མི་རིང་བར་ངེད་ཆང་ས་ལོ་དེབ་ཁྲོམ་རར་དགྲམ་རྒྱུ་ཡིན།

ཨ་རིག་འགྱུར་མེད།

དེ་རིང་ནི་རྒྱལ་སྤྱིའི་སྐད་ཡིག་གི་ཉིན་མོ་ཡིན་ལ་ལོ་སྔོན་མ་སྔོན་མ་དག་དང་བསྡུར་ན་བོད་ཕྱི་ནང་གཉིས་ན་རང་རེའི་ཤ་ཁྲག་གཅིག་པའི་བོད་རིགས་སྤུན་ཟླ་རྣམས་ཀྱིས་ཀྱང་། རྒྱལ་སྤྱིའི་སྐད་ཡིག་གི་ཉིན་མོ་འདིར་བོད་མི་རིགས་ཀྱི་འདས་པའི་བྱུང་རབས་དང་ད་ལྟའི་གནས་བབ། མ་འོངས་པའི་འཇིག་ཉེན་བཅས་ལ་གླེང་སློང་དང་སྐུལ་འདེད། བགྲོ་གླེང་བྱེད་པ། རྩོམ་ཡིག་སྤེལ་བ་ལ་སོགས་བྱེད་ཀྱིན་འདུག དེ་ནི་དགའ་འོས་པའི་དོན་དག་ཅིག་ཀྱང་རེད་སྙམ། དེར་བརྟེན་དེ་རིང་གི་ཉིན་མོ་འདི་དང་བསྟུན་ནས་ངེད་ཆང་ས་དྲ་བས་ཀྱང་བོད་ཕྱི་ནང་གི་ཀློག་མཁན་རྣམས་ལ་གཏམ་བཟང་ཞིག་ཁྱེར་ཡོང་ཡོད་དེ། ད་བར་བོད་ཀྱི་སྐད་ཡིག་སྟེང་བྱུང་མྱོང་མེད་པའི་ “ཆང་ས་” ལོ་དེབ་མི་རིང་བར་ཁྲོམ་རར་དགྲམ་རྒྱུ་ཡིན་ཞེས་པ་དེའོ།།

ཆང་ས་ལོ་དེབ་ནི་བོད་ཕྱི་ནང་གཉིས་ནང་ད་བར་བྱུང་མ་མྱོང་བའི་དམིགས་བསལ་དུས་དེབ་ཅིག་ཡིན་ལ། ང་ཚོས་ཧུར་ཐག་གིས་ལོ་དེབ་འདིའི་ནང་དུ་གཞི་རིམ་མང་ཚོགས་ཀྱི་ཁྱིམ་པ་ཕོ་མོ་རྣམས་ཀྱིས་ངེས་པར་དུ་ཤེས་དགོས་པའི་གནད་དོན་གང་མང་ཞིག་ཆེད་བསྒྲིགས་བྱས་ཡོད་དེ། སེམས་ཀྱི་ཁ་བརྡ་དང་སེམས་ཀྱི་ཕྱི་ནང་། སེམས་ཀྱི་ལམ་སྟོན། སེམས་ཀྱི་སྐྱ་ཡ། སེམས་གཏམ་དམར་བོ་སོགས་ལེ་ཚན་ལྔ་ཡིས་གྲུབ་པར་བྱས་ཡོད། ལོ་དེབ་འདིར་ཁྱོན་ཤོག་གྲངས་དྲུག་ཅུ་ཡོད་ཅིང་ཚོན་ལྡན་ཡིན་པར་མ་ཟད། རྩོམ་ཡིག་དང་བཅར་འདྲི་ཕལ་མོ་ཆེར་རྩོམ་མཁན་དང་བཅར་འདྲི་བྱེད་ཡུལ་གྱི་འདྲ་པར་ཡང་བཞག་ཡོད།(རེ་ཟུང་མ་རེག་པའང་ཡོད།)

སེམས་ཀྱི་ཁ་བརྡའི་ནང་དུ་རྩོམ་སྒྲིག་པའི་གཏམ་ (ང་ཚོའི་དམིགས་འདུན་གསལ་བོ་ཡིན།) ཞེས་པ་དང་བློ་འདོན་པའི་ཁ་བརྡ་ (ཆང་ས་དྲ་བའི་སེམས་གཏམ།)ཀློག་འཕྲིན་ (ཆང་ས་དྲ་བའི་སྙིང་སྟོབས་དང་མདུན་ལམ) ཞེས་པ་སོགས་བཀོད་ཡོད།

སེམས་ཀྱི་ཕྱི་ནང་ནི་ཆེད་སྒྲིག་བཅར་འདྲིའི་ལེ་ཚན་ཞིག་སྟེ། ཆང་ས་དྲ་བ་དང་བོད་ཕྱི་ནང་གི་ཀློག་མཁན་ལྔ་བཅས་ཀྱི་དྲི་བ་ཁག་མཉམ་དུ་བསྡུས་ཏེ། བོད་ཀྱི་རྩོད་ཉོག་འདུམ་འགྲིག་ཁང་གི་འགན་འཛིན་ཀརྨ་ལེགས་བཤད་ལགས་སུ་བཅར་འདྲི་བྱས་པ། “མི་ལ་དགོས་པ་ནི་ཕན་ཚུན་ལ་བརྩེ་བ་དང་ཡིད་ཆེས་རེད།”ཅེས་པ་དང་། བཙན་བྱོལ་གྱི་གཞས་པ་གྲགས་ཅན་ཕུར་བུ་འཕྲིན་ལས་ལགས་སུ་བཅར་འདྲི་བྱས་པ། “ངས་ནམ་ཡང་གཞས་གཏོང་མཚམས་འཇོག་གི་མ་རེད།” “བོད་རིགས་ན་གཞོན་ཁག་ཅིག་ལ་བརྩེ་དུང་སྐོར་ནས་བཅར་འདྲི་བྱས་པ།” བོད་ནང་གི་སྨན་པ་འཕགས་མོ་སྒྲོལ་མ་ལགས་སུ་བཅར་འདྲི་བྱས་པ། “བོད་རིགས་བུད་མེད་ཚོས་མོ་ནད་ཀྱི་ཕྱོགས་ནས་གཟབ་དགོས་ས་མང་གི” ཞེས་པ། ཆང་ས་དྲ་བ་བརྒྱུད་ནས་དགའ་རོགས་བསྒྲིགས་མྱོང་བའི་ངྷ་སར་གནས་སྡོད་པ་བསྟན་པ་ལགས་སུ་བཅར་འདྲི་བྱས་པ། “ངས་ཆང་ས་དྲ་བ་བརྒྱུད་ནས་དགའ་རོགས་བསྒྲིགས་མྱོང་།” ཞེས་པ། ཨ་རིའི་རླུང་འཕྲིན་ཁང་གི་གསར་འགོད་པ་དང་བོད་ཀྱི་མཛངས་མ། བུད་མེད་རྩོམ་པ་མོ་གྲགས་ཅན་ཚེ་རིང་སྐྱིད་ལ་བཅར་འདྲི་བྱས་པ། “ངས་ད་བར་དུ་གཉེན་མ་བསྒྲིགས་པ་ནི་ངེས་གཏན་གྱི་གནས་ཡུལ་ཞིག་མེད་སྟབས་ཡིན།” ཞེས་པ་སོགས་ཆེད་སྒྲིག་བྱས་ཡོད། (གོང་གསལ་སྨན་པ་འཕགས་མོ་སྒྲོལ་མ་ལགས་སུ་བཅར་འདྲི་བྱས་པའི་ནང་དུ་བུད་མེད་ཀྱི་མོ་ནད་ཕྱོགས་ཙམ་ཁོ་ན་མིན་པར། དེང་སྐབས་བོད་ནང་དུ་ཨེ་ཛེའི་འགོས་ནད་ཁྱབ་བརྡལ་དུ་འགྲོ་བཞིན་པའི་ཉེན་ཚབ་ཀྱི་གནས་ཚུལ་ཞིག་ཀྱང་ཡོད་པས། ཚང་མས་དོ་སྣང་བྱེད་ཡུལ་དུ་གྱུར་ཡོད།)

སེམས་ཀྱི་ལམ་སྟོན་ནང་དུ། བོད་བདུད་རྒྱལ་གྱིས་བྲིས་པའི་ “མི་བཤད་ཐབས་མེད་ཀྱི་སྐད་ཆ་དང་གཉེན་སྒྲིག་གི་སྐོར།” དང་། དོན་གྲུབ་སྒྲོལ་མས་བོད་སྒྱུར་བྱས་པའི་ “སྦྲུམ་མའི་གནས་སྐབས་སུ་རང་ཉིད་ཇི་ལྟར་བདེ་ཐང་ཡོང་ཐུབ།” འབྲོང་བུ་ཟླ་བས་བོད་སྒྱུར་བྱས་པའི་ “ཆུང་མ་པང་དུ་ཁྱེར་བའི་ཉིན་ཞག་སུམ་ཅུ།” འབྲུག་མོས་བོད་སྒྱུར་བྱས་པའི་ “ཟླ་མཚན་འབབ་པའི་དུས་སུ་མཉམ་འཇོག་དགོས་པའི་གནད་དོན་འགའ།” གཅན་འོད་འབར་གྱིས་བོད་སྒྱུར་བྱས་པའི་ “བརྩེ་དགས་ཕྱུག་པའི་བརྩེ་འཕྲིན་ཞིག” དགུ་རོང་སྤུན་གྲོལ་གྱིས་བོད་སྒྱུར་བྱས་པའི་ “བུད་མེད་ཀྱི་བྱ་ལེ་འབྲེག་གཅོད་བྱེད་པའི་ཁ་ཆེ་དང་ཡ་ཧུ་དེའི་ཆོས་ལུགས་ཀྱི་ཆོ་ག” དཀོན་མཆོག་གིས་བྲིས་པའི་ “གཉེན་སྒྲིག་དང་ཁྱིམ་ཚང་།” ཆོས་སྒྲོན་གྱིས་བོད་སྒྱུར་བྱས་པའི་ “སྐྱེས་པས་བསམ་ཤེས་བྱ་དགོས་པའི་བུད་མེད་ཀྱི་མངོན་འདོད་བཅུ།” ཞིང་པ་ཀུན་ཁྱབ་དཔལ་བཟང་གིས་བྲིས་པའི་ “བཟའ་ཚང་གི་མཛའ་འབྲེལ་སྐོར་གླེང་བ།” སོགས་བཀོད་ཡོད།

སེམས་ཀྱི་སྐྱ་ཡའི་ནང་དུ། “ཆུང་མ་ཉམ་ཆུང་ཞིག་བྱུང་ན་འགྲིག”ཅེས་པ་དང་། “བོད་མོ་ཚོ། ང་ལ་གཉེན་སྒྲིག་གམ།” “ཆུང་མ་བོད་ཡིན་ན་ཆོག” “ང་རང་ཆང་ས་རྒྱག་འདོད་བྱུང་སོང་།” སོགས་དེ་སྔར་ཆང་ས་ཚགས་པར་སྟེང་བཀོད་མྱོང་མེད་པའི་བཟའ་ཟླ་འཚོལ་བའི་བརྡ་ཁྱབ་གསར་བ་བཞི་ཙམ་བཀོད་ཡོད།

མཇུག་མཐའི་ལེ་ཚན་ཏེ་སེམས་གཏམ་དམར་བོའི་ནང་དུ། ཀླུ་སྨྱོན་གྱིས་བྲིས་པའི་“ཚེ་གཅིག་སྐྱ་ཡ་འཚོལ་བའི་བརྡ་ཁྱབ།”ཅེས་པ་དང་། གཡུ་ལུང་རྣོ་གྲིས་བྲིས་པའི་“རྒྱོ་བཤད་རྟ་ཐོག་མ།” འབའ་སྲས་ཀྱིས་བྲིས་པའི་“གབ་ཚིག་སྐྱིད་པོ།” དགའ་བདེས་བསྒྱུར་བའི་“གཞང་ཁང་ནང་ན་བརྩེ་དུང་མེད།” ཁམས་འཛུམ་གྲོལ་གྱིས་བྲིས་པའི་“འདོད་པའི་ལོངས་སྤྱོད།” གནམ་བུས་བྲིས་པའི་“མཁའ་འགྲོ་མའི་བདེ་བ་འཐོབ་པའི་སྨོན་ལམ་བཞུགས།”ཞེས་པ་སོགས་ཁ་བཙོག་སྙན་ངག་སྐོར་ཞིག་ཀྱང་ཆེད་སྒྲིག་བྱས་ཡོད།

འདི་ལྟར་ཆང་ས་ལོ་དེབ་ནི་ཆེད་དུ་གཞི་རིམ་མང་ཚོགས་དང་འཇིག་རྟེན་གྱི་ཁྱིམ་པ་བ་ཚོ་དམིགས་འབེན་དུ་བཟུང་སྟེ་བསྒྲིགས་ཡོད་ཅིང་། ཁ་བྱང་གིས་བསྟན་དོན་ལྟར་བཅར་འདྲི་དང་བྲིས་རྩོམ། འགྱུར་རྩོམ། བཅད་རྩོམ། ལྷུག་རྩོམ་སོགས་རྩོམ་ཡིག་གང་འདྲ་ཞིག་ཡིན་རུང་ད་སྔ་ཡན་གྱི་དུས་དེབ་དག་དང་མི་འདྲ་བར་ཆེད་སྒྲིག་བྱས་པའི་ལེ་ཚན་རྐྱང་དང་ཆེད་སྒྲིག་བྱས་པའི་རྩོམ་ཡིག་རྐྱང་ཡིན།

ལོ་དེབ་འདི་མི་རིང་བར་ངྷ་ས་གཙོས་ངྷ་སའི་ཉེ་འཁོར་ཁག་ཏུ་དགྲམ་རྒྱུ་ཡིན་པ་དང་། ལྡི་ལི་བོད་ཀྱི་དཔེ་མཛོད་ཁང་ནས་ཉོ་ཐུབ་པ་ཡིན། (དེ་བཞིན་ཧྥ་རི་སི་དང་བྷེལ་རྗམ། ཨ་རི་སོགས་སུ་དགྲམ་རྩིས་ཡོད་ཀྱང་ཞིབ་ཕྲའི་གནས་ཚུལ་རྗེས་ནས་གླེང་ཆོག)

འབྲེལ་གཏུག་བྱེད་ས། tibetchangsa@gmail.com ཡང་ན། changsatsang@gmail.com ཁ་པར་ཨང་། +91 9882339757 ཡིན།