རྩོམ་ཡིག་གི་ཡོང་ཁུངས། བོད་ཀྱི་དུས་བབ།
བླ་གཡུ།
ཟླ་གྲངས་འདི་དག་གི་ཡུན་ལ། ངའི་མལ་གྱི་རྨི་ལམ་དུ་དཔེ་ཀློག་གི་བརྡབ་གསིག་ཡང་ཡང་བཏང་ཡོང་། དེ་ལ་རྒྱུ་དང་རྐྱེན་མང་དག་ཅིག་ཡོད་སྲིད་ནའང་། དཔེ་ཀློག་ལ་བློ་ཤོར་ཞིང་དེས་བསླུ་བྲིད་ཐེབས་ཏེ་སེམས་པ་བླང་བླང་པོར་བྱས་པ་དེ་འདྲ་ཡེ་ནས་ཡིན་མི་སྲིད། ཅིག་བྱས་ན་ཆུང་ངུ་ནས་མ་བསྐུལ་དང་བླངས་ཀྱིས་རང་གི་ཕྲག་པར་བཀལ་བའི་འགན་འཁུར་བཅོས་མའི་རིགས་དེས་འཇིགས་ཟིལ་དང་དཔུང་ཤེད་དེ་ལ་ཐུག་མདོག་ཁ། ཉིན་ཞག་ཕྲུགས་གཅིག་གི་ཞོགས་པ་རེ་རེར་ཁ་པར་གྱི་ཅུང་སྒྲས་བསྐུལ་ཏེ་མལ་ལས་སད་ཡོང་དུས། ཐོག་མར་ངའི་མིག་ལམ་དུ་རབ་རིབ་ངང་བརྒྱུད་ཡོང་བ་ནི་སྒེའུ་ཁུང་ཟུར་གྱི་མདུན་གློག་དང་། མདུན་གློག་འཁྲིས་སུ་གཅར་དུ་བཀྲམས་པའི་བཀླགས་འཕྲོར་ལུས་པའི་དཔེ་དེབ་དེ་དག་རེད། མིའི་གྲལ་དུ་ཀུ་རེ་ལབ་ནས་འོས་མེད་དུ་བཟོས་པ་ལྟ་བུའི་རང་གི་རྣམ་རིག་ཇེ་གསལ་དུ་གྱུར་པ་ན། ད་གདོད་རྨི་ལམ་གྱི་མངོན་གྱུར་དེ་དག་ལ་སླར་ཡང་བདེན་པའི་ངོ་རིས་འཕྲོད་དེ། དར་ཅིག་ལ་སྨྲེང་ཤུར་ཤུར་ངང་དཔེ་དེབ་དེ་དག་ལ་ཁ་གཏད་དེ་ཅེ་རེར་ལྟ་ཞིང་། མིག་ལྕིབས་འགུལ་བའི་རང་དབང་ཡང་མི་སྟེར།
ངའི་ཕྲུགས་གཅིག་གི་ཞོགས་པ་ནི་སྤྱིར་དཀྱུས་མའི་གྲས་སུ་གཏོགས་ཏེ། ཆོས་ལུགས་ལ་དད་མོས་བྱེད་པའི་མི་ཕལ་མོ་ཆེ་དང་འདྲ་བར་མལ་ལངས་པའི་མོད་ལ་མཆོད་སྟེགས་སུ་བཤམས་པའི་རྟེན་གྱི་དྲུང་དུ་ཡོན་ཆབ་ཕུལ་བ་དང་། གཙང་སེང་ངེ་བའི་བདུག་སྤོས་ཀྱི་རིམ་གྲོ་སོགས་ཀྱང་གང་ཡང་མེད་ལ། དུས་ཚོད་ནས་དུས་ཚོད་བསྲིངས་ཏེ་དད་པ་དང་ལུས་པོ་ཡོད་ཚད་ཐམ་ཐོམ་མེར་བྱེད་ངེས་པའི་ཤོག་ལྡེབ་མང་བོ་ཅན་གྱི་ཁ་ཏོན་ཡང་མེད། དབང་པོ་གྲིམ་ཞིང་སྒྲིན་པ་མ་ཡིན་ཞིང་ངང་རྒྱུད་རིང་པོ་ཞེ་དྲག་མེད་པ། འཚོ་བ་སྟབས་བདེ་བའི་རིགས་སུ་གཏོགས་པའི་མི་དག་ལ་གསོལ་རས་སུ་བྱིན་པའི་ཚིགས་བཅད་དུམ་བུ་དང་། འཁྱོས་མ་ལ་བཀལ་ནས་འོངས་པའི་པོ་ཏི་ཕྲ་ལ་རིང་བ་མང་པོ་ཞིག་གི་སྙིང་པོ་བསྡུས་པའི་གཟུངས་སྔགས་སོགས་ཀྱང་ཁ་ཏོན་དུ་གྱེར་པ་ཡེ་ནས་མེད། མཆོད་སྟེགས་སུ་རྗེ་བཙུན་འཇམ་དབྱངས་ཀྱི་སྐུའི་དྲུང་དུ་གློག་གི་མཆོད་མེ་ངན་ནེ་བ་ཞིག་ཡོད་པའི་སྐུད་སྣེ་དེ་སྔས་འགྲམ་གྱི་མདུན་གློག་དང་རྐྱ་བསྒྲིལ་ནས་བསྒར་གདན་དུ་སྤྲེལ་ནས་ཡོད་ཅིང་། མལ་ལས་ལངས་སྐབས་བསྒར་གདན་ངོས་ཀྱི་གློག་གི་གཏོང་འཛིན་དེ་ལ་རྐང་མཛུབ་ཀྱིས་ག་ལེར་མནན་ཙམ་བྱས་ཚེ་ལྷ་དང་མིའི་གྲིབ་མདངས་དུས་གཅིག་ལ་ཇེ་གསལ་དུ་གཏོང་ཞིང་། ཉིན་གཅིག་གི་ཆོ་འཕྲུལ་ཐམས་ཅད་ཀྱང་གཅིག་གིས་གཅིག་ལ་སྤྲེལ་ནས་སླེབས་ཡོང་།
སྒེའུ་ཁུང་ག་ལེར་ཕྱེ་ནས་ཕྱི་རོལ་ཏུ་ཅེར་ནས་སྡོད་དུས་ཟླ་དགུ་བའི་ཆར་ཞོད་ཀྱིས་བྱབས་ཁྲུས་བྱེད་བཞིན་པའི་ལྡེམ་ལྕུག་ལྕུག་གི་ཤིང་གི་ཡལ་ག་དང་། ཁེར་ཧྲེང་དུ་འགྲེང་བའི་ལམ་འགྲམ་གྱི་གློག་སྡོང་། གློག་སྡོང་ངོས་སུ་སྐུད་པ་དེ་དག་སྡོམ་རྒྱ་བཞིན་དུ་གཅིག་གིས་གཅིག་ལ་འཁྲིས་ཤིང་འཛིང་བའི་བཀོད་པ། གསལ་ལ་མི་གསལ་བའི་འཁྲིས་ཀྱི་ཁམས་ཚན་དེའི་རྒྱབ་ཕིབས་ཀྱི་བྱ་འདབ་ལ་གཟར་བའི་གཡེར་ཁ་དེའང་མཐོང་ཡོང་། ཤིང་གི་ཡལ་ག་དེ་དག་ནས་ཟགས་ཏེ་ཆུ་རྐ་ཆེ་ཆུང་གི་ནང་བྱོ་བའི་ཤག་སྒྲ་དང་། དེ་དང་མཉམ་དུ་གཡས་གཡོན་ནས་མལ་ལས་སྐུལ་བའི་ཅུང་བརྡ་བརྡུངས་པའི་ཏིང་སྒྲའི་གྲག་འགུལ་དེ་དག་ཀྱང་རྣ་བའི་ཡོལ་གོར་ལྷུང་ཡོང་། ད་དུང་ཆར་ཟིམ་འདྲེས་མའི་རླུང་བུ་བསིལ་མོ་ཞིག་ལུས་ཀྱི་བ་སྤུའི་བུ་ག་བརྒྱུད་ནས་རུས་དང་རྐང་ལ་དལ་བུར་ཟུག་སྟེ། ལུས་ཧྲིལ་བོ་དར་ཅིག་ལ་བདེ་ཕྲིལ་ཕྲིལ་བྱས་སོང་། མཐོང་ཐོས་དེ་དག་གིས་ནི་རང་གི་ཉིན་རེའི་ཞོགས་པ་རེ་རེ་དང་། ཉི་མ་རེ་རེའི་གྲག་འགུལ་གཞན་དག་ཀྱང་འགོ་རྩོམ་ཞིང་། རང་གི་གྲིབ་མདངས་རབ་རིབ་དེ་ཀའང་ཇེ་གསལ་ནས་ཇེ་གསལ་ལ་བཏང་ཡོང་།
ནམ་རྒྱུན་ལྟར་མལ་ལས་ལངས་ནས་གདོང་པ་ཆུས་རློན་ཙམ་བྱས་ཏེ། ཅི་ཞིག་གི་རྗེས་སུ་ལུས་དོགས་པའི་བྲེལ་བྲེལ་འཚུབ་འཚུབ་ཡང་མེད་ལ། ཅི་ལ་ཡང་སྙིང་པོ་མེད་པ་ལྟ་བུའི་སྒྱིད་ལུག་དེ་འདྲ་ཡང་མེད་པར་འོས་ཤིང་འཚམ་པའི་དར་སྐུད་ཅིག་ལ་འཇུས་ནས་དཔེ་འཛིན་ཐན་ཐུན་རེ་བྱས། ཡང་ཞོགས་ཇའི་བར་གླེགས་ནས་དྲ་བའི་བར་ཁྱམས་ཀུན་ཏུ་གོམ་འགྲོས་རེ་བྱས། གྲོགས་པོ་དག་གི་དྲ་རྩོམ་ལ་ཞབས་མཆན་ཡིག་རྫོབ་རེ་བྲིས། ཡང་ཆོས་རར་སོང་ནས་སྣང་སྲིད་ཧྲིལ་བོ་ཐལ་སྐོར་གཅིག་གི་འོག་ནས་འགྱེལ་འགྲོ་སྙམ་པའི་རྟོག་གེ་བའི་སྣང་བ་ཞིག་ཁྱེར་ཏེ། ཆོས་ཉིད་ལ་འཕྲོད་དང་མི་འཕྲོད་དང་ལན་པོ་ཡོད་མེད་ཅི་ལྟར་ཡང་རིགས་པ་མགོ་མཚུངས་རེ་དང་། ལུང་ཐོ་ཐར་ཐོར་རེས་ཉི་མ་སྐྱེལ་བཞིན་ཡོད་ཅིང་། ཉིན་སྔ་རྒྱབ་གཉིས་ལ་དུས་ཀྱི་བསིལ་དྲོ་མཐོ་དམའ་ཙམ་ལས་འགྲོ་འདུག་ལ་ཧེམ་བག་ཡེ་ནས་མེད། འདི་ལྟར་འཚོ་བ་ངན་ནེ་ཞིག་ཡང་དང་བསྐྱར་དུ་བཟླས་ཏེ་ལོ་ཟླའི་ཁུག་སོ་མང་བོ་ཞིག་ཐག་རིང་ཐག་རིང་ཞིག་ལ་སྐྱེལ་བ་ཡིན།
ངས་དེ་ལྟར་ཉི་མ་རེ་རེ་དང་ཟླ་བ་རེ་རེ། ལོ་ཡི་འཁོར་བསྐྱོད་རེ་རེ་ལ་ཆད་མེད་དུ་རྒྱུན་འཁྱོངས་བྱས་ཏེ་འཚོ་བ་དེ་ག་ཙམ་ཞིག་བསྐྱར་བཟླས་མང་བོ་བྱས་ཤིང་། ཕོ་ལོ་ཉི་ཤུ་རྩ་གྲངས་ཀྱི་གྲག་འགུལ་ཐམས་ཅད་ཀྱང་སྒོ་ཕྱི་ནང་གི་རྒྱ་ཁྱོན་ཙམ་ལས་བརྒལ་མ་ཐུབ་ལ། མི་ཚེ་ཡི་ཡལ་འདབ་དག་ཀྱང་འགུལ་སྐྱོད་དེ་དང་མཐུན་པ་ཞིག་ལས་བྱས་ཐུབ་མེད། ཡིན་ན་ཡང་། ངས་ད་བར་དུ་དེ་ལ་སོས་དལ་བྱས་ཏེ་སྣང་འཇོག་ཡེ་ནས་བྱས་མེད་པ་འདྲ། མི་ཚེ་ནི་དེ་འདྲའི་ཀྱལ་ཁ་ཆུང་ཆུང་གི་ཁྲོད་ནས་འཁྱུག་ཙམ་གྱིས་ཤོར་འགྲོ་བ་ཞིག་རེད། དེ་བས་ཁ་ཁུ་སིམ་པོར་ལུས་པའི་ལུང་པ་འགོལ་བོ་ཞིག་ནས་རང་གི་ནར་སོན་གྱི་ཉིན་སྲིབ་རེ་རེ་ལ་གླེང་རིན་ཡོད་པ་དང་མེད་པ་ཐམས་ཅད་ལ་ཁོག་རྩིས་རྒྱབ་དགོས་ཁེལ་ལ། རང་གི་འདོད་མོས་ལྟར་འཁྱར་ཡན་བྱས་ཏེ་བསམ་ཐོག་ལ་མ་བབས་པའི་དོན་དག་མང་བོ་ཞིག་ལ་འཁང་ར་དང་རེ་ཆད་ལྟ་བུའི་རྣམ་འགྱུར་ཡང་ཡང་སྟོན་དགོས་ཐུག་སོང་།
ད་སྔོན་དཔེ་ཀློག་ལ་གོམས་འདྲིས་ཡོང་བ་དང་སྤྲོ་སྣང་བག་ཙམ་རེ་ཡོང་བའི་ཆེད་དུ་དེ་འབྲེལ་གྱི་གསུང་བཤད་དང་དཔེ་དེབ་ཁ་ཤས་ལ་བལྟ་རྒྱུ་ཨུ་ཚུགས་བྱེད་མྱོང་། དཔེ་ཀློག་སྐོར་གྱི་མྱོང་གོམས་དང་མཐོང་ཐོས་བྲིས་པའི་དཔེ་དེབ་དང་དྲ་རྩོམ་མང་བོར་དཔེ་ཀློག་གི་འཁོར་ཡུག་དང་གཟུར་གནས་ཀྱི་སེམས་ཁམས་གཉིས་བྲིས་འདུག འཁོར་ཡུག་དང་སེམས་ཁམས་གཉིས་ནི་མིག་དང་མིག་གི་རྫི་མ་བཞིན་དུ་དཔེ་ཀློག་དང་མཉམ་དུ་གཤིབས་ནས་ཡོད་ཅིང་། ལུས་དང་ལུས་ཀྱི་ཡན་ལག་ཇི་བཞིན་ཕན་ཚུན་ལ་བརྟེན་ནས་ཡོད་ཅེས་བཤད་འདུག དཔེ་ཀློག་གི་འཁོར་ཡུག་ལྷིག་འཇགས་སེ་བ་ཞིག་དང་འཕྲད་དེ་གཟུ་བོར་གནས་པའི་སེམས་ཁམས་གཙང་སང་ངེ་བ་ཞིག་གིས་ལྟ་ཐུབ་ཚེ། མཁའ་འགྲོ་མའི་བྱིན་རླབས་བབས་པའི་མཁའ་འགྲོའི་བརྡ་ཡིག་སོགས་ཀྱང་དེ་འདྲའི་དཀའ་སེ་བ་ཞིག་མིན་རབས་བྲིས་འདུག འོན་ཀྱང་། དེ་དག་ནི་ང་ལ་འབྲེལ་བ་ཡེ་ནས་མེད་པ་འདྲ།
དེ་ལྟར་ཡིད་ཙམ་གྱིས་ཆར་ཞོད་དེ་ཡང་རིམ་གྱིས་ཆད་ཅིང་ཟམ་ཟིམ་དུ་གྱུར་པ་ན། གླལ་སྒྱིང་ཞིག་བྱས་ཏེ་ང་རང་རྐུབ་སྟེགས་རྒྱབ་སྙེ་ཅན་ལ་ལོག་པ་ན་བཀླགས་འཕྲོར་ལུས་པའི་དེབ་དེ་དག་སླར་ཡང་མིག་ལམ་དུ་མངོན་ཡོང་ཞིང་། དེ་དག་ལས་དེབ་གང་ཞིག་ལ་བལྟ་དགོས་མིན་ཐད་ལའང་བསམ་བློ་གཏང་དགོས་ཐུག་སོང་། དེའི་ནང་ནས་《བཀའ་གདམས་པའི་གསུང་གཅེས་བཏུས》 ཞེས་པའི་དེབ་དེ་བལྟ་སྙིང་ཆེས་སྤྲོ་བའི་དེབ་དེ་ཡིན། འདོད་པ་དེ་ཡང་དཔེ་ཀློག་གིས་བསླུ་བྲིད་བཟོས་པ་དེ་འདྲ་གཏན་ནས་མ་ཡིན་པར་དཔེ་དེབ་དེར་འཚོ་བ་དངོས་ཀྱི་གནས་ལུགས་ཆེ་དགུ་ཆུང་དགུ་འབེལ་བོ་ཞིག་མཛུབ་མོ་རི་སྟོན་གྱིས་ཚིག་ཉུང་ངུར་བཅད་ནས་བྲིས་འདུག་པའི་དབང་གིས་རེད། དེ་ནི་ང་ལྟ་བུ་མི་སྒྱིད་ལུག་ཚིག་ཉུང་ཉུང་དང་པོ་ཏི་ཆུང་ཆུང་དག་ལ་མོས་མཁན་ཚོར་འོས་ཤིང་འཚམ་པ་ཞིག་རེད་དྲན། ངས་ཡང་ཡང་རྣམ་འགྱུར་རྫུས་མ་ཞིག་ཁྱེར་ནས་ཚིག་འབྲི་དེ་དག་ལ་ཞིབ་ཏུ་བལྟས་པ་ཡིན། ཡིན་ན་ཡང་། ཚིག་དུམ་ཞིག་གིས་ངའི་སེམས་པ་གྲང་ཤུར་ཤུར་སེ་བཟོས་སོང་།
ཤོག་ལྷེབ་ཅིག་གི་ངོས་ནས། “གདམས་ངག་ལ་ནང་བྱན་ཆུད་པ་ནི་བེའུ་བུམ་ལག་མཐིལ་ཙམ་ཞིག་ལ་ངེས་པ་རྙེད་པ་ལ་མི་ཟེར་གྱི། གསུང་རབ་ཐམས་ཅད་གདམས་ངག་ཏུ་གོ་བ་ལ་ཟེར།” ཞེས་པ་ཞིག་མཐོང་བྱུང་། དེ་ནི་ཇོ་བོ་རྗེའི་བུ་སློབ་ཀྱི་གྲས་ནས་སྒོམ་གྱི་རྣལ་འབྱོར་ལ་སྐད་གྲག་ཆེ་བའི་རྣལ་འབྱོར་བ་བྱང་ཆུབ་རིན་ཆེན་གྱི་གསུང་དུམ་ཞིག་རེད། ཚིག་དུམ་འདིས་ང་དང་ང་ལྟ་བུ་ཚོར་མཛུབ་མོ་ཀེར་ནས་ཟུར་ཟ་ཞིག་བྱེད་ཀྱིན་པ་འདྲ་ལ། ཞོགས་པ་འདིའི་ལྷིང་འཇགས་ལ་ཡང་ཟང་ཟིང་གི་གྲག་འགུལ་གཞན་ཞིག་བཟོ་བཞིན་ཡོད་འདུག བེའུ་བུམ་ནི་དག་ཡིག་ཁག་ཏུ”མན་ངག་ཕྲན་བུ་སྡེབ་པའི་པོ་ཏི་ཆུང་བའི་མིང་”ཞེས་བྲིས་འདུག བཤད་རྒྱུན་ཞིག་ལ། “ཇོ་བོ་བཀའ་གདམས་པའི་གསུང་བཏུས་ཟེར་བ་འདི་ཀློག་པའི་ཚེ་ན་སྐྱིད་སྣང་ཆེ་ཡང་། རང་ཐོག་ལ་བསྐོར་ན་འདིས་མི་ཉན་ཟེར”བ་ནི་ཤིན་ཏུ་བདེན་པར་འདུག་སྙམ་བྱུང་།
དཔེ་དེབ་ཧྲིལ་བོ་དེའི་ནང་ལ་ཚིག་དུམ་ཐུང་ངུ་ཞིག་ལ་འཚོ་བའི་ཉེར་མཁོ་མང་བོ་ཞིག་ཆེས་སྟབས་བདེ་ཞིང་བཀླག་སྙིང་འདོད་པ་དེ་འདྲ་མང་བོ་འདུག གཞན་ལ་བཤད་ཀྱང་གནས་ལུགས་སུ་བགྲང་ཆོག་པ་དང་། རང་ལ་བསྐོར་ནའང་ཤོག་བུ་སྣུམ་གྱིས་ཟིན་པ་ཇི་བཞིན་ཁ་རི་ཁ་ཐུག་སེམས་ལ་ཟུག་འགྲོ་བ་དེ་འདྲ་ཡང་མང་བོ་འདུག ཡིན་ན་ཡང་། དེ་དག་ལས་གོང་གི་ཚིག་དུམ་དེ་དྲན་འཛིན་ལས་ཡལ་མེད་པར་བསམ་ན་ང་ཡང་བེའུ་བུམ་ལག་མཐིལ་ཙམ་ལ་ཤིན་ཏུ་མོས་པའི་གཤིས་ཀ་ཞིག་ཡོད་པ་གསལ་འདེབས་བྱེད་བཞིན་ཡོད་མདོག་ཁའོ། ། དངོས་གནས་དེ་འདྲ་རེད། ང་དེབ་རྒན་འཁྱོས་མ་ལ་བཀལ་ནའང་ཐེག་དཀའ་བའི་དེབ་རིགས་དེ་གཏན་ནས་བཀླག་སྙིང་སྤྲོ་བོ་མེད། གཉུག་གཤིས་ཁོ་རང་ལ་དཔེ་ཀློག་གི་འདུ་ཤེས་མེད་ཙང་དེའི་ཁར་རྟ་ཁལ་མཛོ་ཁལ་ལྟ་བུའི་པོ་ཏི་ཆེན་པོ་རྔམ་མཐུག་པོ་དེ་དག་བཀླག་དགོས་བྱུང་ཚེ་སྟབས་གཅིག་ལ་ཉོབ་ཏོ་ཆགས་ཡོང་།
ངས་ད་སྔོན་བཀླགས་ཟིན་པའི་ཁྲོད་དུ་པོ་ཏི་ཆེན་པོ་རྔམ་ཁ་མ་མཐུག་ན་མི་སྲབ་པ་མང་བོ་ཡོད་མོད། དེ་དག་ཐམས་ཅད་བྱིས་པ་རྩེད་ཆས་ལ་གཡེང་བ་བཞིན་དུ་བཀླགས་པ་ཕལ་ཆེར་མེད་ཟེར་ཆོག ཕྲན་བུ་བཀླགས་ཟིན་པ་དེ་ཡང་ཨུ་ཚུགས་དང་གཞན་གྱི་ཟེར་སྒྲོས་བསྟོད་ར་སོགས་ལ་བརྟེན་ནས་ཟོལ་རྫུ་འབའ་ཞིག་གིས་བཀླགས་པ་ལས་གཞན་ཅི་ཡང་མེད། དེ་བས་དཔེ་དེབ་རེ་བཀླགས་པའི་སྐས་མཚམས་རེ་ལ་དཀའ་ལས་རྒྱབ་སོང་སྙམ་པའི་ཡུས་སྡུག་ཀྱང་མང་བོ་ཡོང་གི་འདུག མཚམས་རེར་དཔེ་ཀློག་པ་ཞིག་ཡིན་པའི་ཟོལ་གྱིས་དཔེ་ཀློག་གི་བྱ་འགུལ་གང་མང་ལ་ཞུགས། གྲོགས་པོ་དག་ལ་ཡང་དཔེ་དེབ་བཀླག་དགོས་ལྟ་བུའི་སྐད་ཆ་ཆེས་རྫུས་མ་མང་བོ་སྨྲས་མྱོང་ཡོད། དོན་དངོས་སུ་ང་རང་དཔེ་ཀློག་ལ་མོས་པ་ཡེ་ནས་མེད། རྣམ་འགྱུར་དེ་དག་ནི་རང་གི་སེམས་ཀྱི་གོས་ཆེན་གྱི་འདབ་ལ་འགོས་པའི་ལྗན་ལྗིན་གྱི་རྣམ་པ་ཙམ་མ་ཡིན་པར་ཕྱི་ཤུན་བཀོག་པའི་རང་གི་ཆེས་དྭངས་མའི་གཉུག་གཤིས་དེ་ཀ་རང་ཡིན།
ངས་དཔེ་དེབ་མང་བོ་ཞིག་བཀླགས་འཕྲོ་བྱས་ནས་བསྐྱུར་མྱོང་། བཀླགས་འཕྲོ་བྱས་པའི་དཔེ་དེབ་དེ་དག་ནི་ང་རང་བཙན་བྱོལ་བ་ཞིག་ཆགས་རྗེས་འགན་འཁྲི་དང་དུས་ཚོད་འཕྲོ་བརླག་ཏུ་མ་བཏང་བའི་དན་རྟགས་ཕྲན་བུ་ཞིག་ཡིན་ལ། རང་གི་མི་ཚེའི་ཤོག་ཧྲིལ་དེ་ཕར་ལྷོགས་ཙམ་བྱས་ཚེ་མི་ཚེའི་ཚེ་ནོམ་དུ་ངོམས་རི་བ་ཡང་ལྷག་འཕྲོ་འདི་དག་ལས་གཞན་ཅི་ཡང་མེད་པ་འདྲ། ཕྱི་ཤུན་ལྟ་བུའི་རང་གི་ཟོལ་རྫུའི་སེང་རས་དེ་ཕར་བཤུས་ཚེ་འཕྲོ་ཅན་དུ་སོང་བའི་འདས་སོང་གི་བྱུང་བ་མང་བོ་ཞིག་ལ་ཡང་གནོང་འགྱོད་བྱེད་དགོས་ཁེལ་ལ། ཕན་ཚུན་ལ་སྐད་ཆ་བཤད་འཕྲོར་ལུས་པའི་ངོ་ཤེས་པ་ནས་ཆ་མེད་རྒྱུས་མེད་དུ་གྱུར་པའི་གྲོགས་པོ་མང་བོ་ཞིག་ཀྱང་དྲན་པའི་ཡོལ་གོར་འཛིན་དགོས་བྱུང་ཞིང་། མ་འོངས་པའི་རང་གི་ཚེ་སྲོག་གི་འོད་སྣང་མཐའ་མ་དེ་ལའང་ད་ལྟའི་བཀླགས་འཕྲོར་ལུས་པའི་དཔེ་དེབ་དེ་དག་ཇི་བཞིན་ཡོད་ཚད་བཤད་འཕྲོར་ལུས། ཟ་འཕྲོར་ལུས། འཐུང་འཕྲོར་ལུས་ནས་ཐག་རིང་ལ་ཁེར་ཧྲེང་གིས་འགྲུལ་བཞུད་བྱེད་བཞིན་པའི་གྲག་འགུལ་དེ་ལ་མནོ་བསམ་གཏང་དགོས་བྱུང་སོང་།
ཞིབ་རྩིས་ཤིག་རྒྱབ་ཡོང་ན། ལོ་འདི་དག་ལ་དཔེ་ཀློག་གི་གྲངས་དང་སྤུས་ཚད་སྔོན་མ་ཕ་ཡུལ་ལ་ཡོད་པའི་སྐབས་དང་བསྡུར་ཚེ་ཇེ་ཞན་དང་ཇེ་སྡུག་ལ་ཕྱིན་ཡོད་པ་འདྲ། ཕ་ཡུལ་ནས་བྲིས་པའི་རྩོམ་ཁ་ཤས་ད་སྐབས་ཀློག་ཚེ་རྩོམ་འདི་རང་གིས་བྲིས་པ་རེད་དམ་སྙམ་པའི་སོམ་ཉི་ཡང་ཡང་འཁོར་ཞིང་། ཚིག་གི་སྦྱོར་ཚུལ་དང་ཐ་སྙད་འདེམས་སྒྲུག་སོགས་ལ་ནི་ང་རང་ཡང་ཡིད་སྨོན་ཕྲན་བུ་རེ་སྐྱེ་ཡི་འདུག འོན་ཀྱང་། དོན་དག་དེ་ང་གཅིག་པོ་ལ་ལེ་བདའ་བྱེད་འོས་པ་ཞིག་མ་རེད། རང་གི་འཁྲིས་སུ་རང་གི་བློ་ཁ་དང་མཐུན་པའི་མཁོ་སོད་པའི་དཔེ་དེབ་ཀློག་ས་མེད་ལ། བཀླག་སྙིང་འདོད་པའི་དཔེ་དེབ་ཁ་ཤས་ནི་རིན་གོང་འཕར་ཚད་ཆེ་ནས་རང་གི་ཟླ་གཅིག་རིང་གི་འཚོ་བའི་ཉེར་མཁོ་སྐུང་བའི་དངོས་པོ་རྩག་རྩིག་ཐམས་ཅད་ལས་ཀྱང་བླུ་ཡོན་ཆེ་བ་བཟོས་འདུག་པས། ང་ལྟ་བུས་འདོད་པ་དང་སྙིང་ཁམས་གཉིས་ཆ་ནས་ཡོང་བ་མི་འདུག
དུས་ཀྱི་འགྱུར་འགྲོས་ཇེ་མགྱོགས་ནས་ཇེ་མགྱོགས་སུ་ཕྱིན་པ་དང་འབྲེལ་ནས་མི་ཐམས་ཅད་ཅི་ཞིག་གི་རྗེས་ལ་ལུས་དོགས་ཀྱིས་བྲེལ་འཚུབ་ལངས་ཤིང་། འཚོ་བ་དང་དགའ་མོས་ཀུན་ཀྱང་འུར་ཆིལ་ལེ་ཟ་ང་ཟིང་ངེ་ཞིག་ཏུ་བཏང་ཡོད་ཚོད་འདུག བྲེལ་ཟིང་དེའི་ཁྲོད་ནས་ངས་ཀྱང་གནོན་ཤུགས་རེས་མོས་ཀྱིས་མྱངས་ཏེ་དགའ་ཕྱོགས་སྣ་ཚོགས་བོར་བརླག་ཏུ་ཕྱིན་ཅིང་། དགོས་མཁོ་མི་འདྲ་བའི་རིག་གནས་སྣ་མང་གིས་བསླུ་བྲིད་ཐེབས་ཏེ་དཔེ་དེབ་མང་དག་ཅིག་ཀྱང་བླུས་པ་ནས་བཀླགས་འཕྲོ་ཅན་ཞིག་ཏུ་བཏང་བ་ཡིན། དཔེ་དེབ་ཀྱི་ཚོས་གཞི་མི་འདྲ་ཞིང་ནང་དོན་གྱི་འཚོ་བའི་གྲིབ་རིས་ཀྱང་ཡེ་ནས་མ་འདྲ་བ་ཞིག་ཏུ་གྱུར་རྗེས། ངས་དཔེ་དེབ་སྣ་ཚོགས་ཤིག་བརྗེ་སྤོར་དང་བཀླགས་འཕྲོ་བྱེད་དགོས་བྱུང་སོང་། མདུན་ཅོག་ངོས་ཀྱི་ཕྱེད་ནག་པོ་བཟོས་པའི་བཀླགས་འཕྲོ་ཅན་གྱི་དཔེ་དེབ་དེ་དག་མཐོང་ཐེངས་རེ་རེར་ངས་རང་གི་གྲིབ་གཟུགས་ཁྲོད་ཀྱི་མི་ཚེ་ཧྲིལ་བོ་བོར་སྟོར་ཁྲོད་ནས་ཡལ་གྱིན་པ་མཐོང་ནའང་། ངས་དེ་ལ་འོས་ཤིང་འཚམ་པའི་ལེ་བདའ་ཞིག་བྱེད་རྩིས་སེམས་ལ་ཡེ་ནས་འཁོར་མ་མྱོང་།
ངས་དེ་ལྟར་བཀླགས་འཕྲོར་བསྐྱུར་པའི་དཔེ་དེབ་དག་ལ་ཁ་གཏད་ནས་ཅེར་ནས་སྡོད་དུས། ཆོས་རྗེ་ས་པཎ་གྱིས། “དྲན་ཚད་ལག་ཏུ་མ་ལེན། ལེན་ཚད་མགོ་ཐོན་པར་གྱིས།” ཞེས་སྐད་ཆ་དེ་དྲན་ཡོང་། སྐད་ཆ་དེ་བསམ་གཟས་ནས་ང་ལྟ་བུའི་ཡོད་ཚད་བཀླགས་འཕྲོར་བསྐྱུར་བའི་སྐྱེས་བུ་ཅོལ་ཆུང་གི་རིགས་ལ་ཆེད་དུ་གདམས་པ་ཡིན་ངེས། དེ་ལ་བརྟེན་ནས་ངས་རང་གི་སེམས་པ་དེ་ཟུར་དུ་བཀྱེད་དེ་རང་རྟོག་དང་དོ་གལ་མང་བོ་བྱས་པ་ཡིན། ཡིན་ན་ཡང་། རྟིང་མར་དཔེ་དེབ་མང་བོ་མང་བོ་ཞིག་བཀླགས་འཕྲོར་མི་བསྐྱུར་ཞེས་ཡིད་དམ་གཏན་ནས་བཅད་མེད། ངས་རང་གི་སེམས་ནས་ཁ་གཡོར་ས་འོས་འཚམ་རེ་བཙལ་ནས་གནས་སྐབས་མང་བོ་ཞིག་ལ་གཡོལ་གང་ཐུབ་བྱས་པ་ཡིན་ལ། མ་བཅོས་པའི་སོ་སོའི་བསྡུས་གཟུགས་དེ་ནི་རང་གི”ཚེ་སྲོག་གི་འགྱུར་ཁུག་དེའི་ཆེས་རྩ་ཆེ་བའི་དབྱངས་རྟ”ཞིག་ཏུ་འགྱུར་བར་རེ་ལྟོས་བྱེད་བཞིན་ཡོད། རྣམ་འགྱུར་དེས་ནི་རང་གི་འབྱུང་འགྱུར་གྱི་རྩིགས་ལྡེབས་སུ་ལས་སུ་བྱ་བ་ཧྲིལ་བོ་འཕྲོ་ཅན་དུ་ལུས་པའི་རྟེན་འབྲེལ་གྱི་སྐྱ་ཐིག་ཅིག་ཕབ་བཞིན་ཡོད་དམ།