མེ་ལྕེ་གློད་ཡོད་དམ།

དགེ་འདུན།
———————
རྩོམ་པ་པོ་མེ་ལྕེ་ ཟླ་སྔོན་མའི་ཚེས་ ༡༩ ཉིན་འཛིན་བཟུང་བྱས་པའི་གནས་ཚུལ་ཐོན་རྗེས་ གཞི་ནས་ངས་མེ་ལྕེའི་རྩོམ་ཡིག་རྣམས་བཀླགས་པ་ཡིན། ཁོང་གིས་དགེ་འདུན་ཆོས་འཕེལ་གྱི་སྙན་ངག་སྐོར་འཆད་པའི་སྐབས་སུ་འདི་འདྲ་ཞིག་བྲིས་འདུག “དགེ་འདུན་ཆོས་འཕེལ་གྱི་སྙན་ངག་གཙོ་བོ་ཕྱོགས་གཉིས་སུ་འདུ་སྟེ། མི་རིག་བསམ་བློ་དང་བློ་འབྱེད་བསམ་བློའོ༎ མི་རིག་བསམ་བློ་ནི་གཙོ་བོ་སྲོལ་རྒྱུན་ལ་ཡིན་དགག་དང་ཕྱིར་རྟོག་བྱས་པ་ལས་མཚོན་པ་དང་། བློ་འབྱེད་བསམ་བློ་ནི་གཙོ་བོ་མི་གཤིས་ཀྱི་བཅིངས་འགྲོལ་དང་རང་དབང་བརྩོན་ལེན་བྱས་པ་ལས་མཚོན་ནུས།” ཞེས་གསལ་འདུག རྗོད་ཚིག་འདི་འདྲ་ལ་ནི་ང་ལ་མཚོན་ན་ཚིག་གསར་གྱིས་ཁེངས་ལ། གཞུང་ལུགས་དང་སྐད་གཞན་ཞིག་གི་རྒྱབ་རྟེན་མེད་པར་གོ་དཀའ་བར་གྱུར།
ངས་ལན་གཅིག་རླུང་འཕྲིན་པ་ཞིག་ལ། “རྒྱ་ཆེའི་གསན་མཁན་རྣམ་པ་”ཞེས་གསར་འགྱུར་གྱི་མགོ་བརྗོད་དུ་འཆད་པ་དེ་ཏག་ཏག་ཅིག་ཡིན་ནམ་ཞེས་དྲིས་མྱོང་། དེ་ནི་“གསན་མཁན་རྣམ་པ་”ལ་རྒྱ་ཆེ་ཆུང་གི་རྣམ་དབྱེ་འབྱེད་པ་དེ་ང་ཚོའི་ལས་ཀ་ཞིག་མ་རེད་དྲན་བྱུང་།
“ཉེ་ལམ་གངས་སྒྲ་བརྙན་རིག་གནས་ལས་སྒྲུབ་ཁང་གི་གཙོ་སྒྲུབ་འོག་ཏུ་སྐབས་དང་པོའི་ བོད་གཞས་བགྲོ་གླེང་ཚོགས་འདུ་འམ་གླེང་སྟེགས་ཤིག་ཟླ་༡༡པའི་ཚེས་༥ཉིན་མཚོ་སྔོན་ ཞིང་ཆེན་རྨ་ལྷོ་ཁུལ་ནས་ཚོགས་རྒྱུ་རེད།” ལུང་ཚིག་འདི་ནི་ བོད་ཀྱི་ན་གཞོན་ དྲ་བ་ནས་དྲངས་པ་ཡིན། འདི་ལའང་མ་མཐའ་ལ་ཡང་བོད་ཀྱི་སྲོལ་རྒྱུན་པ་ཞིག་གིས་གོ་དཀའ་བའི་རྗོད་པ་ལྡན་འདུག
ལོ་ཤས་གོང་། གྲོགས་པོ་ཞིག་གིས་ཕྲན་ལ་གློག་ཀླད་ཀྱི་སྐོར་འཆད་པའི་བོད་ཡིག་རྩོམ་ཞིག་ཀློག་ཏུ་བཅུག སྐབས་དེར། ངེད་ཀྱིས་ཚིག་འབྲུ་རེ་རེ་བཞིན་བརྡ་སྤྲོད་ཀྱི་འགྲེལ་དང་བཅས་གོ་ཐུབ་མོད། རྩོམ་ཡིག་གི་ཚིག་དུམ་རེ་རེས་ཅི་ཞིག་སྟོན་པའི་ནང་དོན་དེ་མ་གོ་བར་གྱུར།
རྒྱ་ཡིག་མི་ཤེས་མཁན་ཞིག་ཡིན་ན། བོད་ནང་གི་བོད་ཡིག་ཚགས་པར་རྣམས་ཀློག་སྐབས་ནང་དོན་མི་ཤེས་པའི་དཀའ་ངལ་འབྱུང་། དེས་ན་བོད་པས་བོད་སྐད་མི་ཤེས་པའམ། ཡང་ན། བོད་སྐད་ཀྱིས་བོད་སྐད་ཀྱི་གོ་མི་ཆོད་པ་ཞིག་ཏུ་འགྱུར་བཞིན་ཡོད་དམ།
ངའི་གྲོགས་པོ་ཤེས་ཡོན་པ་ཞིག་གིས་བརྗོད་དོན། “ལོ་རབས་བརྒྱད་ཅུ་པ་ནས་མགོ་བཙུགས་ཏེ། བོད་ཀྱི་ཤེས་ཡོན་ཅན་ཚོས་བོད་ཀྱི་ལོ་རྒྱུས་ལ་བརྟགས་པའི་སྐབས་སུ། བཙན་པོའི་དུས་ཀྱི་གཟི་བརྗིད་དང་སྟོབས་ཤུགས་དེ་དག་རིམ་གྱིས་ཉམས་པར་བྱེད་པ་ནི་ཆོས་ལུགས་ཡིན་པ་དང་། བོད་མི་རིགས་འདི་འཛམ་གླིང་དུ་འདྲ་མཉམ་དུ་གནས་དགོས་ན། བོད་མིའི་བསམ་སྤྱོད་ཀྱང་འཛམ་གླིང་གི་མི་གཞན་དང་འདྲ་བ་ཞིག་བྱེད་དགོས་པའི་འདོད་པ་འཕེལ་བ་དང་། དེའི་རྒྱབ་རྟེན་དུ་ནུབ་ཕྱོགས་པའི་གཞུང་ལུགས་བཙལ་བ་རེད།” ཅེས་བཤད་པ་ལྟར། བོད་ཀྱི་སྲོལ་རྒྱུན་ལ་མེད་ཅིང་བོད་མི་རིགས་སྐྱོབ་པར་བྱེད་པའི་གཞུང་ལུགས་ནང་འདྲེན་བྱེད་སྐབས་ གཞུང་ལུགས་མི་ཤེས་མཁན་རྣམས་ཀྱིས་བོད་ཡིག་ཤེས་ཀྱང་རྟོགས་དཀའ་བའི་རིག་གཞུང་ཞིག་འཁྱེར་ཡོང་བཞིན་པ་རེད་དམ། འདི་ཡང་གསར་བརྗེ་ཞིག་གི་ཆ་ཤས་གལ་ཆེན་པོ་ཞིག་རེད་དམ།
ལགས་རེད། འདིའང་མེ་ལྕེ་ཞིག་རེད། མེ་ལྕེ་འདི་རིག་གནས་གསར་བརྗེ་དང་ལྷན་དུ་བོད་ལ་མཆེད་མགོ་བཙུགས་ཤིང་། མེ་ལྕེ་འདི་རིག་གནས་གསར་བརྗེའི་མཇུག་གི་གུ་ཡངས་ཀྱི་དུས་སྐབས་དེར་ཇེ་ཆེར་གྱུར། མེ་ལྕེ་འདི་ནི་དོན་གྲུབ་རྒྱལ་གྱི་ “ལང་ཚོའི་རྦབ་ཆུ་”དང་འབྲེལ་ནས་མཆེད། རིམ་གྱིས་མེ་ལྕེ་འདི་དག་ཏུ་སྙན་ངག་དང་བརྩམས་སྒྲུང་སོགས་སུ་མཆེད། མེ་ལྕེ་འདི་ལོ་ངོ་བཅུ་ཕྲག་གསུམ་དང་བཞི་ཡི་རིང་མཆེད། ཁོང་ཚོས་ མུན་ནག་དང་འོད་ཟེར་བཤད་སྐབས་མེ་ལྕེ་འདི་འཆད་བཞིན་འདུག་ལ། ཁོང་ཚོས་ རྗེས་ལུས་དང་རྨོངས་དད་བཤད་སྐབས་ཀྱང་མེ་ལྕེ་འདི་འཆད་བཞིན་འདུག འདི་ནི་གཅོད་པ་ཀླུ་རྒྱལ་གྱི་དེབ་གསུམ་ལ་བམ་ཀློག་ཅིག་བྱས་པས་ང་ལ་སྤྲད་པའི་ཚོར་སྣང་དེ་རེད།
༢༠༠༥ ལོར་འཚོགས་པའི་མི་རབས་གསུམ་པའི་སྙན་ངག་འདུ་ཚོགས་ཀྱི་སྟེང་ཆོད་དོན་གསུམ་ཟེར་བ་ཞིག་ཡོད་པ་ནི་གཤམ་གསལ་ལྟར་རེད། “༡ གྲྭ་བས་རང་མོས་སྙན་ངག་བྲིས་ཆོག་གམ། ལན་དུ། ཆོག ༢ བོད་ལ་ངེས་དོན་གྱི་གྱི་བུད་མེད་སྙན་ངག་པ་ཡོད་དམ་མེད། ལན་དུ། མེད། ༣ འཇུ་སྐལ་བཟང་གི་སྙན་ངག་གིས་ཡིད་ཚིམ་མམ། ལན་དུ། མི་ཚིམ།” ཞེས་པ་འདི་རེད། སྐྱབས་ཆེན་བདེ་གྲོལ་གྱིས་མི་རབས་གསུམ་པའི་འགྲེལ་བཤད་བྱེད་སྐབས། “མི་རབས་གསུམ་པ་ཞེས་པ་དེ་ཕྱོགས་གཅིག་ནས་ང་ཚོས་ན་ཚོད་ལ་ངོས་འཛིན་པ་དང་། ཕྱོགས་གཞན་ཞིག་ནས་བསམ་བློ་གཏོང་ཕྱོགས་དང་སེམས་ཀྱི་ཁ་གཏོད་ས་མི་འདྲ་བ་ཞིག་ལ་ངོས་འཛིན་གྱིན་ཡོད།”ཅེས་བཤད་འདུག ཁོང་ཚོ་ནི་ ཅི་ཡང་བཤད་ཕོད་ལ། ཅི་ཡང་བྱེད་ཕོད་པའི་འབྲོང་རྒོད་ཅིག་དང་འདྲ། འདིའང་སེམས་ཀྱི་ཁ་གཏོད་ས་མི་འདྲ་བའི་མེ་ལྕེ་ཞིག་ཡིན་ནམ།
གཅོད་པ་ཀླུ་རྒྱལ་འཛིན་བཟུང་བྱས་ནས་བདུན་ཕྲག་གསུམ་ཉེ་བའི་སྐབས་འདིར་ངས་ཁོང་གི་འཛིན་བཟུང་སྐོར་ལ་བྲིས་པའི་དུས་བབ་གསར་འགྱུར་དེ་སླར་ཡང་བཀླགས་པ་ཡིན། ཆབ་བྲག་ལྷ་མོ་སྐྱབས་ལགས་ཀྱིས། “ཁོང་ལྟ་བུའི་རྩོམ་པ་པོ་རེ་རེ་ནི་མི་རིགས་ཀྱི་མགྲིན་ཚབ་པ་རེ་རེ་ཡིན་ལ། དྲང་བདེན་གྱི་སྙུག་ཐོགས་དཔའ་རྒོད་རེ་རེ་ཡིན། ཁོང་ཚོ་ནི”འོད་ཟེར་གྱི་ལག་པས་མུན་ནག་གི་ངོ་གདོང”འབྲུ་མཁན་ཡིན་པས། “སང་ཉིན། སྐྱ་རེངས་ཀྱི་འཇིག་རྟེན་མུན་པའི་ཁྲོད་བཀྱགས་འོང”ངེས་ཡིན། ཁྱེད་ཅག་གི་རྗེས་ན་གདུང་སེམས་མཉམ་སྐྱེད་དང་བདེན་པའི་རྒྱབ་ལངས་བྱེད་མཁན་གྱི་ཁྲི་འབུམ་ཡོད། བདེན་ལུགས་ཀྱིས་དགྲ་མགོ་གནོན་ཐག་ཆོད་ཡིན།” ཞེས་བསྒྲགས་འདུག
སྲོལ་རྒྱུན་དང་དེང་རབས་ཀྱི་བར་ན་མེ་ལྕེ་ཞིག་མཆེད་བཞིན་པ་དེ་གསལ་པོ་རེད། གཅོད་པ་ཀླུ་རྒྱལ་གྱིས་རང་གི་ “ཚེར་མའི་ལམ་གྱི་ང་རོ་”ཞེས་པའི་ནང་། “དུས་རབས་ཉི་ཤུ་བའི་ནང་དུ་དེང་རབས་ཀྱི་ཤེས་ཡོན་ཅན་གྱི་མཚན་ཉིད་ཚང་བ་ནི་དགེ་འདུན་ཆོས་འཕེལ་དང་དོན་གྲུབ་རྒྱལ་གཉིས་མ་གཏོགས་བྱུང་མེད།”ཅེས་བསྒྲགས་ཤིང་། “ད་ལྟ་རང་རེའི་ཤེས་ཡོན་ཅན་གྱི་སྡེ་ལ་མཚོན་ན། ལྗིད་ཏིག་ཏིག་གི་འགན་འཁྲི་དེ་ཕྲག་ཏུ་ལེན་རྒྱུ་ཡིན་ནམ་ལེན་རྒྱུ་མིན་པ་དང་། ལོ་རྒྱུས་ལ་འགན་འཁུར་བའི་སྐད་ཆ་འཆད་རྒྱུ་ཡིན་ནམ་འཆད་རྒྱུ་མིན་པ། བསམ་བློའི་རྣོ་དབལ་ཚ་བའི་རྩོམ་ཡིག་འབྲི་རྒྱུ་ཡིན་ནམ་འབྲི་རྒྱུ་མིན་པ། སྤྱི་ལ་ཕན་ཞིང་སྒེར་ལ་གནོད་པའི་ལམ་བུའམ་སྤྱི་སྒེར་གཉིས་ཀར་ཕན་པའི་ལམ་བུ་འདེམས་རྒྱུ་ཡིན་ནམ་འདེམ་རྒྱུ་མིན་པ་སོགས་ཀྱི་འདམ་ག་ཆེན་པོ་ཞིག་ལ་ཐུག་འདུག”ཅེས་བྲིས་འདུག
དཔེ་ཁང་ཕྱི་ཡི་ “གསར་བརྗེ་”དང་ནང་གི་མནོ་བསམ་ཞེས་པའི་རྩོམ་དེ་ནི་ ༢༠༠༦ ལོར་མཆེད་པའི་པགས་སྲེག་ལས་འགུལ་སྐོར་ཡིན་པ་དང་། པགས་སྲེག་ལས་འགུལ་དེས་གཅོད་པ་ཀླུ་རྒྱལ་ལ་སྤྲད་པའི་བསམ་བློ་ནི། “རང་ཉིད་ཀྱི་བློ་སྤོབས་དང་རྟོགས་པ། བློ་སྦྱོང་། དཔའ་གདེང་སོགས་མང་ཚོགས་ཕལ་བ་ཞིག་ལའང་མི་དོ་བར་ད་དུང་ཤེས་ཡོན་ཅན་དུ་ཁས་འཆེས་བཞིན་པའི་བྱ་སྤྱོད་འདི་ལ་ཐེ་ཚོམ་དང་། རང་གི་རྣམ་ཤེས་ལ་ཚ་འདྲི་ཐེངས་ཤིག་མི་བྱེད་མཐུ་མེད་བྱུང་།”ཞེས་བྲིས་འདུག འོན་ཀྱང་ཁོང་གིས་འདི་ལྟར། “འུ་ཅག་གི་ལོ་རྒྱུས་དང་ད་ལྟའི་གནས་བབ་གང་ལ་བལྟས་ཡོང་ན། བླ་སྤྲུལ་དང་ཆོས་ལུགས་པ་ནི་རང་རེའི་སྤྱི་ཚོགས་འདིའི་ཡོད་ཚད་དང་སྲོག་ཤིང་ལྟ་བུར་གྱུར་འདུག བླ་སྤྲུལ་དང་ཆོས་ལུགས་པས་གསུངས་པ་ནི་ད་གཟོད་ཚད་མར་འཛིན་ཞིང་གཙུག་ཏུ་བཀུར་ལ། བླ་སྤྲུལ་དང་ཆོས་ལུགས་པས་བསྟན་པ་ནི་ད་གཟོད་བདེན་པར་མཐོང་ཞིང་སྙིང་ནས་དད། ཡོད་ཚད་བླ་སྤྲུལ་དང་ཆོས་ལུགས་པས་ཁ་ལོ་སྒྱུར་བའི་སྤྱི་ཚོགས་འདིའི་ནང་དུ་སྒེར་ཚུགས་དང་དགག་སྒྲུབ་ཀྱི་གོ་ཆ་སྤྲས་པའི་ཤེས་ཡོན་ཅན་དག་ནི་ཇི་འདྲའི་ཉམ་ཆུང་ཨང་”སོགས་བྲིས་ཏེ་རྨི་ལམ་ཆེན་པོ་ཞིག་སྒྲུབ་པར་ཆས་སྐབས་ཀྱི་སྐྱོ་ཉམས་བཏོན་འདུག འདི་ལྟ་བུའི་ཚིག་ཚོགས་ཀྱིས་ཁེངས་པའི་ “མི་གཞིའི་སྙིང་སྟོབས།” དང་། “ཁུ་སིམ་ཁད་ཀྱིས་དཀྲོགས།” “ཚེར་མའི་ལམ་གྱི་ང་རོ་” སོགས་ནི་མེ་ལྕེ་ཞིག་ཡིན་ནམ།
གཅོད་པ་ཀླུ་རྒྱལ་གྱི་དེབ་གསུམ་ལས་མཐོང་བ་ནི། ཁོང་གིས་འཛམ་གླིང་གི་གྲགས་ཅན་རྩོམ་པ་པོ་མང་པོའི་དེབ་བཀླགས་ཡོད་པ་མ་ཟད། བོད་ཡིག་དཔེ་དེབ་སྣ་ཚོགས་བཀླགས་ཡོད་ལ། དགེ་འདུན་ཆོས་འཕེལ་དང་དོན་གྲུབ་རྒྱལ་ལ་དུངས་ཞེན་ཆེ་ཞིང་། བོད་མི་རིགས་འདི་ནི་སྐྱོབ་དགོས་པའི་འབད་བརྩོན་གྱི་འགན་འཁུར་ཕྲག་ཏུ་བཞེས་པ་ཞིག་ཧ་ཅང་གསལ།
དེས་ན། ཞོགས་དུང་དང་མེ་ལྕེ་སོགས་ཀྱིས་མིའི་ཐོབ་ཐང་དེ་རྩོད་ཅིང་། རང་གི་རང་དབང་གི་ཆེད་དུ་གཞན་ལ་མགོ་བོ་མི་སྒུར་བའི་སྙིང་སྟོབས་ཀྱི་གོ་ཆ་བགོས་ཏེ། མེ་ལྕེ་ཞིག་སྦར་བཞིན་ཡོད་དམ།
ན་གཞོན་སྤུན་ཟླ་རྣམས་ཀྱིས་འགན་འཁུར་ཞིག་འཁྱེར་ཏེ་མདུན་དུ་བསྐྱོད་སྐབས། ངེད་ཀྱིས་རང་གི་ཞྭ་མོ་ཕུད་ནས་གུས་ཕྱག་ཅིག་བྱེད་འདོད་ལ། སྲོལ་རྒྱུན་པ་དང་དེང་རབས་པ་སོགས་ཀྱི་གདོང་གཡོགས་འདི་བཤུས་པའི་ཤུལ་ན་ལྷག་པའི་གངས་ཅན་པའི་ན་གཞོན་རྣམས་ལ་ཡིད་སྨོན་ཞིག་འཆོར་རོ༎
འདི་མེ་ལྕེ་ཞིག་ཡིན་ནམ།
འབར་བའི་མེ་ལྕེ་ཡིན་ནམ། སྦར་བའི་མེ་ལྕེ་ཡིན།
མེ་ལྕེ་གློད་ཡོད་དམ། མེ་ལྕེ་བཀག་ཡོད།
གང་ལྟར། གཅོད་པ་ཀླུ་རྒྱལ་ལ་མྱུར་དུ་བཅིངས་འགྲོལ་ཐོབ་པ་དང་གཅོད་པ་ཀླུ་རྒྱལ་གྱིས་མྱུར་དུ་བཅིངས་འགྲོལ་འདྲེན་པའི་སྨོན་ལམ་འདེབས།