མི་བཟང་ཡང་འཁྲུལ་ཤེས་ཀྱིས་མི་སླུ་བའི་ངེས་པ་མེད།

གངས་དཀར་རྒྱལ་སྲས།
འཇིག་རྟེན་གྱི་ཁམས་འདིར་མི་སུ་ཞིག་ཡིན་ཡང། འདི་ནི་མངོན་སུམ་དང་འདི་ནི་འཁྲུལ་མེད་ཡིན་སྙམ་པའི་དོན་དག་ཧ་ཅང་མང་ནའང་དོན་དག་ཕལ་ཆེ་བ་ལ་མཐའ་གཅིག་ཏུ་ཐག་གཅོད་དཀའ་ལ་གལ་ཏེ་ཐག་བཅད་པའི་དབང་དུ་བཏང་ནའང་ད་དུང་མཉམ་འཇོག་དང་བརྟག་དཔྱད་བྱས་ན་བཟང་ལས་ངན་ཞིག་ནམ་ཡང་མེད། མི་སུ་ཞིག་ཡིན་ཡང་དོན་དག་ཆེ་མ་ཆུང་གསུམ་སོགས་ནོར་མ་མྱོང་མཁན་ཞིག་ཕལ་ཆེར་ཡོད་རྒྱུ་མ་རེད་བསམ་གི། རྒྱུ་མཚན་ནི། རྟགས་དང་ཚོར་བ་ལ་ནོར་བ་ཡོད་སྲིད་པས་རེད། མི་ཞིག་མི་གཞན་ཞིག་ལ་དགའ་བའི་ཚེ་དེས་བྱས་ཚད་ཚང་མ་རང་གི་སྣང་བར་འགྲོ་ཞིང་བྱས་བྱས་ཚང་མའང་འགྲིག་འགྲིག་འདྲ་བའི་སྣང་བ་འཁོར་སྲིད་པ་བཞིན། མི་ཞིག་མི་ཞིག་ལ་མི་དགའ་བའམ་མི་ཞིག་སྣང་བར་མི་འགྲོ་བའི་དོན་དག་ཅིག་བྱུང་ཚེ། མི་དེས་རང་ལ་ངན་ཞིག་བཤད་ཀྱིན་མེད་ན་ཡང་སྣང་ངོར་རང་ཉིད་མི་དགའ་བའི་མི་དེས་རང་ལ་ཟུར་ཟ་དང་ངན་མཚང་བརྗོད་ཀྱིན་ཡོད་པ་འདྲ་བའི་སྣང་བ་གང་མང་མང་འབྱུང་གིན་ཡོད་པ་མངོན་སུམ་གྱི་མཐོང་སྣང་དང་རང་ཉིད་ཀྱི་མཉམ་མྱོང་སོགས་ལས་ཤེས་པ་དེ་འདྲ་ཡིན་པས་དང་པོ་ནས་དཔྱད་ཞིབ་མཐར་ཕྱིན་པ་ཞིག་བྱེད་ཐུབ་ན་ཡག་ཤོས་དང་གལ་ཏེ་མ་ཐུབ་ཀྱང་མཐའ་གཅིག་ཏུ་ཐག་གཅོད་བྱེད་རྒྱུ་ནི ་ཤིན་ཏུ་ནས་ཉེན་ཁ་ཡོད་པ་ཞིག་རེད།

དཔེར་ན། ཁ་པར་ནང་གི་ལས་འབྲེལ་ཞེས་པའི་གློག་བརྙན་ལས། སྐུ་ཞབས་ཀོ་ཅིན་གྱི་སྒོར་མོ་ཁྲི་གསུམ་བརླགས་སོང། ཁོ་དངུལ་ཁང་སྒོ་འགྲམ་བརྒྱུད་ནས་འགྲོ་སྐབས་ཤིག་ལ་སྟབས་འཁེལ་བ་ཞིག་ལ་ཁོའི་ནང་ལ་ལས་ཀ་བྱེད་མཁན་བུ་མོ་ཞའོ་ཐུང་དང་བྱིས་པ་ཞིག་གིས་སྒོར་མོ་ཞིག་གང་ཞིག་ལ་སྐུར་གྱིན་འདུག ཁོས་དེ་མཐོང་བས་དོགས་པ་སྐྱེས་ཏེ་མོ་སོང་ཤུལ་ནས་དངུལ་ཁང་ལ་སོང་ནས་དྲིས་དུས་སྒོར་ཁྲི་གསུམ་བསྐུར་ཡོད་པ་མ་ཟད་མོས་ད་ལྟ་བསྐུར་བའི་དངུལ་དེའི་ཨང་གྲངས་ལ་བཅིག་བལྟས་དུས་དེ་ཁོ་རང་གི་སྒོར་མོ་ཡིན་པ་རང་ངོ་འཕྲོད་པས་ཁོས་ཞའོ་ཐུང་ལ་སྒོར་མོ་བརྐུས་པའི་ཉེས་མིང་གཡོགས་ཏེ་ལས་ཀ་ནས་ཕྱིར་འཕུད་བཏང། རྗེས་ནས་ཉེན་རྟོགས་པས་བརྟག་དཔྱད་བྱས་པ་ལྟར་ན་སྒོར་མོ་རྐུ་མཁན་ཞའོ་ཐུང་མིན་པར་བྱིས་པ་དེ་རེད་འདུག

བྱིས་པ་དེས་སྒོར་མོ་དེ་བརྐུས་པ་ཡིན་པའང་ཞའོ་ཐུང་གིས་ཤེས་མེད། དེ་ལ་མཚོན་ན་སྦྱིན་བདག་ཁོ་རང་གི་མིག་གིས་མཐོང་བ་མ་ཟད། སྒོར་མོ་དེ་ཁོ་རང་གི་སྒོར་མོའང་ཡིན་པ་རང་ངོ་འཕྲོད་མོད། བསམ་ཡུལ་ལས་འདས་པ་ཞིག་ལ་མཇུག་འབྲས་ནི་དེ་ལྟ་བུ་ཞིག་རེད། ཡང་གློག་བརྙན་གཞན་ཞིག་ནས་ལོའུ་ཧྥུན་ཟེར་བ་ཞིག་གི་ཆུང་མ་ལ་མི་ཞིག་གིས་གྲི་བཙུགས་ནས་བསད་འདུག་ལོའུ་ཧྥུན་ནང་ལ་ཐོན་དུས་ཆུང་མ་གྲིས་བསྣུན་ནས་བསད་འདུག་པ་མཐོང་འཕྲལ་ཁོས་མྱུར་ཏུ་ཆུང་མའི་སྙིང་ཁའི་གྲི་ཕྱིར་ལེན་སྐབས་ཏག་ཏག་ཆུང་མའི་མིང་བོ་སླེབས་པས་ཁོས་ལོའུ་ཧྥུན་གྱིས་རང་གི་ཨ་ཅེ་བསད་སོང་། ངས་མིག་གིས་དངོས་སུ་མཐོང་བྱུང་ཞེས་གནམ་རྒན་མ་དབང་ལ་བཞག་ནས་བཤད། དོན་རྐྱེན་དེར་ཉེན་རྟོགས་པས་བརྟག་དཔྱད་བྱས་པ་ལྟར་ན་ཆུང་མ་གསོད་མཁན་ནི་ཆུང་མའི་ཕ་ཡར་རེད་འདུག

རྒྱུ་མཚན་ནི་ལོའུ་ཧྥུན་ལ་སྒོར་མོ་མང་བས་ཕ་ཡར་གྱིས་ལོའུ་ཧྥུན་གྱི་ལག་ནས་སྒོར་མོ་ཕོན་ཆེན་ཞིག་ལེན་འདོད་པས་རེད། དེ་ལྟར་རང་གི་མིག་གིས་མཐོང་ཞིང་རྣ་བས་ཐོས་ལ་ལག་པས་རེག་པ་སོགས་བྱས་པའི་དངོས་མྱོང་གི་ཁྲོད་ནའང་དེ་ལྟར་བསམ་ཡུལ་ལས་འདས་པ་མང་བོ་ཡོད་པས་དོན་དག་འདི་ལྟ་བུ་གཅིག་ཆོད་ཀྱིས་ཐག་གཅོད་དཀའ་རྒྱུ་རེད། དེའི་རྐྱེན་གྱིས་དགའ་སྡང་གཉིས་ཀྱི་ཕྱོགས་ནས་བསྟུན་རྐྱང་དང་སྡང་རྐྱང་མིན་པ་འདྲ། དོན་དག་འདི་རིགས་ཐག་གཅོད་སྔ་ན་གྲོགས་དང་གྲོགས་མོ་མང་བོ་ཞིག་ལ་ཕོག་ཐུག་བཟོ་སྲིད་ལ་དོན་དག་མེད་སའི་དོནདག་ཀྱང་བཟོ་སྲིད་པ་མ་ཟད། རང་གཞན་མང་བོ་ཞིག་སྡུག་ལ་སྦྱོར་རྒྱུའི་ཉེན་ཁའང་ཡོད།