རྨིག་སྒྲ
སྤྱི་ལོ་ ༢༠༠༨ ལོར་མུན་ནག་གི་ལོ་ངོ་ལྔ་བཅུའི་ནང་། དགྱ་ནག་དམར་པོས་་བོད་ཀྱི་དངོས་ཡོད་ཀྱི་གནད་སྟངས་དང་། མི་འཚམས་པར་སྔར་གྱི་སྲོལ་རྒྱུན་ལས་འདས་ཏེ་མུ་མཐའ་མེད་པའི་སྤང་ལྗོངས་ལ་ལྕགས་ཀྱི་རྭ་བ་བསྐོར་ནས་རང་རིགས་སྤུན་ཟླ་ཕན་ཚུན་འཁྲུག་རྩོད་སློང་བ། གདོད་མའི་ཤིང་ནགས་ཚད་མེད་གཅོད་པ། རྡུལ་ཕྲན་མཚོན་ཆའི་དུག་རྫས་སོགས་ཀྱིས་ཁོར་ཡུག་སྦགས་བཙོག་བཟོ་བ། དུས་རབས་ཉི་ཉེར་གཅིག་ནང་ད་དུང་གྲོང་གསེབ་ཀྱི་ནང་ལ་ཤེས་ཡོན་དང་འཕྲོད་བསྟེན་སྔར་བཞིན་ཉམ་ཐག་པར་གནས་པ། མི་འབོར་སྤོ་ཤུགས་ཀྱིས་ས་སྐྱེས་རྡོ་སྐྱེས་ཀྱི་བོད་མི་གྲངས་ཉུང་མི་རིགས་བཟོ་བ། རྒྱ་ཆེའི་ཞིང་འབྲོག་མི་མང་ལ་འབྲུ་ཁྲལ་དང་མར་ཁྲལ་སོགས་བཙན་གཤེད་ཆེན་པོས་བསྡུ་ལེན་བྱས་པ། ཤེས་འཇོན་གཉིས་ལྡན་གྱི་བོད་ཞེན་ཅན་རྣམས་འབུར་འཇོམས་གཏོང་བ། བརྡ་སྤྲོད་ཀྱི་ནུས་པ་དང་། གཅིག་གྱུར་གྱི་རང་བཞིན། གོ་བདེ་དོན་ཟབ་ཀྱི་ལེགས་ཆ་དང་བཅས་གང་ཐད་ནས་མི་དམན་པའི་བོད་ཡིག་དེ་རྩ་མེད་བཟོ་ཐབས་བྱས་པ། བོད་མིར་མི་རྒྱུ་ཟོག་གསུམ་གྱི་གནོན་ཤུགས་མུ་མཐུད་སྤྲད་དེ་ ཆབ་སྲིད་ཀྱི་བཙོན་ཟུར་རྣམས་སྤྱི་ཚོགས་སྟེང་གྲོགས་མེད་ཁེར་རྐྱང་དུ་འཇོག་ཐབས་བྱས་པ། བོད་མི་རིགས་མི་རིགས་རིང་ལུགས་ཀྱི་བསམ་བློའི་གདུག་རྩུབ་འོག རྩ་མེད་བཟོ་རྒྱུའི་སྲིད་ཇུས་ངན་པ་རབ་དང་རིམ་པ་བཏིང་བ། བོད་མིའི་ཁོག་པའི་སྙིང་དང་དཔྲལ་བའི་མིག་སྤྱི་ནོར་༸གོང་ས༸སྐྱབས་མགོན་པོར་སྒྲོ་སྐུར་སྣ་ཚོགས་དང་། ༸ཀུན་གཟིགས་༸པཎ་ཆེན་མཆོག་སྤྲུལ་རིན་པོ་ཆེ་བཙོན་དུ་བཅུག་པ་མ་ཟད་བོད་ཡུལ་ཆོས་ལྡན་ཞིང་ཁམས་དེ། དེ་སྔ་ཆེས་ྐླ་ྐློ། ཆེས་གདུག་རྩུབ། ཆེས་མུན་ནག་དང། ད་ཆ་གུང་ཁྲན་ཏང་གིས་བཅིངས་གྲོལ་བཏང་སྟེ་འགྱུར་ལྡོག་གསར་པ། རྣམ་པ་གསར་པ། འཚོ་བ་གསར་པ། རྒྱ་ཆེའི་ཞིང་བྲན་ཁྲི་ཚོ་མང་པོར་བདེ་སྐྱིད་བསྐྲུན་ཡོད་ཅེས། ལོ་རྒྱུས་ལ་འཁྱོག་བཤད་བྱས་ཏེ་གངས་ཅན་ཞིང་དེ་དགྱ་དམར་གྱི་ཁ་བྲལ་ཐབས་མེད་པའི་ཆ་ཤས་ཡིན་པའི་ལོག་གཏམ་རི་བོ་ཙམ་སྤེལ་བས། ཕ་རུས་དཀར་པོ་སྙིང་ལ་བཅངས་ཏེ་རིགས་ཞེན་ལང་ཚོ་རྒྱས་པའི་ཆོལ་གསུམ་གྱི་གངས་ཕྲུག་ཚོས་དགྱ་དམར་ྐླ་ྐློའི་འཁྱོག་བརྗོད་དང་རྫུན་བཟོའི་གཉན་འབུར་དེ་དག་ལ་ཚད་མེད་ཞི་བའི་དྲང་བདེན་གྱི་སྤུ་གྲི་བཙུགས་ཏེ་གཏོལ་བས། ཤ་ཁྲག་རུས་གསུམ་ལ་རྔམ་པའི་གུང་ཁྲན་ཏང་གིས་ཤན་པ་ལག་དམར་བས། ལག་ཏུ་མཚོན་ཆ་ཁབ་ཙམ་ཡང་ཐོགས་མེད་པའི་ཞི་བའི་ངོ་རྒོལ་བའི་སྟེང་བྱ་རྒོད་ཤ་ལ་ཆགས་པ་ཇི་བཞིན་མཆོངས་ནས་སྤུན་ཟླ་རྒྱ་ཕྲག་ཁ་ཤས་དེང་དུས་མཚོན་ཆས་དམར་གསོད། སྟོང་ཕྲག་འགའ་ཤས་རྨས་སྐྱོན། དེ་ལས་མང་བ་དྲག་གནོན་དང་བཙན་ཤེད་ཀྱི་མུན་པའི་བཙོན་ཁང་དུ་བཅུག དྲག་སྤྱོད་དང་བཙན་གནོན་ལ་གོམས་པའི་ྐླ་ྐློའི་དམག་དཔུང་གིས་། ཞི་བའི་མི་སེར་རྣམས་ལ་མུ་མཐུད་དེ་དེང་དུས་ཀྱི་མེ་མདའ་དང་འབར་རྫས་བེད་སྤྱོད་གཏོང་བ། དུག་རླངས་གཏོར་བ། ལྐོག་གསོད་གཏོང་བ། གསོན་པོར་མེར་སྲེག་གཏོང་བ། རྐང་ལག་གཅོག་པ། ཐེམ་རེ་མི་རེའི་མདུན་ལ་དམག་དཔུང་གིས་བཙན་ཤེད་ཆེན་པོས་བཀག་ནས། ནང་དུ་ལྟོགས་ཤི་ཐེབས་སུ་བཅུག་པ་སོགས་རིག་འཚོ་ཟིན་པ་སུ་ཞིག་གིས་ཀྱང་། ཐོས་པ་ཙམ་གྱིས་ལུས་ཀྱི་བ་སྤུ་འདར་དགོས་པའི་གནས་ཚུལ་བྱུང་ཡོད། དུས་རབས་ཉེར་གཅིག་གི་ནང་མཐོ་སྒང་ཁ་བའི་ཞིང་འདི་གཡུལ་ས་ལྟ་བུ་གང་སར་མི་རོ་དང་ཁྲག་རལ་གྱིས་ཁེངས་པའི་འཛམ་གླིང་གི་ཡ་ང་བའི་བཙོན་ཁང་ཆེ་ཤོས་ཤིག་ཏུ་གྱུར་ཡོད། ཡིནའང་གཞིས་བཞུགས་སྤུན་ཟླ་ཚོས་དགྱ་དམར་ྐླ་ྐློའི་དྲག་གནོན་དང་། བཙན་ཤེད་ཀྱི་སྟོབས་ཤུགས་ཇི་ལྟར་ཆེ་ཡང་ནམ་ཡང་འཇིགས་ཞུམ་མེད་པའི་ལས་འགུལ་རབ་དང་། རིམ་པ་སྤེལ་བ་དེ་ནི་བཙན་བྱོལ་དུ་ཡོད་པའི་ཚོགས་པ་དག་གི་འཚོ་རྟེན་ངོ་མ་དེ་ཡིན། ན་ནིང་ཟླ་བ་ ༡༠ ཚེས་༢༠ ཉིན། གདུག་རྩུབ་ཀྱི་ཁྲག་རལ་འགོས་པའི་འདྲེ་ལག་རྫོར་པོ་དེས་བདེན་པའི་འཐབ་རྩོད་ཀྱི་ཞི་བའི་ལས་འགུལ་བ། རང་རིགས་སྤུན་ཟླ་གཉིས་ལ་ཞི་བདེ་དང་དྲང་བདེན་གྱིས་དབུལ་ཞིང་། གཉའ་གནོན་དང་མནར་གཅོད་ཀྱི་འབྱོར་བ་བརྟས་པའི། དྲང་བདེན་མིན་པའི་ཁྲིམས་འོག་ནས་དམར་གསོད་བཏང་ཡོད། ཚེས་ཉེར་གཉིས་ཉིན་གཞུང་འབྲེལ་མིན་པའི་ཚོགས་པ་དག་གིས་ ཿགྱང་ན་ནིངས་ལོག ཐལ་འཚུབ་ད་ལོ་བརྒྱབ་ཅེས་པའི་དཔེ་བཞིན་དཔའ་བོ་དེ་དག་སྲོག་ཐོག་བཏང་ཚར་བའི་རྗེས། སྲོལ་རྒྱུན་ལྟ་བུའི་མར་མེའི་ཁྲོམ་སྐོར་ཞིག་གནང་སོང་། དགྱ་དམར་ཤན་པས་བོད་ཀྱི་བདེན་པའི་འཐབ་རྩོད་ཀྱི་ཞི་རྒོལ་བ་རང་ལོ་ཉི་ཤུ་རྩ་ལྔར་གསོན་པ། ལོ་ཡག་ལགས་ལ་དགྱ་མིའི་སྦག་སྦག་བཟོ་བཅོས་རྒྱག་ས་ཞིག་ལ་མེ་བརྒྱབས་ཏེ་དགྱ་མི་འགའ་བསད་པའི་ཉེས་མིང་དང་། རང་ལོ་ཉི་ཤུ་རྩ་བདུན་ལ་གསོན་པ། བློ་བཟང་རྒྱལ་མཚན་ལགས་ལ་ཡང་ཚོང་ཁང་ཞིག་མེར་བསྲེགས་ཏེ་དགྱ་མི་འགའ་བསད་པའི་ཉེས་མིང་སྣ་ཚོགས་བཏགས་ཏེ་སྲོག་ཐོག་བཏང་ནས་ཉིན་གསུམ་ལས་མ་ཕྱིན་ཡང་། ཚེས་ ༢༣ ཉིན་རྡ་སྟེང་བོད་ཕྲུག་ཁྱིམ་སྡེ་དབུ་བརྙེས་པའི་དུས་དྲན་ཙམ་མ་ཡིན་པར་དེ་ཉིན། གླུ་གར་ཞབས་གཞས་ཀྱི་དགའ་སྟོན་གྲ་རྒྱས་པོ་ཞིག་བཤམས་སོང་། ངོ་མ་བོད་ཕྲུག་ཁྱིམ་སྡེའི་རྒན་འཛིན་དང་ལས་བྱེད་རྣམ་པ། སྐུ་མགྲོན་ཆོས་རིག་གི་བཀའ་བློན། སྤྱི་འཐུས་ཚོགས་གཞོན་གྱི་གཙོས་སྐུ་མགྲོན་རྣམ་པ། ལོ་གསར་ལྟ་བུའི་ཟབ་འཆོར་སྤྲས་པའི་རྡ་ས་ཁུལ་གྱི་ལྟད་མོ་བ་ཚོར། གཞིས་བཞུགས་ཀྱི་བོད་མི་རང་གི་སྤུན་ཟླ་ཡིན་པའི་འདུ་ཤེས་འདུག་གམ། ཁྱེད་ཚོའི་གཉེན་ཉེ་ཞིག་རང་བཞིན་གྱིས་འདས་གྲོངས་སུ་ཕྱིན་པ་ཡིན་ན་ཐུགས་སེམས་སྤྲོ་བོའི་ངང་བློ་བདེ་བག་ཕེབས་ཀྱིས་དེ་ལྟར་ལྟ་ཕོད་དམ། ’’གྲོང་པའི་བ་ཤི་ན་ཡང་མྱ་ངན་ཞག་གསུམ་’’ཞེས་པ་ལྟར་བོད་ལ་གྲོང་ཚོ་ཞིག་གི་ནང་བོད་ཟླ་དགུ་པ། བཅུ་པ་གང་རུང་ཞིག་གི་ནང་མི་ཞིག་རང་བཞིན་གྱིས་འདས་གྲོངས་སུ་ཕྱིན་པ་ཡིན་ན་ལོ་འདིར་ལོ་གསར་གྱི་དུས་ཆེན་རིང་ལ་དགའ་སྤྲོའི་རྒྱན་རྩེད་ལྟ་ཅི། ཐ་ན་སྲོལ་རྒྱུན་གྱི་ཞབས་གཞས་ཀྱང་རྩ་བ་ནས་འཁྲབ་ཀྱིན་མེད། ཡིན་ནའང་རྡ་སའི་ཁུལ་དེར་དེ་ལས་ལྡོག་སྟེ་ཡ་ང་ཞིང་ཡིད་སྐྱོ་དགོས་པ་ཞིག་ལ། སྤྱི་ཟླ་ ༡༠ ་ཚེས་ ༢༣དང་༢༥ གཉིས་ཀྱི་དགོང་དྲོ་(ཅའ་འདི་ཀ)མཐོ་སློབ་དང་། ཚེས་༢༤ དགོང་དྲོ་གངས་ཅན་ཆོལ་གསུམ་གླུ་གར་ཚོགས་པ་ཟེར་བ་སོགས་ཀྱིས། མུ་མཐུད་ནས་གཞིས་བཞུགས་ཀྱི་དཔའ་བོ་ཚོའི་སྐུ་སྲོག་རིན་ཐང་མི་མངོན་པར། ཤན་པ་དགྱ་དམར་གྱི་གདུག་རྩུབ་བྱ་སྤྱོད་ལ་རྒྱབ་སྐྱོར་ལྟར་བོད་གཞས་དང་། རྒྱ་གར་གྱི་གཞས། དབྱིན་ཇིའི་སོགས་ཀྱི་གཞས་སྣའི་དགའ་སྟོན་གྲ་རྒྱས་པོ་བཤམས་སོང་། ཕྲན་གྱིས་ཚེས་ ༢༣ ཉིན་གཞུང་འབྲེལ་མ་ཡིན་པའི་ཚོགས་པ་ཁ་ཤས་ཀྱི་ས་གནས་ཚོགས་གཙོར་དོ་དགོང་གི་གཞས་སྣ་འཁྲབ་སྟོན་དེ་འགོག་ཐུབ་ན་ཡག་པོ་འདུག ཞིང་གཤེགས་དཔའ་བོ་དག་གི་ནང་མི་སྤུན་མཆེད་སོགས་ཀྱིས་ཧ་གོ་ན། ཁོང་ཚོ་སེམས་ཤུགས་ཆགས་ཀྱི་རེད་དེ་ལྟར་བྱུང་ན་ཡག་པོ་ཡོད་མ་རེད་ཅེས་ཞུས་པས་’’རྒྱུ་མཚན་ཕ་བསད་བུ་ལ་ཡང་ཡོད་’’ཅེས་པའི་དཔེ་ལྟར་ཁོ་བས། ཁོང་ཚོར་ལས་འགུལ་སྤེལ་དུས་དངུལ་དགོས་ཀྱི་ཡོད་རེད། དངུལ་མེད་ན་ལས་འགུལ་སྤེལ་རྒྱུ་ཁག་པོ་རེད་ཅེས་རྒྱབ་སྐྱོར་ལྟ་བུས་བརྗོད་བྱུང་། དེ་ནི་བསམ་བློ་རྣལ་མ་ཞིག་བཏབ་པ་མ་ཡིན་པར་གཞན་གྱི་ཁ་འགོག་ཆེད་ཀྱི་ལན་ཁོ་ནར་ཟད་དོ། གཞིས་བཞུགས་གཉིས་ཀྱི་ལས་འགུལ་གྱི་ནུས་པ་ནི་ཉིན་མོའི་མར་མེ་དང་མུན་དོང་གི་མར་མེ་ལྟ་བུའི་ཁྱད་པར་ཡོད། བཙན་བྱོལ་ནང་ལས་འགུལ་ཉིན་ནས་ཉིན་མཐུད་དེ། ཇི་ཙམ་སྤེལ་ཀྱང་ཉིན་མོའི་མར་མེ་ལྟར་ནུས་པ་དེ་ཙམ་ཐོན་མི་ཐུབ་པ་མ་ཟད་རྒྱལ་སྤྱིའི་དྲང་བདེན་དང་། རང་དབང་ལྡན་པའི་ཚོགས་སྡེ་དག་གི་འདེང་འཇོག་དེ་ཙམ་བྱེད་ཀྱི་མེད། ཡིན་ནའང་བོད་ནང་ལ་ཞི་རྒོལ་ཕྲན་བུ་ཞིག་བྱུང་བ་ཡིན་ནའང་དྲང་བདེན་ལ་དགའ་བའི་རྒྱལ་སྤྱིའི་མི་མང་གི་དེ་ལ་འདེང་འཇོག་དང་རྒྱབ་སྐྱོར་ཞུ་གི་ཡོད་པ་ང་ཚོས་མིག་མཐོང་ལག་ཟིན་ཡིན། ང་ཚོའི་གཞུང་དང་གཞུང་འབྲེལ་མ་ཡིན་པའི་ཚོགས་པ་དག་གི་ལས་འགུལ་ནུས་ལྡན་སྤེལ་མི་ཐུབ་པའི་ཉེར་ལེན་ལ་བརྟེན་ནས། དགྱ་དམར་གྱིས་རྒྱལ་སྤྱིའི་སྤྱི་ཚོགས་ནང་འཇིག་སྐུལ་བར་རྡུང་རྡེག་ཚ་ནན། གཏོང་དགོས་ཞེས་པའི་ཚ་རླབས་འཕྱུར་བཞིན་པའི་གོ་སྐབས་དེ་གཟུང་ནས་ལག་དུ་མཚོན་ཆ་ཁབ་ཙམ་ཐོགས་མེད་པའི་རང་རིགས་ཞི་བའི་ལས་འགུལ་བ་ཚོར། འཇིག་སྐུལ་པའི་ཉེས་མིང་བཏགས་ནས་དཔའ་བོ་གཉིས་སྲོག་ཐོག་ལ་བཏང་སོང་། ང་ཚོའི་གཞུང་གི་དབུ་མའི་ལང་ཕྱོགས་དང་། བོད་རྒྱ་ཞི་མོལ་ཁོར་ཡུག་བསྐྲུན་རྒྱུ་དེ་ཡང་བོད་རྒྱ་ཆེའི་མི་མང་ལ་བདེ་སྐྱིད་དང་རང་དབང་གི་ཆེད་དུ་ཡིན་དགོས་པ་ལས། བོད་ནང་དུ་དགྱ་མིས་རང་སྣང་གང་དྲན་གྱི་བོད་མི་དམར་གསོད་དང་གདུག་རྩུབ་ཚད་མེད་བཏང་ན་ཡང་ཞི་མོལ་གྱི་ཁོར་ཡུག་ལ་གནོད་དོགས་ཀྱི་བོད་ནང་གི་དངོས་ཡོད་ཀྱི་གནས་སྟངས་ཀྱི་སྐོར་འཛམ་གླིང་ནང་ལ་གསུང་ལན་གཅིག་ཀྱང་མི་བསྒྲགས་པ་ནི། ཕུགས་བསམ་ལྡན་པའི་རྟགས་སུ་མི་མངོན། གཞུང་འབྲེལ་མ་ཡིན་པའི་ཚོགས་པ་དག་གི་ད་ནས་བཟུང་སྟེ་ཚོགས་པའི་མིང་དང་། དཔའ་འབྱོར་ཁོ་ནའི་ཆེད་དུ་མ་ཡིན་པར་ལོ་ངོ་བཅུ་ཕྲག་འགའ་ཤས་ཁྲིམས་ཐག་བཅད་ཟིན་པའི་དཔའ་བོ། ཚེ་བཙོན་དང་སྲོག་ཁྲིམས་བཅད་པའི་ཟིན་པའི་རྒྱལ་གཅེས་ཀྱི་དཔའ་བོ་དག་གི་ད་ལྟའི་དངོས་ཡོད་ཀྱི་དཀའ་ངལ་ལ་གཞིགས་ནས་ལོ་ཚད་ཉུང་དུ་གཏོང་ཆེད་དང། སྲོག་ཁྲིམས་ཕྱིར་འཐེན་ཡོང་བའི་ལས་འགུལ་ནུས་ལྡན་ཞིག་སྤེལ་མི་ཐུབ་ན་ཡང་བསྐྱར་ང་ཚོས་མར་མེའི་ཁྲོམ་སྐོར་ཞིག་ལས་བྱེད་རྒྱུ་གང་ཡང་ལྷག་མི་འདུག་སྙམ། དེར་བརྟེན་གཞུང་དང་གཞུང་འབྲེལ་མིན་པའི་ཚོགས་པ་དག་གིས་ད་ལྟ་ནས་བཟུང་སྟེ་ལས་འགུལ་ནུས་ལྡན་ཞིག་སྤེལ་རྒྱུའི་དུས་ལ་སླེབས་འདུག། །།
དཀོན་ཅོག་གསུམ། ཀློག་ཐུབ་མ་སོང་། དཔེ་མང་པོ་བྲིས་འདུག་ག
ཧེ་ཧེ། མེ་དཀར་ལགས། ཀློག་མ་ཤེས་ན་མ་གཏོགས་ཀློག་མ་ཐུབ་པ་ལ་སྐྱོན་མི་འདུག་གོ།
རྩོམ་ཡིག་འདིར་རྒྱུ་མཚན་མེད་པ་ཞིག་རེད་མིན་འདུག