མེ་ལྕེ།

རྨེ་རུ།

མེ་ལྕེ།
སྙིང་སྟོབས་ཀྱི་མེ་ལྕེ།
ས་ཡ་དྲུག་གི་ཕུགས་འདུན་གྱི་སླད།
སྐུ་ལུས་ཞུགས་མེ་ལ་སྒྲོན།

མེ་ལྕེ།
དཔའ་བོའི་མེ་ལྕེ།
བྲག་སྲིན་མི་རིགས་ཀྱི་སླད་དུ།
གཅེས་འཛིན་གྱི་སྐུ་ལུས་ཞུགས་མེ་ལ་སྒྲོན།

མེ་ལྕེ།
ཚད་མེད་ཀྱི་མེ་ལྕེ།
ཞི་བདེའི་ཆེད་དུ།
རྙེད་དཀའི་མི་ལུས་རིན་ཆེན་ཞུགས་མེ་ལ་སྒྲོན།

མེ་ལྕེ།
ལོ་རྒྱུས་ཀྱི་མེ་ལྕེ།
རྩམ་ཟན་མགོ་ནག་གི་སེམས་ཁོང་ལ།
གསེར་ཡིག་གིས་བྲིས་པའི་མེ་ལྕེའི་ལེའུ།

མེ་ལྕེ།
བློས་གཏོང་གི་མེ་ལྕེ།
དྲོ་སྐྱིད་ཀྱི་ཁྱིམ་གཞི་ཐང་དཀྱིལ་དུ་གཡུགས་ཏེ།
རླབས་ཆེན་གྱི་སྐུ་ལུས་ཞུགས་མེ་ལ་སྒྲོན།

མེ་ལྕེ།
བདེན་དོན་གྱི་མེ་ལྕེ།
གངས་རིའི་མུན་ནག་གི་མཚན་མོ་གསལ་ཕྱིར།
སྐུ་ལུས་ཞུགས་མེ་ལ་སྒྲོན།

མེ་ལྕེ།
སེམས་སྡུག་གི་མེ་ལྕེ།
གངས་ཅན་པའི་སེམས་ཁོང་ལ།
སྡུག་བསྔལ་གྱི་མེ་ལྕེ་འབར་གྱིན་ཡོད།

འབར་གྱིན་པའི་མེ་ལྕེ།
དཔའ་བོའི་མེ་ལྕེ།
གངས་རིའི་མུན་ནག་གི་མཚན་མོར།
ཆད་མེད་ངང་འབར་གྱིན་པའི་མེ་ལྕེ།

འབར་གྱིན་པའི་མེ་སྟག་རེ་རེ།
དཔའ་བོ་དཔའ་མོའི་ཞལ་ཆེམས་ཡིན།
གངས་ཅན་པ་ལོགས་ཤོག
མེ་ལྕེ་བཞིན་འབར་དགོས།