རོང་པོ་བློ་བཟང་རིན་ཆེན།
དེ་རིང་གཞལ་ཡས་ཁང་ལ་འགྲན་པའི་བློ་གསལ་བྱེ་བའི་གླིང་གྲྭ་ཚང་གི་འདུ་ཁང་གསར་པའི་ནང་དུ་མཁན་རིན་པོ་ཆེ་དབུ་བཞུགས་ཐོག ལོ་འདིའི་དགེ་བཤེས་ལྷ་རམས་པ་ཉེར་བཞི་དང་ཚོགས་རམས་པ་བཞི་བཅུ་ལྷག་དམ་བཅར་བཞུགས་ཏེ་གཞུང་ཆེན་བཀའ་པོད་ལྔ་ལ་བརྒལ་ལན་དབུ་འཛུགས་མཛད། ང་རང་གྲལ་མཐར་ཡོད་པས་བརྒལ་ལན་གྱི་དཀའ་གནད་དག་དེ་ཙམ་གསལ་པོ་མི་གོ། དེ་ནས་ངས་<<ཡབ་ཀྱི་བུ་མོར་སྤྲིངས་པའི་འཕྲིན་>>ཞེས་པའི་དེབ་ཆུང་དེའི་ཁ་ཕྱེས་ཏེ་<<སྲོག་ཆགས་དེ་ཚོ་མངོན་འགྱུར་བྱུང་བ་>>ཞེས་པའི་ལེ་ཚན་འདི་ཀློག་འགོ་བརྩམས།
འདིར་“རྣག་ཉ་ལྟ་བུའི་ཉ་སོབ་དང་སྐམ་སར་ལས་སླ་པོའི་ངང་གནས་སྡོད་མི་ཐུབ་པའི་རིགས་གཏོགས་ཀྱི་སྲོག་ཆགས་ཚང་མ་རིམ་གྱིས་ཇེ་ཉུང་དུ་ཕྱིན་པ་དང་། ཕྱི་ཤིན་མཁྲེགས་པོ་ཅན་གྱི་སེམས་ཅན་རྣམས་ཇེ་མང་ནས་ཇེ་མང་ལ་ཕྱིན་པ་རེད།”ཅེས་ས་སྒང་འདིར་སྲོག་ཆགས་མངོན་དུ་གྱུར་ཚུལ་རགས་བཤད་ཅིག་བྱས་འདུག དེ་ཙམ་གྱིས་སྲོག་ཆགས་མངོན་དུ་གྱུར་པའམ་འཕེལ་རྒྱུས་བྱུང་ཚུལ་ལ་གོ་བ་ཆ་ཚང་ཞིག་སྦྱིན་མི་ཐུབ་ཀྱང་། དོགས་སློང་དང་དཔྱད་གཞིའི་རྩོམ་ཡིག་ཚད་ལྡན་ཞིག་ཏུ་ངོས་འཛིན་བྱེད་འོས།
རྣག་ཉ་ལྟ་བུའི་ཉ་སོབ་དང་སྐམ་སར་ལས་སླ་པོའི་ངང་གནས་སྡོད་མི་ཐུབ་པའི་རིགས་ཇེ་ཉུང་དང་། ཕྱི་ཤིན་མཁྲེགས་པོ་ཅན་གྱི་ཆུ་སྲིན་དང་། གཅན་གཟན། འདབ་ཆགས་སོགས་ཇེ་མང་ཇེ་ལེགས་སུ་སོང་། གཅིག་བྱས་ན་ད་ལྟའི་གླེན་ཞིང་ལྐུག་པའི་དམའ་རིམ་སྲོག་ཆགས་དེ་དག་ཀྱང་ལོ་ངོ་ས་ཡ་དུ་མའི་འཕྲོ་ནས་མི་རུ་འགྱུར་བ་ཡང་མི་སྲིད་པ་མེད་ཅེས་ནེ་རུ་ཁོང་གིས་ཚོད་དཔག་བྱས་ཤིང་། འགྲོ་བ་མི་ཡང་དང་ཐོག་བློ་རིག་ཅུང་ཙམ་གསལ་བའི་སྤྲ་ཞིག་ཡིན་པ་དང་། ཁོས་མུ་མཐུད་དུ་འཕེལ་རྒྱས་ལ་འབད་བརྩོན་བྱས་པས་ད་ལྟ་རང་ཉིད་ནི་རྫོགས་མཐའ་མེད་པའི་འགྲོ་བ་ཞིག་དང་། དུད་འགྲོ་ལས་རྦད་དེ་ཁ་ཁ་ཡིན་པའི་ལྟ་ཚུལ་འཛིན་གྱི་ཡོད་ཅེས་མཇུག་བསྡོམས་བྱས་པ་ལ་བལྟས་ན། ནང་པ་སངས་རྒྱས་པས་དང་ཐོག་སེམས་ཅན་ཐམས་ཅད་ལས་ཉོན་གྱི་གཞན་དབང་དུ་གྱུར་ཅིང་། རིམ་གྱིས་རང་ཉིད་ཀྱི་འཕེལ་རྒྱས་ལ་འབད་བརྩོན་དང་། སྒྲུབ་པ་ཉམས་ལེན་བྱས་ན་སེམས་ཅན་ཐམས་ཅད་སངས་རྒྱ་བར་ཚིག་ཐག་བཅད་པ་དེའང་ལྷ་སྒྲུང་ཞིག་མིན་པའི་ངེས་པ་མི་སྟེར་རམ།
ཡང་ཁོང་གིས་སྲོག་ཆགས་རྣམས་ཀྱིས་རིམ་བཞིན་རང་ཉིད་རང་གི་ཁོར་ཡུག་དང་རན་པོ་བཟོས་པ་རེད་ཟེར། དཔེར་ན་དགུན་ཟླ་དང་འཁྱགས་རོམ་གྱིས་ཟིན་པའི་ས་ཆར་གནས་པའི་འདབ་ཆགས་དང་བྱོལ་སོང་དུད་འགྲོའི་རིགས་ཀྱི་སྤུ་མདོག་ཁ་བ་ལྟར་དཀར་པོ་ཡིན་ཞིང་། ལྗང་མདོག་གི་རྩི་ཤིང་དང་ལྗོན་ཤིང་མང་སའི་ཚ་བའི་ལུང་པར་གནས་པའི་སེམས་ཅན་དེ་དག་གི་སྤུ་མདོག་ལྗང་ཁུ་དང་རང་ཉིད་གནས་སའི་ཁོར་ཡུག་དང་རན་པོ་ཡོད། དེ་ནི་ཁོང་ཚོས་རང་ཉིད་རང་གི་ཁོར་ཡུག་དང་རན་པོ་བཟོས་པའི་དན་རྟགས་དང་། རང་ཉིད་དགྲ་ལས་སྲུང་སྐྱོབ་བྱེད་ཕྱིར་རང་གི་ཁ་དོག་ལ་འགྱུར་བ་བཏང་བ་རེད་ཅེས་བརྗོད་ཡོད།
མ་ཟད་ས་གཞི་འདི་དང་ཐོག་ནགས་ཚལ་འཐུག་པོ་ཞིག་དང་འབྲེལ་བའི་འདམ་རྫབ་ཅིག་གིས་ཡོངས་སུ་ཁྱབ་ཅིང་། དེའི་རྗེས་ས་སྒང་འདིའི་འགྱུར་ལྡོག་ལ་བརྟེན་ནས་ནགས་ཚལ་དེ་དག་རྡོ་འབོར་ཆེན་མང་པོས་གབ་པ་རེད་ཅེས་བརྗོད་ཡོད། དེའི་བདེན་དཔང་དུ་ང་ཚོས་གཏེར་ཁ་སྔོག་པ་ལས་རྡོ་སོལ་རག་པ་དང་། དེའང་སའི་གཏིང་ཟབ་ས་ནས་ཐོན་གྱི་ཡོད་ཅེས་བཀོད་ཡོད། དེ་དག་ཚང་མ་དོན་དངོས་དང་མཐུན་མིན་གང་ཡིན་ཡང་། ཡིད་ལ་འཛིན་སླ་བའི་དཔེར་མཚོན་དང་འགྲེལ་བཤད་ལྷུག་པོར་གནང་འདུག
2019/1/16ལ་རང་ཤག་ཏུ་བྲིས།
འཇིག་རྟེན་ས་གཞི་ཆགས་རབས་དང།
སྲོག་ཆགས་སྐྱེ་འགྲོ་འཕེལ་རིམ་སོགས་།
རིག་པས་དཔྱད་ན་དཔྱད་ལུགས་རེ།
ནང་ཆོས་རིག་པས་བསྟན་པའི་བརྟེན་འབྱུང་ལྟ།
ཚན་རྩལ་རིག་པས་བསྟན་པ་དངོས་གཙོ་གཉིས།
དོན་དངོས་ཚོད་དཔག་བློ་ཡིས་དཔྱད་པ་ལས།
གཅིག་ཏུ་ངེས་པའི་གནས་ལུགས་བར་ཐག་འགྱངས།
བཞེས་ས་རྐང་ཆག་འདི་འདྲ་མ་བྲིས་ན་བཟང་། ཡབ་ཀྱིས་ཞེས་བྲིས་ཚར་བའི་རྗེས་ལ་བོུར་ཞེས་པའི་ཚབ་ལ། སྲས་མོར་ཞེས་བྲིས་ན། ཡབ་ཀྱིས་སྲས་མོར་ཕུལ་བའི་ཕྲིན་ཞེས་བྲིས་ན་ལེགས། དེ་མིན་ཕས་བོུར་སྤྲིངས་པའི་ཕྲིན་ཡིག་ཅེས་བྲིས་ན་ལེགས་ཤོས་སུ་མཐོང་།
ཡབ་ཀྱིས་བུ་མོར་སྤྲིངས་པའི་འཕྲིན་ཞེས་པའི་མུ་འབྲེལ་བཀླགས་བྱང་། (5)
དེའང་བཀླགས་ཚར།