འབོ་ར་ས་ཁུལ་དུ་རྒྱ་གཞུང་ལ་སྔ་ཕྱི་ངོ་རྒོལ་བྱེད་པའི་རོམ་པ་ཁག་ཕྱོགས་བསྡུས།

བསོད་ནམས་ཀྱིས།

ཕྲན་གྱིས་འབད་བརྩོན་གང་མང་བྱས་མཐར་དེ་རིང་གཞི་ནས་བདག་གི་ལག་ཏུ་ཕ་ཡུལ་མདོ་སྨད་ལྷོ་རྒྱུད་བླ་བྲང་བཀྲ་ཤིས་ཁྱིལ་གྱི་ལྷ་སྡེ། འབོ་ར་ས་ཁུལ་དུ་འཇིགས་ལ་ཉེ་བའི་རྒྱ་ནག་གུང་ཁྲན་སྲིད་གཞུང་གིས་ད་ལྟའི་བར་དུ་བོད་ས་ཡོངས་ལ་ཚུལ་མིན་གྱི་གཡོ་ཇུས་སྣ་ཚོགས་སྤྱད་དེ། བོད་ཀྱི་བླ་སྲོག་སྐད་ཡིག་གི་མཚོན་པའི་ཆོས་དང་། མི་རིགས་རང་གི་ཁྱད་ཆོས་ལྡན་པའི་སྣ་མང་རིག་གཞུང་རྩ་ཆེན་དག་རྩ་མེད་དུ་བཟོས་དང་བཟོ་བཞིན་པར། ས་གནས་འདིར་སྔ་ཕྱི་ངོ་རྒོལ་རིམ་པ་མང་བོ་བྱས་ཡོད། ལྷག་པར་ན་ནིང་ནས་ཤེས་གསལ་ལྟར་ཞི་བའི་ངོ་རྒོལ་གྱི་ངོ་བོ་ཤུགས་ཆེ་རུ་ཕྱིན་ཏེ། གཞི་བྱེས་གཉིས་ཀྱི་རྒྱལ་གཅེས་དཔལ་བོ་གང་མང་ཞིག་གིས་སྙིང་སྟོབས་ཆེན་པོས་གང་ལ་ཞུམ་པ་མེད་པར་གཅེས་པའི་ལུས་པོ་དམར་བོའི་མེ་ལ་སྒྲོན་ཏེ་ཞི་བའི་འཐབ་རྩོད་གནང་བར་རྒྱབ་སྐྱོར་ཡོད་པའི་མཚོན་བྱེད་ལ། ཉེ་ཆར་ཕྱི་ཟླ་༣པའི་ཚེས་༢༠ཉིན། ས་གནས་འདིར་ཉིན་རྒྱབ་ཆུ་ཚོད་༢བ་མ་ཟིན་ཙམ་ལ་གྲྭ་མང་གིས་ལག་ཏུ་༧གོང་ས་མཆོག་གི་སྐུ་པར་དང་རྒྱལ་དར་གང་མང་ཁྱེར་ཏེ་རྒྱ་ནག་གི་གདུག་རྩུབ་ཅན་གྱི་སྲིད་ཇུས་ལ། ས་གནས་སྲིད་གཞུང་གི་རྒྱ་སྒོའི་མདུན་ནས་(༧གོང་ས་མཆོག་ཕྱིར་བོད་དུ་ཕེབས་འཇུག་དགོས་པ་དང་། བོད་པར་འགྲོ་བ་མིའི་རང་དབང་སྤྲོད་དགོས་པ། མི་རིགས་དབྱེ་འབྱེད་ཀྱི་སྲིད་ཇུས་དག་མཚམས་འཇོག་དགོས་པ་)སོགས་ཀྱི་དགོས་འདུན་བཏོན་ཏེ་སྲིད་གཞུང་གི་སྒོ་དང་། སློབ་གྲྭ། སྲང་ལམ་སོགས་ནས་དེ་ལྟར་ཞི་བའི་སྐད་འབོད་བྱས་པར། དེ་མ་ཐག་དགོན་མཐའ་ཡོངས་དམག་གིས་སྐོར་ཏེ་ཕྱི་ནང་གི་འགྲོ་འོང་ཚང་མ་བཀག དགོང་མོའི་ཆུ་ཚོད་༡༢་དང་༣༠་ཙམ་ལ་ཁུལ་དང་རྫོངས་གི་དམག་མི་མང་བོ་དགོན་ནང་འཇབ་རྒྱུག་བྱས་ཏེ་དགེ་འདུན་པ་༤༠་ལྷག་ས་གནས་སྲིད་གཞུང་དུ་བཙན་ཁྲིད་བྱས་ཡོད་པས། གྲྭ་མང་ཚོགས་ཏེ་ད་ལྟ་མྱུར་དུ་གློད་བཀྲོལ་མ་བཏང་ན་ཁོ་ཚོས་ཡང་བསྐྱར་ངོ་རྒོལ་སྐད་འབོད་བྱ་རྩིས་བྱེད་པ་ངར་ཤུགས་ཆེ་རུ་སོང་བས། དགོན་པའི་དོ་དམ་མི་སྣས་སྲིད་གཞུང་ལ་གྲྭ་མང་ངར་ཤུགས་ཆེ་རུ་འགྲོ་བཞིན་འདུག་པས་ལམ་སེང་མ་བཏང་ན་གནས་ཚུལ་ཚབས་ཆེན་བྱུང་ན་འགན་ཡོད་ཚད་ང་ཚོས་འཁུར་མི་ཐུབ་པས་འཕྲད་དུ་བཏང་ན་དགའ་བའི་བརྡ་ལན་སྤྲད་དེ་ཛ་དྲག་ངང་ཡོད་པའི་སྐབས་དེར། གནས་ཚུལ་དེ་དགོན་པའི་བླ་ཆེན་རྒྱལ་མཁན་པོས་གསན་ཏེ་ཁོང་བླ་བྲང་ནས་ཆེད་ཕེབས་ཀྱིས་བར་འདུམ་མཛད་དེ་ཞི་འཇགས་སུ་བཏང་ཡོད་ནའང་། རྒྱ་གཞུང་ཚིག་ཐོག་ནས་མ་བསྡད་པར། ཉིན་གཉིས་ཀྱི་རྗེས་ཏེ་ཚེས་༢༣ཉིན་ཁུལ་ལམ་རྫོང་གང་ཡིན་མ་ངེས་པའི་བདེ་སྲུང་མི་སྣས་ས་གནས་སྲིད་གཞུང་དང་། དགོན་པའི་དོ་དམ་མི་སྣར་སྙན་ཞུ་མེད་པར་ཁྲིམས་འགལ་གྱིས་སྒོ་ནས་དགོན་པར་ཡང་བསྐྱར་གསང་སྟབས་ཀྱིས་འཛུལ་ཏེ། རང་ལོ༣༠ཡིན་པའི་ཀད་ཀྱ་སྡེ་བའི་གྲྭ་སངས་རྒྱས་རྒྱ་མཚོ་དང་། རང་ལོ་༢༣ཅན་གྱི་གོའུ་བརྡ་སྡེ་བའི་གྲྭ་སྐལ་བཟང་བློ་གྲོས། རང་ལོ་༢༠་ཅན་གྱི་ལུང་ཀྱོག་འགབ་མའི་གྲྭ་དགེ་འདུན་བསོད་ནམས། རང་ལོ་༢༢་ཡིན་པ་སྒྲོག་གོང་མའི་གྲྭ་བཀྲ་ཤིས་རྒྱ་མཚོ་བཅས་གྲྭ་བ་བཞི་འཛིན་བཟུང་བྱས། ཁོང་ཚོ་ཕར་ཁྲིད་སྐབས་གཞུང་ལམ་སྟེང་བསླེབས་པ་དང་ཁོ་ཚོའི་མགོ་ལ་རས་ཁུག་ནག་པོ་རེ་གོན་ཏེ་བཙོན་ཁང་ནང་མ་འབྱོར་བར་ཅི་ཡང་མི་མཐོང་བར་བྱས། བཙོན་ཁང་ནང་ནས་ཀྱང་སྤྱི་མཚུངས་ལྟར་གཉིད་ཁུག་ཏུ་མ་བཅུག་པ་དང་། བཟོད་པར་དཀའ་བའི་གཅར་རྡུང་སྣ་ཚོགས་བྱས་ཏེ། ཁ་ཤས་ཟླ་གཅིག་དང་། ཁ་ཤས་ཉིན་ཉི་ཤུ་ཡས་མས་ལ་བཙོན་འཇུག་བྱས་ཏེ་མཐར་བཙོན་གྲོལ་བཏང་། ཚུར་ཡོང་སྐབས་ཀྱང་སྔོན་ལྟར་དགོན་མཐའ་མ་སླེབས་པར་རས་ཁུག་ནག་པོས་མགོ་བོ་གཡོགས་ཡོད་པས་ཡུལ་མི་དང་ཕ་མ་ཕར་ཟད། ཁོ་ཚོས་ཀྱང་ཁོང་ཚོ་ས་གནས་གང་ཞིག་ཏུ་ཁྲིད་དེ་བཙོན་འཇུག་བྱས་པའང་ཤེས་མི་འདུག ནམ་རྒྱུན་རྒྱ་ནག་གིས་བྱེད་སྲོལ་ལྟར་ཁོང་རྣམས་དགོན་ནང་ནས་ཕྱི་ལ་འགྲོ་སྐབས་གཞུང་ལ་གང་ལ་གང་གི་ཆེད་དུ་འགྲོ་བཞིན་ཡོད་པའི་སྙན་གསེང་ཞུ་དགོས་པ་སོགས་ཀྱི་བཀའ་རྒྱ་འོག་ཏུ་ཡོད། ཉིན་འདི་དག་ལ་ས་ཁུལ་དུ་ཀློག་བཏང་མེད་པ་དང་། དགོན་མཐའ་ཡོང་དྲག་དམག་གིས་ཉིན་མཚན་གཉིས་ལ་སྐོར་ཏེ་གོམ་རེ་མཚམས་སུ་དམག་རེ་བཞག་ཏེ་དམ་དྲག་ཧ་ཅང་ཤུགས་ཆེན་བྱེད་ཡོད་པས། ཚེས་༢༡ཉིན། ནོར་ལུང་དང་གདར་བ་སྡེ་བ་གཉིས་ཀྱི་ནང་ནས་རྒན་རྒོན་གཉིས་གྲོངས་ཏེ་འདས་མཆོད་སྒྲུབ་པར་དགེ་འདུན་པ་གདན་འདྲེན་ཞུ་རུ་ཡོང་མཁན་ཚོ། དགོན་ནང་དུ་འགྲོར་མི་འཇུག་པ་མ་ཟད། ལེན་མཁན་ཚོར་མི་དགེ་བའི་འདྲི་གཅོད་སྣ་ཚོགས་བྱས་ཏེ་དགེ་འདུན་པ་ཚོ་འདས་མཆོད་སྒྲུབ་པར་ཉིན་རྒྱབ་བར་བཏང་མི་འདུག
གཞན་ད་ལོའི་ཆུ་འབྲུག་ལོའི་ཨ་མདོའི་ལོ་སར་སྐབས་ཀྱང་། ང་ཚོའི་གཤེགས་ཟིན་པའི་རྒྱལ་གཅེས་དཔའ་པོ་དཔའ་མོ་ཚོའི་ཆེད་བོད་རང་གི་ཐུན་མིན་འགྲོ་ལུགས་ལྟར་མྱ་ངན་གྱི་རྣམ་པའི་ཐོག་ནས་སེམས་ཁོངས་དྲོན་མོར་སྡུག་གིས་མནར་བཞིན་བོད་མི་ཚོས་ལོ་སར་བྱེད་ཀྱིན་ཡོད་པ་ལྟར། ས་གནས་འདིའི་སྐྱ་སེར་ཡོངས་ཀྱིས་ཀྱང་དེ་ལྟར་བྱེད་ཀྱིན་ཡོད་པ་སྨྲོས་མ་དགོས་མོད། རྒྱ་གཞུང་གིས་ཤོག་སྦག་རྒྱག་རྒྱུ་དང་རྒྱས་སྤྲོ་བྱེད་པར་ངན་སྐུལ་བྱས་པ་དང་། ལྷག་པར་གཞུང་ལམ་འགྲམ་གྱི་སྡེ་པ་ཁ་ཤས་ལ་གཞུང་གི་ལས་བྱེད་ཆེད་བཅར་གྱིས་མི་ཚང་རེར་རྒྱ་སྒོར་ལྔ་སྟོང་རེ་སྤྲད་དེ་ལོ་སར་གཏོང་དགོས་སྐོར་གྱི་གཡོ་ཐབས་སྣ་ཚོགས་བྱས་ཀྱང་། ལས་གནས་དང་དགོས་དབང་གིས་གནས་སྐབས་རྒྱ་གཞུང་ལ་མི་བསྟུན་ཐབས་མེད་ཀྱི་མི་ཚང་རེ་གཉིས་ཤིག་ལས་ལེན་མཁན་བྱུང་མི་འདུག
དེའི་རྗེས་བོད་ལོའི་ལོ་སར་སྐབས་ཡང་རྒྱ་གཞུང་གིས་སྔོན་མ་དང་ལྡོག་ཏེ་ཤོག་སྦག་སོགས་བརྒྱབ་ནས་ལོ་སར་ལ་རོལ་མི་ཆོག་པའི་བཀའ་བཏང་ཡོད་ནའང་། གྲྭ་བ་འགའ་ཤས་ཀྱིས་ཤོག་སྦག་སོགས་ཉོས་ཏེ་ལོ་སར་གྱི་རྟེན་འབྲེལ་ལ་གྲ་སྒྲིག་བྱས་ཀྱང་། གཞན་ཁ་ཤས་ཀྱིས་ད་ལོ་བོད་པ་ཚང་ལོ་ནག་ཡིན་པས་གཞི་བྱེས་གཉིས་སུ་མི་མང་གིས་ཆོས་ཕྱོགས་ཀྱི་བྱེད་སྒོ་ཙམ་ལས་མེད་པས། ང་ཚོས་ཀྱང་དེ་མཐུན་བྱེད་ན་ལེགས་ཟེར་ནས་གྲྭ་བ་ཞིག་གིས་ཁོང་རང་སྒེར་ངོས་ནས་འགྲོ་སོང་བཏང་ཏེ་ཞག་སྒྲོན་མང་བོ་ཉོས་ཏེ་ལོ་སར་ཚེས་གཅིག་གི་དགོང་མོར་དགེ་འདུན་པ་ཡོངས་ཀྱིས་༧རྒྱལ་བའི་ཞབས་བརྟན་གསུང་བཞིན་མར་མེ་ཁྲོམ་སྐོར་བྱས། འདིའི་སྐོར་གྱི་པར་དང་བརྙན་ཐུང་ཞིག་ཀྱང་ཡོད་མོད་ད་དུང་ལེན་ཐུབ་མ་སོང་། ལེན་ཐབ་བྱེད་དང་བྱེད་བཞིན་ཡོད།
ད་དུང་ལོ་འདིའི་སྨོན་ལམ་སྐབས་ཀྱང་། སྨོན་ལམ་མ་རྫོགས་པར་ཉིན་མཚན་གཉིས་ཀར་དམ་དྲག་ཧ་ཅང་ཤུགས་ཆེན་བྱེད་པ་དང་། བཅོ་ལྔའི་དགོང་མོ་མེ་ཏོག་མཆོད་པའི་ནང་༧གོང་ས་མཆོག་གི་སྐུ་པར་བཞག་པའང་། སྲིད་གཞུང་གི་མི་སྣ་ཡོང་སྟེ་འཇོག་མི་ཆོག་པའི་བཙན་བཀའ་བཏང་བར་གྲྭ་བ་ཚོས་ཉན་འཇོག་མ་བྱས་པས། དགོན་པ་རང་ན་བཞུག་པའི་བླ་མ་ཞིག་སྐད་བཏང་སྟེ་ལེན་དགོས་པར་བཤད་ནའང་། ངོས་ལེན་མ་བྱས་པར་མཐར་༧གོང་ས་མཆོག་གི་སྐུ་པར་གྱི་མདུན་དུ་བླ་ཆེན་གཞན་ཞིག་གི་སྐུ་པར་བཞག་ཏེ་༧་རྒྱལ་བའི་སྐུ་བརྙན་མི་མཐོང་བར་བྱས་པའི་གནས་ཚུལ་ཡང་བྱུང་ཡོད།
ཁ་སང་དེ་རིང་གི་གནས་སྟངས། ངོ་རྒོལ་གྱི་ཉིན་དེ་ནས་བཟུང་ཁུལ་དང་རྫོང་ས་གནས་སྲིད་གཞུང་གི་མི་སྣ་ལས་གྲུབ་པའི་ལས་ཁུངས་ཤིག་དགོན་པའི་ནང་ཆེད་བཙུགས་ཀྱིས་དགོན་པར་ཚོགས་དང་ཆོས་གྲྭ་ཡོད་མེད་ལ་མ་ལྟོས་པར། གོང་གི་འཛིན་བཟུང་བྱས་པའི་གྲྭ་༤༠་ལྷག་ལ་ཉིན་ལྟར་སྔ་དྲོ་ཚོུད་༩:༣༠ནས་༡༡བར་དང་། ཕྱི་དྲོ་ཚོུད་༣:༣༠ནས་༥བར། གྲྭ་བ་རྒན་གྲས་ཚོ་ལ་བདུན་རེ་ནང་ཐེངས་གཅིག་རེ་དང་། དར་མའི་གྲས་ལ་བདུན་རེ་ནང་ཐེངས་གཉིས། གཞན་གྲྭ་མང་ཡོངས་བདུན་རེ་ནང་ཐེངས་གསུམ་རེ་བྱེད་དེ་འདི་ལྟར་རྒྱལ་གཅེས་ཆོས་གཅེས་ཀྱི་སློབ་གསོ་སྤེལ་དང་སྤེལ་གྱིན་ཡོད་འདུག
ཡང་ཟླ་༤པའི་ཚེས་༧ཉིན། སྔོན་མ་བཞིན་བློ་བུར་དུ་དགོན་ནང་ལ་རྒྱ་གཞུང་གི་འབྲེལ་ཡོད་མི་སྣ་ཡོང་ཏེ། རང་ལོ་༢༠ནང་ཡིན་པའི་ཚ་ངུ་ཐང་སྡེ་བའི་གྲྭ་དཀོན་མཆོག་རྒྱ་མཚོ། དགོན་པའི་དོ་དམ་མི་སྣར་མགོ་སྐོར་བཏང་ཏེ་འཛིན་བཟུང་བྱས་ནས་ད་ལྟའང་གར་ཡོད་ཤེས་རྟོགས་བྱུང་མེད།
གཞན་ད་ལོའི་ཨ་མདོའི་ལོ་སར་ཚེས་༦ཉིན་སྡེ་དཔོན་ཚོ་བསྡུས་ནས་ཚོགས་ཐོག་ཏུ་གསལ་བསྒྲགས་བྱས་ཟིན་པ་ལྟར། འཚོ་རྟེན་ཞིང་ལས་གཙོ་བོ་ཡིན་སའི་ས་གནས་འདིའི་གཞུང་ལམ་འགྲམ་གྱི་གྲོང་སྡེ་ཚོར། རྒྱ་གཞུང་གིས་མིང་སྙན་མོ་ཞིག་བཏགས་ཏེ་ཞིང་ནང་དུ་ལོ་ཏོག་འདེབས་སུ་མ་བཅུག་པར་དེའི་ཚབ་དུ་གཞུང་ལམ་འགྲམ་གྱི་ས་ཞིང་ཚང་མིའི་ནང་མི་འདོད་བཞིན་དུ་རྩྭ་བཏབ་དུ་བཅུག་ཡོད་པའི་གནས་ཚུལ་གསར་བ་དང་བཅས།
སྤྱིར་ས་གནས་འདིར་ང་བརྒྱད་ནས་དེ་རིང་གི་བར་ངོ་རྒོལ་རིམ་པ་མང་བོ་བྱས་ཡོད་པས་གཤམ་དུ་གལ་ཆེན་ཁག་ངོ་སྤྲོད་ཀྱིས་ཚུལ་དུ་འགོད་ན། ཕྱི་ལོ་༡༩༥༨ལོའི་ནང་ས་གནས་འདིར་ངོ་རྒོ་ཐེངས་ཁ་ཤས་བྱས་ཡོད་ཀྱང་། གཞི་རྒྱ་ཆེ་ཤེས་ཧོར་ཟླ་༢ བའི་ཚེས་༡༡ཉིན། སྐོང་ལུང་ཁག་ཏུ་འབོད་པའི་ལུང་ཆེན་ཞིག་ཡོད་པ་དེའི་ནང་ངོ་རྒོལ་དྲག་པོ་བྱས་མཐར་དམག་གི་མང་ཉུང་དང་ལག་ཆའི་བཟང་ངན་གང་གི་ཆ་ནས་མ་དོ་པས། ཕོ་སྐྱེས་དར་མ་༡༢༥་དང་རྟ་༡༢༥་བཅས་ཉིན་དེར་དུས་གཅིག་ཏུ་དམར་གསོད་དུ་བཏང་། ཕྱི་ལོ་༢༠༠༦ལོར་བོད་ཁམས་ཡོངས་ལ་པགས་རིགས་མེ་སྲེག་གི་ཚ་རླབས་ཆིལ་སྐབས་ས་གནས་འདིར་ཧོར་ཟླ་༢ཚེས་༡༡ནས་༡༤དང་༡༥ཉིན་གསུམ་རིང་རྩ་ཆེའི་རྒྱན་གོས་པགས་རིགས་རྒྱ་སྒོར་ཁྲི་ཆིག་སྟོང་བརྒལ་བའི་པགས་རིགས་མེར་བསྲེགས་བཏང་བའི་ལས་འགུལ་ཞིག་སྤེལ་ཏེ་སྐབས་དེའི་ལམ་འགྲོ་བ་ཤེས་ལྡན་ཚོ་སྤོབས་པ་བྱེད་འོས་པ་ཞིག་དང་། གཞན་རྣམས་འགྲམ་ཆུ་ལྡང་སའི་ལས་འགུལ་རླབས་ཆེན་ཞིག་སྤེལ་འདུག
ཕྱི་ལོ་༢༠༠༧ལོའི་ཟླ་༩ བའི་ཚེས་༥ ཉིན། ས་གནས་ཉེན་རྟོག་པའི་སྒོ་ངོས་དང་། སློབ་གྲྭའི་གྱང་ངོས། ད་དུང་ཁྲོམ་སྲང་གཡས་གཡོན་སོགས་ལ་”བོད་རང་བཙན་ཡིན་ཞེས་པ་དང་། ༧གོང་ས་རྒྱལ་བ་རིན་པོ་ཆེ་མཆོག་བོད་ལ་མྱུར་ཏུ་ཆིབས་སྒྱུར་བསྐྱང་དུ་འཇུག་དགོས་པ” སོགས་ཀྱི་ཡིག་ཆ་ཁག་སྦྱར་འགྲེམས་བྱས་པར་རྐྱེན་བཅས་ཏེ། འབོ་ར་སློབ་འབྲིང་གི་སློབ་མ་ཕ་ཡུལ་ཨ་མཆོག་ནས་ཡིན་པའི་རང་ལོ་༡༧མ་ཟིན་པའི་གཅོད་པ་སྐྱབས། ཚེ་ཁོ། རྟ་མགྲིན་སྐྱབས། ལྷ་མོ་ཚེ་བརྟན། མགོན་བྷེ། སྒྲོལ་མ་སྐྱབས། རྟ་མགྲིན་བཅས་སློབ་མ་བདུན་ཉིན་༢༠ རིང་འཛིན་བཟུང་བཀག་ཉར་བྱས་ཏེ་གཅར་རྡུང་དྲག་པོ་བཏང་ནས་མཐར་མི་རེར་རྒྱ་སྒོར་༤༠༠༠ རེའི་ཆད་པ་བཅད་ཡོད་པ་མ་ཟད། མུ་མཐུད་དུ་སློབ་གྲྭར་འགྲོ་རུ་བཅུག་མེད།
ལྷག་པར་༢༠༠༨ལོའི་ཟླ་༣པའི་ཚེས་༡༨ཉིན། ང་ཚོས་ཤེས་གསལ་ལྟར་ས་གནས་འདིའི་མི་དམངས་ཚོས་སྐབས་དེའི་བོད་ཁམས་ཡོང་ལ་མཆེད་བཞིན་པའི་ཞི་བའི་ངོ་རྒོལ་ལ་རྒྱབ་སྐྱོར་རམ་ཆ་ཤས་སུ་ཚེས་༡༥ དང་༡༨ ཉིན་གཉིས་ལ་རྟར་ཞོན་ཏེ་ཞི་བའི་ངོ་རྒོལ་བྱེད་སྟངས་རྒྱལ་སྤྱིའི་གསར་ལམ་BBC. CNN. CTV རང་རེའི་བོད་ཀྱི་ཁྱེད་ཅག་གི་གསར་ལས་ཁང་གི་གཙོས་པས། བོད་ཀྱི་དུས་བབས་སོགས་ཕྱི་ནང་གི་གསར་འགྱུར་བརྒྱུད་ལམ་ཆེ་ཆུང་ཀུན་ནས་དུས་ལྟར་སྤེལ་བར་སྙིང་ཐག་པ་ནས་ཐུགས་རྗེ་ཆེ་ཞུ། སྐབས་འདིའི་ངོ་རྒོལ་གྱི་དགོས་འདུག་ཁག་ང་ཚོས་བརྙན་འཕྲིན་ནང་ཐོས་པ་བཞིན། དང་བོ། ༧གོང་ས་༧སྐྱབས་མགོན་རྒྱལ་བ་རིན་པོ་ཆེ་མཆོག་བོད་ལ་གདན་འདྲེན་ཞུ་དགོས་པ་དང་། གཉིས་པ། པཎ་ཆེན་སྣང་བ་མཐའ་ཡས་བཙན་དབང་གི་ལྕགས་སྒྲོག་འོག་ནས་གློད་གྲོལ་གཏོང་དགོས་པ། གསུམ་པ། བོད་ཆོལ་ཁ་གསུམ་པོ་རྒྱ་ནག་གིས་གཉའ་གནོན་འོག་ནས་ལོ་ངོ་༤༩་འགོར་བ་རེད། ད་ཚང་མའི་མགོ་བོ་ཡར་འགྱོག་དགོས་འདུག ཅེས་སོགས་ཀྱི་འབོད་ཚིག་འདི་གསུམ་སྒྲོག བརྙན་འཕྲིན་ནང་མཐོང་བཞིན་པའི་སྐད་འབོད་བྱེད་མཁན་གྲྭ་ཚུལ་ཁྲིམས་རྒྱ་མཚོ་ད་ལྟའང་གར་ཡོད་ཤེས་ཀྱིན་མེད། གཞན་སྐབས་འདིའི་ལས་འགུལ་ནང་ཞུགས་མཁན་སློབ་དགེ་ལྷ་གོ་སྐྱབས་ཀྱི་ལག་ནས་དགེ་རྒན་གྱི་བྱ་བ་བླངས་ཡོད། གཞན་བཙོན་འཇུག་བྱས་པ་སོགས་ཀྱི་གནས་ཚུལ་ཞིབ་ཕྲ་སྐབས་སྐབས་སུ་བརྒྱུད་ལམ་ཁག་ནང་བསྟན་ཟིན་པས་བསྐྱར་འབྲིའི་ངལ་བ་མ་བྱས།༢༠༠༦ལོར་པགས་རིགས་མེ་སྲེག་གི་ལས་འགུལ་གྱི་རྗེས་ནས། ༧གོང་ས་མཆོག་གི་ཞབས་བརྟན་དང་བོད་བསྟན་སྲིད་མི་རིགས་དང་། སྤྱི་མཐུན་བསོད་ནམས་སླད། དུ་ཆང་བཅད་པ་དང་། རང་ཁྱིམ་ནས་དགོན་པའི་ནང་། ཡང་ཁ་ཤས་ཀྱིས་བླ་བྲང་བར་རྐྱང་ཕྱག་འཚལ་ཏེ་མཆོད་འཇལ་དུ་འགྲོ་བཞིན་ཡོད་འདུག རྐྱང་ཕྱག་འཚལ་མཁན་ས་ཆ་གཞན་ནའང་ཡོད་པའི་གནས་ཚུལ་འདུག དེ་རིང་འབོ་རའི་ས་ཁུལ་འདིར་གཉེན་སྟོན་དང་། ཁང་སྟོན་སོགས་གཞན་པའི་སྤྲོ་ཚོགས་གང་ཞིག་ཚོགས་ཀྱང་དུ་ཆང་གི་སྡེར་ཁ་གཤམ་རྒྱུ་མེད་པའི་སྲོལ་བཟང་ཞིག་གམ་མིག་དཔེ་བཟང་བོ་ཞིག་དར་ཡོད།
ན་ནིང་རྡོར་གདན་དུས་དབང་སྐབས་༧གོང་ས་མཆོག་གིས་(ཕྱིའི་རྒྱན་ཆ་ལས་ནང་བསམ་བློའི་རྒྱན་ཆ་གལ་ཆེ་བ་དང་། ནང་ན་ཤེས་བྱ་ཡོན་ཏན་མེད་ན་ཕྱི་ལ་རྒྱན་ཆ་ཅི་ཙམ་བཏག་ཀྱང་དེ་ལྐུག་པའི་ལས་ཀ་ཡིན་) པའི་བཀའ་གསུང་ནན་མོ་གནང་བས་ད་ལྟའི་སྐབས་ས་ཁུལ་འདིར་གསེར་དངུལ་གཡུ་བྱུར་གྱི་རྒྱན་ཆའི་རིགས་འདོགས་རྒྱུར་སྡེ་བ་དང་སྡེ་བ་བྱེད་ནས་བཅད་དང་གཅོད་བཞིན་པའི་སྒང་ཡིན།
མཇུག་ཏུ་བཤད་འདོད་པ་ནི། ཁོང་རྣམ་པའི་རྒྱ་ནག་གི་རྔམས་ཐུགས་པའི་དམག་དཔུག་དང་འཇིགས་ཡེར་བའི་མེ་མདའི་སོ་ཁ་ནས། རང་རེའི་མི་རིགས་འདིའི་ལས་དབང་ལ་གཞིགས་ཏེ་གྱི་ལིང་རྟ་བོའི་བང་རྩལ་དང་བསྡོངས་ནས་སེང་དར་མཐོན་པོར་བསྒྲེངས་ཏེ། དཔའ་གཏམ་སྒྲོག་བཞིན་དཔའ་རྩལ་ངོམ་བཞིན། གང་ལ་མ་འཇིགས་པར་རྒོལ་ལན་སློག་པ་ཁག་ཆུད་ཟོས་སུ་མི་འགྲོ་ཆེད་དམ། རྒྱ་ཆེའི་མང་ཚོགས་ཀྱིས་ཤེས་རྟོགས་སླད། སྔོན་མ་སྐབས་སྐབས་སུ་བརྒྱུད་ལམ་ཁག་ནས་སྤེལ་མིན་ལ་མ་ལྟོས་པར་ཕྱོགས་གཅིག་ཏུ་བཀོད་པ་ལགས་སོ།།
ཁ་པར་ཨང་། ༩༩༠༠༩༧༡༩༣༡
ཀློག་འཕྲིན་ཁ་བྱང་། borso2250@gmail.com

https://docs.google.com/open?id=0B6ML7rcv-wk9aG96bWZacS0ySUk
འདིའི་ནང་ན་ངོ་རྒོལ་བྱས་པའི་པར་ཡོད།

https://www.transferbigfiles.com/8925bb0f-7396-497d-9042-53e39f3681c2?rid=8GWUmg-V0EwcJceQZxoIPw2
འདིའི་ནང་དུ་སྨོན་ལམ་ནང་བཅོ་ལྔ་མཆོད་པའི་བརྙན་ཐུང་ཞིག་ཡོད།