འདི་འདྲ་ཞིག་ང་ཚོས་ཅིས་ཀྱང་བྱ་དགོས་པ་འདྲ།

འདི་འདྲ་ཞིག་ང་ཚོས་ཅིས་ཀྱང་བྱ་དགོས་པ་འདྲ།འཛམ་གླིང་གི་ཡུལ་ཕྱོགས་གང་ས་ན་གནས་འཆའ་བཞིན་བཞུགས་པའི་བོད་རིགས་གཙོས་འཛམ་གླིང་གི་དད་ལྡན་མི་སྣ་ཚོའི་སྙན་ཅོག་རིང་མོའི་དྲུང་དུ། ཨོ་མ་རེད། གསེར་གྱི་སྙན་ཅོག་གསལ་བོ་གང་དེའི་དྲུང་དུ། (དེང་སང་སྟོན་བཤད་ཨ་ཧ་མ་ཞིག་འབྲི་བཞིན་ཡོད་པས་སྐད་ཆ་བཤད་བཤད་ཚང་མར་ཨ་མཚར་འདྲེས་འགྲོ་གིན་འདུག སྤོ་ལངས་མི་ཉན་གོ)

ངས་འདིར་བོད་མི་སྤྱི་དང་འཛམ་གླིང་ཡུལ་གྲུ་ཀུན་དུ་གནས་པའི་དད་ལྡན་སྐྱེས་འགྲོ་ཡོངས་ལ་དྲན་སྐུལ་ཞུ་རྒྱུ་ཞིག་ལ།

དེ་རིང་ནས་ཁ་ཕྱིར་འཁོར་ཏེ་ཡར་བརྩིས་པའི་མོ་ལོ་ཉི་ཤུའི་ཡར་སྔོན་ཞིག་ལ། རང་རེའི་གངས་ཅན་བོད་མི་སྐྱེས་འགྲོ་སྤྱི་དང་འཛམ་གླིང་ས་ཕྱོགས་གང་སར་གནས་པའི་འགྲོ་མི་ཡོངས་ཀྱི་དཔྲལ་བའི་མིག་དང་ཁོག་པའི་སྙིང་དང་འདྲ་བའི་ནོར་བུ་དགོས་འདོད་ཀུན་འབྱུང་། དོན་གྱི་ལྷད་དུ་མཚན་ནས་སྨྲས་ན། ༸གོང་ས་༸ལྷ་མའི་རྣམ་འདྲེན་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་འཛམ་གླིང་ཞི་བདེའི་གཟེངས་རྟགས་བཞེས་ཏེ་མི་ལོ་ཧྲིལ་བོ་ཉི་ཤུ་ཏག་ཏག་འཁོར་བའི་དགའ་སྟོན་རྟེན་འབྲེལ་གྱི་ཉིན་མོ་༼ད་ནས་བརྩིས་པའི་ཉིན་༡༥་རྗེས་ཏེ་ཕྱི་ཟླ་༡༢པའི་ཚེས་༡༠་ཉིན༽སླེབས་ལ་ཉེ་བའི་སྐབས་འདིར། ངས་འདི་ནས་བོད་གངས་ཅན་པའི་རིགས་རུས་སུ་གཏོགས་པའི་བོད་མི་ཡོངས་ལ་ཞུ་རྒྱུར། སངས་རྒྱས་གཉིས་པ་རྒྱལ་བའི་དབང་པོ་མཆོག་གི་སྐུ་ཚེ་བརྟན་ཅིང་མཛད་འཕྲིན་སྔར་ལས་དར་ཞིང་རྒྱས་ལ་ཡུན་རིང་དུ་གནས་པའི་སྨོན་འདུན་དང་། གཞན་ཡང་མགོན་པོ་གང་གིས་ཞི་བདེའི་གཟེངས་རྟགས་བཞེས་པ་ནས་ད་བར་དུ་བསྐྱངས་པའི་མཛད་རྗེས་ལ་དམིགས་ཀྱིས་བསྔགས་པའི་མཛད་བཟང་དངོས་ཡོད་ཀྱི་ལམ་ནས་ཡིག་གེར་བསྡེབས་པའི་རྩོམ་ཡིག་༼རྩོམ་ལུས་ལ་ཁྱད་མེད།༽གང་མང་ཞིག་དུས་ཚེས་གཅིག་དུས་གཅིག་ལ་དྲ་ཐོག་ཏུ་སྤེལ་རྒྱུའི་འབོད་སྐུལ་ཞུ་རྒྱུ་དང་། དྲ་ཐོག་ཏུ་ཟིན་བྲིས་གཉེར་བ་དང་མཆན་བུ་འདེབས་ཀྱི་མེད་མཁན་དང་། དྲ་ཐོག་རིག་གནས་ལ་རྒྱུས་ཡོད་རྒྱུས་མེད་གང་ན་སུ་བཞུགས་པ་རྣམས་ལ་དྲ་གྲོགས་ཚོས་ཨ་ལན་བརྡ་ལན་བསྐྱལ་ཏེ། ཕྱི་ཟླ་༡༢པའི་ཚེས་༩ཉིན་གྱི་ཕྱི་དྲོ་ནས་རང་རང་གིས་བྲིས་པའི་བཅད་ལྷུག་སྤེལ་མའི་རྩོམ་ཡིག ༼རྒྱལ་བའི་མཛད་རྗེས་ལ་བསྔགས་པ།༽རེ་དུས་བབ་ནང་གི་རང་སོ་སོའི་ཟིན་བྲིས་དང་། དེ་མིན་ཁ་བརྡ་སོགས་སུ་འགོད་ཐབས་བྱ་རྒྱུ་དང་།

ང་ཚོས་བཙན་བྱོལ་དུ་འདི་འདྲ་བའི་བོད་མི་ཚོས་འདི་འདྲ་བའི་ལས་འགུལ་ཆུང་ཚགས་ཤིག་སྤེལ་ན་བཟང་མིན་དང་། གཞན་བོད་ནང་དུ་ཡང་འདི་ལྟ་བུའི་རེ་སྐུལ་༼རྩོམ་སྐུལ༽རེ་ཞུས་ན་གང་འདྲ་ཡོད་མེད་སྐོར་ནས་བསམ་ཚུལ་གསུང་རོགས།

༡༽ རྩོམ་ལུས་རང་དབང་ཡིན་པ།

༢༽ ཉིན་མོ་འདི་གལ་ཆེ་བས་དོན་མེད་ཚིག་རྩུབ་རིགས་སྤོང་ཅི་ཐུབ་བྱེད་པ།

༣༽ དྲ་ཐོག་ཏུ་འགོད་བདེ་བའི་ཕྱིར་རྩོམ་ཡིག་ཧ་ཅང་རིང་པོ་མིན་པ།

༤༽ གཙོ་བོ་༸གོང་ས་མཆོག་གི་མཛད་རྗེ་ལ་མིའི་རིན་ཐང་གི་སྟེང་ནས་ལྟ་དགོས།

༥༽ རྩོམ་ཡིག་རྣམས་ཕྱི་ཚེས་༩་ཡི་ཕྱི་དྲོ་ནས་དྲ་ཐོག་ཏུ་འཇོག་རྒྱུ།

༦༽ དཔྱད་རྩོམ་གྱི་རྣམ་པའི་ཐོག་ནས་འབྲི་ཐུབ་ན་བཟང་པ།

བཅས་གོང་གི་འདི་ཚོ་ང་རང་གི་བསམ་ཚུལ་ཙམ་ཡིན་ལ། གཞན་དྲ་གྲོགས་ཚོར་ཁ་སྣོན་གྱི་དགོངས་ཚུལ་གང་ཡོད་འདིར་གསུང་རྒྱུ་མཁྱེན།

གོང་བཀོད་འདི་ཡང་༸གོང་ས༸མཆོག་གིས་ད་བར་དུ་ང་ཚོ་བོད་མི་རིགས་གཙོས་འཛམ་གླིང་མི་དམངས་སྤྱི་དང་ཡང་དགོས་འགྲོ་བ་རིགས་དྲུག་ཐམས་ཅད་ལ་ཞབས་ཞུ་གནང་བའི་མཛད་པའི་ཆ་ཤས་ཙམ་ལ་དྲིན་བཟོ་བའི་ཕྱི་དང་། རང་ཉིད་ཀྱི་ཚོགས་གསགས་པའི་ལྷད་དུའང་ཡིན་ན། དེ་དོན་གལ་ཆུང་དུ་མི་དགོངས་པར་རྩོམ་ཡིག་གང་ཐུབ་རེ་འབྲི་རྒྱུ་མཁྱེན་ཅེས་སྐུལ་ལོ།།

སྐད་ཆ་འདི་བོད་མི་ཡིན་ནོ་ཅོག་གི་སྙན་ཅོག་ནང་དུ་གོ་ཐུབ་པའི་ཆེད་དུ་དྲ་གྲོགས་ཚོས་རོགས་རམ་གནང་རོགས་ཞུ།

༢༠༠༩་ལོའི་སྤྱི་ཟླ་༡༡པའི་ཚེས་༢༤་ཉིན་གཅན་བཟོད་རྒྱམ་ནས་སྤེལ་བ་དགེའོ།།