མི་ཉག་གི་ལོ་རྒྱུས་ཚིགས་སུ་བཅད་པ་མི་ཉག་གངས་དཀར་རི་བོའི་རང་མདངས།

མི་ཉག་སྐལ་བཟང་།
 
སེ་རྨུ་ལྡོང་སྟོང་རུས་ཆེན་བཞི།།
ནང་གསེས་སྡེ་ཚན་ལྡོང་གི་རྒྱུད།།
རྒྱ་བོད་ཧོར་ཀྱི་ས་མཚམས་སུ།།
མི་ཉག་ཅེས་པ་བྱུང་བ་གྲགས།།

མི་ཉག་མིང་གི་རྣམ་གྲངས་སུ།།
ལྡོང་དང་ལྡོང་པ་ལྡོང་བྱང་ངོ་།།
རྒྱ་བོད་གང་གིས་བཤད་ཀྱང་རུང་།།
བོད་རིགས་ཡིན་པར་ཐེ་ཚོམ་མེད།།

ལོ་རྒྱུས་ངག་རྒྱུན་གཉིས་ཀའི་ནང་།།
མི་ཉག་ཆགས་ས་ལྟེ་བ་དེ།།
མཚོ་སྔོན་ཀན་སུའི་ཤར་ཀྱི་ངོས།།
སི་ཁྲོན་བྱང་ཤར་མཚམས་སུ་ངེས།།

དག་པའི་སྒྲ་གདངས་མ་བཀླགས་པར།།
མ་དག་རྒྱུན་འབྱམས་གྱུར་བ་ཡིས།།
མེ་ཉག་མི་གཉགས་མི་ནག་སོགས།།
མིང་དུ་གྲགས་ཀྱང་ནོར་བ་ཡིན།།

མི་འབོར་ཧ་ཅང་མང་བའི་ཁར།།
རྩྭ་དང་རྩི་ཤིང་ནགས་ཚལ་སོགས།།
རྒྱང་ནས་བལྟས་ཀྱང་མི་འདྲ་ཞིང་།།
མི་ཉག་ཅེས་པ་མིང་དུ་བཏགས།།

བོད་ཀྱི་བཙན་པོ་བྱུང་རབས་ལས།།
གནམ་གྱི་ཁྲི་བདུན་བྱུང་བའི་སྐབས།།
དེ་དང་དེ་འདྲའི་དུས་སྐབས་སུ།།
མི་ཉག་མཁས་པ་དགུ་བྱུང་ཞིང་།།

སྲོང་བཙན་སྒམ་པོས་ཐུགས་སྟོབས་ཀྱིས།།
བོད་ཁམས་གཅིག་གྱུར་གནས་པའི་སྐབས།།
མི་ཉག་ཡོང་བཟའ་རྒྱལ་མོ་བཙུན།།
ཁབ་དུ་བཞེས་པ་ཡོངས་སུ་གྲགས།།

བོད་རྒྱལ་སྲོང་བཙན་སྒམ་པོ་ལ།།
མེད་ཐབས་མེད་པ་བློན་པོ་ཡིན།།
བློན་པོ་མགར་གྱི་བརྒྱུད་པ་ཡང་།།
མི་ཉག་ཡིན་པའི་བཤད་སྲོལ་ཡོད།།

བཙན་པོ་གླང་དར་བཀྲོངས་པའི་རྗེས།།
རྒྱལ་པོའི་གདུང་རྒྱུད་རྫོགས་པ་དང་།།
བོད་ཁམས་སིལ་བུར་འཐོར་བའི་དུས།།
མི་ཉག་པ་རྣམས་ཕྱོགས་གཅིག་འདུས།།

མི་ལོ་བཞི་བརྒྱ་བཅུ་གཅིག་ཙམ།།
སིལ་བུར་འཐོར་བའི་དུས་རབས་དེར།།
མི་ཉག་ཅེས་པའི་གྲགས་པ་འདི།།
རྒྱ་བོར་ཧོར་གསུམ་ཡུལ་དུ་གྲགས།།

ཚོ་ཁག་རེ་ལ་དཔོན་པོ་རེ།།
རྒྱལ་ཕྲན་རེ་ལ་རྒྱལ་པོ་རེ།།
རང་ས་རང་གིས་བཟུང་བའི་དུས།།
མི་ཉག་སྟོབས་འབྱོར་རྒྱས་པར་གྱུར།།

བསྟན་པའི་མེ་རོ་གསོས་བའི་ཕྱིར།།
དཀའ་བ་བརྒྱ་ཕྲག་སྤྱད་མྱོང་བའི།།
མི་ཉག་རྩ་མི་སངས་རྒྱས་སོགས།།
མཁས་གྲུབ་དུ་མ་བྱུང་བ་ཡིན།།

ཇིང་གི་རྒྱལ་པོའི་སྟོབས་ཤུགས་ཀྱིས།།
འཛམ་གླིང་སུམ་གཉིས་དབང་བསྒྱུར་ཞིང་།།
དུས་སྐབས་དེ་དང་སྟབས་བསྟུན་ནས།།
མི་ཉག་ཡུལ་ལ་དམག་དྲངས་ཤིང་། །

སྟོབས་འབྱོར་གཅིག་ལས་གཅིག་ཆེ་བའི།།
ཆེན་པོ་ཧོར་དང་མི་ཉག་གཉིས།།
དམག་འཁྲུག་ལངས་པའི་མཐའ་འབྲས་སུ།།
མི་ཉག་རེ་ཞིག་ཕམ་པར་གྱུར།།

འགའ་རེ་རང་སར་བསྡད་པ་དང་།།
འགའ་རེ་རྒྱ་དང་འཐིམ་པར་བཤད།།
འགའ་རེ་ལྷ་སར་བྲོས་ཕྱིན་ཏེ།།
མི་ཉག་པ་ཚོ་ཕྱོགས་བཞིར་འཐོར།།

འགའ་རེ་ཁམས་ཕྱོགས་བྲོས་བ་ཚོས།།
སི་ཧུ་རོང་ལ་རྒྱལ་ས་བཟུང་།།
སི་ཧུ་ག་ཇུ་འབོད་པ་དེ།།
མི་ཉག་རྒྱལ་པོ་དང་པོ་བྱུང་།།

མི་ཉག་རྒྱལ་རབས་དགུ་བྱུང་སྟེ།།
རྒྱལ་ས་ལན་མང་སྤོ་མྱོང་ཞིང་།།
རྒྱལ་ས་རྒྱལ་པོ་བྱུང་ཡོད་ཀྱང་།།
རྒྱལ་ཁབ་ཡིན་མིན་ངས་མི་ཤེས།།

སྡེ་དགེ་རྒྱལ་པོ་བྱུང་བ་དང་།།
ནག་ཆེན་རྒྱལ་པོ་བྱུང་བ་སོགས།།
རྒྱལ་ཁབ་ཡིན་མིན་མི་ཤེས་བཞིན།།
མི་ཉག་ལ་ཡང་དེ་བཞིན་ནོ།།

ཡི་གེའི་རྩ་བ་སྐད་ཡིན་ཏེ།།
སྐད་ལ་བརྟེན་ནས་ཡི་གེ་བྱུང་།།
མི་ཉག་སྐད་ཅིག་ཡོད་མོད་ཀྱང་།།
ཡི་གེ་ཡོད་པ་ངས་མི་ཤེས།།

རྒྱལ་མོ་རོང་དང་ཚ་བ་རོང་།།
ཀོང་པོའི་ཡུལ་དང་བྲག་མགོ་སོགས།།
ལོག་སྐད་ཡོད་ལ་ཡི་གེ་མེད།།
མི་ཉག་ལ་ཡང་དེ་བཞིན་རེད།།

ཡིག་རྙིང་འགའ་དང་པར་རིས་འགར།།
མི་ཉག་ཡི་གེ་འདི་རེད་ཅེས།།
ལན་མང་མིག་ལ་མཐོང་བའི་རྗེས།།
རྒྱ་ཡིག་ཡིན་པ་ངས་རྟོགས་སོ།།

མི་ཉག་ཡུལ་དུ་འཚར་བ་ཡིན།།
བློ་ལྡན་བློ་གསར་གཞོན་ནུ་ཚོར།།
ལེགས་གསར་པ་མིན་ན་ཡང་།།
དྲན་གསོ་བསྐུལ་བའི་ཚུལ་དུ་ཕུལ།།