དུར་བྱང་གིས་བརྩམས།
སྐྱེས་ནས་འཆི་བར་མངོན་དུ་ཕྱོགས།།
དུས་བཞིའི་ངོ་བོ་ཉིད་དང་མཚུངས།།
རྨི་ལམ་ལྟ་བུའི་ཁང་བཟང་ལས།།
རྟག་པར་སྡོད་པ་འཁྲུལ་བའི་གཞི།།
འོན་ཀྱང་འཚོ་བའི་གནས་སྐབས་སུ།།
མེས་པོའི་གཤིས་ལ་འབད་པར་གྱིས།།
ཤེས་བྱའི་སྦྲང་རྩིའི་བཅུད་འཐུང་ནས།།
གངས་རིའི་ལྗོངས་ལ་རྟག་ཏུ་སོམས།།
རྟེན་འབྲེལ་ཟབ་མོའི་ཆོས་ཉིད་ལས།།
ཁྱོད་ཀྱང་གནས་འདིར་སྐྱེས་པ་ཉིད།།
འདོད་དང་མི་འདོད་ཅི་ལྟར་ཡང་།།
གནད་འདིར་ཡོལ་བ་ཆ་ཙམ་མེད།།
ཁྱོད་ནི་གང་དུ་གནས་ཀྱང་རུང་།།
ཅུང་ཙམ་འཚར་བའི་དུས་ཚོད་ལ།།
རིགས་མཐུན་ཁྱུ་དང་ཁྱུ་བྱས་ནས།།
རྣམ་གཡེང་ལེ་ལོར་རིང་དུ་གྱེས།།
མགོ་འཕང་ཨེན་ཙམ་མཐོ་བར་བྱོས།།
སེམས་པ་རྟག་ཏུ་བསྒྲིམ་པར་བྱོས།།
མེས་པོའི་བྱུང་བ་བཀླག་པར་བྱ།།
རང་ངོ་རང་གིས་ཟིན་པར་གྱིས།།
ད་ནི་བྱུང་རབས་ཅུང་ཙམ་བྲི།།
རྣ་པ་བླགས་ཏེ་ཉན་པར་བྱ།།
ཐོག་མར་རང་ཉིད་སྡོད་ས་རུ།།
ལག་མཐིལ་ཙམ་གྱི་ས་ཡང་མེད།།
འདི་ནི་ཁྱོད་ཀྱི་ལས་སྐལ་ཡིན།།
འདི་ནི་ཐོག་མའི་གཞི་འཛིན་ཡིན།།
འདི་ལས་འཕྲོས་པ་བྱུང་རབས་ཡིན།།
འདི་རུ་བསྐུངས་པ་ལོ་རྒྱུས་ཡིན།།
གདོད་མའི་སྐབས་དག་བསྐྱུང་བར་བྱ།།
བཙན་པོའི་དུས་ཀྱང་བསྐྱུང་བར་བྱ།།
ཁྱོད་ནི་ན་ཚོད་སྨིན་པའི་སྐབས།།
ཞིབ་ཏུ་བཀླག་ནས་ཤེས་པར་གྱིས།།
བཅུ་ཕྲག་འགའ་ཡི་སྔ་རོལ་དུ།།
གངས་རིའི་ཁ་མདོག་ཁྲག་ཏུ་བསྒྱུར།།
གླེགས་བམ་རི་ཡི་བོངས་ཚད་རྣམས།།
མེ་ལ་བསྲེགས་ཤིང་ཆུ་ལ་བསྐུར།།
ལྷ་ཁང་བཤས་རའི་ཚུལ་དུ་བྱས།།
བླ་གྲྭ་གཡོག་པོའི་ཚུལ་དུ་བྱས།།
མི་རྣམས་དུད་འགྲོའི་ཚུལ་དུ་བྱས།།
བོད་ཁམས་དམྱལ་བའི་ཚུལ་དུ་བྱས།།
བཀྲེས་པ་སྐོམ་པའི་སྟངས་ཀ་དག།
ལྟ་བར་བཟོད་པ་སུ་ཞིག་མཆིས།།
མུག་ཤི་ཐེབས་པ་ག་ཚོད་ཙམ།།
གྲངས་ལ་འགྲན་པ་ཁོ་ནར་ངེས།།
སྐབས་དེར་བཅུ་དྲུག་ན་ཚོད་ཅན།།
གངས་རི་དཀར་པོ་ཕྲག་ཏུ་བཞེས།།
ཉི་མ་ཟླ་བར་ཕྱག་ཟུང་བརྐྱངས།།
སྣང་བའི་ཟེར་མ་ཕྲ་ཙམ་བྱུང་།།
དགྲ་བོའི་འདོད་རྔམ་མ་རྫོགས་པས།།
གངས་རི་མུན་པའི་གནས་ལ་བཀོད།།
ཁྱེའུ་ཐབས་མཁས་ཐུགས་རྗེ་ཅན།།
མི་ཡུལ་ལུང་བར་ཞལ་ཁ་བསྒྱུར།།
ད་ནི་གཞིས་བྱེས་གཉིས་སུ་གྱེས།།
སྐྱོ་གར་རིང་མོ་ད་དུང་མྱངས།།
ཁྱེད་ཅག་བྱིས་པའི་ན་ཚོད་ཅན།།
འབྱུང་འགྱུར་འདི་ལས་ཡོལ་མ་འགྱུར།།
ཁྱོད་ཀྱི་བསྐྱེད་བྱ་སྐྱེད་བྱེད་ལ།།
རེ་བ་འདི་ལས་གཞན་མ་མཆིས།།
དྲིན་ལ་དྲིན་གཟོ་མེད་ཀྱང་བླ།།
རིགས་ཀྱི་འདུ་ཤེས་འདོར་མི་བྱ།།
2018.07.28 ཉིན་དུར་བྱང་གིས་བརྩམས།
ཕ་བཟང་མཁས་པའི་གདམས་པ་ལ། །
རིགས་བཟང་བུ་མོའི་རྣ་བར་འཇེབས། །
ཁ་རྡ་དྲ་བར་བཀོད་པ་ལས། །
ཀརྡོ་ངས་ཀྱང་ཐང་ཅིག་བཀླགས། །