ཨེ་མ་ཧོ།
རྒྱ་མོ་སྤྱན་སྦྱིན་བྱང་ཆུབ་སེམས་མ་ཡོའོ་པེའུ་ནཱ་ལ་ཕུལ་བ་རྒྱ་སེ་མེ་ཏོག་དམར་པོ།
ན་མོ་གུ་རུ་པདྨ་ཀ་ར་ཡེ།།
ཀ་ལ་པིང་ཀ་བཞིན་གསུང་སྐད་སྙན་ཞིང་།།
ཁ་བའི་གངས་རི་བཞིན་ལྷག་བསམ་དཀར་པོ།།
ག་ས་གང་ན་རུ་གྲགས་ཅན་གླུ་མ།།
ང་ཡིས་ཡི་རང་དང་བསྟོད་བསྔགས་ཞུའོ།།
ཅ་ཡི་ན་དང་ནི་གངས་ཅན་ཡུལ་གྲུར།།
ཆ་ཡོད་བུ་མོ་ཁྱེད་ཞིང་དུ་ཕེབས་པས།།
ཇ་རྩམ་སྒྲོན་མེ་ཡིས་མཆོད་འབུལ་བྱས་ནས།།
ཉ་གང་ཟླ་རྒྱས་བཞིན་བསྔོ་སྨོན་ཞུའོ།།
ཏ་ཐ་ག་ཏ་ཡི་གསུང་རབ་ཀུན་ཏུ།།
ཐ་དག་གཞན་ཕན་གྱི་བྱང་ཆུབ་སེམས་དཔའ།།
ད་ལྟའི་དུས་རབས་འདི་ཤིན་ཏུ་དཀོན་ཡང་།།
ན་ཆུང་བུ་མོ་ཁྱེད་ཉིད་མངོན་པར་བསྟོད།།
པ་ར་མི་ཏའི་རླབས་ཆེན་མཛད་པ་ཅན།།
ཕ་མེས་རྒྱུད་པའི་སྤྱན་རས་གཟིགས་མ་བཞིན།།
བ་ནུའི་ནད་ལས་སྐྱོབ་པའི་ཚོགས་བསགས་འཁན།།
མ་སྨད་བསོད་ནམས་སྦྱིན་པའི་རྒྱ་མོ་རྒྱལ།།
ཙྰ་རི་གནས་སྐོར་སྒོམ་ལ་མ་བཞུགས་ཀྱང་།།
ཚ་བསྲེག་རང་གཞན་གནོད་པའི་ལས་མ་བྱས།།
ཛ་ཡའི་བསྟན་པའི་སྙིང་ནོར་ཁྱེད་ལ་དབང་།།
ཝ་ལེར་འཛམ་གླིང་ཁམས་སུ་འོད་སྣང་ཁྱབ།།
ཞ་ལོང་འོན་པ་སྤྱན་དང་དོན་སྣོད་སྦྱིན།།
ཟ་གོས་འཚོ་བ་སྒྱུ་མའི་རྟགས་སུ་བསྟན།།
འ་ཅག་འཁོར་འདས་རྟག་འཛིན་བགྱིས་པ་ལ།།
ཡ་རབ་མཛད་བཟང་མངོན་པར་སྙིང་ནས་གུས།།
ར་རུ་སྡུག་པའི་ངན་སེམས་རྩ་ནས་སྤངས།།
ལ་རྒྱའི་དུང་བ་གཞན་ཕན་སེམས་ཀྱིས་ཕྱུག།
ཤ་ཁྲག་དོན་སྣོད་སྐྱོན་མེད་སྦྱིན་པ་བཏངས།།
ས་ཐོབ་སེམས་དཔའ་ཆེན་པོ་ཁྱེད་མིན་སུ།།
ཧ་ཅང་སྐྱོ་བའོ་སྒྱུ་མའི་གྲོང་ཁྱེར་འདིར།།
ཨ་མའི་བུ་མོའི་ཕྲིན་ལས་དཀར་པོའི་འོད།།
ཞི་བདེའི་ལམ་སྟོན་སྤྱན་གཉིས་དཔེ་བརྡར་བཞག།
གཞན་ཕན་ཟླ་བའི་སྲས་མོ་ཡོངས་སུ་བསྔགས།།
བདེ་ཆེན་ཞིང་གི་མགོན་པོ་འོད་དཔག་མེད།།
སྲས་བཅས་རྒྱལ་བས་སྤྱན་འདྲེན་གཟེངས་བསྟོད་བཅས།།
བདེ་ཆེན་དག་པའི་ཞིང་དུ་ཕེབས་མཛད་ནས།།
འགྲོ་ཁམས་རྒྱ་མཚོ་དོང་ནས་སྤྲུགས་པར་མཛོད།།
ཅེས་པ་རབ་རྒྱན་ཤིང་རྟའི་རྒྱལ་ཟླའི་དུས་ཚེས་དགེ་བ་འམ། ࿉ རྒྱ་ནག་ཧྭོའུ་པེ་ཞིང་ཆེན་བོའུ་ཧྭན་གྲོང་ཁྱེར་གྱི་གླུ་མ་གྲགས་ཅན་ཡོའོ་པེའུ་ནཱ་（姚贝娜）ལ། བཅོས་ཐབས་དཀའ་བའི་ནད་གཞི་ཞིག་གིས་ཐེབས་པར་བརྟེན་ཉེ་ཆར་ཚེ་ལས་འདས་སོང་། མོས་ཉམ་ཐག་དབུགས་ཀྱི་རྒྱུ་བ་མ་འགགས་པའི་སྔ་རོལ་ཏག་ཏག་དེ་སྤྱི་ལོ༢༠༡༥ལོའི་ཟླ་༡བོའི་ཚེས་༩ཉིན་རང་གི་དོན་ལྔ་སྣོད་དྲུག་སོགས་གཞན་ལ་སྦྱིན་པར་སེམས་ཐག་བཅད་པ་དང་མོའི་ཨ་ཕས་ཀྱང་བུ་མོའི་རེ་བ་ལྟར་འཐད་ཡིག་བྲིས་ཤིང་མིང་རྟགས་བཀོད་རྗེས་རང་གི་ཧ་ཅང་གཅེས་པའི་མིག་ཟུང་དེ་ཟི་ཁྲོན་ཞིང་ཆེན་གྱི་ལོ་༢༦ཅན་གྱི་ཞྭོ་ཏུང་（小董）ཟེར་བ་ལ་སྦྱིན་ཏེ་གཤག་བཅོས་ལེགས་གྲུབ་བྱུང་། ཡིན་ཡང་། སྤྱི་ལོ༢༠༡༥ལོའི་ཟླ་༡བོའི་ཚེས་༡༦ཉིན་མོ་རང་དངོས་སུ་ཚེ་ལས་འདས་སོང་། ཚང་མས་མོ་ལ་བསྔོ་སྨོན་རེ་གནང་བར་རེ་བ་ཞུའོ།། ཞེས་བྱམས་བརྩེའི་གསར་འགྱུར་མཐོང་བའི་མོད་ལ་སྙིང་ནས་ཡི་རང་བཅས་བསྔོ་སྨོན་ཟབ་རྒྱས་དང་ཟིན་རྩོམ་གང་ཤར་མ་འདི་དབྱིན་ཡུལ་ཀུན་བཟང་ཆོས་གླིང་ནས་རིག་འཛིན་ཨེ་མ་ཧོས་བགྱིས་པ་འདས་པ་བདེ་ཆེན་ཞིང་དུ་སྐྱེས་བའི་རྒྱུ་རུ་གྱུར་ཅིག་གུ།། ཤྲྰི་སརྦ་ལོ་ཀ་ཨ་ནནྟ་བཛྲ་བི་ཛ་ཡནྟུ།། །།
ལྡོང་བ་གསེར་མིག་ལ་གདམས་པ་མིག་ཐུར་རྣོན་པོ་ཞེས་བྱ་བ།།
ན་མོ་གུ་རུ་བྷྱ།།
སྐྱབས་གནས་དཀོན་མཆོག་ཀུན་འདུས་བླ་མ་མཁྱེན།།
ལྡོང་བ་ཆོས་མིན་གསེར་གྱི་མིག་ཐུར་འབྱེད།།
མི་བུ་གདུང་དྲུག་རྨོངས་པའི་གཞན་དབང་འཁན།།
གསང་ཆེན་ལོག་པར་བལྟ་རྣམས་དལ་ཅིག་གསོན།།
ས་སྐྱའི་བསྟན་པ་འཁོན་རིགས་ལྷ་ཡིས་འཛིན།།
དགེ་ལུགས་བསྟན་པ་གསང་བདེ་དུས་ཀྱིས་འཛིན།།
བཀའ་བརྒྱུད་བསྟན་པ་བདེ་ཆེན་ཕྱག་རྒྱས་འཛིན།།
རྙིང་བོན་གསང་ཆེན་རྫོགས་པ་ཆེན་པོས་འཛིན།།
འདི་ན་རུས་འདྲེ་ཞྭ་རྙིང་ནང་རྩོད་ཀྱིས།།
ས་དགེ་བཀའ་རྙིང་འཇིག་པ་ག་ལ་ནུས།།
བཤད་སྒྲུབ་ཕྲིན་ལས་ཤར་ནུབ་ཀུན་ཏུ་ཁྱབ།།
ཡང་དག་བསྟན་པ་ཉི་མ་བཞིན་དུ་གསལ།།
ས་སྐྱའི་ཁྲི་ཆེན་ཉི་ཟླ་ཟུང་གཅིག་ཤར།།
དགེ་ལུགས་རྒྱལ་པན་གངས་སེང་ཆ་གཅིག་མཛེས།།
བཀའ་བརྒྱུད་འབྲུག་ཆེན་འཛམ་གླིང་ཀུན་ལ་གྲགས།།
སྔ་འགྱུར་ཀུན་མཁྱེན་ཀུན་གསལ་ཁྱོན་ལ་ཁྱབ།།
ཡིད་བཞིན་ནོར་བུ་སད་རྨིར་འབྲལ་མེད་གནས།།
ཡི་དམ་དཔལ་ཆེན་དགྱེས་པ་རྡོ་རྗེའི་གར།།
མཁའ་འགྲོ་རྒྱ་མཚོའི་རིགས་བདག་ཧེ་རུ་ཀ།
སངས་རྒྱས་ཡེ་ཤེས་འགྲོ་དོན་ཨེ་མ་ཧོ།།
ཞེས་ཤྲྰིཿ་ཨེ་མ་ཧོས་འཇིག་མེད་འཇིགས་སྐུལ་སྨྲ་བའི་རང་ལུགས་འཛིན་པ་དག་ལ་ཕུལ་བར་དགེའོོ།། །།
བུ་མོ་ཡོད་ཚད་ལྷ་མོར་མཐོང་བའི་ན་ཚ་ཞིག་ཨེ་མ་ཧོ་ལ་ཕོག་གདའ།
ཚིག་རྡོག་གཅིག་ལ་བཟོད་པའི་གོ་ཆ་དབེན།
གསང་སྔགས་བསྒྲུབ་ཟེར་མཆེད་ཀྱི་མིག་ཟུང་འདྲུ།
ཐེག་ཆེན་ཡིན་ཟེར་སྣང་མཐོང་དགྲ་རུ་བལྟ།
རྙིགས་མའི་རྙིགས་མའི་རྙིགས་རོ་ཁྱོད་མིན་སུ།