དཀར་མཚོ་སྐྱིད།
བོད་ཀྱི་གསོ་བ་རིག་པའི་ངོས་ནས་བཤད་ན་གཉན་ནད་རེག་དུག་གི་ནད་གཞི་འདི་རྒྱུད་བཞིའི་ནང་དུ་རྩ་བའི་གཉན་རིམས་བཅོ་བརྒྱད་ཡོད་པའི་ཁོངས་སུ་གཏོགས་པར་གསུངས་ཏེ། སྐྱེད་བྱེད་ཡུལ་དུས་ཟས་སྤྱོད་གདོན་རྐྱེན་གྱིས། །སྲིན་འཁྲུགས་ལུས་ཟུངས་བཟས་པས་གཉན་ནད་བྱུང་། །ཤིན་ཏུ་སྲོག་ལ་གཟན་ཕྱིར་གཉན་ཞེས་བྱ། །ཞེས་གསུངས་པ་ལྟར་ནད་གཞི་འདི་སྐྱེད་བྱེད་གཙོ་བོ་ཡུལ་ངན་པ་དང་དུས་ཐ་མའི་སྐབས་སུ་ཟས་དཀར་མངར་གྱིས་གནོད་པར་བྱེད་ཅིང་སྤྱོད་པ་ཕོ་མོ་ཕན་ཚུན་རེག་ཅིང་ལོག་པར་གཡེམ་པ་བཅས་ཀྱི་གདོན་སེམས་ཀྱི་རྐྱེན་ལ་བརྟེན་ནས་ལུས་ཀྱི་གཉན་སྲིན་རྣམས་འཁྲུགས་ཏེ་ཟུངས་ཁྲག་བཟས་པ་དང་ཟད་པས་གཉན་ནད་བྱུང་ཞིང་མཐར་འགྲོ་བའི་སྲོག་ལ་གཟན་ཞིང་འཆི་བར་བྱེད་པའི་འགོ་བའི་ནད་རིགས་ཤིག་ཡིན་པར་ཕྱོགས་ཙམ་བསྟན་ཡོད་པ་དང་། གཞན་ཡང་། ད་དུང་གསོ་རིག་གི་གཞུང་ལས། འདི་ལ་སྒོས་ཀྱི་གཉེན་པོས་མ་སླེབས་ན། །སྨན་དཔྱད་གང་ཡང་ནད་ཀྱི་གྲོགས་ཡིན་ཏེ། །གསོ་བ་ལོག་ཅིང་སྲོག་གི་གཤེད་མར་འགྲོ། །ཞེས་སོགས་གསུངས་པས་ནད་གཞི་འདི་ལ་དམིགས་བསལ་གྱི་སྨན་སྦྱོར་གྱི་ནུས་པའམ་གཉེན་པོ་ཁྱད་པར་བ་ཞིག་མ་བསྟེན་ན་སྨན་གྱི་བཅོས་ཐབས་གཞན་གང་གིས་ཀྱང་ཕན་ཐོགས་མེད་པ་དང་དྲག་སྐྱེད་འབྱུང་གི་མེད་པས་གཉན་ནད་རེག་དུག་གི་ནད་གཞི་འདིས་དུས་ཐ་མའི་སྐབས་སུ་འཛམ་བུ་གླིང་གི་མི་རྣམས་ཀྱི་ཚེ་སྲོག་འཕྲོག་འགྲོ་ཡི་ཡོད་པ་སོགས་བསྟན་ཡོད།
སྤྱིར་HIV AIDS་ནད་གཞི་འདི་འཛམ་གླིང་ཁྱོན་ཡོངས་ཀྱི་ལོ་ན་རྒན་གཞོན་དང་། ཕོ་མོ་སོགས་ཀྱི་དབྱེ་བ་མེད་པར་མི་ཚང་མ་ལ་འགོས་ཀྱི་ཡོད་པ་དང་། དང་པོ། HIV་གཉན་སྲིན་ཡོད་པའི་མིའི་ཕན་ཚུན་གྱི་ཁྲག་བརྗེ་ལེན་དང་གཞན་གྱི་སྤུ་གྲི་དང་སྨན་ཁབ་ལ་སོགས་རང་གིས་བེད་སྤྱོད་བྱས་པ་སོགས་ལ་བརྟེན་ནས་འགོས་ཀྱི་ཡོད་པས་ཁྲག་བརྗེ་ལེན་བྱེད་པའི་སྐབས་སུ་ངེས་པར་དུ་དུག་སེལ་བྱས་ཟིན་པའི་ཁྲག་བརྗེ་ལེན་བྱེད་དགོས་པ་དང་མི་གཞན་གྱི་སྤུ་གྲི་དང་། སྐྲ་གྲི སྨན་ཁབ་སོགས་མཉམ་སྤྱོད་མི་བྱེད་པར་ཤེས་དགོས། གཉིས་པ། ཨ་མའི་འོ་མ་བརྒྱུད་ནས་རང་གི་ཕྲུ་གུ་ལ་HIV་འབུ་སྲིན་དེ་འགོས་ཀྱི་ཡོད་པས། ཕྲུ་གུ་ལ་HIV་ན་ཚ་དེ་མི་འགོས་པའི་ཐབས་ལམ་གྱི་ཐོག་ལ་སྨན་པ་ལ་སྐད་ཆ་དྲིས་ཏེ་ཨ་མས་HIV་སྨན་ཟ་བ་དང་ཨ་མའི་འོ་མ་ལ་མ་བརྟེན་པར་ཕྲུ་གུ་འཚར་ལོངས་འབྱུང་དུ་འཇུག་དགོས། གསུམ་པ། HIV་གཉན་སྲིན་ཡོད་པའི་མི་དང་མཉམ་དུ་ལུས་འབྲེལ་བྱས་པ་ལ་བརྟེན་ནས་ན་ཚ་དེ་འགོས་ཀྱི་ཡོད་པས། HIV་གཉན་སྲིན་དེ་མི་སུ་ལ་ཡོད་མེད་གསལ་བོ་མི་ཤེས་པས་ཕོ་མོ་ཕན་ཚུན་ལུས་འབྲེལ་བྱེད་པའི་སྐབས་སུ་སྲུང་སྐྱོབ་ཀྱི་འགྱིག་ཤུབས་ངེས་པར་དུ་བེད་སྤྱོད་བྱེད་དགོས་པ་དང་ཕྲུ་གུ་སྐྱེས་པའི་ཆེད་དུ་ཡིན་ན་ཕོ་མོ་གཉིས་ཀ་ལ་HIV་གཉན་སྲིན་ཡོད་མེད་ངེས་པར་དུ་བརྟག་དཔྱད་བྱེད་དགོས། དེ་ཚོ་ནི་ཉེན་ཁ་ཆེ་བའི་བརྒྱུད་ལམ་གསུམ་ཡིན་པས། HIV་ན་ཚ་སྔོན་འགོག་བྱེད་པའི་ཐབས་ལམ་ལ་ངེས་པར་དུ་དོ་སྣང་བྱ་དགོས་པ་དང་། ང་ཚོའི་མཆིལ་མ་དང་སྣ་ཆུ། ལུད་པ། རྔུལ་ནག མིག་ཆུ། བཙོག་པ་དང་གཅིན་པ་སོགས་བརྒྱུད་ནས་HIV་འབུ་སྲིན་དེ་འགོས་ཀྱི་མེད་པ་སོགས་ཚང་མས་ཐུགས་ལ་འཛིན་པར་ཞུ། ། ཐུགས་རྗེ་ཆེ།