—-ཆང་སྐྱེས།
༼རྒྱ་ནག་གྲོང་ཁྱེར་ན་སློབ་སྦྱོང་བྱེད་བཞིན་པའི་རང་གི་ཚ་བོ་ཞིག་གིས་བསྐུར་ཡོང་བའི་སྐད་འཕྲིན་དང་འདྲ་པར་སོགས་མཐོང་ཐོས་བྱུང་རྗེས།༽
ཚེ་སྲོག་མྱུ་གུ་གངས་རིའི་འདབས་ནས་རྒྱས།།
ལང་ཚོའི་མེ་ཏོག་ཙི་ཎིའི་གྲོང་ན་བཞད།།
མེས་པོའི་སྲོལ་བཟང་བོར་བའི་གླེན་རྟགས་ཀྱིས།།
ཁྱེད་ལ་དུངས་པའི་སེམས་པ་འཁྱག་སོབ་སོབ།།
ལུས་ན་ཨ་ཕོ་ལུག་རྫིའི་ཆ་ལུགས་ཡལ།།
ངག་ན་ཕ་སྐད་གཙང་མའི་འགྱུར་ཁུགས་དབེན།།
ཚ་བོའི་ར་མ་ལུག་གི་ངང་ཚུལ་འདིས།།
ཁྱེད་ལ་བཅིངས་པའི་རེ་ཐག་ཡུན་གྱིས་ལྷོད།།
ཡབ་མེས་གཏམ་རྒྱུད་གོ་ལའི་རྩེ་ན་འཁྱིལ།།
ཁྱེད་ཀྱི་ལས་དབང་སྐྱ་མོ་ཐང་ན་ལུས།།
ཡིག་དྲུག་དབྱངས་རྟ་དབེན་པའི་གྲུ་ཟུར་ན།།
ཚ་བོ་ཁྱེད་རང་རིགས་རུས་གང་ལ་གཏོགས།།
ཅེ་སྤྱང་སོ་བ་རྒྱབ་ཀྱི་དཔུང་དུ་བསྟེན།།
ཝ་གཤེད་མཛེས་མ་མདུན་གྱི་གཏན་མར་བསུས།།
མི་གཙང་ཁ་དབུགས་རུལ་བའི་དྲི་ངན་གྱིས།།
སེམས་ཀྱི་བུ་ཆུང་གཉིད་ལས་སྒུལ་ལགས་སམ།།
ལྷོ་ཕྱོགས་རྒྱ་ནག་རྒྱ་མཚོའི་ཕ་མཐའ་ནས།།
བརྩེ་བའི་འཕྲིན་ཅིག་བཏང་བ་སྙིང་ནས་དགའ།།
མི་མིན་འདྲེ་མིན་ལུགས་ཀྱི་སྐད་ཅོར་འདིས།།
ཨ་ཁུའི་མགོ་ལ་ཤུགས་ཀྱིས་ཡང་ཡང་གཞུས།།
སྒང་བ་བོད་པ་ཞིག་གི་རང་ཚུགས་ཟུངས།།
ཀ་ཁ་དབྱངས་གསལ་སོ་བཞིའི་བདག་པོར་རློམས།།
ནམ་ཞིག་ལྷན་འཛོམས་བྱུང་བའི་ཉིན་མོ་དེར།།
མགོ་བོ་འཇོག་པའི་ཤེད་མོང་ཡོད་ནི་བྱོས།།
གྲོང་ཁྱེར་ནང་དུ་སློབ་སྦྱོང་ངོ་མ་བྱས་ཀྱི་ཡོད་ས་རེད། གཟུགས་པོའི་ཐོག་ཏུ་ཁབ་བཙགས་རི་མོ་བྲིས་སྟངས་ལ་བལྟས་དུས་ནུབ་གླིང་ནང་སེམས་ཁམས་ཐང་པོ་མེད་པའི་རིགས་ཀྱིས་ཡོན་ཏན་ཀུན་ཤེས་འདུག་གདའ། ཡག་ཀི་་་་མ་འོངས་པའི་རེ་བ་རྒྱག་སའི་བུ་་་་་་