མི་རབས་གསར་བའི་གྲྭ་ལོག་གི་མཚན་བྱང་།

འབའ་སྲས།

 
ངག་ནས་དབྱངས་ཅན་ངག་ཐོས་པ།།
དཔྱད་ན་རིག་པའི་ཀློང་བརྡོལ་བ།།
མདོ་སྨད་ལོ་རྒྱུས་རྩོམ་པ་པོ།།
ཧོར་གཙང་འཇིགས་མེད་གྲྭ་ལོག་ཡིན།།

ཤར་ཕྱོགས་མཚན་ཉིད་སྨྲ་བ་བོ།།
སྲོལ་རྒྱུན་སྙན་ངག་ཟླ་མེད་པ།།
སཱ་རའི་སློབ་དཔོན་ཆེན་མོ་མཆོག །
བློ་གྲོས་དཔལ་བཟང་གྲྭ་ལོག་ཡིན།།

ཤར་ཕྱོགས་འགྲིམས་པའི་གཏམ་སྨྲ་བ།།
ཚིག་སྦྱོར་ཚུལ་ལ་མཁས་པའི་ཕུལ།།
ཏེ་སེ་བཙལ་ནས་རྙེད་པ་པོ།།
ཤེས་རབ་དར་རྒྱས་གྲྭ་ལོག་ཡིན།།

ལོ་རྒྱུས་སྨྲ་ལ་ཀུན་མཁྱེན་གྲགས།།
སུམ་རྟགས་ཐོན་མི་གཉིས་པ་སྟེ།།
མཚན་མ་རིག་པ་ཆོས་གྲགས་སྤུན།།
བློ་བཟང་རྒྱལ་མཚན་གྲྭ་ལོག་ཡིན།།

བཅད་གསར་སྙན་ངག་སྲོལ་གཏོད་མཁན།།
ལྟ་བ་རིག་པ་འགྲན་མེད་པ།།
རྟུལ་ཕོད་གླེགས་བམ་རྩོམ་པ་པོ།།
སེང་གེ་རྡོ་རྗེ་གྲྭ་ལོག་ཡིན།།

དབྱིན་ཡིག་བོད་ཡིག་སྨྲ་བའི་མཆོག །
སུམ་རྟགས་རྣམ་དབྱེ་དཔྱད་པ་གསར།།
སངས་རྒྱས་དཔལ་རྟུལ་སྒྱུར་པ་པོ།།
དགེ་འདུན་རབ་གསལ་གྲྭ་ལོག་ཡིན།།

སྨན་དང་སྙན་ངག་ནང་བའི་ཆོས།།
ཐ་སྙད་རིག་གནས་རྩིས་ལ་སོགས།།
ཆེ་ཆུང་ལྔ་ལ་བྱང་ཆུད་པ།།
ཨ་ཚོགས་མཁས་བཙུན་གྲྭ་ལོག་ཡིན།།

ལོ་རྒྱུས་སྨྲ་ལ་མེ་ལོང་གཟུགས།།
གསང་རྣམ་ལག་མཐིལ་རི་མོ་བཞིན།།
སྨན་སྦྱོར་གཡུ་ཐོག་གཉིས་པ་སྟེ།།
བླ་བྲང་སྐལ་བཟང་གྲྭ་ལོག་ཡིན།།

རཱ་མ་ཎ་ཡི་ཡང་འགྲེལ་དང་།།
སྤྲིན་གྱི་ཕོ་ཉའི་འབྲུ་འགྲེལ་བ།།
ནོར་གླིང་སྙན་ངག་སྨྲ་བའི་མཆོག །
བསྟན་འཛིན་འཇམ་དབྱངས་གྲྭ་ལོག་ཡིན།།

རྩོམ་རིག་གཞུང་དང་མིང་གི་བརྡ།།
མངོན་བརྗོད་རིག་བྱེད་གཏམ་ལ་མཁས།།
དེང་གི་རྩོམ་རིག་དགེ་རྒན་མཆོག །
རྭ་རྒྱ་འཕྲིན་ལས་གྲྭ་ལོག་ཡིན།།

གནའ་དེང་སྙན་ངག་འབྲི་བ་པོ།།
གོ་སླ་གཉི་ཀ་རྩོམ་མཁས་པ།།
ཏཱ་ལའི་བླ་མའི་སློབ་ཆེན་གྱི།།
དགེ་རྒན་ཨ་འཇམ་གྲྭ་ལོག་ཡིན།།

གང་ཞིག་འཆད་ལ་དབྱུག་པ་ཡིས།།
རྨོངས་དད་ཅན་གྱི་མགོ་གཏོར་བ།།
བདེན་དངོས་སྨྲ་ལ་ལྕགས་ཀྱི་ལྕེ།།
མཁས་པ་འོད་ཀྱང་གྲྭ་ལོག་ཡིན།།

མཐོན་པོའི་རྐང་མཐིལ་སེན་སྐོར་བྱེད།།
དམའ་བའི་མགོ་བོ་འཁོར་གསུམ་བསྐོར།།
གྲྭ་ལོག་ནང་གི་ལྟ་ལོག་པ།།
སྨྲ་དུག་ལྕེ་ཅན་གྲྭ་ལོག་ཡིན།།

སྙན་གཞུང་སྙན་ངག་མེ་ལོང་མ།།
རོང་བས་འཐེན་ཐུག་འཐུང་འཐུང་བྱེད།།
འབྲོག་པས་རྩམ་པ་བརྫི་བརྫི་བྱེད།།
ཁ་སྒང་བསམ་གཏན་གྲྭ་ལོག་ཡིན།།

༠༢/༠༨/༡༥ མཚན་དཀྱིལ་དུ།