བོད་རྒྱའི་གྲོས་གཞི་རང་སྐྱོང་ཡོང་ཐབས་ཀྱི་བསམ་འཆར་ཐོག་རང་འཇགས་གནས་ཡོད།

ཡོང་ཁུངས། བོད་ཀྱི་དུས་བབ།

 
དེ་རིང་སྤྱི་འཐུས་གྲོས་ཚོགས་ནང་སྤྱི་འཐུས་ཁག་ཅིག་དང་སྲིད་སྐྱོང་མཆོག་གི་བར་བོད་རྒྱ་འབྲེལ་མོལ་སྐོར་ལ་འདྲི་བ་དྲིས་ལན་བྱུང་སྐབས། སྲིད་སྐྱོང་མཆོག་གིས་འབྲེལ་མོལ་སྐོར་ལ་ཐབས་ཇུས་དང་འབྲེལ་བའི་ཐོག་ནས་ག་རེ་ཡིན་ན་ཡོང་སྲིད་པ་དང་རྒྱལ་སྤྱིའི་རྒྱབ་སྐྱོར་དེ་གལ་ཆེན་པོ་ཡིན་སྐོར་གསུངས་སོང་།

དེ་རིང་སྐབས་བཅོ་ལྔ་པའི་གྲོས་ཚོགས་ཚོགས་དུས་དགུ་བའི་ཉིན་དྲུག་པའི་སྔ་དྲོར། སྐར་རྟགས་ཅན་གྱི་དྲི་བ་དྲིས་ལན་གནང་སྐབས། སྤྱི་འཐུས་ཨ་ཅཱརྱ་ཡེ་ཤེས་ཕུན་ཚོགས་ལགས་ཀྱིས་སྲིད་སྐྱོང་བློ་བཟང་སེང་གེ་མཆོག་ལ། བཀའ་ཤག་སྐབས་བཅོ་ལྔ་པའི་ལས་ཡུན་གང་འཚམ་སོང་ཟིན་པ་དང་། བོད་ནང་གི་གནས་སྟངས་ཉིན་རེ་བཞིན་ཛ་དྲག་ཆགས་ཡོད་སྟབས། ད་ཆ་བོད་རྒྱ་འབྲེལ་མོལ་གྱི་གནས་སྟངས་གང་འདྲ་ཆགས་ཡོད་པ་དང་། ལྷག་པར་དུ་བོད་རྒྱ་འབྲེལ་མོལ་ཡོང་ཐབས་ཀྱི་ཁོར་ཡུག་གང་ཞིག་བསྐྲུན་ཡོད་པ། རྒྱ་གཞུང་དང་ཐད་ཀར་གྲོས་མོལ་ཡོང་རྒྱུའི་ཐབས་བྱུས་གང་དག་གནང་པ་བཅས་ལ་དྲི་བ་བཏོན་པའི་ལན་དུ་སྲིད་སྐྱོང་མཆོག་གིས། བོད་རྒྱ་འབྲེལ་མོལ་གྱི་ལས་དོན་ཐོག་རང་ཕྱོགས་ནས་འབད་བརྩོན་ཞུ་བཞིན་ཡོད། ཅེས་དྲི་བ་གཞན་དག་ལ་ད་ལྟའི་ཆར་ལན་འདེབས་བདེ་བོ་མེད་སྐོར་གསུངས་སོང་།

ཨ་ཅཱརྱ་ཡེ་ཤེས་ཕུན་ཚོགས་ལགས་ཀྱིས་སླར་ཡང་། དྲི་བ་གཞན་དག་ལ་ལན་རྒྱག་རྒྱུ་བདེ་བོ་མེད་པ་དེ་ཁོར་ཡུག་བསྐྲུན་པ་ཡིན་མིན་དྲིས་པའི་ལན་དུ་སྲིད་སྐྱོང་མཆོག་གིས། བོད་རྒྱ་འབྲེལ་མོལ་དེ་གནད་དོན་གལ་ཆེ་ཤོས་ཤིག་ལ་བརྩི་བཞིན་ཡོད་སྟབས། རྒྱལ་ཁབ་གང་ཞིག་ཡིན་ཡང་གནད་དོན་དེ་རིགས་ཕྱི་གསལ་ནང་གསལ་མ་བྱས་པའི་འོག་ནས་འབད་བརྩོན་ཞུ་བཞིན་ཡོད་པ་རེད། ཕྱི་གསལ་ནང་གསལ་བྱས་ན་ཕན་ལས་གནོད་ཆེ་བ་ཡོང་གི་ཡོད་སྟབས། དྲི་བ་དེ་དག་ལ་ལན་གསལ་བོ་མ་ཞུས་པ་མ་གཏོགས་ཁོར་ཡུག་བསྐྲུན་པ་མིན་ཞེས་གསུངས་སོང་།

སྤྱི་འཐུས་རྒྱ་རི་བུ་ཕྲུག་ལགས་ཀྱིས་བཀའ་ཤག་གིས་རྒྱ་ནག་གཞུང་ལ་འབྲེལ་བ་བྱེད་སྟངས་ཀྱི་ཐབས་ལམ་གཅིག་ཡིན་ནམ། ཡང་ན་ཐབས་ལམ་མང་པོ་བརྒྱུད་ཀྱི་ཡོད། ད་ལྟའི་བཀའ་ཤག་གིས་ཁོར་ཡུག་བསྐྲུན་གྱི་མེད་གསུང་གི་ཡོད་སྟབས། ཐོག་མར་ཁོར་ཡུག་བསྐྲུན་ཟེར་བ་དེ་གང་འདྲ་ཞིག་ལ་ངོས་འཛིན་གནང་གི་ཡོད་ཅེས་དྲིས་པའི་ལན་དུ་སྲིད་སྐྱོང་མཆོག་གིས། ཁོར་ཡུག་བསྐྲུན་ཟེར་བ་དེ་བཀའ་ཤག་སྔོན་མས་བར་ལམ་ཞིག་ལ་ཁོར་ཡུག་བསྐྲུན་པའི་གནས་ཚུལ་ཞིག་ཡོད། སྐབས་དེར་ཁོར་ཡུག་ག་འདྲ་ཞིག་ཡིན་མིན་གསལ་བཤད་གནང་ཡོད་པ་མ་ཟད། དེ་ཕྱིར་འཐེན་ཡང་གནང་ཚར་བ་ཡིན་སྟབས། བཀའ་ཤག་སྔོན་མས་ཐུགས་ཐག་བཅད་པ་དེ་ད་ལྟ་རང་འཇགས་གནས་ཡོད། ཅེས་གསུངས་སོང་།

སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་ཀྱིས་བཀའ་ཤག་སྐབས་སྔོན་མས་རྒྱ་ནག་གཞུང་ལ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་ཞིག་སྤྲད་པ་དེར། རྣམ་པ་འགྱུར་བའི་རང་བཙན་དང་ཕྱེད་རང་བཙན་རེད་ཅེས་སྐབས་དེའི་རྒྱ་ནག་འཐབ་ཕྱོགས་གཅིག་གྱུར་ཁང་གིས་ངོས་ལེན་མེད་པའི་གསལ་བསྒྲགས་བྱས་པ་རེད། འབྲེལ་མོལ་ཆད་དེ་ལོ་ ༥ འགྲོ་བཞིན་ཡོད་སྟབས། ད་ལྟའི་བཀའ་ཤག་གིས་བོད་རྒྱ་འབྲེལ་མོལ་བསྐྱར་དུ་ཡོང་བར་གཞི་རྟེན་དེ། སྔར་ལྟར་བོད་རིགས་ཡོངས་ལ་མིང་དོན་མཚུངས་བའི་རང་སྐྱོང་ཡོང་ཐབས་ཀྱི་བསམ་འཆར་དེ་རང་གི་ཐོག་བསྡད་ཡོད་མེད་བཀའ་འདྲི་ཞུས་པའི་ལན་དུ་སྲིད་སྐྱོང་མཆོག་གིས། གཙོ་བོ་བོད་རྒྱ་གཉིས་བར་ཐད་ཀར་འབྲེལ་བ་གནང་སྟེ་བོད་དོན་སེལ་ཐུབ་ལ་འབད་བརྩོན་གནང་དགོས་པ་ཞིག་ཡིན་ཡང་། ང་ཚོའི་ནུས་པ་སོགས་གང་ཅིའི་ཐོག་ནས་འདང་གི་མེད་སྟབས། རྒྱལ་སྤྱིའི་གནད་ཡོད་མི་སྣ་དང་གཞུང་བརྒྱུད་དེ་རྒྱ་ནག་གཞུང་ལ་དྲན་གསོ་བྱེད་པར་རྒྱལ་སྤྱིའི་རྒྱབ་སྐྱོར་དེ་གལ་ཆེན་པོ་ཡིན་སྟབས། སྲིད་སྐྱོང་གཙོས་པའི་ཕྱག་རོགས་བཀའ་བློན་རྣམ་པ་ཕྱི་རྒྱལ་ལུང་པ་གང་དུ་བཅར་ཡང་། རྒྱ་ནག་གཞུང་གི་སྐུ་ཚབ་ག་འདྲ་ཞིག་དང་མཇལ་ཡང་བོད་པའི་ལངས་ཕྱོགས་གསལ་བོར་ཞུ་རོགས་ཞུ་བཞིན་ཡོད། རྒྱལ་སྤྱིའི་རྒྱབ་སྐྱོར་གལ་ཆེན་པོ་ཞེ་དྲགས་ཆགས་ཡོད་པ་རེད། ཅེས་དང་། ཁོང་གིས་མུ་མཐུད་དུ། བོད་རྒྱ་འབྲེལ་མོལ་ཚོགས་ཆུང་གིས་བཀའ་བསྡུར་རིམ་པ་མང་པོ་གནང་གི་ཡོད་པ་རེད། ཐབས་ཇུས་དང་འབྲེལ་བའི་ཐོག་ནས་ག་རེ་ཡིན་ནའང་ཡོང་སྲིད་པ་ཞིག་རེད། བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་ཡིག་ཆ་དང་ལངས་ཕྱོགས་སོགས་གང་ཅིའི་ཐད་ནས་དེ་སྔ་བཀའ་ཤག་གིས་ག་རེ་ཕུལ་བཞག་པ་དེའི་ཐོག་རང་འཇགས་གནས་བསྡད་ཡོད། ཅེས་གསུངས་སོང་།

སྤྱི་འཐུས་ཟླ་བ་ཕུན་སྐྱིད་ལགས་ཀྱིས། ང་ཚོའི་སྤྱི་ཚོགས་ནང་དང་གསར་འགྱུར་བརྒྱུད་ལམ་ཁག་ཏུ་རྒྱ་ནག་ལ་ཉམས་ཞིབ་གནང་མཁན་མང་པོ་ཞིག་གིས་རྒྱ་ནག་གི་མགོ་ཁྲིད་ཁག་གི་རྒྱབ་ལྗོངས་འདི་རེད། འདི་དང་༧རྒྱལ་བ་རིན་པོ་ཆེའི་ཐུགས་ཉེ་བོ་ཡོད་པ་རེད། འདིའི་ཕ་མ་འདི་རེད། འདིའི་སྤུན་ཉེ་འདི་རེད་ཟེར་བ་སོགས་མང་པོ་ཞིག་ཤོད་བཞིན་ཡོད་པ་དེས། རྒྱ་ནག་མི་མང་དང་མགོ་ཁྲིད་གཞན་དག་ཚོས། ཁོ་དང་བོད་པའི་བར་འབྲེལ་བ་ཆེན་པོ་ཞིག་འདུག་བསམ་སྟེ། ངས་འདི་བྱས་ན་ང་ལ་སྐྱོན་ཆ་གང་ཞིག་རག་མི་ཡོང་ངམ་བསམ་སྟེ། བོད་དོན་ཐོག་ལས་ཀ་ཞིག་བྱེད་རྒྱུར་འགོག་རྐྱེན་འཕྲད་ཀྱི་ཡོད་མེད་ཐོག་བཀའ་ཤག་ལ་ཐུགས་སྣང་ཡོད་དམ་ཞེས་དྲི་བ་བཏོན་པའི་ལན་དུ་སྲིད་སྐྱོང་མཆོག་གིས། རྒྱ་ནག་གི་མགོ་ཁྲིད་སྒེར་གྱི་ཡབ་དང་ནང་མི་བོད་དང་ནང་པ་སངས་རྒྱས་པའི་ཆོས་དང་འབྲེལ་བ་ཡོད་པའི་གནས་ཚུལ་གསར་ལམ་ཁག་ཁག་ཏུ་ཐོན་ཡོད་པ་རེད། དེ་ལ་བསྟན་ཏེ་རང་བཞིན་གྱིས་འཛིན་སྐྱོང་ལ་འགན་ཞིག་དང་དྲི་བ་ཞིག་སླེབ་ཡོང་གི་ཡོད་པ་རེད། གསར་འགྱུར་བརྒྱུད་ལམ་ཁག་ཏུ་འདི་འདྲ་བཀོད་འདུག དེ་ལ་བརྟེན་ཏེ་ཁྱོད་རང་ཚོས་རེ་བ་ཆེན་པོ་བྱེད་ཀྱིན་ཡོད་དམ་ཞེས་དྲི་བ་མང་པོ་ཞིག་ཡོང་སྐབས། དེ་ལ་ལན་མི་རྒྱག་ཟེར་ས་ཡོད་པ་མ་རེད། དེ་འདྲ་ཞིག་ཡོད་པ་རེད། ཡིན་ནའང་ཁོ་རང་སྒེར་དང་ནང་མིའི་གནས་ཚུལ་འདི་རེད། ཁོ་རང་རྒྱ་ནག་གི་མགོ་ཁྲིད་ཡིན་པའི་གནད་དོན་འདི་རེད་ཅེས་ཞུ་བཞིན་ཡོད། ད་ལྟའི་བོད་ནང་གི་གནས་སྟངས་དང་། རྒྱ་ནག་གཞུང་གི་སྲིད་བྱུས་དང་ཐབས་ཇུས་ལག་བསྟར་ལ་བལྟས་ཡོང་ན་འགྱུར་བ་གང་ཡང་མི་འདུག ཅེས་ཞུ་བཞིན་ཡོད། དེ་ལ་བརྟེན་ཏེ་དོ་ཕོག་ཕྱིན་པའི་གནད་དོན་དེ་འདྲ་ད་སྔ་ཤེས་མ་སོང་། ཞེས་སོགས་གསུངས་སོང་།

སྤྱི་འཐུས་དབུ་དཀར་ཚང་གཡུ་སྒྲོན་ལགས་ཀྱིས། ང་ཚོའི་ངོས་ནས་བོད་རྒྱ་འབྲེལ་མོལ་ཆེད་སྐུ་ཚབ་ག་དུས་གཏོང་དགོས་ནའང་གཏོང་ཆོག་ཆོག་ཡིན་གསུང་གི་ཡོད་ཀྱང་རྒྱ་ནག་ཕྱོགས་ནས་ཡ་ལན་མེད་སྟབས། ང་ཚོའི་ངོས་ནས་དམིགས་བསལ་སྐུ་ཚབ་མ་ཡིན་པར་སྐུ་ཚབ་གཞན་པ་གཏོང་བའི་རེ་བ་དང་འཆར་གཞི་སྒྲིག་གི་ཡོད་མེད་དང་། ཐུག་འཕྲད་དེའང་འཐབ་ཕྱོགས་གཅིག་གྱུར་ཁང་མ་ཡིན་པའི་རྒྱ་ནག་གཞུང་གི་ལྷན་ཁང་གཞན་པར་ཐུག་འཕྲད་གནང་བའི་རེ་བ་དང་འཆར་གཞི་ཡོད་མེད་དྲིས་པའི་ལན་དུ་སྲིད་སྐྱོང་མཆོག་གིས། སྤྱིར་བཏང་ཞི་བའི་ལམ་གྱི་ཐོག་ནས་རྩ་དོན་བརྩད་དེ་འགྲུབ་མཁན་མང་པོ་ཞེ་དྲགས་ཡོད་པ་རེད། དཔེར་ན་རྒྱ་གར་ལ་ཆ་བཞག་ན་གྷན་དྷི་ཡིན་ནའང་ལས་འགུལ་མང་པོ་སྤེལ་ཏེ་དབྱིན་གཞུང་དང་བཀའ་མོལ་གནང་བ་རེད། དེ་བཞིན་ནལ་སིན་མན་ཌ་ལ་ཡིན་ནའང་ལས་འགུལ་མང་པོ་སྤེལ་ཏེ་ཁ་གཏད་ཚོགས་པ་དང་མཉམ་དུ་གཞུང་འཛིན་པར་བཀའ་མོལ་གནང་ནས་གྲུབ་པ་ཞིག་རེད། ངས་ཁ་སང་ཞུས་པ་ལྟར་གནང་སྟངས་མ་འདྲ་བ་མང་པོ་ཡོད་སྟབས། ང་ཚོས་ཀྱང་ལས་འགུལ་མང་པོ་སྤེལ་དགོས་པ་རེད་ཞུ་དོན་དེ་ཡིན། རྒྱལ་སྤྱིའི་འགྲོ་སྟངས་འགྲོ་ལུགས་ནང་བརྒྱུད་ལམ་གཞན་དག་བེད་སྤྱོད་གཏོང་བ་དེ་སྤྱི་ཡོངས་ཀྱི་འགྲོ་སྟངས་ཤིག་ཡིན་སྟབས། ང་ཚོས་གནང་གི་ཡོད་དང་མེད་ཐད་ཀར་ཞུ་མ་དགོས་པའི་ཐོག་ནས་ང་ཚོས་དུས་རྟག་ཏུ་འབད་བརྩོན་བྱས་ཏེ། རྒྱལ་སྤྱིའི་ཐོག་ནས་ག་འདྲ་གནང་གི་འདུག འགྲུབ་སོང་བ་ཚོས་ག་འདྲ་གནང་གི་འདུག དེ་འདྲ་ང་ཚོས་གནང་ཐབས་བྱེད་ཀྱིན་ཡོད། ཅེས་གསུངས་སོང་།

གསར་འགོད་པ། པདྨ་མཚོ།