འབའ་སྲས།
༼༡༽
ང་ཡང་ཁྱོད་ལྟར་བཤད་ཤེས་དོན་གོ་བས་འཇིག་རྟེན་མི་ཡུལ་དུ་སྡོད་པའི་སྐྱེས་བོ་ཞིག་ལས་གཞན་ཅི་ཡང་མིན། ཡིན་ན་ཡང་། མི་ཞིག་འཇིག་རྟེན་འདིར་སྡོད་ཆོག་ཆོག་ཅིག་ག་ལ་ཡོད། རང་རང་གི་རྣམ་དཔྱོད་དང་རྩོལ་བ་ལ་བརྟེན་ནས་འཚོལ་སྙེགས་ཤིག་གམ་རེ་བཞག་ཅིག་ལ་ཅིས་ཀྱང་འབད་དགོས། དེ་ནི་”མི་ཚེ་མདུན་ལམ”་ཟེར་བ་དེ་རེད། མདུན་ལམ་གྱི་ཆེད་དུ་མི་ཚེ་བརླགས་ཤིང་། མི་ཚེ་ཡི་ཆེད་དུ་མདུན་ལམ་བོར་བ་ཅི་འདྲས་མང་ཨང་།
༼༢༽
ང་ཡང་ཁྱོད་ལྟར་དྲིན་ཆེན་ཕ་མ་གཉིས་ལས་གཉོམ་ལག་རྒྱས་ཤིང་། ཁྱིམ་ཚང་གི་ཁ་དབུགས་ལ་བརྟེན་ནས་འཚར་ལོངས་བྱུང་བ་ཞིག་ལས་གཞན་ཅི་ཡང་མིན། ཡིན་ན་ཡང་། ཁྱིམ་ཚང་ཞིག་ལས་སྡོད་ཆོག་ཆོག་ཅིག་ག་ལ་ཡོད། རང་རང་གི་བརྩེ་སེམས་དང་དུངས་ཞེན་ལ་བརྟེན་ནས་ཕ་མའི་བཀའ་དྲིན་མཇལ་དགོས། དེ་ནི་”ཕ་མའི་དྲིན་ལན”་ཟེར་བ་དེ་རེད། ཕ་མའི་ཆེད་དུ་རང་ཉིད་བོར་ཤིང་། རང་གི་ཆེད་དུ་ཕ་མ་བརྗེད་པ་ཅི་འདྲས་མང་ཨང་།
༼༣༽
ང་ཡང་ཁྱོད་ལྟར་དབྱངས་གསལ་གཉིས་ལས་སྐད་ཆ་བསླབས་ཤིང་། སྐད་ཡིག་དང་སྐད་ཆ་གཉིས་ཀྱིས་མི་རིགས་ཤིག་གི་གྲལ་དུ་ཚུད་པ་ཞིག་ལས་གཞན་ཅི་ཡང་མིན། ཡིན་ན་ཡང་། མི་རིགས་ཤིག་གི་གྲལ་དུ་སྡོད་ཆོག་ཆོག་ཅིག་ག་ལ་ཡོད། རང་རང་གི་ལྷག་བསམ་དང་རིགས་ཞེན་ལ་བརྟེན་ནས་བོད་སྐད་བཤད་དགོས། དེ་ནི་”སྐད་ཡིག་སྲུང་སྐྱོབ”་ཟེར་བ་དེ་རེད། སྐད་ཡིག་གི་ཆེད་དུ་རང་ཉིད་བོར་ཞིང་། རང་ཉིད་ཀྱི་ཆེད་དུ་སྐད་ཡིག་དོར་བ་ཅི་འདྲས་མང་ཨང་།
༼༤༽
ང་ཡང་ཁྱོད་ལྟར་དཔེ་རྒྱན་གཟུགས་རྒྱན་ལས་སྙན་ངག་གི་ཁ་བྱང་རྙེད་ཅིང་། དོན་རྒྱན་སྒྲ་རྒྱན་ལས་སྙན་ངག་གི་མཛེས་སྡུག་མཐོང་མཁན་ཞིག་ལས་གཞན་ཅི་ཡང་མིན། ཡིན་ན་ཡང་། སྙན་ངག་པའི་གྲལ་དུ་སྡོད་ཆོག་ཆོག་ཅིག་ག་ལ་ཡོད། རང་རང་གི་སྦྱང་རྩོམ་དང་ཤེས་རབ་ལ་བརྟེན་ནས་སྙན་ངག་འབྲི་དགོས། དེ་ནི་”སྙན་ངག་པ་”ཟེར་བ་དེ་རེད། སྙན་ངག་གི་ཆེད་དུ་རང་ཉིད་བོར་ཞིང་། རང་ཉིད་ཀྱི་ཆེད་དུ་སྙན་ངག་བརྗེད་པ་ཅི་འདྲས་མང་ཨང་།
༡༤/༠༥/༢༠༡༣
མི་ཚེ་མདུན་ལམ། མི་ཚེའི་མདུན་ལམ་ལ་བཅོས།
འབའ་སྲས་ལགས
རྩ་དོན་དང་པོ་དེའི་ནང་བོད་པ་བཙན་བྱོལ་བ་ཚོས་སོ་སོའི་མི་ཚེའི་མདུན་ལམ་གྱི་ཆེད་དུ་བཙན་བྱོལ་སྟི་གནས་རྡ་རམ་ས་ལ་བརླགས་ཤིང་། སོ་སོའི་མི་ཚེ་མདུན་ལམ་གྱི་ཆེད་དུ་ནུབ་ཕྱོགས་རྒྱལ་ཁབ་བསྙེགས་ཞེས་བྲིས་མི་འདུག