ཞིས་ལ་ཕུལ་བའི་སྙན་ཞུ་ཆ་ཚང། An open letter to Xi Jinping

༄༅།། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་གཙོ་འཛིན་གསར་པ་སྐུ་ཞབས་ཞིས་ཅིན་ཕིན་མཆོག་གིས་གཙོས་རྒྱ་ནག་དབུས་གཞུང་གི་འབྲེལ་ཡོད་དཔོན་རིགས་རྣམ་པ་དང་རང་སྲེག་བསྟུད་མར་འབྱུང་སའི་ས་གནས་དཔོན་རིགས་རྣམས་ཀྱི་མདུན་སར།།

 

      ཆེད་ཞུ། རྣམ་པ་ཚོས་ཤེས་གསལ་བཞིན། འདས་པའི་ལོ་དྲུག་ཅུ་ལྷག་རིང་༧གོང་ས་༧སྐྱབས་མགོན་ཆེན་པོ་མཆོག་གི་དབུས་གཞིས་བྱེས་བོད་མི་ཡོངས་ནས་རྒྱ་ནག་གཞུང་གིས་བོད་ཐོག་འཛིན་པའི་ནོར་འཁྲུལ་ཅན་གྱི་སྲིད་བྱུས་ལ་བསྒྱུར་བཅོས་ཡོང་སླད་དབུས་དང་ས་གནས་ཀྱི་འབྲེལ་ཡོད་དཔོན་རིགས་ཁག་ལ་རེ་སྐུལ་དང་ཞུ་འབོད་མཚམས་མ་ཆད་པར་བྱས་ཤིང་། ལྷག་པར་ཕྱི་ལོ་ ༢༠༠༨ ལོར་ཆོལ་གསུམ་བོད་མི་རྣམས་སྡེབ་ལངས་ཀྱིས་ལོ་རྒྱུས་ཐོག་ཡོངས་གྲགས་སུ་གྱུར་པའི་ས་བྱི་ཞི་རྒོལ་ཆེན་མོའི་ལས་འགུལ་སྤེལ་སྐབས་འཚེ་བའི་ལས་ཏིལ་འབྲུ་ཙམ་ཡང་མ་བྱས་པར་འཇིག་རྟེན་སྤྱི་ལ་ཁྱབ་པའི་ཞི་བའི་འབོད་སྒྲ་བསྒྲགས་ཀྱང་། རྒྱ་ནག་གཞུང་གིས་འཕྲལ་དུ་བོད་མི་ཞི་རྒོལ་བའི་ཁྲོད་སིམ་འཛུལ་གྱི་གཡོ་ཐབས་ལ་བརྟེན་ནས་གཏོར་བཅོམ་དང་རྒྱ་བོད་མི་རིགས་བར་འགལ་ཟླ་འགྲོ་གཞིའི་བྱ་སྤྱོད་ཐབས་རྡུགས་བསྟུད་མར་སྤེལ་བར་མ་ཟད།

 

བོད་མི་རིགས་ཀྱི་དངོས་ཡོད་དཀའ་ངལ་ལ་བསམ་ཤེས་སྒོས་ནོར་འཁྲུལ་ཅན་གྱི་སྲིད་བྱུས་ལ་སྒྱུར་བཅོས་གཏོང་རྒྱུའི་ཚབ་ཏུ་གདུག་རྩུབ་ཆེ་བའི་དྲག་གནོན་ཁོ་ན་བྱས་ཏེ། བོད་མི་མང་པོ་དམར་གསོད་དང་འཛིན་བཟུང་བཙོན་འཇུག་མཚམས་མ་ཆད་པར་བྱས། དེར་བརྟེན་ཕྱི་ལོ ༢༠༠༩ ལོ་ནས་བོད་ནང་སྔར་ལས་ཀྱང་ཛ་དྲག་ཆེ་ཞིང་འཚེ་མེད་ཞི་བའི་ལས་འགུལ་ཚད་མཐོ་ཤོས་རང་ལུས་མེར་སྲེག་གི་ལས་འགུལ་སྤེལ་ཏེ། ད་བར་བོད་མི་དགུ་བཅུ་ལྷག་གིས་རང་གི་ཚེ་སྲོག་མེ་རུ་བསྒྲོན་ནས་རྒྱ་ནག་དབུས་སའི་དཔོན་རིགས་རྣམས་ལ་ཞུ་འབོད་བྱས་དང་བྱེད་བཞིན་པའི་ཛ་དྲག་ཆེ་བའི་དུས་སྐབས་འདིར་ཡང་། རྒྱ་གཞུང་གིས་ཕྱོགས་གཅིག་ནས་རང་སྲེག་བྱེད་མཁན་རྣམས་སེམས་ཐང་པོ་མེད་མཁན་དང་། འཚོ་བའི་མདུན་ལམ་མེད་མཁན། བཟའ་ཚང་ནང་ཁུལ་མི་མཐུན་པའི་གནས་ཚུལ་ཡོད་མཁན་ཤ་སྟག་ཡིན་པའི་རྫུན་གཏམ་འུར་སྒྲོག་བྱེད་བཞིན་པ་དང་། ཕྱོགས་གཞན་ནས་༧གོང་མཆོག་དང་བཙན་བྱོལ་གཞུང་མང་ནས་ངན་སྐུལ་བྱས་པ་ལ་བརྟེན་ནས་བྱུང་བ་ཡིན་ལུགས་སོགས་དངོས་དོན་མིན་པའི་གནས་ཚུལ་རྫུན་མ་སྣ་ཚོགས་ཁྱབ་སྤེལ་གྱིས་ཉིན་ཞག་འཁྱོལ་ཐབས་ཙམ་བྱེད་བཞིན་ཡོད། སྲིད་བྱུས་ཐབས་རྡུགས་འདིས་བོད་མི་མང་གི་ཞི་རྒོལ་གཏན་ནས་མཚམས་ཆོད་མི་སྲིད་པར་མ་ཟད། འདི་ལ་མཇུག་འབྲས་ཧ་ཅང་འཇིགས་སྣང་ཅན་ཞིག་འབྱུང་མི་སྲིད་པ་གཏན་ནས་མིན།

 

རྒྱ་ནག་དབུས་གཞུང་དང་ས་གནས་ཀྱི་དཔོན་རིགས་འགའ་ཤས་ཀྱིས་རང་སྲེག་གི་གནས་ཚུལ་འདི་ས་ཁུལ་རེ་ཟུང་དང་མི་ཉུང་ཤས་ཀྱི་དཀའ་ངལ་ཡིན་པ་སྒྲོག་བཞིན་ཡོད་ཀྱང་། དོན་དངོས་སུ་རང་སྲེག་ནི་བོད་ཁམས་ཞིང་ལྗོངས་ལྔའི་ས་ཁུལ་ཚང་མར་བྱུང་ཡོད་པར་མ་ཟད། དེ་ཡང་བླ་མ་དང་གྲྭ་པ། ཞིང་པ་དང་འབྲོག་པ། ཤེས་ཡོན་པ་དང་རྩོམ་པ་པོ། སློབ་མ། བུ་ཕྲུག་གི་ཕ་མ་དང་ཕ་མའི་གཅེས་ཕྲུག མདོར་ན། རྒན་གཞོན། ཕོ་མོ ། ཆོས་བརྒྱུད། སྐྱ་སེར། ལུང་ཚན། ཆོལ་ཁ་དབྱེར་མེད་ཀྱིས་རྒྱ་གཞུང་ལ་རྒོལ་བའི་རང་སྲེག་བསྟུད་མར་སྤེལ་དང་སྤེལ་བཞིན་པ་འདིས་གང་ཟག་སྒེར་དང་ས་ཁུལ་བྱེ་བྲག་པ་ཞིག་གི་དཀའ་ངལ་མིན་པ་འཇིག་རྟེན་ཀུན་ལ་ཧ་ཅང་མངོན་གསལ་དོད་པོས་གསལ་སྟོན་བྱས་ཡོད།

 

རང་སྲེག་གཏོང་མཁན་རྣམས་ཀྱིས་མེ་དཔུང་གི་ཁྲོད་ནས་ཀྱང་༧གོང་ས་༧སྐྱབས་མགོན་ཆེན་པོ་བོད་དུ་གདན་འདྲེན་ཞུ་དགོས། བོད་ལ་རང་དབང་དགོས་ཞེས་པའི་དགོས་འདུན་ཤུགས་ཆེར་སྒྲོག་བཞིན་པ་འདིས། བོད་མི་རིགས་ཀྱི་མངོན་འདོད་གསལ་བོར་མཚོན་ཡོད་ལ། བོད་མི་རིགས་ནི་དངོས་པོའི་དཔལ་ཡོན་ལས་བསམ་བློའི་དཔལ་ཡོན་དང་ཆོས་ལུགས་ཀྱི་འདུ་ཤེས་ལ་གཙིགས་ཆེར་འཛིན་མཁན་གྱི་མི་རིགས་ཤིག་ཡིན་པས། རྒྱ་ནག་གཞུང་དང་ལྷག་པར་སྐུ་ཞབས་ཞིས་ཅིན་ཕིན་གྱིས་དབུ་ཁྲིད་པའི་དུས་སྐབས་གསར་པའི་སྲིད་སྐྱོང་ལས་དོན་ནང་གདུག་རྩུབ་ཆེ་བའི་དྲག་གནོན་དང་། དཔལ་འབྱོར་གྱི་གཡོ་ཐབས་བཀོལ་བའི་བསླུ་བྲིད་ཙམ་མ་ཡིན་པར། བོད་མི་རིགས་ཀྱི་དངོས་ཡོད་དགོས་མཁོ་གཞི་རྩར་བཟུང་བའི་ཐོག་ནས་བོད་ཀྱི་གནད་དོན་ཐག་གཅོད་ཡོང་ཐབས་བྱ་དགོས། དེ་སྔ་སྲིད་འཛིན་མའོ་སྐབས་ནས་བཟུང་བོད་ནི་”རྒྱལ་ནང་ཞིང་ཆེན་དང་ས་ཁུལ་གཞན་དག་ལྟར་མིན་པར་དམིགས་བསལ་ཁྱད་ཆོས་ལྡན་པའི་ས་ཁུལ་ཞིག་”ཏུ་ངོས་འཛིན་བྱས་ཡོད་པའི་གཞི་རྩའང་འདི་ག་རང་ཡིན་ལ། རྒྱ་ནག་གཞུང་གི་ཆེས་མཐོའི་དཔོན་རིགས་ནང་བོད་ཀྱི་གནས་ཚུལ་ལ་དངོས་ཐོག་བདེན་འཚོལ་གནང་མྱོང་མཁན་སྐུ་ཞབས་ཧུའུ་ཡའོ་པང་དང་གཙོ་འཛིན་ཉིད་ཀྱི་ཨ་ཕ་སོགས་འགའ་ཤས་བྱུང་ཡོད།

 

༧གོང་ས་༧སྐྱབས་མགོན་ཆེན་པོ་མཆོག་དང་བོད་མི་མང་བར་གྱི་ཐུན་མོང་མིན་པའི་འབྲེལ་བར་རྒྱ་གཞུང་གིས་ངོས་འཛིན་ཡང་དག་མ་ཐོབ་པར་ཚོད་རྩིས་གཞི་རྩ་མེད་པ་རྒྱག་བཞིན་པའི་སྲིད་བྱུས་འདི་རིགས་ནི། བོད་ནང་ཞི་རྒོལ་མཚམས་མ་ཆད་པར་འབྱུང་བའི་རྐྱེན་རྩ་གཙོ་བོ་ཞིག་ཡིན་ལ། ༧གོང་ས་༧སྐྱབས་མགོན་ཆེན་པོ་མཆོག་བོད་དུ་གདན་འདྲེན་ཞུ་དགོས་པ་ནི་བོད་མིའི་མངོན་འདོད་ཙམ་དུ་མ་ཟད། རྒྱ་ནག་མི་མང་དུང་ཕྱུར་བཅུ་གསུམ་གྱི་མི་ཚེའི་རིན་ཐང་དང་འབྱུང་འགྱུར་ལོ་རྒྱུས་འོད་སྣང་ལྡན་པ་འབྱུང་ཐུབ་མིན་ལ་འབྲེལ་བ་གཏིང་ཟབ་ཡོད། དེར་བརྟེན་༧གོང་ས་༧སྐྱབས་མགོན་ཆེན་པོ་མཆོག་ཕྱིར་བོད་དུ་གདན་ཞུ་དང་། རྒྱ་བོད་མི་རིགས་བར་སྤུན་ཟླའི་མཛའ་བརྩེ་བསྐྲུན་ཏེ་དོན་དམ་པའི་ཞི་བདེ་མཉམ་གནས་ཀྱི་སྤྱི་ཚོགས་ཤིག་མངོན་འགྱུར་ཡོང་ཐབས་སུ་སྐུ་ཉིད་ཀྱིས་གོ་སྐབས་དམ་འཛིན་གནང་རྒྱུ་དང། བོད་ཐོག་འཛིན་པའི་སྲིད་བྱུས་ཀྱི་གཞི་རྩ་ནི་བོད་ཀྱི་དངོས་ཡོད་གནས་བབ་དང་བསྟུན་དགོས་པའི་རེ་བ་ཤུགས་ཆེར་ཞུ་རྒྱུ་ཡིན། བོད་ས་སྟོད་སྨད་བར་གསུམ་དུ་༧གོང་ས་མཆོག་གི་སྐུ་པར་ཙམ་ཡང་སྒྲིག་གཤོམ་མི་ཆོག་པའི་གདུག་རྩུབ་ཆེ་ཞིང་མིག་རྒྱང་ཐུང་བའི་སྲིད་བྱུས་ལག་བསྟར་བྱེད་བཞིན་པ་འདིས་བོད་མི་ཚོར་བརྗོད་མི་ཤེས་པའི་སྐྱོ་གདུང་གིས་མནན་ཏེ་ཚེ་སྲོག་འདོར་དགོས་འབྱུང་བཞིན་པ་སོགས་ནི་ས་གནས་ལ་ཞིབ་འཇུག་བྱས་ན་གསལ་པོར་མཁྱེན་ཐུབ་པ་ཞིག་རེད།

 

དེང་སྐབས་འཛམ་གླིང་འདིར་འགྲོ་བ་མིའི་རང་དབང་དང་ཆེ་མཐོང་ལ་བརྩི་བཀུར་བྱེད་མཁན་གྱི་གཞུང་སྒེར་མང་པོས་བོད་ནང་གི་ད་ལྟའི་རང་སྲེག་གི་གནས་སྟངས་ལ་ཟས་བརྗེད་གཉིད་བྲལ་ལྟ་བུའི་སེམས་ཁུར་གནང་གི་ཡོད་ནའང། རྒྱ་ནག་གཞུང་གིས་བོད་མི་རང་སྲེག་གནང་མཁན་གྱི་མངོན་འདོད་ལ་ཉན་འཇོག་གནང་རྒྱུ་ལས་ལྡོག་སྟེ། ད་དུང་རང་སྲེག་གིས་སྐུ་གྲོངས་པ་རྣམས་ཀྱི་ཆེད་དུ་མཆོད་འབུལ་སྨོན་ལམ་བྱེད་པ་དང་། འདས་པོའི་ཁྱིམ་ཚང་ལ་ཐུགས་གསོ་འཚམས་འདྲི་བྱེད་པ་སོགས་ལ་ཡང་དམ་བསྒྲགས་བཀག་སྡོམ་གྱིས་བོད་མི་རྣམས་གསོན་གནས་དཀའ་བའི་སྲིད་བྱུས་གདུག་རྩུབ་ཅན་སྣ་ཚོགས་འོག་ལྷུང་ཡོད། དཔེར་ན། ཉེ་ཆར་རྨ་ལྷོ་ཁུལ་ཏང་ཨུས་བཀྲམས་པའི་དོན་ཚན་ལྔ་ཅན་དང། མཚོ་ལྷོ་ཁུལ་ཏང་ཨུའི་དྲིལ་བསྒྲགས་པུའུ་ནས་བཀྲམས་པའི་མིག་སྔའི་ལྟ་ཚུལ་འཛིན་སྟངས་བཅུ་ཟེར་བའི་སྦྱར་ཡིག་ལྟ་བུ་ཡིན། དེ་བཞིན་ཀན་ལྷོ་ཁུལ་དུ་སྒོར་མོས་བསླུ་ཐབས་ཀྱི་བརྡ་སྦྱོར་སྤེལ་བ་སོགས་ཀྱི་བྱ་སྤྱོད་འདི་རིགས་ལ་གྲུབ་འབྲས་ལྡོག་ཕྱོགས་ནས་ཐོན་པའི་ཉེན་ཁ་ཤིན་ཏུ་ཆེ་བས། གནས་སྟངས་འདིའི་འོག་འཆམ་མཐུན་དང་སྤྱི་ཚོགས་བརྟན་བརླིང་ཟེར་བ་སོགས་ནི་ཚིག་སྐམ་པོ་ཙམ་མ་གཏོགས་ཡོང་ཐབས་མེད་པ་ཞིག་རེད།

 

 

རང་སྲེག་ནི་མི་ཞིག་ལ་མཚོན་ན་བློས་གཏོང་ཆེ་ཤོས་དང་མིག་སྔའི་གདམ་ག་མཐའ་མ་དེ་ཡིན། རང་སྲོག་གཏོང་རྒྱུ་ཐག་བཅད་ཟིན་པའི་མི་ཞིག་ལ་མཚོན་ན་འཇིགས་སྣང་གི་དྲ་བ་ལས་ཡོངས་སུ་བརྒལ་ཟིན་པས་བློ་ཐག་གཅོད་མི་ཐུབ་པའི་གནད་དོན་གང་ཡང་ལྷག་མེད། དེར་བརྟེན་རྒྱ་ནག་གཞུང་གིས་བོད་མི་རང་སྲེག་གནང་མཁན་ཚོའི་མངོན་འདོད་སྐོང་ཕྱིར་བྱེད་ཐབས་དོན་ཕན་ལྡན་པ་འཕྲལ་དུ་ལག་བསྟར་བྱེད་དགོས། དངོས་ཡོད་དང་ཚེ་སྲོག་ལ་སྣང་ཆུང་བྱས་ཚེ་བསམ་ཡུལ་ལས་འདས་པའི་དོན་རྐྱེན་སྣ་ཚོགས་འབྱུང་མི་སྲིད་པ་མིན་པས། མི་རིགས་འདྲ་མཉམ་དང་ཞི་མཐུན་མཉམ་གནས་ཀྱི་ཕྱོགས་སུ་གོམ་ཞེང་ཆེན་པོས་མདུན་བསྐྱོད་བྱ་རྒྱུར་གཤམ་འཁོད་དོན་ཚན་རྣམས་སྐུ་ཉིད་ཀྱི་སྲིད་འཛིན་གསར་པའི་ལས་དོན་ནང་གི་གལ་ཆེའི་གྲས་སུ་བཞག་སྟེ་གང་མགྱོགས་ཕྱག་བསྟར་ཡོང་བ་ཞུ།།
གཅིག རང་སྲེག་ཐད་རྒྱ་ནག་གཞུང་ནས་རང་དབང་ལྡན་པའི་ཞིབ་འཇུག་ཚོགས་ཆུང་བཙུགས་ཏེ། རང་སྲེག་གི་བྱུང་རྐྱེན་ལ་གཏིང་ལོན་པའི་ངོས་འཛིན་ཐོབ་པ་བྱ་དགོས།

Form an independent Chinese committee to investigate the deep-root causes of the Tibetan’s self immolation.

要求中共政府就自焚事件成立专门调查小组，尽快找到发生自焚问题的根源。

 

བཞི། བོད་མིའི་རང་སྲེག་གི་བྱུང་རྐྱེན་དང་བྱུང་རིམ་ཐད་གཡོ་ཐབས་དང་རྫུན་སྒྲིག་གིས་ཁྱབ་བསྒྲགས་བྱེད་པ་འདི་རིགས་འཕྲལ་དུ་མཚམས་འཇོག་བྱ་དགོས

Stop the baseless accusations and the untrue branding of the causes and events leading to the self immolations.

立即停止对藏人自焚抗议活动颠倒黑白或无中生有的污蔑与系列的反面宣传。
ལྔ། བོད་མི་མང་གིས་གུས་བརྩི་ཡོད་པའི་བླ་སྤྲུལ་དགེ་བཤེས་དང་། ལས་བྱེད། ལས་ཁྱུར་ངལ་གསོ་བ། ཤེས་ཡོན་པ། མི་རྒན་ལྷག་བསམ་ཅན་རྣམས་ཀྱི་ས་ནས་རང་སྲེག་བྱུང་རྐྱེན་སྐོར་རང་དབང་ཡོད་པའི་ཐོག་ཉན་ཞིབ་གནང་དགོས།

To listen freely the true causes of these self-immolations from those respectable public figures such as, high Lamas, officials, retired, educated and elders so on.

要诚恳听取受西藏人民尊重的仁波切、格西、藏人干部、退休干部、知识分子，以及民间德高望重的老者等对有关自焚活动的真实诉求等的自由表述。

 

དྲུག “༧གོང་ས་མཆོག་བོད་དུ་གདན་ཞུ་”དང་། ”བོད་ལ་རང་དབང་དགོས་”ཞེས་པ་ནི་རང་སྲེག་གཏོང་མཁན་གཙོས་གཞིས་བྱེས་བོད་མི་ཡོངས་ཀྱི་མངོན་འདོད་ཉག་ཅིག་ཡིན་པས་བོད་རིགས་མང་ཚོགས་ཀྱི་མངོན་འདོད་སྣང་མེད་དུ་མི་གཏོང་བའི་ཞུ་འབོད་ནན་པོ་བྱེད་བཞིན་ཡོད།

PRC should seriously consider the over-whelming call of His Holiness return to Tibet and the freedom to Tibet by the self-immolators, which are also the wishes of all Tibetans.

允许圣尊达赖喇嘛返回家园！西藏需要自由！”等是以自焚者为主的西藏境内外人民的共同愿望，故我们强烈呼吁当局不要忽略藏族人民这一合法的诉求。
བདུན། འཚེ་མེད་ཞི་བའི་ལམ་ནས་སྤྱི་དམངས་ཀྱི་ཐོབ་ཐང་རྩོད་པའི་རང་སྲེག་དང་། སློབ་ཕྲུག་སྡེབ་ལངས་ཀྱིས་རྔམ་སྟོན་ཁྲོམ་སྐོར་སོགས་ཀྱི་སྐབས་འཕྲལ་དུ་དྲག་གནོན་བྱེད་རྐྱང་མིན་པར་ཁོང་ཚོའི་མངོན་འདོད་གཞིར་བཟུང་དཀའ་ངལ་སེལ་ཐབས་གནང་དགོས།

Instead of using violence onto the peaceful protesters like the self immolations and the non-violent student up-risings, they must resolve the issue by addressing the desperate wishes of the Tibetans.

呼吁你们不要一味地对争取人权而举行的自焚抗议，以及学生举行的和平示威游行活动等采取武力镇压，而要力求合理针对有关诉求切实解决实际存在的困难。

 

བརྒྱད། ཉེ་ཆར་བོད་ནང་གི་མཐོ་རིམ་སློབ་གྲྭ་དང་དགོན་སྡེ་ཁག་ཅིག་གི་བླ་སྤྲུལ་དགེ་སློབ་དུ་མས་རྒྱ་ནག་གཞུང་ལ་དོན་ཚན་བརྒྱད་ཅན་གྱི་རེ་སྐུལ་སྙན་ཞུ་ཕུལ་འདུག་པ་དེར་ཚུལ་བཞིན་ཡ་ལན་གནང་དགོས་པར་མ་ཟད། བོད་ཀྱི་དཀའ་ངལ་སྐོར་སྙན་ཞུ་ནམ་ཕུལ་ལ་ངེས་པར་དུ་ཐུགས་ཞིབ་ལན་འདེབས་ཚུལ་བཞིན་གནང་རྒྱུའི་ལམ་སྲོལ་འཛུགས་དགོས།

PRC should properly reply the recent 8 points demand which jointly submitted by high school Tibetans, Lamas and monks in the monastery.

当局理应接受近期藏区高校师生和一些寺院佛法师徒们对政府提出的八项请愿诉求，养成一种对群众诉求有问必答的良好作风，并形成一个开放的空间。

 

དགུ། ཉེ་ཆར་རྨ་ལྷོ་དང་མཚོ་ལྷོ་ཁུལ་ཏང་ཨུས་རང་སྲེག་ཐད་མི་སྤྱོད་ལས་འདས་པའི་བསྒྲགས་གཏམ་དོན་ཚན་ལྔ་ཅན་དང་བཅུ་ཅན་ཞིག་སྤེལ་བ་འདི་རིགས་བོད་མིའི་སེམས་ཁམས་དཀྲོགས་རྐྱེན་དུ་འགྲོ་བས་མྱུར་དུ་མཚམས་འཇོག་བྱེད་དགོས།

Stop the governmental distributions about the inhuman explanation on the act of self immolations which creates greater disturbances among the Tibetans.

最近，青海省海南与黄南州政府针对藏人自焚，发出分别有五款及十个条款内容的道德沦丧性通告，由此极大伤害了西藏人民的感情，故要求即刻撤销有关通告。

 

བཅུ། བོད་རྒྱའི་དཀའ་རྙོག་སེལ་ཐབས་ཡག་ཤོས་ནི། ༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་དང་རྒྱ་ནག་གཞུང་དབར་ཞི་བའི་གྲོས་མོལ་གནང་རྒྱུ་འདི་ཉིད་ཡིན་པས། ཉ་ཉོག་ཀ་ཀོར་གང་ཡང་མེད་པར་འབྲེལ་མོལ་མྱུར་ཏུ་བསྐྱར་གསོ་གནང་དགོས།།

The best way to resolve the Sino-Tibet issue is to resume dialogue between the two sides without delay.

解决西藏问题的最佳途径是与尊者达赖喇嘛的特使间进行和谈，中共政府要在无任何条件的基础上重新启动彼此间的和谈；

 

བཅུ་གཅིག རྩོམ་པ་པོ་སྒྲོལ་མ་སྐྱབས་གཙོས་བཙོན་འོག་གི་རྩོམ་པ་པོ་རྣམས་གློད་གྲོལ་གནང་དགོས།

We strongly appeal to release all Tibetan  intellectuals, particularly Mr. Dolma kyab,  who were imprisoned by violating the freedom of speech.

释放以卓玛嘉为主的所有狱中作家。

ཞེས་ན་གཞོན་ཤེས་ཡོན་པའི་ཚོགས་ཆེན་ཐེངས་དང་པོའི་ཚོགས་ཞུགས་པ་ཡོངས་ཀྱིས། ༢༠༡༢། ༡༢།༡༠། ཉིན།

སྙན་ཞུ་ཨ་མ།