ཀླུ་སྨྱོན།
ཞི་བདེའི་གཟེངས་རྟགས་ལ་ཕུལ།
ཁ་སང་། ས་གཞི་ཡོངས་རྫོགས་མུན་ནག་གིས་ཟིན་ཅིང་། བོད་ཀྱི་གངས་རི་རེ་རེ་བཞིན་ཐག་ཉེ་རིང་གང་ནས་བལྟས་ཀྱང་མཐོང་མི་ཐུབ་པར་གྱུར། ཉི་མ་ནུབ་ཕྱོགས་སུ་ཕེབས་པ་དང་། ཟླ་བ་ཤར་ཕྱོགས་སུ་ལུས་པས། ཕོ་བྲང་པོ་ཏ་ལའི་དབུ་རྩེ་ཡང་མུན་ནག་གི་ཁྲོད་དུ་དབུགས་རིང་འཐེན་བཞིན་ཡོད། བར་སྐོར་དུ་མདོ་དབུས་ཁམས་གསུམ་གྱི་གནས་སྐོར་བ་ཁྲི་སྟོང་གི་འཚང་ཁ་ཇི་འདྲས་ཆེ་ཡང་། མུན་ཁྲོད་དུ་ཁོ་ཚོས་ཕྱོགས་གང་ཞིག་ཏུ་ཇོ་བོ་ཡིད་བཞིན་ནོར་བུ་བཞུགས་ཡོད་མེད་ཙམ་ཡང་ཤེས་དཀའ། བོད་ཡུལ་ཧྲིལ་བོ་འདི་ཤོག་ངོས་ནག་པོའི་སྟེང་དུ་སྣག་ཚ་ནག་པོས་བྲིས་པའི་ལོ་རྒྱུས་ཤིག་ཏུ་གྱུར་ཡོད།
དེ་རིང་། ཉི་མ་བགྲེས་སོང་ཞིག་ནུབ་ཕྱོགས་ཀྱི་མཁའ་མཐའ་རུ་ནོ་སྦེལ་ཞི་བདེའི་གཟེངས་རྟགས་ཀྱི་མཚམས་སྤྲིན་སྙིང་རྗེ་བོ་ཞིག་གི་ཀློང་དུ་འོད་སྟོང་འགྱེད་འཕྲོ་དང་བཅས་མཐོང་ཐུབ་ཅིང་། དེས་གཤགས་པའི་མཁའ་ལམ་ཧྲིལ་བོར་ངོ་མཚར་དང་མཛེས་སྡུག ཞི་བདེ་དང་དྲོད་སྣང་གིས་ཁྱབ་བསྡད་ཡོད་ཅིང་། དེའི་འོད་ཟེར་གྱི་ཀློང་ན་ལོ་རྒྱུས་ཀྱི་དྲན་རྟེན་དུ་གྱུར་པའི་ཕོ་བྲང་པོ་ཏ་ལ་ཡང་མཐོང་ཙམ་ཡལ་ཙམ་བྱེད་པ་དང་། བར་སྐོར་གྱི་མཇལ་སྐོར་བ་ཚོས་ཀྱང་ཇོ་ཁང་གི་སྒོ་རྙེད་ཙམ་རླག་ཙམ་བྱེད་བཞིན་ཡོད། དུས་ཚོད་འཁོར་སྐྱོད་ཆོས་ཉིད་བཞིན་བྱས་ན་ཟླ་བ་ཞིག་ཤར་ཕྱོགས་ནས་འཆར་དགོས་པའི་དུས་སུ་བསླེབས་ཟིན་མོད། ཆ་ཤས་ཡོངས་སུ་རྫོགས་ཟིན་པའི་ཟླ་བ་དེ་རྒྱང་རིང་གི་མུན་ཁྲོད་ཅིག་ཏུ་ལུས་བསྡད་ཡོད་སྐད།
སང་ཉིན། དུས་ཚོད་ཀྱི་དབང་གིས། ཆོས་ཉིད་ཀྱི་རྐྱེན་གྱིས། དྲོད་ཁོལ་འཛོམས་པའི་ཉི་མ་དེ་ཡང་ནུབ་ཕྱོགས་ཀྱི་མཁའ་དབྱིངས་ནས་ཡལ་སྲིད་ཅིང་། ས་གཞི་ཧྲིལ་བོ་འདི་སླར་ཡང་མུན་ནག་གིས་ཁེངས་སྲིད་པས། རྒྱང་རིང་གི་སྐར་ཚོགས་ལྟ་བུའི་བོད་མི་རེ་རེས། རང་ཉིད་ཀྱང་མཚན་མོའི་ཚེ་སྲོག་ཏུ་གྱུར་པའི་སྐར་མ་འོད་ཆེན་ཞིག་ཡིན་པའི་ངེས་ཤེས་དང་། སྐར་མ་ཆུང་ཆུང་ཞིག་གི་འོས་འགན་དེ་གང་ཡིན་ངོས་ཟིན་རྒྱུ་དེ་ཧ་ཅང་གལ་ཆེ་བ་དང་། སྟོང་ཁམས་ཆེན་པོ་འདི་ནས་རང་ཉིད་ཀྱི་སྐར་མའི་ཁྱིམ་རྒྱུད་མཛེས་སྡུག་ལྡན་པ་ཞིག་བསྐྲུན་རྒྱུ་དེ་ནི་ང་ཚོ་ལས་དབང་གཅིག་པའི་སྐར་མ་འོད་ཆེན་དག་གི་མ་འོངས་པའི་དམིགས་འབེན་མ་ཡིན་ནམ། ང་ཚོ་སྐར་མ་ཡོད་ཚད་མཉམ་གཅིག་ཏུ་བསྡུས་ཏེ་ད་ལྟའི་ནུབ་ཕྱོགས་ཀྱི་མཁའ་དབྱིངས་སུ་མེ་ལྟར་འབར་བཞིན་པའི་ཉི་མ་བགྲེས་པོ་དེའི་ཚབ་བྱེད་ཐུབ་པའི་ཉི་མ་གསར་པ་ཞིག་བྱེད་རྒྱུ་ནི་ང་ཚོའི་འགན་ཁུར་མ་རེད་དམ། ང་ཚོ་ཉི་མ་གསར་པ་ཞིག་ཏུ་གྱུར་པ་དེའི་འོད་སྣང་གི་ཀློང་ནས་ང་ཚོས་མང་པོའི་རིང་བརླགས་ཟིན་པའི་འོད་ལྡན་ཟླ་བ་དེ་འཚོལ་རྒྱུ་ཡང་ང་ཚོའི་རེ་འདོད་མ་ཡིན་ནམ།
ངའི་ཚེ་འདི་ཕྱི་གཉིས་ཀྱི་སྐྱབས་གནས་དམ་པར་གྱུར་འཕགས་མཆོག་སྤྱན་རས་གཟིགས་སྐུ་ཉིད་སྐུ་ཚེ་ཡུན་ནས་ཡུན་དུ་བརྟན་པའི་སྨོན་འདུན་གྲངས་མེད་ཞུ།
ཞི་བདེ་དགའ་བའི་༧སྐྱབས་མཆོག་དམ་པ་ཡིས།།
ཞི་བདེ་ལམ་ལ་སྐུ་གཞོན་དུས་སྐབས་ནས།།
ཞི་བདེ་དོན་ལ་འབད་འབུངས་དུ་མ་ཡིས།།
ཞི་བདེ་འོད་སྣང་ཁྱབ་པའི་ལམ་སྟོན་འོག།
ཞེ་བདེ་ལམ་ནས་བོད་མིའི་རང་དེ།།
ཞེ་བདེ་ནུས་པས་ལེན་ཐབས་བརྩོན་པ་དེར།།
ཞེ་བདེ་དགའ་བའི་སྐྱེས་བོ་གྲངས་མེད་ཀྱིས།།
ཞེ་བདེ་དེད་དཔོན་འོས་པའི་ངོས་འཛིན་ཐོབ།།
ཞི་བདེ་ཁ་ནས་བརྗོད་པའི་བོད་པ་ཚོ།
ཞི་བདེའི་དེད་དཔོན་བསྟན་འཛིན་རྒྱ་མཚོ་ཡི།
ཞི་བདེའི་རྟ་བོ་བྲག་རོང་མི་ཁྲིད་རྒྱུ།
ཞི་ལུ་ང་ཡི་སྙིང་གི་རེ་བ་ཡིན།
ཞི་བདེ་ཟླ་བ་དཀར་པོོ།། ཁ་བ་གངས་ཅན་བོད་ལ།།
མྱུར་དུ་ཤར་བའི་སྨོན་མལ།།
ཤར་རྒྱ་ནག་དང་ལྷོ་རྒྱ་གར་གཙོ་བའི་འཛམ་གླིང་གི་སྐྱེ་འགྲོ་ཡོངས་ལ་ཞི་བདེའི་ལམ་བཟང་སྟོན་པར་མཛད་པའི་དུས་རབས་ཉེར་གཅིག་པའི་སྟོན་པ་ཀུན་ཏུ་བཟང་པོ་གངས་ཅན་བོད་ཀྱི་ཆོས་ཀྱི་དབུ་ཁྲིད་བླ་ན་མེད་པ། སྟོན་པ་ཤཱཀྱ་ཐུབ་པའི་གདུང་འཚོབ་དམ་པ་མཁས་བཙུན་བཟང་གསུམ་གྱི་ཡོན་ཏན་གྱི་བདག་ཉིད་ཀྱི་ཆེན་པོ། རིས་སུ་མ་མཆིས་བའི་ཆོས་ལུགས་སྤྱི་དང་བྱེ་བྲག་ཁ་བ་གངས་ཅན་པའི་ས་དགེ་ཀར་རྙིང་བོན་དང་བཅས་བའི་མཐུན་ལམ་གྱི་ཤིང་རྟའི་སྲོལ་འབྱེད། ལྷག་པར་ཏུ་ནུབ་ཕྱོགས་རྒྱལ་ཁབ་སོགས་ཀྱི་རིགས་གསར་སྨྲ་བ་དུ་མར་ཆོས་ཚན་ཟུང་གི་བསམ་བློ་བརྗེ་རེ་དང་བསམ་བློའི་མིག་འབྱེད་པ་ཆེན་པོ། བྱམས་བརྩེ་དང་འབྲེལ་བའི་སྤྱོད་པ་འཚེ་བ་མེད་པ་དང་རྒྱུ་རྐྱེན་རྟེན་འབྲེལ་བསླུ་བ་མེད་པའི་ལྟ་བ་རྟེན་འབྱུང་གི་སྲོལ་འཛིན་པ་ཆེན་པོ། སྐྱབས་གཅིག་མཐོང་བ་དོན་ལྡན་མཆོག་སྐུ་ཚེ་བསྐལ་བ་ཁྲི་ཕྲག་ནས་ཁྲི་ཕྲག་གི་བར་དུ་བརྟན་པར་སྨོན།
༧ ཅོང་བརྡ།
༄། །ཉེ་ཆར་ཕྱི་ཟླ་8པའི་ནང་། །༸གོང་ས་མཆོག་གི་མཚན་འཁོད་པའི། །སྐུ་སྒེར་དྲྭ་ཞབས་ལས་ཁུངས་སུ། །ཕུལ་བའི་ཞུ་ཡིག་གཤམ་གསལ་ལྟར།།
༄། །མཁྱེན་ཡངས་དབུ་འཛིན་རྣམ་པའི་མདུན་སར།
གུས་གསོལ། ༧གོང་ས་མཆོག་གི་རང་རྣམ་«
བཙན་བྱོལ་ནང་གི་རང་དབང་»དེ་༧གོང་ས་མཆོག་གི་མཚན་འཁོད་དྲ་ངོས་སུ་ས་མིག་སྟོང་བར་ཡོད་བཞིན་པ་དེ་ལ། ལྡི་ལི་བོད་ཁང་གིས་ཁུར་བཞེས་ནས་ཉེ་འཆར་དཔར་དུ་བཏབ་པའི་རང་རྣམ་དེ་ག་ཁ་བསྐངས་ཅན«ཕྱི་ཡུལ་གྱི་རང་དབང་»ཞེས་སུ་མཚན་གསོལ་འདུག་པ་དེ་བཞིན་རང་རྣམ་གྱི་ས་མིག་སྟོང་བར་འགོད་རོགས་བསྙེལ་མེད་ཞུ། གཞིས་ལུས་དོན་གཉེར་ཡོད་རིགས་ཚོར་ཕན་རླབས་ཆེ་ངེས་ཡིན་པ་ཞུ་མ་དགོས་པ་བཅས་ཐུགས་འཛིན་དོན་སྨིན་ཞུ་ཡིག་ཏུ།
ཨ་མདོ་ནས་གུས་ཕུལ།
དེ་ནས་ཕྱི་ཟླ་9པའི་ནང་། །འབྱོར་བའི་ཞལ་བཞེས་ཡིག་ལན་ནི། །
༄༅། །གཞིས་བཞུགས་དོན་གཉེར་ཅན་རྣམས་ལ།
ཆེད་ཞུ། ངེད་དྲྭ་བས་ཁྱེད་རྣམས་པའི་ཐུགས་འདོད་ལྟར་༸གོང་ས་མཆོག་གི་རང་རྣམ་
«ཕྱི་ཡུལ་གྱི་རང་དབང་»ཞེས་པ་གང་མགྱོགས་དྲྭ་བའི་ཐོག་འགོད་ངེས་ཡིན་པས་དེ་དོན་ཡིད་འཇགས་འཚལ། ཁོང་གི་ཞབས་ཞུ་བས་2011ཟླ་9ཚེས་15བཟང་པོར་ཕུལ།།
ད་ནི་ལོ་འདིའི་ལོ་མཇུག་སྟེ། །སྒྱིད་ལུག་མ་གནང་ཞབས་ཞུ་བ། །ཞལ་བཞེས་བཞིན་དུ་རང་རྣམ་ཟླ། །གང་མྱུར་དྲྭ་བའི་མཁར་གསལ་ཤོག།
ཁ་བརྡ་ཚང་ནི་ཨ་ཁུ་ཀླུ་སྨྱོན་གྱི་གསང་སྤྱོད་རེད།
དབྱངས་འཛོམས་ལགས། ཁྱོད་ནི་གླེན་པ་ཞིག་རེད། བརྗོད་གཞི་དང་འབྲེལ་མེད་ཀྱི་བཀྲ་མི་ཤིས་བའི་ཚིག་དེ་འདྲ་མ་བཤད་རོགས། །ཨ་ཁུ་གླུ་སྨྱོན་གྱི་འཛམ་གླིང་གི་ཉི་མ་ཟེར་བ་སྐྱག་པ་ཨེ་རེད། ཁ་བརྡ་ཚང་གསང་སྤྱོད་ཡིན་པས་སོ།།