རང་གི་ལོ་རྒྱུས་ཚིགས་བཅད་དུ་བྱོ་བ།

མྱི་སྟིག

དགུང་ནས་མེ་ཏོག་ཆར་བ་མ་བབས་ལ།།
ས་ནས་འཇའ་ཚོན་སྣ་ལྔ་མ་འཆར་བར།།
ཅི་ཞིག་བསགས་པའི་བྱིན་དང་ནུས་མཐུ་ཡིས།།
བོད་ཀྱི་མདོ་ཁམས་སྨད་ནས་མི་རུ་སྐྱེས།།
ཨ་ཕས་བཤད་ན་སྙིང་རྗེ་ཡིན་རབས་ཟེར།།
ཨ་མས་བཤད་ན་ངན་རྟགས་སྟོན་རབས་ཟེར།།
ད་དུང་ཕུ་བོས་ངུ་ཁ་སླ་རབས་ཟེར།།
གང་ལྟར་ཨ་ཅེ་དག་གིས་མྱངས་རབས་འདུག།
དེ་ལྟར་ཟླ་ཐོག་ཟླ་བ་བརྩེགས་ནས་ནི།།
བརྒྱད་པ་ཁ་ཆག་དུས་ལ་རིམ་གྱིས་བསླེབས།།
དུས་ཚིགས་ཚེས་གྲངས་ནམ་ཡིན་མི་གསལ་མོད།།
ལོ་གྲངས་དགུ་ལ་བུད་པའི་ཐེམ་སྐས་ནས།།
རང་སྡེའི་སློབ་ཆུང་ནང་དུ་བསྐྱལ་བ་གསལ།།
རྗེས་ཀྱི་ལོ་སྟེ་བཅུ་གཅིག་བཅུ་གཉིས་བཅུ་གསུམ་དག།
རྣམ་གཡེང་རྩེད་མོའི་གསེབ་ནས་དེ་རུ་བརླག།
ཉིན་ཞིག་ང་དང་འཛིན་གྲྭའི་འགན་བདག་གིས།།
བོད་ཡིག་ལས་བྱ་འབྲི་རྒྱུ་བརྗེད་པར་བརྟེན།།
ཀླུ་མིང་ཅན་གྱི་དགེ་རྒན་རབ་ཁྲོས་ནས།།
ང་དང་འགན་བདག་གཉིས་ལ་བསྐོར་རྡུང་བྱས།།
ཚིག་རྩུབ་མནར་སྡུག་སྙིང་ནས་མ་བཟོད་པར།།
དེ་ཡི་ཕྱི་དྲོ་སློབ་གྲྭར་གྱེས་བརྡ་བཏང་།།
དེ་ནས་གཏན་དུ་སློབ་གྲྭར་འགྲོ་མཚམས་བཞག།
བརྩེ་བའི་ཕ་ལོས་སྐེ་ཤ་འཐེན་ཞོར་དུ།།
སློབ་གྲྭར་སོང་དང་ཅི་དགོས་ཉོ་ཆོག་ཟེར།།
ཨམ་གཙུགས་བསྡམས་ནས་སེན་མོས་ས་འབྲད་ཞོར།།
སློབ་གྲྭར་མི་འགྲོ་གྲྭ་བ་འདོད་ལུགས་ཀྱིས།།
བླ་བྲང་ཁོངས་ཀྱི་ཧོར་གཙང་ཙག་ཙག་ནས།།
ཆུ་ལེན་ཤིང་གཏུབ་ཞོར་དུ་འདོན་རྟ་སྦྱངས།།
དེ་ལྟར་ལོ་ངོ་གསུམ་ལ་བྲན་གཡོག་གིས།།
གཙུག་ཏུ་བཀུར་ནས་ཧུར་གྱིས་འབད་མོད་ཀྱང་།།
ནམ་རྒྱུན་མིག་གི་དཀར་ལོགས་དམར་ལོགས་ཀྱིས།།
འུ་ཐུག་ཐབས་ཟད་བྱུང་ནས་ཁྱིམ་དུ་ལོག།
དགེ་བ་བསྒྲུབས་པའི་མཇུག་བསྡོམས་དེ་ནས་བརྒྱབ།།
ཨ་ཕས་སྡིག་པས་ཁྱིམ་དུ་མ་བསྡད་པར།།
ཨ་ཅེའི་ལྷན་དུ་ཡུ་གུར་ས་ཆ་ནས།
ཞིང་གི་སྲིན་བལ་བཏོགས་ནས་གཡོག་ལས་བྱས།།
དེ་ལྟར་མྱངས་ཞོར་ལོ་གསར་ཡུལ་ནས་རོལ།།
དཔྱིད་དཔལ་བུ་མོ་ས་ལ་མ་བབས་གོང་།།
མགོ་ལོགས་ཕྱོགས་སུ་དབྱར་རྩ་དགུན་འབུའི་ཆེད།།
ཕུ་བོ་ཆུང་བར་འགྲོགས་ནས་བཞུད་འགོ་བརྩམས།།
ཇི་ལྟར་གོག་ཀྱང་དེ་ཙམ་མི་རྙེད་པས།།
སྡུག་གི་ཨ་ཐང་ཆད་ཀྱང་ལོ་གཉིས་བསྡད།།
ད་དུང་སྔར་བཞིན་ཡིན་པ་གཏན་ཁེལ་བས།།
ངོ་ཤེས་དག་ལ་བཀའ་དྲིན་དང་བཅས་ཏེ།།
ལག་པ་མཆན་དུ་བཅུག་ནས་ཡུལ་དུ་ཡོང་།།
དགོན་ནས་བུད་པའི་ཉི་མ་དེ་ནས་བཟུང་།།
ལོ་ངོ་འཁོར་མོ་བཞི་ལྷག་འཁྱམས་ནས་བསྐྱལ།།
སྡེ་མིའི་ངག་ནས་ཧི་ནན(སོག་རྫོང་)་རྫོང་ཐོག་ན།།
ལས་ཀ་མང་རབས་གླ་ཕོགས་མཐོ་རབས་ཐོས།།
སྡེ་བ་གཅིག་པའི་ན་ཟླ་གཉིས་དང་ལྷན།།
ཧོབ་ཀྱིས་ལམ་འགྲུལ་བྱས་ནས་ལས་ཀར་ཆས།།
ཟླ་བ་འགའ་ལ་ལས་ཀ་བྱས་ན་ཡང་།།
ལག་ཏུ་ལྷག་པ་རྒྱ་སྒོར་ལྔ་བརྒྱ་ཙམ།།
སྡེ་བ་གཅིག་པའི་གྲོགས་པོ་གཞན་ཞིག་གིས།།
རྒྱ་གར་ཡུལ་དུ་འགྲོ་མཁན་ཡོད་མེད་ཟེར།།
རྒྱ་སྒོར་ལྔ་བརྒྱ་མ་གཏོགས་མེད་ཟེར་དུས།།
ལྷ་སར་སོང་ན་ལས་ཀ་རག་མདོག་ཟེར།།
དེ་ཡི་ཕྱི་ཉིན་ཧི་ནན་རྫོང་ཐོག་ནས།།
གནམ་མཁར་ཟི་ལིང་བར་དུ་འཛིན་བྱང་ཉོས།།
ལྩགས་ཀྱི་མེ་འཁོར་ནང་ནས་ལྷ་སར་བསྲེས།།
ཟླ་བ་བཞི་ལྷག་ལྷ་སའི་གྲོང་ཁྱེར་ནས།།
མཚམས་མཚམས་སྐྱིད་པོ་མཚམས་མཚམས་སྡུག་གིས་ཕུད།།
ཡོང་བའི་སྔ་ཉིན་ཕུ་བོར་ཁ་པར་ནས།།
རྒྱ་སྒོར་ལྔ་བརྒྱའི་རོགས་རམ་དགོས་ལུགས་དང་།།
མ་མཐར་དང་ན་ཡུལ་ནས་འདུག་ལུགས་སོགས།།
ཚིག་རྟིང་མནའ་ཡིས་མནན་ཞོར་ཨུ་ཚུགས་བྱས།།
ལམ་འཁྲིད་མི་དེ་རང་སྡེ་ཡིན་པ་ཡིས།།
སྒོར་མོ་གཅིག་ཀྱང་གླ་ལ་མི་དགོས་ཟེར།།
ཉིན་མཚན་བརྗེ་ཞོར་ཉིན་གྲངས་ཉི་ཤུ་ལྷག།།
རྩམ་སྐྱ་ཆུ་ལ་སྤོད་ཞོེར་སྐྲག་སྣང་དང་།།
༧གོང་ས་མཆོག་ལ་གསོལ་བ་འདེབས་ཞོར་གྱིས།།
རེ་བའི་གོམ་ཁ་འདོད་པའི་ཡུལ་དུ་སྤོས།།
རང་གི་ཕུགས་བསམ་འགྲུབ་པའི་གླུ་དབྱངས་ལེན།།
གཏན་གྱི་བསམ་དོན་གྲུབ་པའི་ཞབས་བྲོ་རྒྱག།
གང་ལྟར་གཉེན་མེད་བས་མཐའི་ཡུལ་གྲུ་འདིར།།
ང་འདྲའི་ལེ་ལོ་ཅན་དག་ཡོང་ས་མིན།།
སློབ་ཆུང་སྒོ་ཐེམ་ནང་ནས་ལོ་གསུམ་བརླག།
དགོན་པའི་རྡོ་གཅལ་ཐོག་ནས་ལོ་གསུམ་བརླག།
ཤེས་རབ་དགའ་ཚལ་གླིང་ནས་ལོ་གསུམ་འདས།།
ནོར་གླིང་མཐོ་སློབ་ཚང་གི་ལོ་གསུམ་གྱིས།།
མི་ཡི་གྲལ་དུ་འགྲོ་བར་ཕན་མིན་ལ།།
སེམས་པའི་གཏིང་ནས་སོམ་ཉིའི་དྲ་རྒྱ་དེ།།
གཅོད་པའི་གདེང་ཚོད་སྔར་བཞིན་མི་འདུག་ལ།།
ཆད་པའི་རེ་བ་ནམ་ཡང་མི་རྙེད་དོ།།
སྤྱི་ལོ༢༠༡༡་ སྤྱི་ཟླ༨་ཚེས༡༧ཉིན་རྫོགས་པར་བྲིས་སོ།