མྱི་ཆེན། རྩོམ་ཁུངས། བཙན་པོ་ཚང་།
ཕྲན་གྱིས་ནམ་རྒྱུན་དྲ་ཐོག་ནས་ས་སྐྱའི་བླ་མ་མཁས་པ་རྫོང་སར་ཚང་གི་སྐོར་ལ་མཉམ་བཞག་པ་ཡིན་ལ། ཁོང་གི་གསུང་ཚན་བོད་ཡིག་ཏུ་ཕབ་པ་རེ་མཐོང་དུས་གང་ཐུབ་ཅི་ཐུབ་ཀྱིས་ཀློག་གིན་ཡོད་པར་མ་ཟད། གུས་ཞབས་དང་ཡི་རང་བླ་ན་མེད་པ་བྱེད་བཞིན་ཡོད། ན་ནིང་ཞིག་ལ་ཁོང་གི་གསུང་བོད་འགྱུར་མ་ཞིག་ལ་མཇལ་ཏེ་ཞིབ་པར་བཀླགས་ཤིང་ཁོང་གི་ཆོས་ཀྱི་ཡོན་ཚད་ལ་སྨོན་པ་ཤོར་མྱོང་། ད་ཐེངས་ཁོང་གི་གསུང་བོད་འགྱུར«དྲི་བ་བརྒྱད་ཁྲི་བཞི་སྟོང་།»ཞེས་པ་པར་བསྐྲུན་བྱས་འདུག་པ་མཐོང་ནས་དགའ་མོས་ཆེན་པོས་བླུས་པ་ཡིན།
འོན་ཀྱང་དགའ་དད་ཀྱི་སྨོན་པ་ཤོར་མྱོང་བའི་མཁས་པ་གང་གི་གསུང་ནི། ལེགས་གྲུབ་ཟེར་བའི་ཡིག་རྨོངས་པ་ཞིག་གིས་འཕྲོ་བརླག་ཏུ་བཏང་ཡོད་པས་ཡི་མུག་སྐྱེས་སོང་། ག་རེ་བྱས་འདུག་ཟེར་ན། ཤོག་ངོས་དང་པོ་ནས་ཞིབ་པར་བཀླགས་ཡོང་དུས་ཡིག་ནོར་དང་བརྗོད་པ་མི་བདེ་བའི་ཚིག་ཉོག་གིས་ཡོངས་སུ་བསླད་ཡོད་པས་ཀློག་ཐུབ་མ་བྱུང་ལ། ཕལ་ཆེར་ཤོག་ངོས་རེ་རེ་ན་ཡིག་ནོར་གཅིག་གཉིས་ཤིག་མེད་པ་མི་སྲིད་པའི་ཚད་རེད། ངས་འདི་ལྟར་བསམ་བློ་བཏང་ཡོང་དུས་འགྱུར་ཚིག་དང་དོན་སྐྱོན་གྱི་ཐད་ནས་ཀྱང་གང་མང་རེ་ཏག་ཏག་ཡོད་ངེས་རེད་སྙམ་བྱུང་།
ང་ཚོ་སུ་ཞིག་ཡིན་ན་མཁས་པ་རྫོང་སར་ཚང་གིས་མཚོན་པའི་གནའ་དེང་གི་མཁས་པ་ཚོའི་གསུང་བསྒྱུར་ལས་གཞིའི་སྐོར་ནས་ཐུགས་བསམ་ཡག་པོ་རེ་གཏོང་དགོས་འདུག་སྙམ། ན་ནིང་དོ་ཚིགས་ཀྱི་ལོ་འདི་གར་རྩོམ་ཡིག་དང་བསྒྱུར་རྩོམ་སྣ་ཚོགས་པ་ཞིག་གང་དགར་བཀྲམ་བཞིན་འདུག་པས་དགའ་འོས་ཤིང་གུས་བཀུར་བྱ་རྒྱུ་ལས་མི་འདུག་མོད་དེ། འདི་ལྟར་རྨད་དུ་བྱུང་བའི་མཁས་པའི་གསུང་རྩོམ་རྣམས་ཡིག་རྫོབ་དང་གད་སྙིགས་སུ་བསྒྱུར་ན་ཕངས་པ་ལ་ཨང་།
ངས་ནི་ཚང་མས་ཡིག་ནོར་འབྲི་བ་ལས་མ་བྲིས་ན་བཟང་ཟེར་བ་གཏན་ནས་མིན་ཏེ། ཡིག་ནོར་ལ་འཛེམས་ཏེ་མི་འབྲི་བ་ལས་གང་ཐུབ་ཐུབ་ཀྱིས་བྲིས་ན་ལེགས་པ་ནི་སྨོས་ཅི་དགོས་ཏེ། འོན་ཀྱང་དམ་པ་དག་གི་གསུང་རྩོམ་ཡིག་སྒྱུར་བྱེད་མཁན་ཞིག་ལ་མཚོན་ན། ཆེས་མ་མཐའ་ཡང་བརྡ་སྤྲོད་གཞུང་ལུགས་ཀྱི་སྤྱི་འགྲོས་ཤིག་ནི་ངེས་པར་དུ་ཤེས་དགོས་ཏེ། ལོ་ཙཱ་པ་ཞེས་པ་ནི་འཇིག་རྟེན་གྱི་མིག་ཕྱེ་མཁན་མ་ཡིན་ནམ།
སྤྱིར་དེང་སང་གི་རྩོམ་ཡིག་དང་འགྱུར་ཡིག་མང་ཆེ་བར་མི་རིགས་གཞན་གྱི་ཤན་ཐེབས་དྲགས་པས་ཡིན་ནམ། གང་ལྟར་རྩོམ་ཡིག་མང་ཆེ་བ་ནི་ཟེར་མི་རུང་མོད། འོན་ཀྱང་རྩོམ་ཡིག་སྐོར་ཞིག་གིས་ཡིག་ངོས་ནས་ཚུར་ཀློག་མཁན་ལ་བོད་སྐད་ཀྱི་བརྡ་ཡག་པོ་འཕྲོད་མི་ཐུབ་པས་ན། ཀློག་མཁན་རང་ནས་ཕར་ཨུ་ཚུགས་ཀྱིས་བརྡ་འདེད་བྱས་ཏེ་ཁྱོད་ཀྱིས་འདི་ལྟར་བཤད་ཀྱིན་ཡོད་པ་འདྲ་ཟེར་དགོས་པའི་དུས་ཚོད་ལ་སླེབས་འདུག་པས་ངུ་བྲོ།
གཞན་ད་དུང་མཁན་པོ་ཚུལ་ཁྲིམས་བློ་གྲོས་སོགས་མཁས་པ་གང་མང་གི་གསུང་རྩོམ་མང་པོ་ཞིག་ཕྱོགས་ཡས་མས་ན་ཕབ་བསྒྱུར་བྱས་ཏེ་འགྲེམ་ཚོང་བྱེད་བཞིན་པ་དག་ལའང་དེ་ལུགས་ཀྱི་དགེ་སྐྱོན་ཉིས་ཆ་ཡོད་ངེས་ཏེ། ང་ཚོས་ནི་མཁས་པ་དེ་དག་གི་གསུང་བསྒྱུར་ཕབ་སྒྲིག་བྱེད་སྐབས་ཡིག་ནོར་གཙོ་བོར་བཟུང་སྟེ་ཞུས་དག་གཏོང་རྒྱུ་ལས། དོན་གྱི་འགངས་བབ་ཀྱི་ཐད་ནས་ཁོང་རྣམ་པར་སྤྱན་འབེབས་དགོངས་བསྟུན་གྱིས་དཔེ་སྒྲིག་ལས་གཞི་དེ་གཉེར་ཐུབ་པ་ཡིན་ན། ད་གཟོད་ཚོང་ལས་དང་རིག་གཞུང་གང་ཐད་ནས་འཐུས་ཚང་དང་འབྱོར་ཕྱུག་ལྡན་པ་ཞིག་འོང་ཐུབ། དེ་མིན་དངུལ་རྐྱང་བར་དམིགས་ཏེ་ཕྱི་ཤོག་དང་སྒྲིག་སྦྱོར་མཛེས་པོ་ཙམ་ལ་འཆེལ་ནས་མཁས་པ་དག་གི་གསུང་རྩོམ་རྩེ་སྤྱད་དུ་བཀོལ་མི་རུང་སྙམ།
གལ་བོ་ཆེ་ལ་ནན་ཏན་གྱི་ཚུལ་དུ་བཤད་ན། ཡིག་སྒྱུར་པ་དང་དཔེ་སྒྲིག་པ་སྐོར་ཞིག་ནས་དཔལ་འབྱོར་ལ་དམིགས་ཏེ་དཔེ་ཚོང་བྱེད་པ་ནི་ཁོ་ཚོའི་ལས་གཞི་ཞིག་ཡིན་པས་ང་ལ་འབྲེལ་བ་ཅི་ཡང་མེད་མོད། འོན་ཀྱང་དེང་གི་དཔེ་ཆའི་ཚོང་ཁྲོམ་དུ་རྒྱུག་ཆེ་བའི་མཁས་པ་རྣམས་ཀྱི་གསུང་རྩོམ་གྱི་དཔེ་དེབ་འགྲེམ་སྤེལ་བྱེད་པའི་སྐབས་ཀུན་ཏུ། བརྡ་སྤྲོད་རིག་གཞུང་དང་མཐུན་པའི་ཡིག་བསྒྱུར་དང་ཞུ་དག་གང་ལེགས་ཤིག་བྱ་རྒྱུ་ནི་གལ་ཆེ་སྟེ། ཁྱོད་ཚོས་ནི་མཚན་སྙན་དང་དཔལ་འབྱོར་གང་ལ་དམིགས་ནའང་དེ་ལུགས་ཀྱི་འགན་ཡག་པོ་ཞིག་ལེན་རྒྱུ་ནི་འོས་སུ་ཆེའོ། །
ཞེས་ཀློག་མཁན་སྒང་བ་བོད་ཀྱི་མྱི་ཆེན་གྱིས།
དངོས་ཡོད་ཀྱི་གནས་སྟངས། རྩོམ་སྒྲིག་དང་ཞུས་དག་གི་ཚད། ཡིག་སྒྱུར་བ་ཚོས་བརྡ་འཕྲོད་པོ་ཞིག་བསྒྱུར་ཐུབ་ཀྱི་མེད་པ་བཅས་གླེང་སློང་བྱེད་པ་བརྒྱུད་ནས་ཚད་ལྡན་དང་ཡར་རྒྱས་ཀྱི་རེ་བ་རྒྱག་དགོས། རྩོམ་དང་དེབ་བོད་བསྒྱུར་བྱེད་པ་ནི་མེད་པ་ལས་ཡོད་པ་དགའ་བ་འདུག་ཟེར་བ་ནས་། དེང་སྐབས་ཡོད་པ་ལས་མེད་པ་དགའ་བ་འདུག་ཟེར་མཁན་ཡོང་གི་ཡོད། ཕྱོགས་ཚང་མས་ཡར་སྐུལ་དང་ཡར་རྒྱས་ལ་རེ་བ་རྒྱག་དགོས།
བཙན་པོ་ཚང་། ཁྱེད་རང་དེ་སྔོན་མི་ཞིག་གིས་རྡོ་རྗེ་གཅོད་པ་ཞུ་དག་བཏང་པ་རེད། དེ་འདྲ་བ་ཞིག་མིན་ནམ་སྙམ། གང་ཞེ་ན་ཁྱེད་ཀྱིས་བྲིས་པའི་ཚུལ་དེའི་ནང་ལ་ཡིག་ནོར་ཧ་ཅང་པོ་གདའ། མ་ཟད་ཚིག་སྦྱོར་སྟངས་དེ། བོད་ཀྱི་སྔ་ཕྱིའི་མཁས་པ་ཀུན་དང་མ་མཐུན་པའི་སྦྱོར་ལུགས་ཤིག་རེད་ཤག མ་ཟད་དུས་གསུམ་གྱི་འགྲོས་དང་། བདག་གཞན་གང་ལའང་གཞི་འཛིན་པ་རེད་ཤག མ་ཟད་ཧ་ཅང་མང་པོ་གདའ།
མྱི་ཆེན་གྱིས་ལྷག་བསམ་མཚོན་པའི་འབོད་བསྐུལ་ཞིག་གདའ་བས། བོད་ཡིག་འབྲི་མཁན་ཚང་མའི་ཐུགས་ལ་ངེས་པར་བཞག་དགོས་འདུག ཐུགས་རྗེ་ཆེ།