐང་བྲག་ཆའི་སྤུན།།
སོ་ཕྲེང་སུམ་བཅུའི་འཕྲེང་ཐག་རྩ་བཞིན་འཐོར།།
ལུས་ཀྱི་རྩལ་དགུ་རུས་སྤལ་ནུར་དང་མཚུངས།།
ཐོད་པ་མེ་ལོང་གཟུགས་ལ་ཆག་སྐྱོན་ཤོར།།
ཐོས་འཛིན་བུ་རམ་མངར་མོ་སྐྱུར་ཁའི་བྲན།།
སྣ་འཛོམ་ཟས་ཀྱི་དངས་ཀ་ཡུན་གྱིས་འགག།
མིག་གི་རྒྱང་རིང་རི་བོ་རབ་རིབ་གྱུར།།
རོ་འཛིན་ལྕེ་ཡི་རེག་བྱ་མི་ཤེས་པར།།
དལ་མོ་སོང་ཡང་དབུགས་འདི་སྟོད་ལ་འཚང་།།
དད་པའི་སེམས་ཀྱིས་ཞལ་གཟུགས་འཇལ་འདོད་ཀྱང་།།
རྒས་པའི་ཁུར་རོ་འདི་ཡིས་མི་གཏོང་བར།།
སྐྱེ་ས་འདི་ནས་གོམ་བཀང་སྤོ་དབང་མེད།།
ད་ནི་སྨོན་ལམ་རེ་ཡིས་ཚིམས་པར་བྱེད།།
སྐུད་སྣེ་གཅིག་གི་སྣེ་མོ་ཨ་མྱེ་ཡོད།།
སྐུད་སྣེ་གཞན་གྱིས་སྣེ་རུ་ང་རང་འཇུས།།
ནང་གི་བཤད་པའི་གཏམ་གྱི་ཚོམས་པུ་འདིས།།
མི་སེམས་དམར་པོ་ལྷོག་ལྷོག་ལྡིང་དུ་བཅུགས།།
ལོ་ན་རྒས་པའི་སྡུག་བསྔལ་ལུས་ལ་ཐོན།།
བློ་རིག་ཉམས་པའི་རྨོངས་པ་སེམས་ལ་འཐིབས།།
ལུས་སེམས་གཉིས་ཀ་གཞན་དབང་གྱུར་བ་ཡི།།
མི་ཡི་མི་ཚེ་སྨད་འདི་སྙིང་རེ་བརྗེ།།
སེམས་ཀྱི་ཁུགས་སོ་ཞིག་ན་སྐོང་བ་ཡི།།
བདག་གི་ཨ་མྱེ་ལགས་ཀྱི་གཏམ་རྒྱུད་དེ།།
ཡིད་ལ་དྲན་ཐེངས་རེ་ལ་བདག་སེམས་སུ།།
གསོས་ཀྱང་ལྷོད་ཅིག་མི་སྟེར་བུ་ང་སྐྱོ།།