འཇིགས་ཞུམ་མེད་པའི་མི།

རྫ་ཚེ་རིང་བཀྲ་ཤིས།

ཕལ་ཆེར་ཁྱེད་ནི་ཁ་དོག་མེད་པ་ཞིག །
ཡང་ན་ཁ་དོག་ཚང་མ་བཅོས་མ་ཉིད།།
མེ་ཏོག་བཏུས་དང་མེ་ཏོག་འཛེར་བ་ཡི།།
བྱ་བ་མཐའ་དག་ཡུལ་ལ་མེད་པ་ལགས།།

བྲག་ཆར་འཁོར་བའི་སྒྲ་དང་སྒྲ་ལན་བཞིན།།
ཡོད་ཚད་རྩ་བ་མེད་པའི་རྩེ་མོ་སྟེ།།
རྟོག་འགྱུའི་སྒྲིབ་པ་རྣམ་པར་སེལ་བ་དེར།།
ཐར་པའི་ལམ་མཁན་ཞེས་སུ་བསྙད་པ་ལགས།།

ཕལ་ཆེར་སྲན་མ་འདྲ་བའི་ཟླུམ་པོ་སྟེ།།
རིས་དང་ཕྱོགས་ལ་ཕྱོགས་པའི་ཆ་མེད་ཀྱང་།།
འོན་ཀྱང་ཚངས་པའི་གདོང་དང་གདོང་དག་བཞིན།།
ངོས་ཀུན་ཡོངས་སུ་གསལ་བར་གཟིགས་པ་ལགས།།

དུས་ཀྱིས་ཁྱེད་ཀྱི་མཆུ་སྒྲོས་དམར་པོར་བྱས།།
ཁྱེད་ཀྱིས་དུས་ཀྱི་འགྲམ་པ་དམར་པོར་བྱས།།
མཚན་མོའི་གློག་འོད་འོག་གི་འཁྲུགས་ཆ་བཞིན།།
ཁྱེད་ནི་ཧ་ཅང་འཁྲུགས་ཆ་དོད་པ་ལགས།།

ལྡ་ལིའི་ཁམ་འཕྲོ་ཞལ་དུ་མིད་བཞིན་དུ།།
ཁྱེད་ཀྱིས་རྡོ་སྐུ་དག་ལ་གང་སྨྲས་པ།།
ཕལ་ཆེར་ཆད་མདོ་ཡིན་ནམ་བསྟན་མ་ཡིན།།
ཡང་ན་སེམས་ཀྱི་ཚོར་བ་འཕྱུར་བ་ལགས།།

ན་ལེནྡ་ཡི་སོ་ཕག་དམར་པོ་དག །
ཕྱི་དྲོའི་ཉི་མ་དམར་པས་ཧ་ཅང་དམར།།
དེ་དུས་ཁྱེད་ནི་སེམས་གཅོངས་གཞན་ཞིག་གི །
ཏིང་ངེ་འཛིན་ལ་མཉམ་པར་འཇོག་པ་ལགས།།

ཁྱེད་ནི་རྔ་ཟླུམ་རྡུང་བར་ཧ་ཅང་དགའ།།
ཁྱེད་ནི་གླུ་དབྱངས་ལེན་པར་ཧ་ཅང་སྤྲོ།།
འོན་ཀྱང་ཁྱེད་ནི་འཁུ་འཁྲིགས་ཆུང་བ་སྟེ།།
སྟོན་པའི་འགྲམ་ན་ཅུང་ཟད་བདེན་པ་ལགས།།

ཀུན་དགའ་ལེགས་པ་མོན་བོད་གཉིས་ན་སྨྱོ།།
ཟུར་མང་དྲུང་པ་ཨ་རིའི་ཡུལ་ན་སྨྱོ།།
ཁྱེད་ཀྱི་སྨྱོ་བར་རྒྱལ་མཚམས་མེད་ན་ཡང་།།
སློབ་མ་ང་ལ་ཐེ་ཚོམ་མེད་པ་ལགས།།

སྐྱེས་རབས་ཕྲེང་བ་གཅིག་དང་གཉིས་དང་གསུམ།།
ཚང་མས་ནམ་མཁའི་སྒོང་རྒྱ་བརྟོལ་བ་སྟེ།།
དུས་ཀྱི་འཁྲབ་ར་གཅིག་དང་མ་གཅིག་ལས།།
དོན་ལ་གསུམ་ཀ་མས་ཁལ་ཇག་སོན་ལགས།།

ཚེར་མའི་རལ་གྲི་གཟེངས་པའི་རི་སུལ་ན།།
འཇིགས་ཞུམ་མེད་པའི་མི་ཞིག་མཆིས་སོ་སྐད།།
ཤིན་ཏུ་དཔའ་བ་ཉིད་ཀྱི་གླུ་ལེན་པ།།
ཁྱེད་ནི་ཐུབ་པའི་དཔའ་ཐུལ་གཞན་ཞིག་ལགས།།

སྤྱིར་ན་ཧ་ཅང་སྟབས་བདེ་ཡིན་པའི་ཁྱེད།།
མང་པོའི་སེམས་ན་རྟོགས་པར་དཀའ་བ་སྟེ།།
གང་ལྟར་མང་པོ་ཞུས་ཀྱང་མ་ཞུས་ཀྱང་།།
ཁྱེད་ནི་སྔར་བཞིན་རྫོང་སར་མཁྱེན་བརྩེ་ལགས།།

ཞེས་པ་འདི། རྫོང་སར་བཤད་གྲྭའི་འཛིན་གྲོགས་ལྷན་ཚོགས་ཞེས་པའི་དྲ་ཚོམས་སུ་ཚང་མས་རྩོམ་རེ་ཕྲིས་ཟེར་བ་ལྟར་གང་དྲན་དུ། ༸སྐྱབས་རྗེ་མཁྱེན་བརྩེ་རིན་པོ་ཆེ་མཆོག་དགུང་གྲངས་ལྔ་བཅུ་ང་ལྔར་ཕེབས་པའི་འཁྲུངས་སྐར་ཉིན་ཏེ། སྤྱི་ལོ་༢༠༡༥ཟླ་༦ ཚེས་༡༦ ལ། རྫ་ཚེ་རིང་བཀྲིས་ཀྱིས་ཐའེ་ཝན་ཡེ་ཤེས་འཁོར་ལོ་རུ་མཚན་མོ་འཕྱི་བོར་སྦྱར། །