རང་ལ་ཡོད་རུང་། རང་གིས་མ་ཚོར།

བཀྲ་ལྷ་ཉི་མ་རྡོ་རྗེ་།

 ༣/༠༧/༢༠༡༣ཉེ་དུས་ང་རང་ཡིག་རྒྱུགས་གལ་ཆེ་ཤིག་གི་ནང་གྲུབ་འབྲས་ཡག་པོ་མ་སོན་པའི་དབང་གིས་ཉིན་ཤས་རིང་སེམས་པ་མ་སྐྱིད་པ་དང་ཟས་པའི་ལྟོ་ལ་ཡང་བྲོ་བ་ཡང་མེད་པར་རྒྱུར། དུས་རྒྱུན་ང་རང་མི་སྣ་འདྲ་མིན་ཁག་དང་ཐུགས་ཕྲད་བྱེད་རྒྱུར་དགའ་མོས་ཆེན་པོ་ཡོད། ཡིན་ཡང་། སྐབས་དེར། ངས་ཉིན་ཤས་རིང་ལས་ཁུངས་ནས་ནད་དགོངས་ཞུས་རྗེས་རང་ཉིད་བཟང་བཙོན་ནང་བཅུག་པ་ལྟར་། ཉིན་ལྟར་རང་གི་ལས་ཤག་ཁང་ཆུང་འདོམ་གང་གྲུ་བཞི་དེའི་ནང་འཛུལ་ནས་བསྡད། དུས་ཡུན་དེ་དག་གི་རིང་ངས་བློ་ཡི་སྒོ་མོ་ཡངས་པོར་ཕྱེ་ནས་གནད་དོན་འདྲ་མིན་ཞིག་གི་ཐོག་བསམ་བློ་ཇེ་མང་ཞིག་བཏང་རུང་དོན་ལ་སྨིན་པའི་བློ་ཁ་ཅི་ཡང་མ་འཁོར།     ཕྱི་དྲོ་ཞིག་ང་རང་ཁྱེར་རྐྱང་དུ་གཙང་འགྲམ་ལ་འཆམ་འཆམ་དུ་བསྐྱོད། ཚུར་ལོག་འོང་བའི་ལམ་བར་ང་རང་ཤིང་ཏོག་ཟ་འདོད་བྱུང་སྟབས་ངས་ལམ་ཟུར་དུ་ཐེར་ཆུང་ནང་ཤིག་ཏོག་ཚོང་མཁན་གི་སར་བསྐྱོད་ནས་ཤིང་ཏོག་ཉོ་བར་ཕྱིན་། ང་རང་ཤིང་ཏོག་གང་ཞིག་ཟ་དགོས་མིན་ཆ་མ་འཚལ་བའི་སྐབས། ངས་ཤིང་ཏོག་ཚོང་མཁན་དེ་ནར་མ་སོན་པའི་བྱིས་པ་ཞིག་ཡིན་པ་ཤེས། ཁོས་ལག་ཏུ་ཚགས་ཤོག་རྙིང་ཧྲུལ་ཞིག་བཟུང་ནས་བློ་ནུས་གང་ཡོད་ཀྱི་ཚགས་ཤོག་དེ་ཀློག་ཨེ་ཐུབ་ལྟ་བཞིན་འདུག་པ་ངས་མཐོང། ངས་ཁོ་པར་ “ཁྱེད་རང་ག་རེ་བྱེད་ཀྱི་ཡོད་” ཅེས་དྲིས་པར་ཁོས་ “ང་རང་ཀློག་རྩལ་ནུས་པ་ཡར་རྒྱས་གཏོང་གི་ཡོད་”ཅེས་བཤད་བྱུང་། ཁོས་བརྗོད་དོན་ཁོ་རང་འཛིན་རིམ་གསུམ་པ་བར་སློབ་གྲྭར་འགྲོ་རྒྱུའི་གོ་སྐབས་ཐོབ་རུང། ཁྱིམ་ཚང་ལ་དཔལ་འབྱོར་གྱི་དཀའ་ངལ་ཆེན་པོ་ཕྲད་སྟབས་སློབ་གྲྭ་ནས་ཕྱིར་འཐེན་མ་བྱེད་དཀའ་མེད་ཐུགས་། ད་ཆ་ཁོས་ཉིན་མོར་ལམ་འགྲམ་དུ་ཤིང་ཏོག་ཚོང་ནས་ནང་ལ་ཡོང་འབབ་བསགས་པ་དང་། མཚན་མོར་ཀློག་རྩལ་ནུས་པ་ཡར་རྒྱས་གཏོང་གི་ཡོད།འོན་ཀྱང་ཁོ་པའི་ནང་གི་དཔལ་འབྱོར་གྱི་གནས་སྟངས་གཞན་པའི་དབང་གི་ཁོ་པའི་ཤེས་ཚད་དང་སྙོམས་པའི་ཀློག་དེབ་རྣམས་ཉོ་ཐུབ་ཀྱི་མེད་པ་རེད། དེར་རྟེན་། ཁོས་རང་གི་ལག་ཏུ་ཀློག་རུང་བའི་ཡིག་རིགས་ཅི་དང་གང་ཞིག་ཐེབས་རུང་ཐེ་ཚོམས་མེད་པར་ཀློག་རྐྱང་བྱེད་ཀྱི་ཡོད་པ་རེད།”ཁྱིམ་དུ་ཁྱེད་རང་ལ་སློབ་སྦྱོང་ཐད་རོགས་རམ་བྱེད་མཁན་སུ་ཡོད་དམ།“ཅེས་དྲིས་པར་ཁོས་”ང་ཚོའི་གྲོང་པའི་བུ་འཛིན་རིམ་ལྔ་པར་སླེབས་པ་དེས་ང་ལ་རོགས་རམ་བྱེད་ཀྱི་རེད། ཁོང་ཡང་མཚན་ལ་སློབ་སྦྱོང་བྱེད་ཀྱི་རེད་”ཅེས་བཤད། ཤིང་ཏོག་ཚོང་མཁན་གྲོགས་པོ་ཆུང་ཆུང་དེས་ཤེས་བྱའི་གནས་ཆེ་ཆུང་གང་འདྲ་ཞིག་ཡིན་རུང་ཤེས་རྒྱུར་འབད་བརྩོན་བྱེད་ཀྱི་ཡོད་པ་ངས་དོ་སྣང་བྱུང་། ང་རང་ལ་དགོས་པའི་ཤིང་ཏོག་དེ་རྒྱ་མར་བཏེགས་རྗེས་ངས་ཁོ་པར་ཁྱོན་བསྡོམས་རིན་གོང་ག་ཚོད་གནས་སོང་ཞེས་དྲིས་པར། ཁོས་ཇི་མི་སྙམ་པའི་གོ་ནས་ཁྱོན་བསྡོམས་རིན་གོང་སྒོར་ ༡༩༧ ཐོབ་ཀྱི་འདུག་ཅེས་ལན་བཏབ། ངས་ཁོས་ལབ་པ་དེ་ཏག་ཏག་ཨེ་ཡིན་སྙམ་ནས། ལྐོག་ཏུ་ཀླད་པའི་ནང་མཚུངས་བསྡུར་གྱི་ཁོག་རྩིས་ཤིག་རྒྱབ་རྗེས་ཁོས་གང་ལབ་པ་དེར་ནོར་འཁྲུལ་སྤུ་ཙམ་མེད་པ་ཤེས། དེ་ནས་ངས་གྲོགས་པོ་ཆུང་ཆུང་དེར་ཁྱེད་ཀྱི་དེ་མིན་ཨང་རྩིས་ཐད་གང་ཤེས་ཀྱི་ཡོད་ཅེས་དྲིས་པར་། ཁོས་རང་གི་འཐེན་རྩིས་ཀྱི་ནུས་རྩལ་དེ་ང་ལ་ལག་ལེན་དངོས་ཀྱི་ཐོག་ནས་བཏོན། ངས་ཤིང་ཏོག་གི་རིན་པར་ཁོ་ལ་སྒོར་ ༥༠༠ སྤྲས་སྐབས་ཁོས་”སྐུ་ཞབས་དེ་ཁྱེད་ཀྱི་ཕྱག་དངུལ་ལྷག་མ་དེ་རེད་རྩིས་བཞེད་གནང་རོགས། ཚང་ཡོད་མེད་གཟིགས་ཙམ་གནང་དང་།”ཅེས་ངའི་ལག་ནང་སྒོར་ ༣༠༣ ཏག་ཏག་སློག ངའི་སེམས་ནང་བརྗོད་མ་ཤེས་པའི་ཚོར་བ་བདེ་པོ་ཞིག་དང་བཅས་ང་རང་ས་ཆ་དེ་ནས་ཁ་བྲལ།

གྲོགས་པོ་ཆུང་ཆུང་དེ་དང་ཐུགས་ཕྲད་བྱུང་བའི་རྗེས་ངའི་སེམས་ནང་ང་རང་གི་མི་ཚེའི་ནང་གང་ཡོད་པ་དེར་བློ་ཡིད་འཚེམ་པའི་ཚོར་བ་ཤུགས་ཆེན་ཞིག་ངམ་ངམ་ཤུག་ཤུག་གི་སླེབས་སོང། ཆུ་ཚོད་འགའ་ཤས་སྔོན་ང་རང་ཡིག་རྒྱུགས་ཀྱི་གྲུབ་འབྲས་ཡག་པོ་མ་བྱུང་བའི་དབང་གིས་སེམས་སྡུག་གི་མནར་བའི་མི་ཞིག་ཡིན་རུང། ཧུར་བརྩོན་ཅན་གྱི་གྲོགས་པོ་ཆུང་ཆུང་དེ་དང་ཕྲད་རྗེས་ངས་རང་ཉིད་ཀྱི་མི་ཚེའི་ནང་གང་ཚང་གི་མེད་པ་ལས་ལྡོག་སྟེ་གོ་སྐབས་དང་ཆ་རྐྱེན་ག་ཚོད་ལྡན་ཡོད་པ་དེ་ངོས་འཛིན་བྱུང་སོང། ང་རང་ཡིག་རྒྱུགས་ཀྱི་གྲུབ་འབྲས་ལ་བློ་ཡིད་མ་ཚེམས་པར་སེམས་སྡུག་གི་མནར་བཞིན་པའི་སྐབས་དེར་གྲོགས་པོ་ཆུང་ཆུང་དེ་ཚགས་པར་རྙིང་ཧྲུལ་ཀློག་ནས་རྒྱལ་ཁའི་ཚོར་བ་བདེ་པོ་ཞིག་མྱོངས་བཞིན་ཡོད་པ་རེད།སྐབས་དེར་ངའི་སེམས་ནང་། ང་རང་ལ་སློབ་སྦྱོང་གི་གོ་སྐབས་བཟང་པོ་དེ་འདྲ་ཞིག་ཐོབ་པ་ནི་དངོས་གནས་བསོད་ནམས་ཆེན་པོ་རེད་ཨང་སྙམ་བྱུང། གོ་སྐབས་དེ་ལ་བརྟེན་ནས་ངས་ད་ཆ་རང་གི་སེམས་ནང་གི་ཚོར་བ་བདེ་སྡུག་གང་ཡིན་པ་རྣམས་ཡིག་རྨོངས་དུ་ལུས་པའི་སྐྱེ་བོ་ཁྲི་འབུམ་མང་པོ་ལས་ལྡབ་བརྒྱ་ཕྲག་མང་པོས་གསལ་བར་འགྲེལ་བརྗོད་ཐུབ་ཀྱི་ཡོད། ང་རང་ལ་མཚོན་ན་ཆ་རྐྱེེན་དང་གོ་སྐབས་དེ་དག་འབད་མེད་ལྷུན་གྲུབ་ངང་ཐོབ་ཀྱི་ཡོད་རུང་གྲོགས་པོ་ཆུང་ཆུང་དེར་མཚོན་ན་འགན་འཁྲི་དང་འདེམས་ཀའི་དབར་ལ་རྒྱུན་དུ་འཐབ་རྩོད་བྱེད་དགོས་ཀྱི་ཡོད་པ་རེད།