ཞུ་དག་གནང་རོགས། རྡོ་རྗེ་རྒྱལ་མཚན།

Comments (12) on “ཞུ་དག་གནང་རོགས། རྡོ་རྗེ་རྒྱལ་མཚན།”

1. །འོན་ཀྱང་ལྷག་བསམ་དཀར་བའི་དགེ་བ་ནི། །རྒྱལ་བར་བྱེ་མ་ཕུལ་བའི་ཡོན་ཏན་གྱིས། །ཆོས་རྒྱལ་མྱ་ངན་མེད་གྱུར་རྣམ་ཐར་དང་། །་་་་་ཟེར།

2. ༼ཛ་ལང་རྒྱས་པས་གླང་པོ་སྟོང་ཐུབ་ལ། །ཝ་སྐྱེས་སེང་གེ་གོམ་ཕྱིར་རྒྱུག་པ་བཞིན། ། { 1v } ཞྭ་ལྟར་འཁུར་འོས་རྫོགས་པའི་སངས་རྒྱས་ལ། །ཟྭ་ལྟར་ཀུམ་མོའི་བསམ་ནས་སོང་བ་དེ། །༽༼དེ་ལྟར་སྲ་རྒྱས་ཆར་གཏོགས་ཀ་ལི་ལས། །༽དེའི་ཐད་ལ་དགོངས་འཆར་གསུང་རྒྱུ་ཡོད་དམ། ངས་ནི་གོང་གི་དེ་ཚོ་ལ་དོན་དག་ཅིག་གཏན་ནས་ལོན་ཐུབ་མ་སོང་། ལྷག་དོན་དུ་ཡང་ཛ་དང་ཟྭ་དེ་བཞིན་དེ་ལྟར་སྲ་རྒྱས་ཞེས་པ་གསུམ་ལ་གོ་བ་སྤུ་ཙམ་ཡང་ལེན་གྱི་མིན་འདུག།

3. ལྷ་ལུང་གསུང་སྤྲུལ་ལྔ་པ་གྲུབ་མཆོག་རྡོ་རྗེ་མཆོག སྤྱི་ལོ་ག་དུས་བྱུང་ངམ། གང་ཉིད་ཀྱི་གསུང་རྩོམ་ལེགས་པ་ཞིག་ཏུ་སྣང་།
   ཚ་གྲངས་འཁྲུགས་པའི་སྒྲ་ཚོགས་སྒྲོགས་པའི་དཔུང་། །ཚ་གྲང་གི་གྲང་དང་གཅིག་གཉིས་ཀྱི་གྲངས། ཞེས་ཁྱད་པར་འབྱེད་དགོས།
   ཟྭ་ལྟར་ཀུམ་མོའི་བསམ་ནས་སོང་བ་དེ། ། འདིར་ཟྭ་ཞེས་པ་ཟྭ་ཚོད་དུ་ཡིན་ན། ཀུམ་མོའི་དོན་ཅི་ཡིན་ནམ་
   མ་ཤེས། ཨ་ཅང་འགྲོ་ངོར་ཡིན་གྱིས་གཞན་དུ་མིན། ཨ་ཅང་གི་དོན་ཅི། མཐུ་ལས་འཁོར་བར་ཉམས་ཐག་འགྲོ་ཚོགས་རྣམས། ཉམ་ཐག ཅེས་དགོས་ཏེ། པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས། བླ་མཆོད་དུ། ཉམ་ཐག་འགྲོ་བ་འདོཀུན་བདག་གི་མ། ཞེས་གསུངས་པ་ལྟ་བུ། ཞུ་དག་ཅེས་པ་ཡང་མ་དག་པར་མཐོང་སྟེ། དཔེ་ཆ་དག་པ་མང་པོ་ན། ཞུས་དག་ཅེས་བྲིས། དེ་ཉིད་དག་སྟེ། ངའི་ལུང་པར་སྤུས་དག་པོ་བྱེད་པ་ལ། ཞུན་དག ཅེས་ཟེར། རྗེས་འཇུག་ས་དང་ན་གཉིས་རེས་མོས་སུ་འབྱུང་སྟེ། དཔེར་ན། ཟན་དང་། ཟས། ཚོན། ཚོས་ཞེས་སོགས་སོ།།

4. ཨ་ཅང་གི་དོན། བཤད་མི་དགོས་སམ་སྨོས་ཅི་དགོས།འཇིགས་དྲགས་ནས་ཞིང་ཁང་གི་ཕྱོགས་ལ་འགྲོ་བ་དག་ཨ་ཅང་ཆེ་སྟེ་མིག་ཀྱང་བལྟ་མི་ཕོད་པ་ཙམ་ཡོད།

5. ཆོས་རྒྱལ་མྱ་ངན་མེད་ཀྱི་ལས་ཀྱི་མཐུ། །
   རྒྱལ་པོ་སྤྱི་བོ་སྐྱེས་ཀྱི་ལས་ནུས་སོགས། །
   ལས་ཚུལ་བསམ་གྱིས་མི་ཁྱབ་ལ། །
   ཅུང་ཟད་ཡིད་གཡོ་བྱུང་བ་མཚར། །

6. རྒན་ལ་དྭགས་པ་ལགས་དང་མེ་དཀར་ལ་ཐུགས་རྗེ་ཆེ་ཞུ། གསུང་སྤྲུལ་ལྔ་པ་མཆོག་ནི་སྤྱི་ལོ་༡༧༢༥ ལོར་བསམ་གྲུབ་བདེ་བ་ཆེན་པོའི་ཕོ་བྲང་དུ་ཡབ་སྡེ་པ་ན་ལུང་པ་བསོད་ནམས་དར་རྒྱས་དང་ཡུམ་ངག་དབང་དཔལ་མོའི་སྲས་སུ་འཁྲུངས་ཞེས་རྣམ་ཐར་དུ་དེ་ལྟར་གསལ། སྨིན་གླིང་ཁྲི་ཆེན་རིན་ཆེན་རྣམ་རྒྱལ་དང་རྗེ་བཙུན་མི་འགྱུར་དཔལ་སྒྲོན་གྱི་སློབ་མ་ཡིན་པར་བཤད། ཁོང་གི་གསུང་རྩོམ་མང་པོ་ཞིག་ཡོད་ལས་ཆེ་སྟེ་འོན་ཀྱང་ད་ལྟའི་བར་དུ་ཁོང་གི་གསུང་རྩོམ་ཕྱོགས་བསྡུས་བྱེད་མཁན་སུ་ཡང་བྱུང་མྱོང་མི་འདུག དེར་བརྟེན་ཁོང་གི་གསུང་རྩོམ་རྣམས་ཁ་འཐོར་དུ་སོང་སྟེ་ཕལ་ཆེར་ཆོས་ཀྱི་དབྱིངས་སུ་ནུབ་ཟིན་པའམ་སྙམ་པ་འདུག། གང་ལྟར་གོང་གི་དེ་ནི་འབྲུག་ཡུལ་གྱི་དགོན་པ་རྙིང་པ་རྣམས་ཀྱི་ནང་ནས་རྙེད་པའི་དཔེ་རྙིང་གི་གྲལ་དུ་འདུག་ཅིང་དཔེ་རྙིང་ཡིན་སྟབས་ཡི་གེ་གསལ་ལ་མི་གསལ་བ་ཞིག་འདུག། ངས་ཕོ་ཚོད་ཀྱིས་བཤུས་པ་ཡིན།

7. ཨ་ཅང་འདི་ཧ་ཅང་དང་ཐག་ཉེ།

8. ཨ་ཅང་ཞེས་པ་དེ་ཕལ་ཆེར་དགེ་ལུགས་ཀྱི་གྲྭ་སར་འགྲིམས་མཁན་ཚོ་ལ་དྲིས་ན་གསལ་པོ་ཞིག་ཡོང་བར་རེ། གང་ཡིན་ཟེར་ན་ངས་འབྲས་སྤུངས་བློ་གསལ་གླིང་གི་སློབ་ཁྲིད་ཅིག་ཉན་པ་ཡིན། སློབ་ཁྲིད་དེར་དགེ་རྒན་གྱིས་ཨ་ཅང་ཅང་ཞེས་པ་ཡང་ནས་ཡང་དུ་གསུངས་པ་ཐོས། ཧ་ཅང་ཅང་ཞེས་གསུངས་པ་ཡིན་ནམ་མི་ཤེས། ངའི་རྣ་བར་ནི་ཨ་ཅང་ཅང་ཞེས་རང་ཐོས།

9. ཨ་ཅང་ནི་ཧ་ཅང་གི་ཡུལ་སྐད་དང་། ཧ་ཅང་གི་གོ་དོན་ནི་མང་པོ་ཞེ་དྲགས་དང་། ཨ་ཅང་ཅང་ནི། ཡིན་དང་ཡིན་ཡིན་དང་། ཡོན་དགོས་བྱུང་ཞེས་པའི་དོན་ནོ། །

10. རྒན་ལ་དྭགས་པ་ལགས། ངས་ཁྱོད་རང་ལ་ནང་མོལ་གྱི་ཚུལ་དུ་དོགས་འདྲི་ཞིག་ཞུ་རྒྱུ་ཡོད་པས་མི་བདེ་བ་མེད་ན་གཤམ་གྱི་གློག་འཕྲིན་གྱི་ཐོག་ཏུ་འབྲེལ་བ་ཞིག་གནང་རོགས།
    shenruma@yahoo.com

11. བླ་མ་དང་ལྷག་པའི་ལྷ་དབྱེར་མི་ཕྱེད་པ་ལ་ཕྱག་འཚལ་ལོ། །བསྐལ་པ་བཟང་པོའི་རྣམ་འདྲེན་བཞི་པའི་སྐུར། །ཡོངས་གྲུབ་སྟོབས་བཅུའི་མངའ་བདག་ཟས་གཙང་སྲས། །དེ་ཡི་གསུང་རབ་ཡན་ལག་བཅུ་གཉིས་དང་། །དེ་འཛིན་དགེ་འདུན་བཅས་ལ་གུས་པས་འདུད། །སྔོན་གོམས་བག་ཆགས་འགྲིབས་ཤིང་འདིར་སྦྱངས་དམན། །རྟུལ་པོའི་གྲལ་མཐར་གནས་ཀྱང་ལྷག་བསམ་ནི། །ཀཻ་ལ་ཤ་རི་མཚུངས་ཕྱིར་དང་བའི་བློས། །རྫོགས་སངས་རྒྱས་ལ་བསྟོད་པའི་དབྱངས་འདི་སྐད། །ཀ་ལིང་ཀ་སོགས་མཐའ་ཁོབ་མུན་གླིང་དང་། །ཁ་བ་ཅན་སོགས་དུད་འགྲོའི་རྒྱུད་མིན་པའི། །ག་ཤེད་སངས་རྒྱས་ཀུན་འཁྲུངས་འཕགས་ཡུལ་དེར། །ང་ཚོ་འགྲོ་ཀུན་འདྲེན་པ་མཆོག་དེ་བལྟམས། །ཅ་ཅོ་མ་ཡིན་སྙན་པའི་རོལ་མོས་མཆོད། །ཆ་ལུགས་སྐབས་གསུམ་སྒེག་མཚུངས་བཙུན་མོ་དང་། །ཇ་ཆང་ལོངས་སྤྱོད་རྒྱས་པའི་འཁོར་ལྡན་ཡང་། །ཉ་མོ་ལྕགས་ཀྱུའི་སྡུག་བསྔལ་བཞི་གཟིགས་ནས། །ཏ་ལའི་ནགས་གསེབ་སྦས་?བས་?མཐའི་ངོགས་རྣམས་སུ། །ཐ་མལ་བསམ་ཡུལ་འདས་པའི་དཀའ་སྤྱད་ཀྱིས། །ད་གདོད་བྱང་ཆུབ་སྙིང་པོ་བརྙེས་པའི་ཚེ། །ནཱ་གའི་ཚོགས་ཀྱང་གདུག་པ་རང་ཞིར་གྱུར། །པ་སངས་ལྟར་དཀར་འོད་ཕུང་གྲངས་མེད་པ། །ཕ་རོལ་བདུད་སྡེའི་གྲོང་དུ་སྤྲོས་པའི་ཚེ། །བ་ལང་རྣམ་ཐར་འཛིན་པའི་འདོད་རྒྱལ་ཚོགས། །མ་རུངས་བསམ་པ་ལྡན་པའི་གཡུལ་བཤམས་ནས། །ཙ་རའི་གྲོང་གི་མི་རྒོད་ལྷགས་པ་བཞིན། །ཚ་གྲང་འཁྲུགས་པའི་སྒྲ་ཚོགས་སྒྲོགས་པའི་དཔུང་། །ཛ་ལང་(རྒྱས་པས་)…..?གླང་པོ་སྟོང་ཐུབ་ལ། །ཝ་སྐྱེས་སེང་གེ་གོམ་ཕྱིར་རྒྱུག་པ་བཞིན། ། { 1v } ཞྭ་ལྟར་(འཁུར་)……?འོས་རྫོགས་པའི་སངས་རྒྱས་ལ། །ཟྭ་ལྟར་(ཀུམ་མོའི་)……?བསམ་ནས་སོང་བ་དེ། །འ་ཅག་ངན་འགྲོར་འདོང་ཞེས་སྨྲ་དང་མཚུངས། །ཡ་རབས་སྤྱོད་ཚུལ་མིན་པར་ཀུན་གྱིས་རྟོགས། །ར་རིའི་དྲི་མ་ཡོངས་སྤང་རྒྱལ་བ་དེས། །ལ་ལུང་བརྒལ་ནས་སེམས་ཅན་ཀུན་དོན་མཛད། །ཤ་ཟ་ལ་སོགས་སྐད་དུའང་ཆོས་འཁོར་བསྐོར། །ས་བཅུར་སྐྱེ་བོ་མང་པོ་བཀོད་མཛད་ནས། །ཧ་རིའི་ནགས་ཚལ་འཁྲིགས་པའི་(གྲོང་ཁྱེར་)……?(དུ)(རུ)། །ཨ་ཧོ་མྱ་ངན་འདས་པའི་ཚུལ་བསྟན་ཀྱང་། །ཧ་ཅང་ཞིབ་མོའི་བློ་ཡིས་བརྟག་པ་ན། །ཨ་ཅང་འགྲོ་ངོར་ཡིན་གྱིས་གཞན་དུ་མིན། །དེ་ལྟར་(སྲ་རྒྱས་)…..?ཆར་གཏོགས་ཀ་ལི་ལས། །བརྩམས་པའི་རྒྱལ་བར་བསྟོད་དབྱངས་འདི་དབུལ་བའི། །མཐུ་ལས་འཁོར་བར་ཉམས་ཐག་འགྲོ་ཚོགས་རྣམས། །འདྲེན་པའི་དེད་དཔོན་མཆོག་ཏུ་བདག་གྱུར་ཤོག །བླུན་རྒན་བ་ལང་རྫི་བོའི་གཏམ་ཇི་བཞིན། །སྐྱོན་མང་ལྡན་པའི་གྲོང་ཚིག་རྐང་བཅད་འདི། །རྨོངས་བརྟུལ་གྲུབ་མཆོག་རྡོ་རྗེས་སྨྲས་པ་ལ། །མཁས་རྣམས་ཁྲེལ་ན་བཟོད་པའི་གོ་ཆ་བཞེས། །འོན་ཀྱང་ལྷག་བསམ་དཀར་བའི་དགེ་བ་ནི། །རྒྱལ་བར་བྱེ་མ་ཕུལ་བའི་ཡོན་ཏན་གྱིས། །ཆོས་རྒྱལ་མྱ་ངན་མེད་གྱུར་རྣམ་ཐར་དང་། །ཚིག་གི་ཕན་ཡོན་དུས་མཁྱེན་རྒྱལ་པོ་བཞིན། །འདི་ནི་རྒྱལ་བར་བསྟོད་པའི་ཚིག་ཡིན་ཕྱིན། །བརྙས་པ་དགེ་ཚུལ་སྐྱེ་བ་ལྔ་བརྒྱའི་བར། །ཁྱི་ཡི་ལུས་གྱུར་དམ་ཆོས་མཛངས་བླུན་སོགས། །བཀའ་བསྟན་ཡོངས་སུ་གྲགས་ཕྱིར་ཀླན་ཀ་སྤོངས། །ཞེས་ཀྱང་སྨྲས་སོ། །

12. ཞུ་དག་གཏོང་ན་མ་དཔེ་དེ་ང་ཚོས་མཐོང་ན་ཅིག་བྱ་རྒྱུ་རེ་རྙེད་སྲིད། དེ་མིན་ཁྱེད་ཀྱིས་ཕོ་ཚོད་ཀྱིས་ཞུ་དག་བཏང་བ་ལས་ལྷག་ཅིག་ང་ཚོས་ཅང་ཤེས་ཀྱི་མ་རེད།