ཤིས་ཚང་ལྗང་མྱུག
——————
གངས་སྐྱིད་དུ་བསྐྱོད་པ།
དེ་རིང་ནམ་རྒྱུན་འཆར་ཅན་གྱི་ཆུ་ཚོད་གསུམ་པའི་དབྱིན་ཡིག་ཟུར་སྦྱོང་གི་འཛིན་གྲྭ་དེའང་མེད་པས་ཉིན་གུང་ཡོལ་རྗེས་གྲོགས་ག་གེ་མོ་དང་ལྷན་དུ་དམིགས་ཡུལ་གང་ཡང་མེད་པར་གངས་སྐྱིད་དུ་བསྐྱོད་པ་ཡིན། ང་གངས་སྐྱིད་དུ་སླེབས་རྗེས་ཐད་ཀར་དུས་བབ་རྩོམ་སྒྲིག་ཁང་དུ་ཉེ་ལམ་གསར་དུ་ཐོན་པའི་༼སངས་རྒྱས་ཀྱི་དཔའ་རྟུལ་ཚོ་༽ཞེས་པའི་དཔེ་དེབ་དབྱིན་བསྒྱུར་མ་དེ་ཉོ་རུ་འགྲོ་དགོས་དྲན་པ་ལྟར་གོམ་ཁ་དེ་རུ་བསྲིངས། ང་དུས་བབ་རྩོམ་སྒྲིག་ཁང་དུ་སླེབས་སྐབས་ལས་མི་ཚོ་རང་རང་གི་སྐབས་བབ་ལས་དོན་ལ་གཞོལ་གྱིན་པའི་སྒང་རེད་ལ། ལྷག་པར་ཉིན་བཅུ་རེའི་མཚམས་ཀྱི་གསར་ཤོག་འདོན་ཐེངས་ཤིག་འདོན་པར་ཉེ་བས་ཉིན་འདིར་ཏག་ཏག་ཁོ་ཚོར་ལས་བྲེལ་ཅུང་ཆེ་བར་མངོན། ངས་སྐབས་དེའི་ཁོ་ཚོའི་ལས་བྲེལ་གྱི་རྣམ་པ་དེ་མཐོང་རྗེས་ངའི་ཡིད་ལ་རང་ཉིད་དེ་སྔོན་༼ལྷོ་ཕྱོགས་ཕོ་ཉ༽འི་ལས་གནས་སུ་ཡོད་སྐབས་ཀྱི་རྣམ་པ་ཞིག་ལ་འཕྲལ་དུ་ཕྱིར་དྲན་ཐེངས་ཤིག་སློག་དགོས་བྱུང་། ང་སེམས་པ་ཕྱིར་དྲན་ལ་ཕྱོགས་བཞིན་ཕྱིར་གངས་ཅན་སྐྱིད་གཤོངས་ཀྱི་སྒོ་ཆེན་སྙེགས་ནས་ཡོང་བ་ཡིན་ལ། ཞོར་དུ་རང་གཞུང་གི་ལས་ཁུངས་མ་ལག་དག་ལ་བལྟ་སྐོར་ཐེངས་ཤིག་བྱེད་འདོད་ཀྱིས་གྲོགས་པོ་ངེད་གཉིས་ཐད་ཀར་གངས་སྐྱིད་ཀྱི་སྒོ་ཆེན་དེ་བརྟོལ་སྟེ་སོང་། རང་ཉིད་གང་དུ་སོང་ཡང་བོད་ཡིག་གི་སྒོ་བྱང་སོགས་སུ་དོ་སྣང་བྱེད་པའི་གོམས་གཤིས་བཞིན་འདིར་ལས་ཁུངས་རེ་རེའི་སྒོ་བྱང་ལ་ཞིབ་ཀློག་རེ་བྱེད་བཞིན་ཆེ་ཆུང་སོགས་དོ་མི་སྙོམས་པའི་བོད་ཡིག་ལག་བྲིས་མ་འདི་དག་གློག་ཀླད་དུ་བཅུག་ནས་སྒོ་བྱང་སྤུས་དག་ཅིག་བཀལ་ན་ཅིས་མ་ཆོག་གམ་སྙམ་པའི་སེམས་འགྱུ་གློ་བུར་བ་ཞིག་ཀྱང་ཁོག་ལ་ཉར་བ་ཡིན། ད་དུང་སྒོ་བྱང་ལ་ལར་དབྱིན་ཡིག་གི་སྒྲ་གདངས་ཇི་བཞིན་ཐོན་མེད་པར་གློག་ཀླད་སྡེ་ཚན་ལ་༼ཀམ་སྤུ་ཊར་སྡེ་ཚན།༽ཞེས་བྲིས་པ་རེ་མཐོང་བས་རང་དབང་མེད་པར་ཁོང་དགོད་ཅིག་ཀྱང་ཤོར། དེ་ལྟར་ཕྱི་ཚུལ་ནས་བལྟས་ན་ཧ་ཅང་ཉམ་ཆུང་ཞིང་ཉམ་ཐག་པའི་གངས་ཅན་སྐྱིད་གཤོངས་ལ་སྐོར་བ་ཐེངས་ཤིག་བརྒྱབ་རྗེས་ཐད་ཀར་ཕྱིར་རྡ་སྟེང་དུ་ལོག་ཡོང་བ་ཡིན།
དོར་མའི་ཁྲོམ་སྲང་གླེང་བ།
དམིགས་བསལ་ལས་གནས་སོགས་གང་ཡང་མེད་པར་གུང་གསེང་རང་བཞིན་གྱིས་རྡ་སར་སྡོད་རྒྱུ་ནི་སྐབས་རེར་ངོ་མ་ཉི་མ་མི་འཁྱོལ་བ་ཞིག་ཀྱང་རེད། ཡིན་ནའང་། ང་ལ་མཚོན་ན། ཚ་བ་སོགས་མི་འཕྲོད་པའི་དཀའ་ངལ་ལ་གཡོལ་སྟེ་ལུས་བདེའི་སྨན་བཅོས་ཀྱི་ཕྱིར་དུ་འདིར་ཡོང་བ་ཡིན་པས། ཁ་སང་དེ་རིང་གི་རྡ་སའི་གནམ་གཤིས་ཀྱིས་ཀྱང་ང་ལ་བདེ་སྣང་དམིགས་བསལ་བ་ཞིག་སྟེར་གྱིན་འདུག་ལ། ད་དུང་ཐོག་མའི་འཆར་གཞི་ལྟར་ཟླ་ངོ་འགར་སྡོད་རྒྱུའི་བསམ་བློ་ལའང་འགྱུར་བ་གང་ཡང་ཕྱིན་མེད། ཉིན་འདི་ཚོར་ང་རྟག་པར་མེག་ལོར་ཁྲོམ་སྲང་ལ་མ་མཐའ་ཐེངས་རེར་བསྐྱོད་ཀྱིན་ཡོད་ལ། དེ་ནི་འཚོ་ཟས་ཙག་ཙིག་ཉོ་ཆེད་དང་། ཡང་ན་དྲ་ཁང་དུ་འགྲོ་དགོས་པ་སོགས་ཀྱིས་ཡིན། མེག་ལོར་(Mecload)ཁྲོམ་སྲང་ནི་དངོས་གནས་དོར་མའི་དབྱིབས་ལྟར་ཆགས་ཡོད་ལ། ཏག་ཏག་སྲང་ལམ་གཡས་གཡོན་གཉིས་མ་གཏོགས་མེད་པས་ངས་འདིར་༼དོར་མའི་ཁྲོམ་སྲང་༽ཞེས་འབོད་ཀྱིན་ཡོད། སྲང་ལམ་དོག་མོ་འདི་རུ་ཉིན་ལྟར་མི་ཚོགས་འགྲུལ་བཞུད་ཀྱི་འདུ་འཛི་ཧ་ཅང་ཆེ་བའི་ཁར་ལམ་འགྲམ་གཡས་གཡོན་དུ་ཚོང་ཟོང་ཙག་ཙིག་གི་ཁྲོམ་གྱིས་ཡོངས་སུ་བཀང་ཡོད་ལ། ད་དུང་རླངས་འཁོར་དང་གླང་ཀོག་སོགས་ཀྱང་འགྲོ་འོང་བྱེད་ཀྱིན་ཡོད་པས་དོར་མའི་ཁྲོམ་སྲང་ན་མི་ཕྱུགས་འཕྲུལ་གསུམ་གྱི་འདུ་འགོད་ཧ་ཅང་ཆེ།
ཁ་རྒོད་ལྕེ་བདེ་འགས་འདིར་ནམ་རྒྱུན་མགྲོན་པོ་ལྷོད་སྡོད་བྱེད་སའི་ཟ་ཁང་ག་གེ་མོ་དང་རླངས་འཁོར་འབབ་ཚུགས་སོགས་ལ་༼བླ་བཙག་སྒང་༽དང་༼རེ་སྒུག་ཐང་༽ཞེས་ཐ་སྙད་སྙིང་རྗེ་བོ་རེའི་མིང་འདོགས་ཀྱང་བྱས་ཡོད། ད་དུང་ཉེ་འཁོར་གྱི་དགོན་པ་གྲྭ་ཚང་ཁག་ལའང་དེ་ལྟར་མིང་འདོགས་རེ་བྱས་ཡོད་དེ། དཔེར་ན། རྣམ་རྒྱལ་གྲྭ་ཚང་ལ་སྡོམ་པ་མེད། ཀིརྟིི་གྲྭ་ཚང་ལ་གུང་གསེང་མེད། ཚེ་མཆོག་གླིང་ལ་རིག་གནས་མེད་ཅེས་ཁོ་ཚོའི་གནས་བབ་ལ་བཏགས་པའི་སྡོམ་ཚིག་འདྲ་ཆགས་པོ་རེའང་སྐྱོར་རྒྱུ་ཡོད། གང་ལྟར་དོར་མའི་ཁྲོམ་སྲང་ན་རྐྱལ་སྟོང་བག་ལ་རོལ་སའི་མཚན་ཚོགས་ཁང་ཡོད་ལ། རྒས་འཁོགས་སྐོར་བ་འགྲོ་སའི་མ་ཎི་ཁང་ཞིག་ཀྱང་ཡོད།
༢༠༠༨།༡༢།༣༠དགོང་མོར་བྲིས།
དྲ་གྲོགས་ཤིས་བུ་ལགས། གངས་སྐྱིད་ཀྱི་གནད་དོན་དེ་གཞུང་ཞབས་པ་ཚོའི་གྲས་སུ་མི་རིགས་ཀྱི་བླ་སྲོག་ལ་དུང་ཞེན་ཡོད་མཁན་ཞིག་ཧ་ཅང་ཉུང་བའམ་མེད་པས་ཡིན་ལ། གནད་དོན་འདིས་ང་ལ་ནམ་རྒྱུན་སྐྲག་སྣང་ཞིག་སློང་གི་འདུག་ཡ
གངས་སྐྱིད་ཀྱི་ལས་བྱེད་དག་གི་ངེད་ཅག་ལ་སྐྲག་སྣང་ཞིག་སྤྱིན་ན། དེ་དག་ལ་སྐྲག་སྣང་མི་བྱེད་པའི་ཐབས་ཤེས་རེ་ཟུང་ཞིག་ངེད་ཅག་གི་གྲོགས་པོ་དག་བརྒྱུད་དེ་གོ་བརྡར་བཟང་བོ་ཞིག་བྱས་དེ། ད་ནི་གངས་སྐྱིད་སྐྱིད་གཞོང་གི་བོད་ཡིག་མི་ཤེས་པའི་བོད་ཀྱི་ལས་བྱེད་དེ་དག་ལ་གཞུང་དེ་ནི་བོད་བཙན་བྱོལ་ཚང་གི་གཞུང་ཡིན་པ་ངོས་ཟིན་ཐོབ་དུ་འཇུག་པའི་དུས་སུ་སླེབས་ཡོད་པ་མ་རེད་དམ། དྲ་གྲོགས་ཚོས་བལྟས་ན་ག་འདྲ་རེད་འདུག
its strange to read such things . all the country is not perfect .
thats life . try to open your mind . be open mind .
Drepang is also not perfect in my eyes . but thats life £. someone try to translate this to the writer .
བདྨ་ལགས། ཁྱེད་རང་གི་གང་ཞིག་བཤད་འདོད་ཡོད་པ་དེ་དག་བོད་ཡིག་གི་ཐོག་ནས་གཏོང་ཐུབ་པ་བྱེད་དགོས་པ་དེ་ནི་ཁྱེད་རང་གི་བོད་ཡིག་གི་དྲ་ཚིགས་འདིའི་ནང་དུ་ཞུགས་པའི་བོད་མི་ཞིག་གི་འོས་འགན་ཆགས་ཡོད་པ་སེམས་སུ་འཛིན་རོགས་ཞུ།
དྲ་གྲོགས་པདྨ་ལགས། བོད་ཡིག་རྐྱང་བའི་དྲ་ཚིགས་ཤིག་ཏུ་བསམ་བཞིན་དབྱིན་ཡིག་ཁྱེར་ནས་ཡོང་དགོས་དོན་ཅི་ཡིན། རྗེས་ཕྱོགས་བསམ་འཆར་ཅི་ཞིག་སྤེལ་ནའང་བོད་ཡིག་གིས་སྤེལ་བའི་རེ་བ་ཡོད། དོ་སྣང་ཆེན་པོས་དྲ་ཐོག་ཏུ་ཡོང་ནས་བསམ་འཆར་གནང་བར་དགའ་བསུ་ཞུ།