ཙི་ཙི་ལ་སྙིང་རྗེ་མ་བྱེད།

གཙང་བུ

འདི་ནས་བརྩིས་པའི་བགྲང་བྱ་བཅོ་བརྒྱད་སྔོན་གྱི་ཉིན་ཞིག་ལ།
ང་ཟ་ཁང་དུ་འགྲོ་བའི་ལམ་བར་བྱི་ལ་ཚོ་ཞིག་གིས་ཙི་ཙི་ཆུང་ཆུང་ཞིག་བསྐོར་ནས་གསོད་གྲབས་བྱེད་ཀྱིན་འདུག
ང་ལ་སྙིང་རྗེ་ཡ་མ་ཟུང་ཞིག་སྐྱེས་ནས་བྱི་ལ་དེ་ཚོ་ཕར་ཕུད་ནས་ཙི་ཆུང་དེ་སྲོག་ལས་བསྐྱབས་པ་ཡིན།
ཙི་ཙི་ཆུང་ཆུང་དེ་ཡིས་དབུགས་ཧལ་བཞིན་མཐེ་མོ་གནམ་ལ་སྒྲེང་སྟེ་སྨྲེ་ངག་དང་བཅས་སྲོག་བསྐྱབས་པ་ལ་བཀའ་དྲིན་ཆེ་ཟེར།
ངས་ཁོང་གི་ཡ་ངལ་བའི་རྣམ་འགྱུར་དེ་སེམས་ཀྱིས་མ་བཟོད་ནས་བྱམས་སྐྱོང་དང་གཅེས་སྤྲོས་བྱས་ཤིང་།
བྱི་ལ་ཡོད་ཚོད་ལ་ཕོག་ཐུག་གཏོང་གང་ཐུབ་བྱས།
མཚམས་དེར་ཁོས་ཀྱང་ང་ལ་ཨ་ཕ་ཞེས་འབོད་ལ་ཨ་མ་ཡང་ཟེར།
སྐབས་འགར་སྲོག་སྐྱོབ་ཀྱི་དྲིན་ཅན་ཡང་ཟེར།
དེ་འདྲའི་ལྷད་མེད་པའི་ཚོར་བ་ལ་སྤྱོད་ནས་བགྲང་བྱ་དུ་མ་ཞིག་འདས་རྗེས་ངས་ཤེས་རྟོགས་བྱུང་བ་ཞིག་ལ།
ཁོང་ནི་ཁྱིམ་མཚེས་གཡས་གཡོན་གྱི་མི་ཚང་མཐོ་དམའ་དྲག་ཞན་ཐམས་ཅད་ཀྱི་ནང་དུ་འཛུལ་ནས་མིག་གིས་མཐོང་ཚོད་དང་ལག་པས་ལྕོག་ཚོད་ཁུར་བ་མ་ཚད།
ཅ་དངོས་ག་གེ་མོ་རེའི་ཆེད་དུ་གསང་སྤྱོད་ནང་དུའང་འཛུལ་ཞུགས་བྱས་ཚུལ་གོ
དེ་ནས་ངས་ཁོང་གི་འགྲོ་འདུག་ལ་ཚོད་བཀག་བྱས་ཀྱང་།
ཁོང་ལ་སྐྱེས་པ་ནི་ནས་རྡོག་རེའི་ཆེད་དུ་གཅེས་པའི་རང་སྲོག་ཀྱང་གཏོང་ཕོད་པའི་སྙིང་སྟོབས་དེ་རེད།
དེ་ནས་ངེད་གཉིས་བར་ལ་ལྟ་སྤྱོད་མི་མཐུན་པའི་རྩོད་པ་ཆེན་ཆུང་མང་ཙམ་བྱུང་ཡང་ངས་ལྷག་བསམ་ལ་རྒྱ་ལ་འགྱུར་བ་ནམ་ཡང་མ་བཏང་།
རེད་དེ་ཁོང་གི་ཕུགས་འདུན་ངོ་མ་ནི་ཁེ་སོ་བྱུང་ན་གང་བྱེད་ཀྱང་འགྲིག་གི་རེད་ཅེས་པ་དེ་རེད།
ཁོས་སྐབས་འགར་ལྷ་ཡི་ཕོ་ཉ་བྱེད་ལ། མཚམས་སུ་འདྲེ་ཡི་ཚེ་གྲོགས་བྱེད།
དུས་སུ་དགྲ་བོའི་རྐུབ་གཡོག་ཀྱང་རྒྱུགས།
གང་ལྟར་ཁོང་ལ་དགོས་པ་ནི་རྒྱུ་འབྱོར་དང་གྲགས་པ་དེ་ཡིན།
དེ་བྱུང་ན་མགོ་ལ་ལྷམ་གོག་བཀོན་ཆོག་ལ། རྐུབ་ལ་མཆིལ་ཞགས་ཀྱང་བཏབ་ཆོག
མཚམས་དེར་བསམ་ཡུལ་ལས་འདས་པ་ཞིག་ལ་ལུང་པ་ལ་བྱི་ནད་ཅིག་ལོང་ནས་བྱི་ལ་ཐམས་ཅད་ཤི་སོང་བ་དང་།
ཁོང་ལ་སྙིང་སྟོབས་དང་བློ་ཁོག་སྐྱེས་ནས་ང་ལ་དགྲ་ཟླ་རུ་འཛིན་པར་མ་ཟད།
ངས་ཕོར་བའི་ནང་གི་ཟས་ཟ་ལ། སྐྱག་པ་ཡང་བཏང་།
གནམ་རས་ཐོག་ཏུ་རྒྱུགས་རྩེད་བྱེད་པ་དང་།
ནམ་ཉིན་མཚན་མེད་པར་ཙི་སྐད་བརྒྱབས་ནས་གཉིད་ཀྱང་ཁུག་མི་འཇུག་པ།
ངའི་མགོ་བོའི་ཐད་དུ་ཡོང་ནས་གཅིན་སྐྱག་བཏང་བ།
མཆོད་བཤམ་ནང་དུ་འཛུལ་ནས་སྐུ་གསུང་ཐུགས་རྟེན་རིགས་རྩ་ཆེན་ཐམས་ཅད་འཕྲོ་བརླག་བཏང་ལ།
ནང་གི་གསང་དངོས་མང་པོ་ཞིག་ཁུར་ནས་སྤྱི་ཚོགས་ནང་འགྲེམ་སྟོན་བྱས་པ་སོགས་རང་ནུས་ཡོད་ཚོད་ཀྱིས་ང་ལ་སེམས་གནག་བྱེད།
ད་དུང་ངའི་མདུན་ལྕོག་ཐོག་ཏུ་རྒྱུགས་ནས་ཕོར་བའང་ས་ལ་གཡུགས།
ཐ་ན་ངའི་གྱོན་གོས་ཐམས་ཅད་གཙགས་ནས་རལ་མེད་པ་ཅིག་ཀྱང་མེད་པར་བྱས་འདུག
ད་དུང་ཁོང་ནི་གནོད་སྦྱིན་འབྲོང་ནག་གི་ནོར་བདག་དང་།
རྣམ་ཐོས་སྲས་ཀྱི་དཀོར་བདག་ཡིན་ཟེར་བཞིན་རྒྱུ་དང་འབྱོར་བ་ངོམས།
ལྷ་ཆེན་ཚངས་པའི་སྲས་པོ་དང་།
དབང་ཕྱུག་ཆེན་པོའི་སྙིང་སྡུག་ཡིན་རབས་སོགས་བཤད་ནས་ལྷ་དང་ལྷ་མིའི་ལོ་རྒྱུས་གླེང་།
མཚམས་སུ་གེ་སར་དམག་གི་དམག་དཔོན་དཔའ་མི་འགྱུར་རྒྱ་ཚ་ཞ་དཀར་གྱི་ཁུ་བོ་དང་།
རྒྱ་ནག་པོའི་རྒྱལ་རབས་གསུམ་གྱི་ཡ་གྱལ་ལིང་པཱེ་ཡི་སྤུན་གཉིས་པ་དཔའ་བོ་ཆེན་པོ་ ཀཱོའོ་ཡན་གྱི་ཚ་བོ་ཡིན་ཚུལ་གླེང་ནས་ངའི་ཐོག་ཏུ་དཔལ་སྐད་འབྲུག་ལྟར་གྲགས།
དུས་སུ་སྟོན་པ་སངས་རྒྱས་ཤཱཀྱ་ཐུབ་པའི་ཞང་པོ་ཡིན་ཟེར་ནས་ཆོས་གོས་རྣམ་གསུམ་ལུས་ལ་རྒྱན་ནས་ཞག་གསུམ་ཟས་ཀྱང་མི་ཟ།
ཡང་རྒྱལ་སྲས་ཆེན་པོ་ཞི་བ་ལྷའི་སློབ་དཔོན་ཡིན་ཟེར་ནས་བདག་གཞན་མཉམ་བརྗེ་བསྒོམས་ནས་དགྲ་བོའི་མདུན་དུ་གུས་ཞབས་དང་རྒྱུད་པ་འདར་སིག་ཤོར།
བྱི་ལ་དང་ཐུག་ན་སྐྲག་ནས་གཅིན་པ་གོས་ཐུང་ནང་ཟག་པའང་ཉུང་ཉུང་མིན།
མཚམས་རེར་བརྩེ་དུང་གི་དོན་དུ་རང་སྲོག་བཏང་མྱོང་བའི་ལིང་ཧྲྰ་པོ་ཡིན་མདོག་གིས་ཡོད་ཚོད་ཆང་མའི་སྒོ་ཁར་བསྐྱེལ།
ཡང་སྐྱེ་ཡག་གངས་དཀར་སེང་ཡག་ཡིན་ཁུལ་གྱིས་ཨ་སྟག་ཀླུ་མོ་བསྒུགས་ནས་ལུང་ཁུག་ཡོད་ཚོད་ལ་འགྲིམས།
སྐབས་རེར་འདུལ་བའི་མངའ་བདག་ཆེན་པོ་སློབ་དཔོན་ཡོན་ཏན་འོད་ཀྱི་རྣམ་སྤྲུལ་ཡིན་ཟེར་ནས་ཤག་ཁུང་གྲུ་བཞི་ནང་དུ་མགོ་བོའང་གནམ་ལ་མི་བཀྱགས།
དེང་ གི་དུས་འདིར་ཙི་ཙི་སྐམ་པོ་ཞིག་གི་རྒྱབ་ཏུ་འབྱར་ནས་ནམ་འཕངས་བཅད་བཞིན་གནམ་ གྱི་བདག་པོ་མཁའ་ལྡིང་དབང་པོ་ཡིན་ཟེར་བ་སོགས་རང་ལ་བསྟོད་པའི་གླུ་ཆུང་ཞིག་ བླངས་ནས་ཉི་ཟླ་ལས་མིག་ལམ་དུ་ཅི་ཡང་ཤར་མི་འདུག།
༢༠༡༡ ༥ ༢༡ཉིན།