ཨེ་མ་ཧོ།
གྲུབ་དབང་པདྨ་ནོར་བུའི་ཡང་སྲིད་རིན་པོ་ཆེའི་ཞབས་བརྟན་གསོལ་སྨོན་དཔག་བསམ་ལྗོན་བཟང་ཞེས་བྱ་བ་བཞུགས་སོ།།
ན་མོ་མ་ཧཱ་གུ་རུ་པདྨ་མ་ཎི་ཡེ།
ཆོས་དབྱིངས་རབ་འབྱམས་ཀློང་ཡངས་རིག་གཏེར་ལས།།
ལོངས་སྤྱོད་རྫོགས་སྐུ་བཅོམ་ལྡན་རྣམ་སྣང་མཛད།།
སྤྲུལ་པའི་སྐུ་མཆོག་དགའ་རབ་རྡོ་རྗེ་ནས།།
རྩ་བརྒྱུད་བླ་མའི་ཚོགས་ཀྱིས་ཤིས་པར་སྩོལ།།
ལྔ་བརྒྱའི་གཙུག་བརྒྱན་པན་ཆེན་བཱི་མ་ལ།།
བསམ་བཞིན་སྲིད་པ་བཟུང་བའི་ཚུལ་སྟོན་པས།།
སྙིང་པོའི་བསྟན་པ་སྤེལ་ལ་ཟླ་བྲལ་བ།།
པདྨ་ནོར་བུའི་ཡང་སྲིད་ཞབས་བརྟན་གསོལ།།
ཐུགས་བསྐྱེད་དྲི་མེད་ཤེལ་གྱི་བུམ་པ་བཟང་ལས།།
དམ་ཆོས་བདུད་རྩི་སྙིང་པོ་བརྒྱད་ལྡན་ཅན།།
དཔལ་ཡུལ་དག་པའི་ཞིང་ནས་སྤྲོས་མཛད་པས།།
རྟེན་འབྲེལ་ཆོས་ཀྱི་རྒྱལ་པོ་ཞབས་བརྟན་སྨོན།།
སྐུ་གསུམ་རྣམ་པར་སྣང་མཛད་ཐུགས་ཀྱི་འཕྲུལ།།
མཚོ་སྐྱེས་རྒྱལ་བའི་རྒྱལ་ཚབ་སྐྱབས་གནས་མཆོག།
རྩ་གསུམ་རྒྱ་མཚོའི་སྤྱི་གཟུགས་གྲུབ་དབང་རྗེ།།
ཡེ་ཤེས་སྒྱུ་མའི་རོལ་གར་ཞབས་བརྟན་ཤོག།
བསྟན་དང་འགྲོ་བའི་དོན་ལ་རྟག་དགོངས་པས།།
སྐུ་དངོས་སྤྲུལ་སྐུ་རྒྱུན་ཆད་མེད་པ་རུ།།
སྐལ་ལྡན་སྐྱོང་བར་ཞལ་བཞེས་རྡོ་རྗེའི་ཚིག།།
ནམ་ཡང་ཉམས་རྒུད་མེད་པར་ཞབས་བརྟན་གསོལ།།
བཀའ་དྲིན་མཉམ་མེད་༧གྲུབ་དབང་ཆོས་ཀྱི་རྗེ།།
སྐུ་གསུང་ཐུགས་ཡོན་ཕྲིན་ལས་མཐའ་རྒྱས་པས།།
བསྟན་འགྲོའི་དོན་དུ་རླབས་ཆེན་མཛད་བཟང་གིས།།
དམ་པའི་རྣམ་ཐར་ཇི་བཞིན་ཞབས་བརྟན་གསོལ།།
ཕྱི་ནང་གསང་བའི་བར་ཆད་མི་འབྱུང་ཞིང་།།
ཉམས་རྟོགས་ཡོན་ཏན་མི་ཟད་གོང་དུ་འཕེལ།།
དོན་གཉིས་ལྷུན་གྲུབ་རྡོ་རྗེ་ཐོད་ཕྲེང་རྩལ།།
སྐུ་ཚེ་བརྟན་ཅིང་བཞེད་དོན་ལྷུན་གྲུབ་ཤོག།།
ཐེག་པ་ཆེན་པོའི་བྱང་སེམས་ས་གསུམ་ཁྱབ།།
ཕྱག་རྒྱ་ཆེན་པོའི་བདེ་གསལ་གནས་ཀུན་ཁྱབ།།
རྫོགས་པ་ཆེན་པོའི་བསྟན་པ་ཕྱོགས་ཀུན་ཁྱབ།།
ཁྱབ་བདག་འགྲོ་བའི་མགོན་པོ་ཞབས་བརྟན་ཤོག།
ཅེས་པ་རབ་རྒྱན་ཤིང་རྟའི་ཆུ་སྟོད་ཟླ་བའི་གཟའ་ཚེས་དགེ་བར་སྔ་འགྱུར་དཔལ་ཡུལ་དགོན་ཆེན་དུ་༧གྲུབ་དབང་རིན་པོ་ཆེའི་ཡང་སྲིད་ཁྲི་འདོན་རྒྱ་ཆེར་གནང་བའི་འདྲ་སྐུ་དཔར་མཇལ་བ་དང་མཁའ་འགྲོ་ཆོས་སྒྲོན་དང་དཔལ་ལྡན་ལྷ་མོ་སོགས་དད་ལྡན་སློབ་ཚོགས་ཀྱིས་བསྐུལ་ངོར་སྔ་འགྱུར་བསྟན་པའི་གྲལ་མཐར་བ་རྒྱལ་ཁམས་པ་ཨེ་མ་ཧོས་དབྱིན་ཡུལ་ཨེ་ཝྃ་ཕྱག་ཆེན་རི་ཁྲོད་ནས་གསོལ ་བ་འདེབས་པར་དགེའོ།། །།
ཕྱི་རུ་སྤྲུལ་བའི་ཟློས་གར་པདྨ་འབྱུང༌།།
ནང་ལྟར་སྙིང་རྗེའི་རང་གཟུཊ་སྤྱིན་རས་གཟིཊ།།
གསང་བར་སྟོན་མཆོག་དགའ་རབ་རྡོ་རྗེ་དངོས།།
གྲུབ་དབང་པད་ནོར་ཡང་སྲིད་ཁྱེད་ལ་བསྟོད།།
ཕྱི་རུ་སྨྲ་བའི་དབང་ཕྱུག་འཇམ་དཔལ་དབྱངས། །ནང་དུ་སྙིང་རྗེའི་རང་གཟུགས་སྤྱན་རས་གཟིགས། །གསང་བ་རྒྱལ་བའི་གསང་མཛོད་ཕྱག་རྡོར་དངོས། །རིགས་སུམ་སེམས་དཔའ་པདྨ་ནོར་བུར་འདུད། །
པན་ཆེན་པདྨ་ནོར་བུའི་ཡང་སྲིད་རིན་པོ་ཆེ་རྒྱལ་ལོ།།
ཨེ་མ་ཧོ།།
པན་ཆེན་བི་མ་མི་ཏྲའི་སྐུ་ཡི་སྤྲུལ།།
བཀའ་གཏེར་གདམས་པའི་མཛོད་འཛིན་གསུང་གི་སྤྲུལ།།
འཇམ་དཔལ་པདྨ་ནོར་བུའི་ཐུགས་ཀྱི་སྤྲུལ།།
ཡང་སྤྲུལ་ཡིད་བཞིན་ནོར་བུ་རྒྱལ་གྱུར་ཅིག།
པདྨས་སོ།།
ཕྱག་ན་པད་མོས་བྱིན་གྱིས་བརླབས་པའི་སྲས། བསླར་ཡང་འགྲོ་བའི་དོན་དུ་བྱོན་པ་ལེགས། སྐུ་ཚེ་བརྟན་ཅིང་མཛད་འཕྲིན་རྒྱས་པའི་ཕྱིར། ཕྱག་ན་རྡོ་རྗེས་རྟག་ཏུ་བསྲུང་གྱུར་ཅིག།
ལྷོ་ཕྱོགས་རྒྱ་གར་ཡུལ་ནས་སྐུ་གཤེགས་ཡང་།།
བྱང་ཕྱོགས་ཁ་བའི་ལྗོངས་སུ་སྐུ་བལྟམས་པའི།།
པདྨ་རྡོ་རྗེ་པདྨ་ནོར་བུ་དང་།།
མཛད་པ་འཕྲིན་ལས་ཀུན་ནས་མཚུངས་པར་སྨོན།།
བོད་ནས་ཕེབས་ནས་ལྷོ་ཕྱོགས་གཞིས་སུ་ཆགས། །
བྱེས་སུ་འགྲོ་མང་སྔོན་མཐོའི་གོ་འཕང་བཀོད། །
ལྷོ་རུ་གཤེགས་ནས་བྱང་གི་ཕྱོགས་སུ་འཁྲུངས། །
ཡང་སྲིད་པད་རྡོར་སྐུ་ཚེ་ཡུན་བརྟན་ཤོག །