རིན་ཐང་དུས་ཚོད་ལ་བཅར་བ།(ཞར་བཀོད་གཅིག།)

ཁྲོ་གཏུམ།

མི་ཚེ་ནི་ཆུ་ཚོད་ཅིག་སྟེ
དལ་ལྷོད་ཀྱི་འགྲོས་མེད་པར་མདུན་ལ་བཞུར

དུས་ཚོད་ཀྱི་ཆུ་རྒྱུན་ཁྲོད་ན
བསམ་གཞིགས་ཀྱི་རི་མོ་ཁྲ་ཆིལ་དགུ་ཆིལ་གྱིས་བབས་ཤིང
བསམ་བློའི་འཚོལ་བསྙེགས་ཀྱི་ཐོན་ཁུངས་སུ
རྡོ་སོལ་་་་ ཧ་ཅང་གིས་འབག་བཙོག་ལྡན
གངས་ཆུ་་་་ ཧ་ཅང་གིས་གཙང་སྒྲར་དགའ
རི་བོའི་ཁོང་དགོད
རྩྭ་ཐང་གི་འཕྱ་སྨོད
ནམ་མཁའི་ལྐོག་མིག
གཉུག་མར་གནས་པའི་གད་མོ་རྒྱུན་ལྡན་དང་རྒྱུན་ལྡན་མ་ཡིན་པ
དུས་ཚོད་ཀྱི་སྔ་དགོང་ཁྲོད་ལ་བྲིས་ཡོད

ཁྱོས་དུས་ཚོད་ཀྱི་འཁོར་མདའ་མ་མཐོང་བའི་སྐབས
ཁྱོད་རང་རྒྱུན་ལྡན་མིན་པའམ
ཡང་ན་ཁེ་ཕོག་མེད་པའི་གནས་མལ་ལ་ཡོད

2016/11/17ལ།

ཇ་འཐུང་ཞོར།

—སྙན་ངག་ཇ་ཁང་ནས་ཇ་ཕོར་དང་མཉམ་དུ་མོལ་བ།

འོ་ཇ་ལྟེམ་པའི་ཕོར་ངོས་སུ
རླངས་པ་དགུང་ལ་བཏེགས་པའི་ཚོར་བ་འཕུར

སྐྲ་ལོས་སོག་འདབ་བཀབ་པའི་གསར་བུ་ཞིག
ཇ་ཕོར་གྱི་བཅུད་དུ་ཐིམས་ཤིང
སེམས་ཀྱི་གསེང་ལས་བརྡོལ་བའི་ཚོར་བསིལ་སྟེ
ཧི་མ་ལའི་རི་འདབས་སུ་བཙལ

ང་ནི་སྙན་ངག་ཇ་ཁང་གི་ཟུར་དུ་བསྡད་པའི་མགྲོན་པོ་ཞིག
ཇ་ཧུབ་རེ་འཐུང་ཞོར་ཡ་ཀའི་རྫ་ལ་བལྟས
ཇ་ཁམ་བཀང་མུད་ཞོར་མདུན་གྱི་སྲིང་ལམ་མཐོང
ནགས་རིས་སྔར་ལྟར་ལྗང་མདོག་གིས་རི་བོ་གཉོར་ཞིང
འགྲོ་འོང་འདུར་རྒོད་ཀྱིས་ནམ་རྒྱུན་སྲང་ལམ་བཅད

དུས་ཚོད་ཀྱི་དབང་གིས་ཇ་ཡུན་ཙམ་སྟེ
ཡང་འདུར་དགོས་སོང

ཇ་ལོ་དང་ཇ་ཁང
སྙན་ངག་དང་ཇ་ཁང
པང་ལེབ་སྔོན་པོའི་ངོས་ན་སྙན་ངག་གི་ཤོག་བུས་ལག་གཡབ་མོད
དེ་བས
ང་ཁོམ་དུས་ཕྱིར་ཡོང་ངེས

2016/11/14ལ།