འཇིགས་པ་མེད་པའི་འཆི་བ།

ཀླུ་སྨྱོན།
ཨ་རིའི་ནང་པ་སྐོར་ཞིག་ལ་འཆི་བའི་སྐོར་འཆད་ཁྲིད་བྱས་པའི་ཟིན་བྲིས།
སྐྱེ་འཆི་གཉིས་ནི་ཆུ་དང་ཟམ་པ་འདྲ། །འགྲོ་བ་ཐམས་ཅད་འདི་གཉིས་བརྒྱུད་དགོས་འདུག །
འཇིག་རྟེན་ཁམས་ཀྱི་དངོས་པོ་ཐམས་ཅད་ཀྱིས་མེད་པ་ནས་ཡོད་པ། ཡོད་པ་ནས་རྙིང་པ། རྙིང་པ་ནས་མེད་པ་ཆགས་དགོས་པའི་གོ་རིམ་འདི་བརྒྱུད་དགོས་པ་ནང་བཞིན། འགྲོ་བ་མིའི་རིགས་སོགས་ས་སྟེང་གི་སྲོག་ཆགས་སུ་ཡིན་ཡང་མ་སྐྱེས་པ་ནས་སྐྱེས་པ། སྐྱེས་པ་ནས་གནས་པ། གནས་པ་ནས་རྒས་པ་དང་ན་བ། རྒས་པ་དང་ན་བ་ནས་འཆི་བའི་གོ་རིམ་འདི་མ་བརྒྱུད་པར་སྡོད་ས་ཡོད་པ་མ་རེད།

མི་མང་པོ་ཞིག་འཆི་བ་ལ་མི་འཇིགས་པ་དང་། དེ་ཡང་མི་དེ་ཚོའི་སེམས་ནང་འཆི་བ་ནི་གཡོལ་ཐབས་མེད་པ་ཞིག་ཡིན་པ་དང་། ཤི་བའི་རྗེས་སུ་ག་རེ་ཆགས་མིན་ཤེས་ཀྱི་མེད་པ་དང་། ཆོས་པ་ཡག་པོ་ཞིག་ཡིན་ན་མི་ཚེ་གང་བོར་ཚོགས་བསག་སྒྲིབ་སྦྱོང་བྱས་ཡོད་པས་ཤི་རྗེས་སྐྱེ་གནས་བཟང་པོ་ཞིག་ཏུ་སྐྱེ་བའི་ཡིད་ཆེས་གཙང་མ་ཡོད་པས་འཆི་བ་ལ་མི་འཇིགས་པ་དང་། ཡང་ན་རང་གི་སྐྱབས་གནས་དེས་རང་ཉིད་སྐྱེ་བ་རྗེས་མར་སྐྱབས་གནས་དེའི་དག་ཞིང་དུ་འཁྲིད་པའི་ཡིད་ཆེས་ཡོད་པས་འཆི་བ་ལ་དགའ་མོས་ཆེན་པོ་ཡོད་པ་དང་། སྐྱེ་བ་རྗེས་མ་ཁས་མི་ལེན་མཁན་ཞིག་ཡིན་ན་ཤི་རྗེས་གློག་ཤི་བ་ནང་བཞིན་ཡིན་པས་འཆི་བ་ལ་འཇིགས་དགོས་དོན་མེད་པར་འདོད།

མི་མང་པོ་ཞིག་འཆི་བ་ལ་འཇིགས་སྐྲག་སྐྱེ་གི་ཡོད་པ་རེད། དེ་ནི་ཆོས་ལུགས་གང་ཞིག་ནས་བཤད་པའི་སྡིག་སྤོང་དགེ་སྒྲུབ་ལ་བརྩོན་མ་ཐུབ་པས་ཆོས་ལུགས་དེ་དང་དེའི་གཞུང་ནས་བཤད་པའི་དམྱལ་བ་ལ་འགྲོ་དགོས་པར་ཞེད་ནས་འཆི་བ་ལ་འཇིགས་སྐྲག་སྐྱེ་གི་ཡོད་པ་དང་། ཡང་ན་ཚེ་འདིའི་དཔལ་འབྱོར་སོགས་ལ་ཞེན་ཆགས་ཆེན་པོ་སྐྱེས་ཏེ་ཤི་བའི་རྗེས་སུ་དེ་ཚོ་དང་ཁ་འབྲལ་བའི་འཇིགས་སྣང་ཡོང་གི་ཡོད་པ་རེད།

ནང་པའི་གཞུང་ལུགས་དག་ལས་འཆི་བ་ལ་ཇི་ལྟར་བསམ་བློ་གཏོང་དགོས་པའི་སྐོར་ཧ་ཅང་མང་པོ་ཞིག་གསུངས་ཡོད་ཅིང་། རྗེ་ཙོང་ཁ་པའི་ལམ་རིམ་ལྟ་བུར་མཚོན། འཆི་བ་མི་རྟག་པ་བསམ་པའི་སྐོར་ལ་རྩ་བ་གསུམ། རྒྱུ་མཚན་དགུ། ཐག་བཅད་པ་གསུམ་ཞེས་པའི་ལེ་ཚན་མི་འདྲ་བར་བགོ་བཤའ་བརྒྱབ་ནས་འཆི་བ་མི་རྟག་པ་བསམ་པའི་སྒྲོམ་གཞི་ཞིག་བཟོས་གནང་ཡོད་པ་རེད།

དེ་ཡང་ཁོང་གིས་གསུངས་པའི་རྩ་བ་གསུམ་ནི། ངེས་པར་འཆི་བ་བསམ་པ། ནམ་འཆི་ངེས་མེད་བསམ་པ། འཆི་བའི་ཚེ་ཆོས་མ་གཏོགས་གཞན་གང་གིས་ཀྱང་མི་ཕན་པར་བསམ་པ་འདི་གསུམ་རེད། ནང་པའི་ཆོས་པ་ཞིག་ཡིན་ན་བསམ་བློ་འདི་གསུམ་མ་བཏང་ཐབས་མེད་ཡིན་ཞིང་། རྗེ་མི་ལ་རས། ང་འཆི་བས་འཇིགས་ནས་རི་ལ་བྲོས། །ཡངས་མེད་རི་ལ་བསྒོམས་བསྒོམས་ནས། །རི་ནས་སྐྱེ་མེད་བཙན་ས་ཟིན། །ཞེས་གསུངས་པ་བཞིན། ནང་པ་ཞིག་ཡིན་ན་ཐོག་མར་འཆི་བ་ལ་འཇིགས་སྐྲག་མེད་ན་ཆོས་རྣམ་དག་ཅིག་བསྒྲུབ་ཐུབ་ཀྱི་ཡོད་པ་མ་རེད།

དེ་ཡང་སྐྱེ་བ་ཞིག་བླངས་ཕྱིན་ཆད་ནས་བཟུང་སྟེ་འཆི་བའི་ཕྱོགས་སུ་ཉི་མ་རེ་རེ་བཞིན་ཐག་ཇེ་ཉེ་ཡིན་པས་སྡོད་ས་མེད་པར་ཉི་མ་གཅིག་ངེས་པར་འཆི་དགོས་པ་འདི་ལ་བསམ་བློ་གཏོང་དགོས་ཤིང་། དེ་ཡང་རང་ཉིད་གཅིག་བུ་མ་ཡིན་པར་ས་སྟེང་གི་སེམས་ཅན་ཚང་མས་སྐྱེས་ནས་འཆི་བའི་གོ་རིམ་འདི་བརྒྱུད་དགོས་པ་ལ་བསམ་བློ་གཏོང་དགོས་པ་རེད།

དེ་ཡང་ང་ཚོས་ཉི་མ་རེ་རེ་བཞིན་ཚགས་པར་ཀློག་གིན་ཡོད་པ་དང་གཟུགས་མཐོང་རླུང་འཕྲིན་ལ་ལྟ་གིན་ཡོད་དུས། དེ་བཞིན་རླུང་འཕྲིན་ལ་ཉན་གི་ཡོད་དུས་སོགས་སུ་ས་ཆ་འདི་འདྲ་ཞིག་ནས་མི་དེ་འདྲ་ཞིག་རླངས་འཁོར་བརྡབས་སྐྱོན་གྱིས་གྲོངས་པ་དང་། ཁང་པ་མེར་ཤོར་བ་དང་། གནམ་གྲུ་ས་ལ་ཟགས་པ་དང་། དམག་འཁྲུག་བརྒྱབ་པ་དང་། ན་ཚ་སྡུག་པོ་བྱུང་བ་དང་། ས་ཡོམ་དང་ཆུ་རུད་བརྒྱབ་པ་སོགས་ཀྱིས་མི་ཧ་ཅང་མང་པོ་ཞིག་འདས་གྲོངས་སོང་པའི་གསར་འགྱུར་མཐོང་རྒྱུ་ཡོད་པ་དང་། མི་དེ་ཚོ་དང་ང་རང་ཚོ་ནང་བཞིན་འཆི་ན་མི་འདོད་ཅིང་གསོན་ན ་འདོད་པ་ཤ་སྟག་ཡིན་ཡང་། འཆི་བ་མི་རྟག་པ་དེ་བསླེབས་དུས་སྡོད་ས་མེད་པར་འགྲོ་དགོས་བྱུང་བ་རེད་ཨང་སྙམ་པའི་བསམ་བློ་གཏོང་དགོས་པ་རེད།

ནང་པ་ཞིག་ཡིན་ན་ཚེ་འདིའི་རྒྱུ་ནོར་དང་ནང་མི། སྤུན་ཟླ། མཚན་སྙན་གྲགས་སོགས་མ་ཤི་བའི་གོང་ལ་རང་དང་མཉམ་དུ་ཡོད་པ་མ་གཏོགས། ཤི་ཚར་བའི་རྗེས་ལ་འདི་དག་གཅིག་ཀྱང་རང་དང་མཉམ་དུ་འཁྱེར་ཐབས་དང་འཁྲིད་ཐབས་མེད་པར་རང་ཉིད་ཀྱི་རྣམ་ཤེས་གཅིག་པོ་སྐྱེ་བ་རྗེས་མར་འགྲོ་དགོས་པ་དང་། དེ་དུས་རང་དང་མཉམ་དུ་འགྲོ་མཁན་ནི་དགེ་བའི་ལས་དང་སྡིག་པའི་ལས་གཉིས་ལས་མེད་པ་དང་། ཧ་ཅང་ཐུང་ཐུང་ཡིན་པའི་མི་ཚེ་འདིའི་རིང་ལ་དགེ་སྡིག་གང་ཞིག་བྱས་ཡོད་མེད་རང་ཉིད་ཀྱིས་ཤེས་པ་ཡིན་པས། གལ་སྲིད་སྡིག་པ་མི་དགེ་བ་ཆེན་པོ་ཞིག་བསགས་ཡོད་ན་འཆི་བ་ལ་འཇིགས་སྐྲག་སྐྱེ་གི་ཡོད་པ་དང་། ཡང་ན་དགེ་བ་རྒྱ་ཆེན་པོ་ཞིག་བསྒྲུབས་ཡོད་ན་འཆི་བ་ལ་འཇིགས་སྐྲག་སྐྱེ་དགོས་དོན་ཡོད་པ་མ་རེད། དེ་ལ་བོད་པ་ཚོས། ཚེ་འདི་ལ་སྡིག་པ་མ་བྱས་ན། སྐྱེ་བ་ཕྱི་མ་ལ་འཇིགས་དོན་མེད་ཟེར་གི་རེད།

གལ་སྲིད་ཚེ་འདི་ལ་དགེ་བ་རང་གི་འདོད་པ་ཁེངས་པ་ཞིག་བསྒྲུབས་མ་ཐུབ་ན་ཡང་། དམ་པའི་ཆོས་ཀྱི་ཕན་ཡོན་རྒྱ་ཆེན་པོ་ལ་ཡིད་ཆེས་རྣམ་དག་ཅིག་ཡོད་ན། འཆི་དུས་འཇིགས་པ་སྐྱེ་དགོས་ཀྱི་ཡོད་པ་མ་རེད། རྒྱུ་མཚན་ནི་མགོན་པོ་འོད་དཔག་མེད་ཀྱི་མཚན་སྔགས་ལན་གཅིག་འདོན་པའམ། མ་ཎི་ཡིག་དྲུག་ཚར་གཅིག་བགྲངས་པའི་ཕན་ཡོན་ཡང་སྐྱེ་བ་འབུམ་ཕྲག་དུ་མར་བདེ་འགྲོ་ལྷ་མིའི་གོ་འཕང་འཐོབ་པར་གསུངས་ཡོད་པས། ཉི་མ་རེ་ལ་འོད་མཚན་ཚར་རེ་དང་མ་ཎི་ལན་གཅིག་ལས་འདོན་མ་ཐུབ་ན་ཡང་། རང་ཉིད་ཆོས་ཀྱི་ཕན་ཡོན་ལ་ཡིད་ཆེས་བརྒྱ་ཆ་བརྒྱ་ཡོད་ན་སངས་རྒྱས་ཀྱི་གསུང་ལ་བསླུ་བ་མེད་པས་སྐྱེ་བ་རྗེས་མ་གཅིག་པོ་ཙམ་མ་ཡིན་པར་སྐྱེ་བ་རྗེས་མར་འབུམ་ཕྲག་མང་པོར་བདེ་སྐྱིད་དང་འཕྲད་ཐུབ་པས། དེ་རེས་ཀྱི་འཆི་བ་འདི་ལ་འཇིགས་སྐྲག་སྐྱེ་དགོས་ཤིག་ཡོད་པ་མ་རེད།

དེ་ཡང་ཚེ་འདིའི་དགེ་བ་སྒྲུབ་པའི་གནས་སྐབས་སུ་རིག་པ་ཡག་པོ་ཞིག་སྒྲིམ་མ་ཐུབ་ན་ཡང་། རང་ཉིད་འཆི་བའི་གནས་སྐབས་དེར་དཀོན་མཆོག་གསུམ་ལ་གསོལ་བ་དྲག་པོ་ཞིག་འདེབ་ཐུབ་ན། གང་ལ་མོས་པ་གཙོ་བྱེད་པ། །དེ་ཡི་མདུན་ན་ཐུབ་པ་བཞུགས། །གསུངས་པ་བཞིན། དཀོན་མཆོག་གསུམ་རང་ཉིད་ཀྱི་མདུན་དེ་རང་དུ་བཞུགས་ནས་སྐྱེ་བ་རྗེས་མའི་ལམ་སྣ་འདྲེན་པ་ལ་ཐེ་ཚོམ་མེད་པས། བསམ་བློ་ཡག་པོ་ཞིག་གཏོང་ཤེས་ན་འཆི་བའི་གནས་སྐབས་དེ་ནི་སྒོམ་ཉམས་ལེན་ཡག་པོ་བྱེད་པའི་གོ་སྐབས་ཡོད་ན་མེད་ན་ཞིག་རེད།

དེ་ཡང་རང་ཉིད་གསོན་པོའི་གནས་སྐབས་སུ་འཆི་སྲིད་སྦྱོང་བ་(Practice of Death)ཞེས་པའི་ཉམས་ལེན་འདི་བྱེད་ཐུབ་ན་ཡག་པོ་ཡོད་པ་རེད། དུས་ཚོད་ཡོད་དུས་སུ་བླ་མ་དང་ཡི་དམ་གྱི་ཐང་ཀ་སོགས་བཤམས་པའི་མདུན་དེར་མཆོད་པ་ཕུལ། རང་ཉིད་གཅིག་པོ་ཙོག་བུར་སྡོད་པའམ་ཡང་ན་ཉལ་ཁྲིའི་སྟེང་དུ་ཉལ། བདེ་བ་ཅན་དུ་སྐྱེ་བའི་སྨོན་ལམ་སོགས་བཏབ། དེ་ནས་མིག་གཉིས་བཙུམས་ཏེ་རང་ཉིད་འཆི་བཞིན་པའི་རྣམ་པ་ཡིད་ལ་སྒོམ་ནས་བླ་མ་དང་ཡི་དམ་ལ་གསོལ་བ་དྲག་པོ་འདེབ་དགོས། འདི་ལྟར་ཡང་དང་ཡང་དུ་བྱེད་ཐུབ་ན། རང་ཉིད་འཆི་བའི་ཉི་མ་དེར་ཡང་སྔོན་ཆད་ཀྱི་འཆི་སྲིད་སྦྱོང་བའི་ཉམས་ལེན་དེ་ཞེད་སྣང་དང་འཚབ་འཚུབ་མེད་པར་བྱེད་ཐུབ་པའི་ཁྱད་པར་ཆེན་པོ་ཞིག་ཡོད་པ་རེད།

བོད་ཀྱི་འཆི་བའི་གཞུང་ལུགས་གྲགས་ཅན་བར་དོ་ཐོས་གྲོལ་ཞེས་པ་དེའི་ནང་དུ་གསུངས་པའི་འབྱུང་བཞིའི་ཐིམ་རིམ་དང་སྣང་མཆེད་ཐོབ་གསུམ་འཆར་རིམ། ཀུན་རྟོག་བརྒྱད་ཅུའི་འགག་རིམ་སོགས་ཀྱི་སྐོར་ལ་ཡང་ཐོས་གྲོལ་རང་ནས་གསུངས་པ་ཇི་ བཞིན་སེམས་ཅན་ཀུན་ལ་འཆར་གིན་ཡོད་མེད་གང་ལྟར་ཡང་། ཐོས་གྲོལ་རང་ལ་སློབ་སྦྱོང་དང་ཉམས་ལེན་བྱེད་མྱོང་མཁན་དག་གིས་མ་ཤི་སྔོན་ནས་ ཐོས་གྲོལ་གྱི་འཆར་ལུགས་དེ་ཚོར་ཡང་ཡང་ཤར་སྒོམ་བྱེད་དགོས་ལ། འཆི་བའི་སྐབས་སུ་ཡང་བར་དོ་ཐོས་གྲོལ་དེ་བླ་མ་དང་ཆོས་གྲོགས་སོགས་ཀྱིས་རང་གི་ རྣ་ལམ་དུ་སྒྲོག་ཐུབ་ན་ཉམས་ལེན་ལ་བོག་ཐོན་པའི་ཕན་རླབས་ཧ་ཅང་ཆེ།

དེ་བཞིན་གལ་སྲིད་རང་ཉིད་ཀྱིས་གསོན་པོའི་གནས་སྐབས་སུ་མགོན་པོ་འོད་དཔག་མེད་དང་མཁའ་སྤྱོད་མ་སོགས་ཀྱི་འཕོ་བའི་རིགས་ལ་ཉམས་ལེན་བྱས་ཡོད་ན། འཆི་བའི་གནས་སྐབས་དེར་འཕོ་བའི་སྒོ་ནས་རང་ཉིད་ཀྱི་རྣམ་ཤེས་མགོན་པོ་འོད་དཔག་མེད་དང་མཁའ་སྤྱོད་མ་སོགས་ཀྱི་ཐུགས་ཀར་འཕོ་དགོས་པ་རེད། འདི་ལ་བླ་མ་གོང་མ་དག་གིས། འཆི་བ་ཞེས་བྱ་རྣམ་རྟོག་སྟེ། །རྣལ་འབྱོར་སངས་ཆུང་རྒྱ་བ་ཡིན། ན། །ཞེས་གསུངས་ཡོད་པ་རེད། འདི་དུས་ཚེ་འདི་ལ་ཞེན་ཆགས་ཕྲ་མོ་ཙམ་ཡང་མེད་པ་ཞིག་དགོས་པ་མ་གཏོགས། འཆི་ཁར་རྒྱུ་ནོར་དང་ནང་མི་སོགས་ལ་ཞེན་ཆགས་བྱེད་པ་འདི་ནི་ནང་པའི་ཆོས་པ་ཞིག་ལ་མཚོན་ན་ཧ་ཅང་ཐབས་སྐྱོ་བོ་ཞིག་རེད།

དེ་ཡང་འཆི་ཁའི་དུས་སུ་རང་གི་མདུན་ཐད་དེར་མགོན་པོ་འོད་དཔག་མེད་དང་འཕགས་པ་ཐུགས་རྗེ་ཆེན་པོ། མཁའ་སྤྱོད་མ་སོགས་རང་ཉིད་ཀྱི་ཡི་དམ་དང་རང་གི་རྩ་བའི་བླ་མ་གང་ཡིན་དེའི་བྲིས་སྐུ་དང་འབག་སྐུ་སོགས་བཤམས། དེའི་མདུན་དུ་མཆོད་པ་བཤམ་དུ་བཅུག དེ་ནས་རང་གིས་ཁ་ནས་གསོལ་བ་འདེབ་ནུས་ན་དེ་བཞིན་དང་། མི་ནུས་ན་ཐང་ཀ་སོགས་ལ་མིག་གིས་ལྟ་བཞིན་ཡིད་ནས་གསོལ་བ་རྩེ་གཅིག་ཏུ་འདེབས། དེ་ཡང་། མགོན་པོ་འོད་དཔག་མེད་ལ་གསོལ་བ་འདེབས། །ནུབ་ཕྱོགས་བདེ་བ་ཅན་དུ་དྲང་དུ་གསོལ། །ལྟ་བུ་ཚིག་ཉུང་ལ་དོན་འདུས་པ་དེ་འདྲའི་སྒོ་ནས་གསོལ་བ་རྩེ་གཅིག་ཏུ་འདེབས་ཤིང་། རང་ཉིད་ཀྱི་རྣམ་པར་ཤེས་པ་བླ་མ་དང་ཡི་དམ་གྱི་ཐུགས་ཀར་ཐིམ་པའི་དམིགས་པ་ཡང་ཡང་བྱ་དགོས།

རྗེ་བཙུན་མི་ལ་རས་པས། ཆོས་པ་རབ་ཅིག་འཆི་བ་ལ་དགའ། ཆོས་པ་འབྲིང་ཞིག་འཆི་བ་ལ་མི་སྐྲག གསུངས་པ་བཞིན་འཆི་བ་ལ་དགའ་བ་མེད་ན་ཡང་འཆི་བ་ལ་འཇིགས་སྐྲག་མེད་པ་ཞིག་གསོན་པོའི་གནས་སྐབས་སུ་སྒྲུབ་དགོས་པ་རེད། དེ་མིན་གསོན་པོའི་གནས་སྐབས་སུ་རྣམ་གཡེང་གི་དབང་དུ་སོང་སྟེ་ཚེ་འདི་རྐྱང་རྐྱང་གི་དོན་དག་ལ་མགོ་འཁོར་ནས་བསྡད། འཆི་བ་བསླེབས་དུས་འཇིགས་སྐྲག་སྐྱེ་བ་དེ་ནི་ཆོས་པ་ཡག་པོ་ཞིག་གི་བྱེད་སྟངས་མ་རེད།

རང་ཉིད་མ་ཤི་གོང་དེར་སྨན་ཁང་གི་སྨན་པ་དང་ནད་གཡོག་སོགས་དང་། རང་གི་ནང་མི་དང་གྲོགས་པོ་སོགས་ལ། རང་ཉིད་འཆི་དུས་སུ་སྐད་ཆེན་པོས་ངུ་བ་དང་ལུས་པོར་གློག་བཏང་ནས་ཕྱིར་གསོན་པའི་ཐབས་ཤེས་གཏོང་བ་སོགས་གང་ཡང་མ་བྱེད་རོགས་ཞེས་བཅོལ་གདམ་བྱེད་དགོས་ཤིང་། ཤི་ནས་ཀྱང་ཞག་གསུམ་བར་དུ་ལུས་པོར་སྒུལ་སྐྱོག་མེད་པར་འཇོག་པ་དང་། དེ་ནས་ཐོག་མར་ལུས་པོའི་སྟོད་ཕྱོགས་ཤིག་ལ་འཇུས་ནས་གཟུགས་པོ་ཕྱི་རོལ་ཏུ་འཁྱེར་རོགས་ཞེས་བརྗོད་དགོས། རྒྱུ་མཚན་ནི་བར་དོ་ཐོས་གྲོལ་སོགས་ལས་ཤི་བོའི་བེམ་པོའི་གང་དུ་ལག་པ་འཆང་ས་དེ་ནས་རྣམ་ཤེས་ཕྱིར་ཐོན་འགྲོ་ཞིང་། རྣམ་ཤེས་ལུས་སྟོད་ནས་ཐོན་ན་བདེ་འགྲོ་དང་། ལུས་སྨད་ནས་ཐོན་ན་ངན་འགྲོར་འགྲོ་བའི་ཉེན་ཁ་ཡོད་པར་གསུངས་པ་ཡིན།

རང་ཉིད་ཀྱི་རུས་པ་ཡང་ཐོག་མར་རུས་ཆོག་ཅེས་པའི་ཆོ་ག་ཞིག་ཡོད་པ་དེ་ཚད་ལྡན་ཞིག་བྱེད་དགོས་ཤིང་། དེ་ལྟར་གྲུབ་རྗེས་གཞི་ནས་རུས་པ་དེར་སཙྪྰ་འདེབ་ཆོག་པ་མ་གཏོགས། རུས་ཆོག་མ་བྱས་པའི་རུས་ཐལ་ལ་སཙྪྰ་འདེབ་ཆོག་གི་མ་རེད། སཙྪྰ་ཡང་མགོན་པོ་མི་འཁྲུག་པ་ལྟ་བུ་ངན་སོང་སྦྱོང་བ་ལ་མཆོག་ཏུ་བསྔགས་པའི་སངས་རྒྱས་ཀྱི་སྐུ་གཟུགས་སཙྪྰ་འདེབ་ཐུབ་ན་ཕན་ཡོན་བསམ་གྱིས་མི་ཁྱབ་པ་ཞིག་ཡོད་པས་དེ་ཡང་ཁ་ཆེམས་སུ་འབྲི་ཐུབ་ན་ཡག་པོ་རེད།

དོན་དག་རྡོག་རྡོག་དེ་ནི་སྐྱེ་བ་ཡོད་ན་འཆི་བ་ཡོད། འཆི་བ་ཡོད་ན་ཡང་སྐྱར་སྐྱེ་བ་ཡོད་པའི་ནང་པའི་ལྟ་བ་འདི་ལ་ཡིད་ཆེས་ཡོད་དགོས་ཤིང་། དེ་བཞིན་ཚེ་འདི་ལ་ཞེན་ཆགས་ཆེན་པོ་ཞིག་མེད་པ་དེ་ག་དུས་ཡིན་ན་ཡང་སེམས་ནང་ཉར་དགོས། དེ་བཞིན་རང་ཉིད་ཀྱིས་རང་ཉིད་ལ་དུས་ཚོད་སྤྲད་དེ་ཆོས་སྒྲུབ་དགོས། བོད་ཀྱིས། ཆོས་བསྒྲུབས་པའི་བུ་ལ་ངན་སོང་མེད། །མནའ་ཟོས་པའི་བུ་ལ་ཐར་བ་མེད། །ཟེར་བ་དང་། དེ་བཞིན། སྔ་མ་གར་སྐྱེས་ད་ལྟའི་ལུས་ལ་ལྟོས། །ཕྱི་མ་གར་སྐྱེས་ད་ལྟའི་ལས་ལ་ལྟོས། །ཞེས་ཀྱང་གསུངས། དགེ་སྡིག་གང་བྱེད་རང་གི་ལག་པར་ཡོད་དུས་འདིར་རང་ཉིད་ཀྱིས་རང་ཉིད་ལ་ལམ་ཁ་བཟང་པོ་ཞིག་འཚོལ་རོགས་གནང་།
སྨྲས་པ།
སྐྱེས་ནས་འཆི་བ་འཁོར་བའི་ཆོས་ཉིད། །
སྐྱེ་འཆི་གཉིས་ཀ་རང་གི་ལག་ཡོད། །
སྐྱེ་བ་རྗེས་མར་གང་དུ་སྐྱེ་བ། །
སྐྱེ་བ་འདི་ཡི་ཉམས་ལེན་རག་ལས། །