མེ་ཡི་གཤོག་པ་དང་གནམ་གྱི་མིག་ཆུ།­­

ཚེ་བརྟན་རྡོ་རྗེ་མ་བུ་གསུམ་ལ་ཕུལ།

ཀླུ་ཚང་གུ་རྒྱལ་གྱིས་།

  བོད་ཁ་བ་ཅན་གྱི་མེ་ཡི་གཤོག་པ་བརྐྱངས་ཏེ་གཤོག་ལྕག་གིས་མཚོ་དང་མཚོ་མོ་རྒུལ་དུས་།   རྡ་སའི་རི་ངོགས་ཀྱི་འདས་ཟིན་པ་ཐམས་ཅད་སླར་ཡང་སད། མ་བུ་གསུམ་གྱི་རྨི་ལམ་ནང་གི་ཉི་རྩེ་དེས། བར་སྣང་སྟོང་བ་ནས་འོད་ཀྱི་གཟེགས་མ་ལན་འགར་གཙུབས་ཏེ།  འཚོ་བ་བློས་གཏོང་དང་བརྩེ་དུང་བློས་གཏོང། བཟའ་ཚང་བློས་གཏོང་དང་བུས་ཕྲུག་བློས་གཏོང་། ཕྱི་རྒྱལ་བློས་གཏོང་སོགས་ཀྱིས་རླབས་ཆེ་བའི་ཨ་མའི་སེམས་ཀྱི་རི་རབ་སྐྱོར་ནས་སྲུང་ཆུང་མའི་རྐང་བའི་ན་ཟུག་གི་རྨ་ཁ་བསྡམ་། རང་གི་སྐྲ་ལོ་ལས་གཅེས་པའི་གོམ་པ་རེ་རེ་། ཉི་མ་ལྷ་ས་དང་ལྷ་སའི་མི་དམངས་ཚོའི་མདུན་དུ་ནུར། ཕྱིར་མིག་ཁྲོད་ཀྱི་ཕྱི་སྡོད་བོད་མི་ཚོའི་འོས་འགན་གྱི་ལམ་སྣེ་ལྕིད་པོ་ཞིག་དྲུད་དེ་ཤོར་།

ཡིན་ཡང་། རྗེས་ལུས་ཐེབས་སོང་།   དུས་ལ་བབ་པའི་འོས་འགན་གྱིས་ཕྲག་པ་ཡང་ཡང་རྡུང་ཀྱང་ང་ཚོ་འགུལ་མ་ནུས།  མཚམས་སྤྲིན་ལྟར་ཚ་ལམ་ལམ་འབར་བའི་ངོ་གདོང་གི་རི་མོ་འདིས་།  ཁྱེད་མ་བུ་གསུམ་གྱི་མདུན་སྐྱོད་ཀྱི་འདྲ་པར་མཐོང་ཐེངས་རེ་ལ། ཅི་བྱ་སྟོད་བྲལ་དུ་གྱུར་།  ཅི་ཡང་མ་ཚོར་བའི་ཚུལ་གྱིས་རང་ཉིད་ཁོ་ན་རི་བོའི་ཕག་དང་རྒྱ་མཚོའི་གཏིང་ལ་ཡུབ། སུས་ཀྱང་མཐོང་མི་ཐུབ་པ་འཇིག་རྟེན་ཡིན་པས་ང་ཚོ་འཇིག་རྟེན་དང་ལྷན་དུ་སྦོས་ན་འདོད།

མ་བུ་གསུམ་གྱི་བློ་སྟོབས་ལས་འཁྲུངས་པའི་རྐང་འོག་གི་ས་གཞི་འདི་ལ་གནམ་གྱིས་མིག་ཆུ་ཕབས་། ཕལ་ཆེར་བྱ་བྱེའུ་ཚོགས་ཀྱི་ཀྱང་གདུང་སེམས་མཉམ་སྐྱེད་ཅེས་པ་སྐད་ཆ་ཞིག་གོ་མ་མྱོང་ནའང་། དགོང་ཁ་ནས་ཉི་ནུབ་ཀྱི་མཚམས་སུ་གཤོག་པ་སྐྱངས་ཏེ་བོད་ཡུལ་དུ་འཕུར་ཅེས་པའི་སྣང་ཚུལ་ཞིག་ཁྱེར་འོངས་པ་འདྲ།  ཡིན་ཡང་ང་ཚོ་ད་དུང་འདུག་གི་ཡིན། ཧ་ལམ་རྨས་ཟིན་པ་ཞིག་དང་འདྲ་བར་འདུག་གི་ཡིན།

ཡིན་ཡང་། ཉི་མ་ལྷ་ས་ཡོད། མེ་ཡི་གཤོག་པ་ཡོད། གནམ་ནས་བབས་པའི་མིག་ཆུ་ཡོད། མ་བུ་གསུམ་གྱི་ཤ་ཁྲག་རུས་གསུམ་ཡོད་། སུས་ཀྱང་མཚོན་མི་ཐུབ་པའི་མ་བུ་གསུམ་ཡོད་པ་ནས་། ང་ཚོར་ཅི་ཡང་མེད་པ་ཚོར་། འཇིག་རྟེན་གྱི་སྐྱེས་བོ་མང་ཤོས་ཀྱིས་རང་གི་སེམས་ཀྱི་གཙང་ངོགས་སུ་དུང་ཞེན་ཞེས་པའི་རྩིག་པ་དཀར་བོ་ཞིག་བྲིས་ཡོད་ཟེར་མོད་།  དོན་གྱིས་ཁྱེད་ཚོ་འདི་ལྟར་ལམ་ལ་ཞུགས་དུས་། ཕར་འགྲོ་ཚུར་འོང་གི་དུས་འགྱུར་གྱི་ལམ་སྣེ་ར་བཟི་བ་དང་འདྲ། སུས་ཀྱང་མི་མཐོང་བའི་ཁུལ་གྱིས་གཞན་ཞིག་ལ་ལྟ་ཁུལ་བྱ་དགོས་བྱུང། དུས་ཚོད་ཀྱི་མདའ་རྩེར་ཟུག་པའི་ཉེས་པ་དེ་དག མ་བུ་གསུམ་གྱིས་ཀུ་ཡངས་སུ་གཏོང་ནའང་ལོ་རྒྱུས་ཀྱིས་བརྗེད་མི་སྲིད་པ་རེད།