རི་བོང་ལ་གདམས་པའི་མགུར་དབྱངས་དྲང་སྲོང་དགྱེས་གླུ

ཨེ་མ་ཧོ།

 
ན་མོ་གུ་རུ་ཨ་བྷྱ་ལ྇ཀྵྃ་ཀ་ར་ཡེ།
ཀ་མ་ལ་ལྟར་བཞད་པའི་དབེན་གནས་ཀྱི་རི་རྩེར།།
ཁ་ཁོག་བདེན་པའི་རིག་འཛིན་དེང་དུས་ཀྱི་རྣལ་འབྱོར།།
ག་ས་གང་ན་བལྟས་ཀྱང་དགའ་སྐྱིད་ཀྱི་ཞིང་ནས།།
ང་ཡི་མཛའ་གྲོགས་རི་བོང་དལ་ཅིག་ལ་གསོན་མཛོད།།
ཅ་ཅོ་འདུ་འཛིས་དབེན་པའི་རི་ཁྲོད་ཀྱི་གནས་འདིར།།
ཆ་ལུགས་གང་དགའ་སྒྱུར་བའི་སྨྱོན་པ་ངའི་དྲུང་ན།།
ཇ་མདོག་སྤུ་རིས་འཁྱིལ་བའི་རི་བོང་གིས་ཆོས་ཉན།།
ཉ་གང་ཟླ་བར་སྣང་བའི་བློ་ལྡན་ཁྱེད་མིན་ནམ།།
ཏ་ཐྰ་ག་ཏའི་བསྟན་བུའི་ཡང་སྙིང་ལ་གསོན་དང་།།
ཐ་དག་ཐར་བ་ཐོབ་པའི་ཐོས་གྲོལ་གྱི་ཕན་ཡོན།།
ད་ལྟ་ཁྱོད་ཀྱིས་གསན་པ་བསོད་ནམས་ཀྱི་འབྲས་བུ།།
ན་རཀ་སྡུག་བསྔལ་སེལ་ཞིང་མྱང་འདས་ལ་ཆས་འགྲོ།།
པ་ར་མི་ཏའི་ཕྱིན་བཅུའི་ས་ལམ་གྱི་སྙིང་པོ།།
ཕ་མས་རྒྱུད་སྡེའི་དག་མཉམ་གསལ་རྫོགས་ཀྱི་ཡང་སྙིང་།།
བཛྲའི་ཐེག་རྩེའི་སྙིང་ཐིག་རྫོགས་ཆེན་ལ་ཉམས་ལེན།།
མ་ལུས་ཀུན་འདུས་རང་བྱུང་བུ་གཅིག་གི་རྒྱལ་པོ།།
ཙ་རི་སྦས་ཡུལ་འདྲ་བའི་ཀ་བྷན་གྱི་ནགས་ཀློང་།།
ཚ་གྲང་མཉམ་པའི་རི་ཁྲོད་རང་བཞིན་གྱི་དགོན་དུ།།
ཛ་ཡའི་བསྟན་པའི་སྙིང་པོ་ཐོས་བསམ་གྱི་སྒོམ་པས།།
ཝ་ལེར་རིག་འཛིན་བརྒྱུད་པའི་གཤེགས་ཤུལ་ལ་ཆས་འགྲོ།།
ཞྭ་དམར་སྔ་འགྱུར་རྒྱལ་བའི་བཤད་སྒྲུབ་ལ་འབད་བཞིན།།
ཟ་ཧོར་མཁན་སློབ་མཛད་པའི་ཕྲིན་ལས་ཀྱི་སྣང་བར་།།
འ་ཅག་མཉམ་དུ་འཛོམས་པ་སྐལ་བ་རེ་བཟང་ཕྱིར།།
ཡ་མཚན་ཀུན་བཟང་བླ་མའི་རང་ཞལ་ལ་གཟིགས་མཛོད།།
ར་བ་མཚོ་བྲག་མུ་ཁྱུད་དཀྱིལ་འཁོར་བཞིན་བཀོད་པའི།།
ལ་ལུང་གཡུ་མདོག་མཛེས་པའི་ཀུན་བཟང་གི་ཞིང་ནས།།
ཤ་ཞེན་ཆོས་ལ་དུང་བའི་རི་བོང་ཁྱོད་མཐོང་ཚེ།།
ས་ལམ་ཡོན་ཏན་ཐོབ་པའི་སྨོན་ལམ་ཞིག་བྱས་ཡོད།།
ཧ་ཅང་ཕྱི་ནང་གཙང་པའི་དབེན་རི་ཡི་ངོགས་སུ།།
ཨ་མཚར་ཀུ་རེ་མིན་པར་དམ་ཆོས་ཀྱི་འཆད་ཉན།།
ཨིན་ལན་གངས་ལྡན་རི་ནས་ཀ་ལྷུན་གྱི་སྒོམ་པས།།
ཨུ་རྒྱན་རིག་འཛིན་བརྒྱུད་པའི་ཚོགས་གྲལ་དུ་ཆས་སོང་།།
ཨེ་མ་ཧོ་རུ་འབོད་པའི་སྙིང་གཏམ་གྱི་སྙིང་པོ།།
ཨོ་རྒྱན་པདྨའི་ལྟ་སྒོམ་སྤྱོད་འབྲས་ལ་བརྩོན་ནས།།
བསྟན་འགྲོར་ཕན་བདེ་སྒྲུབ་པའི་དེད་དཔོན་རུ་ཆས་འགྲོ།།

ཞེས་པ་འདི་ཡང་རབ་གནས་ཤིང་ལུག་ཁྲུམས་ཟླའི་དབང་ཚེས་དགེ་བར་དབྱར་གནས་བགྱིས་པའི་དུས་སུ་དབྱར་གནས་ཕྱིར་ཏུ་ལབ་རྩེ་རུ་དར་ལྕོག་རྣམས་རི་རྩེ་རུ་སྒྲོན་པའི་སྐབས་སུ་རི་བོང་ཇ་མདོག་ཅན་ལྟ་ན་སྡུག་པ་ཅིག་གིས་འཕག་རྩེད་དང་དགའ་གུས་སྣ་ཚོགས་བསྟན་པ་དང་བདག་གིས་བསྟན་བུ་དང་བཟང་སྤྱོད་ཚར་རེ་ཀློག་ཚེ་རི་བོང་དེས་ཆ་ཚང་ཉན་པའི་ཚོར་སྣང་དག་གང་ཤར་དུ་ཨེ་མ་ཧོས་ཀུན་བཟང་ཆོས་གླིང་གི་ཡ་གྱལ་ཨེ་ཝྃ་ཡེ་ཤེས་བླ་མའི་རི་ཁྲོད་ནས་བྲིས་པར་དགེའོ།། །།