འདྲེ་གླེན་པ། (ཨོ་གླིང་།)
འཛམ་གླིང་དུ་སྐད་གྲགས་ཆོད་པའི་ནེའུ་ཡོག་གྲོང་ཁྱེར་ལ་ལྟོས་དང་
མི་མེད་ལུང་སྟོང་དུ་ལུས་པའི་རྫ་ཁོག་ཅིག་དང་འདྲ
རི་སྤྱང་ལྟ་བུའི་འགྲུལ་སྐྱེལ་མེ་འཁོར་རེ་རེས་ཁོག་སྟོང་དུ་ཁྱེད་ལ་ངུ་འབོད་བྱེད
སེཌ་ཎཱེ་ཟམ་ཆེན་ཡང་དུར་ཁྲོད་ཅིག་དང་འདྲ་བར
རྒྱ་མཚོའི་ཁ་གཏད་དུ་ཁྱེད་ལ་སྐྱོ་ཉམས་སྟོན
ཕཱེ་རེ་སིལ་ལྟོས་དང་
གློ་བུར་དུ་ཨཱེ་ཧྥུལ་ལྕགས་མཁར་གཅིག་པུ་ཁེར་བུར་ལྷག་སྟེ
རྒྱང་རིང་གི་རྣམ་དག་ཁཱེ་ཐོ་ལི་ལ་མིག་ཆུ་ཤམ་ཤམ་དུ་གཏོར
པཱེ་ཅིན་ནི་སྔར་ལྟར་སྒེའུ་ཁུང་མེད་པའི་མཁར་ཤུལ་ཞིག་གོ
ཝུ་ཧཱན་གྱི་གྲི་ཐོགས་ལྷ་རྗེ་རེ་རེ་གློ་བུར་གློ་བུར་དུ་སྒེའུ་ཁུང་མེད་པའི་ཕོ་བྲང་དུ་གཟིམས
མཆན།
ནེའུ་ཡཱོག་New York ནི་འཛམ་གླིང་དུ་སྐད་གྲགས་ཆོད་པའི་ཨ་རིའི་གྲོང་ཁྱེར་ཞིག་ཡིན། ནམ་རྒྱུན་གྲོང་ཁྱེར་དེར་མི་འབོར་ས་ཡ་བཅུ་དགུ་ལྷག་ཅིག་གཏན་སྡོད་བྱས་ཡོད་པ་དང་འཛམ་གླིང་གི་ཡུལ་སྐོར་སྤྲོ་འཆམ་པ་མང་ཤོས་འགྲོ་སའི་གྲོང་ཁྱེར་ཞིག་ཡིན་མོད། དགྱ་ནད་ཨང་བཅུ་དགུ་པ་འདིའི་རྐྱེན་གྱིས་འདས་པའི་ཟླ་གཅིག་ལྷག་གི་ནང་དུ་གྲོང་ཁྱེར་གྱི་མི་ཚོགས་ཡོངས་སུ་བརླགས་ཤིང་གྲོང་ཁྱེར་ཧྲིལ་བོ་མི་མེད་ཁོག་སྟོང་དུ་ལུས་པའི་རྫ་ཁོག་ཅིག་དང་འདྲ། འདི་ནི་གྲོང་ཁྱེར་ནེའུ་ཡཱོག་གི་ལོ་རྒྱུས་སུ་བྱུང་མ་མྱོང་བའི་གོད་ཆགས་ཤིག་ཡིན།
སེཌ་ཎེ་ཟམ་ཆེན་Sydney Harbour Bridge ནི་སྤྱི་ལོ་1932ལོར་གསར་འཛུགས་བྱས་པའི་འཛམ་གླིང་དུ་མིང་གྲགས་ཆེ་བའི་ཨོ་གླིང་གི་ལྕགས་ཟམ་ཆེན་པོ་ཞིག་ཡིན། ནམ་རྒྱུན་གྲོང་ཁྱེར་དེར་མི་འབོར་ས་ཡ་ལྔ་ལྷག་གཏན་སྡོད་བྱེད་ཅིང་འཛམ་གླིང་ཡུལ་སྐོར་སྤྲོ་འཆམ་གྱི་གནས་མཆོག་མིང་གྲགས་ཆེ་བ་ཞིག་ཡིན། དགྱ་ནད་ཨང་བཅུ་དགུ་པའི་དབང་གིས་སྲིད་གཞུང་གིས་མི་མང་ལ་ཁྱིམ་སྡོད་བཀའ་རྒྱ་བཏང་རྐྱེན་འདས་པའི་ཟླ་གཅིག་ལྷག་གི་ནང་དུ་གྲོང་ཁྱེར་ཧྲིལ་བོ་ཁུ་སིམ་མེར་གྱུར།
པཱེ་རེ་སི་Paris ནི་མིའི་རིགས་ཀྱི་ལོ་རྒྱུས་ཧ་ཅང་རིང་བའི་ཧྥ་རན་སཱིའིFrance ་རྒྱལ་ས་ཡིན། ཨཱེ་ཧྥུལ་ Eiffel Towerནི་སྤྱི་ལོ་1888ལོར་ཧྥ་རན་སཱི་གསར་བརྗེ་བྱུང་ནས་ལོ་བརྒྱ་འཁོར་བའི་དྲན་རྟེན་དུ་གསར་འཛུགས་བྱས་པའི་ལྕགས་མཁར་ཞིག་ཡིན། དགྱ་ནད་ཀྱི་རྐྱེན་པས་ནམ་རྒྱུན་མི་འབོར་ས་ཡ་གཉིས་ལྷག་གནས་སྡོད་བྱེད་སའི་མི་ཀུན་སྤྲོ་འཆམ་དུ་འགྲོ་བའི་གནས་མཆོག་དེའི་ཉེ་འཁོར་ཡོད་ཚད་ཁུ་སིམ་མེར་གྱུར། ཁཱ་ཐོ་ལིག་Catholicནི་ཧྥ་རན་སིའི་གདོད་མའི་ཆོས་ལུགས་ཏེ་ཡེ་ཤུའི་ཆོས་ལུགས་ཀྱི་ཆ་ཤས་ཤིག་གོ།
པཱེ་ཅཱིན་北京ནི་དགྱ་ནག་དམར་གཞུང་གི་རྒྱལ་ས་ཡིན།
ནམ་རྒྱུན་མི་འབོར་ས་ཡ་ཉེར་གཅིག་གནས་སྡོད་བྱེད་ཅིང་འཛམ་གླིང་ཁྱོན་ཡོངས་སུ་དམ་དྲག་དང་ཞེད་སྣང་ཆེ་ཤོས་ཀྱི་རྒྱལ་ས་ཡིན། པཱེ་ཅིན་སྲིད་གཞུང་གིས་ནམ་རྒྱུན་སྲིད་གཞུང་མགོ་རྟིང་སློག་པར་དོགས་ནས་རང་བྱུང་ཁམས་ཀྱི་གོད་ཆགས་དང་རྒྱལ་ནང་གི་འགྲོ་བ་མིའི་ཐོབ་ཐང་སོགས་ཆབ་དཔལ་རིག་གསུམ་དང་བཅས་པའི་གནས་ཚུལ་ཆ་ཚང་ལ་ཧ་ཅང་གསང་རྒྱ་དམ་པོ་བྱེད་ཅིང་རྒྱལ་སྤྱིའི་འགྲོ་བ་མིའི་ཐོབ་ཐང་སྐྱོ་ཤོས་ཀྱི་རྒྱལ་ཁབ་རྩེ་གྲས་ཡིན་པས། ད་ཐེངས་ཀྱི་དགྱ་ནད་ཨང་བཅུ་དགུ་པའི་ཁྲོད་ནས་ལྷག་ཏུ་ཡང་འགྲོ་བ་མིའི་ཐོབ་ཐང་ཛ་དྲག་ཏུ་ཆགས་པའི་རྒྱལ་ཁབ་ཨང་དང་པོར་གྱུར་ཏེ། འཛམ་གླིང་ཁྱོན་ཡོངས་ནས་ཁ་རྡུང་དྲག་པོ་གཏོང་ཞིང་ཕྱི་འབྲེལ་ལ་དོ་ཕོག་ཤུགས་ཆེན་འགྲོ་རྒྱུ་ཡིན་པ་ཡོངས་གྲགས་སུ་ཆགས།
གསལ་འདེབས།
དགྱ་ནད་ཨང་བཅུ་དགུ་པCOVID-19 ནི་འཛམ་གླིང་དམག་འཁྲུག་གཉིས་པའི་རྗེས་ཀྱི་འཛམ་གླིང་གི་དཀའ་ངལ་ཆེ་ཤོས་སུ་གྱུར་ཞེས་འཛམ་གླིང་མཉམ་འབྲེལ་འཕྲོད་བསྟེན་ལྷན་ཚོགས་ཀྱིས་གོ་ལ་སྤྱི་ལ་ཡོངས་ཁྱབ་ཏུ་བསྒྲགས། འཛམ་གླིང་གི་ནད་དུག་ཆེད་མཁས་པ། ཚན་རིག་པ། ཆབ་སྲིད་དཔྱད་བརྗོད་པ་སོགས་ཐུན་མོང་གིས་དགྱ་ནག་གིས་ནད་དུག་སྔོན་འགོག་དུས་ལྟར་བྱེད་མ་ཐུབ་པ་དང་གསང་རྒྱ་བྱས་ཏེ་གོ་ལ་སྤྱི་ལ་འགན་མ་ཁུར་བའི་སྟབས་ཀྱིས་ད་ལྟའི་གནས་སྟངས་ངན་པ་འདི་བྱུང་ཞེས་གཅིག་མཚུངས་སུ་སྨྲས། གང་ལྟར། དགྱ་ནག་གི་གྲོང་ཁྱེར་ཝོས་ཧཱན་ནས་ཐོན་པའི་ནད་དུག་ཨང་བཅུ་དགུ་པ་འདི་ནི་དུས་རབས་ཉེར་གཅིག་པའི་མིའི་རིགས་ཀྱི་ལོ་རྒྱུས་སུ་འགོད་པའི་དཀའ་ངལ་དང་རྙོག་རྫོབ་ཆེ་ཤོས་སུ་འགྱུར་རྒྱུ་ཡིན་པ་གདོན་མི་ཟ་བས་ན། ང་ཚོ་བོད་མི་རིགས་ཀྱིས་ཀྱང་ནད་ངན་འདིར་ཐ་སྙད་འདོགས་སྟངས་དང་ལོ་རྒྱུས་ཡིག་ཚགས་སུ་འགོད་སྟངས་བཅས་ལ་ཐུགས་བསམ་ནན་གྱིས་གཏོང་དགོས་པ་ནི་ཧ་ཅང་གི་གལ་འགངས་ཆེ་བར་མཐོང་།
དགྱ་ནད་ཨང་བཅུ་དགུ་པའི་འདས་པའི་ཟླ་གསུམ་ལྷག་གི་ཉམས་མྱོང་ལས་ང་ཚོས་རྙེད་པ་ནི་འཛམ་གླིང་སྤྱིའི་ཆབ་དཔལ་རིག་གསུམ་ལ་སྔོན་བྱུང་མྱོང་མེད་པའི་འགྱུར་བ་ཤུགས་ཆེན་འགྲོ་བཞིན་པ་དང་མ་འོངས་པར་དེ་ལས་ལྷག་པའི་འགྱུར་བ་འགྲོ་ངེས་པ་སོགས་ལ་བརྟེན་སྤྱི་ཡོངས་ནས་རིག་པ་རྣོན་པོས་གྲ་སྒྲིག་ཨང་གསར་ངེས་པར་དུ་དགོས་སྙམ།
28/4/20ཉིན་ལས་ཞོར་དུ་ཨོ་གླིང་གི་གནས་མཆོག་རི་སྔོན་པོ་ནས།