༄༅།།ཁོ་བོས་བྱང་གི་ཕྱོགས་ནས་གཙོ་བོའི་བུ།།ཁོ་བོས་ས་མཐའ་བསྐོར་པས་མི་མཐོང་མྱོང༌།།རྣ་གཏམ་མང་དུ་ཐོས་པས་བཤད་པ་ཚ།།ཡིན་མིན་མགོ་ལྟག་ཕྱེད་པས་གྲུང་བོར་གྲགས།།གནས་དང་ཕྱོགས་རྣམས་གང་དུ་འགྲོ་ཡང་རུང༌།།གཞི་དང་གནས་མལ་གང་དུ་བྱེད་ཀྱང་རུང༌།།གྲོགས་དང་འགྲོགས་ལུགས་སུ་ལ་འཚོལ་ཡང་རུང༌།།གཞན་དང་བསྟུན་པ་མི་ཆོས་རྩ་བ་ཡིན།།དེ་ཡི་སྟེང་ནས་འདུན་མ་བཤད་ཀྱི་ ཉོན།།བྱ་བྱེད་ཡོངས་ཀྱི་མགོ་ལྟག་ཕྱེ་ཡི་ཉོན།།ལྷ་ཞི་གླུ་ཞིའི་གདམས་པ་བཤད་ཀྱི་ཉོན།།ཆོས་ལ་མི་ཆོས་ཟབ་པ་འདི་ལྟར་ལེགས།།སུ་ཡི་དོན་དུ་དཀའ་སྤྱད་བྱེད་ན་ཡང༌།།བྱ་ཤེས་ཀོ་ལོང་སྡུག་ཡུས་ཆུང་བར་མཛོད།།ལས་དང་བྱ་བ་ཇི་ལྟར་བྱེད་ན་ཡང༌།།མཛད་སྤྱོད་ཐབས་ཅད་མི་དང་མཐུན་པར་མཛོད།།རང་ལ་ཡོན་ཏན་ཇི་ཙམ་ཡོད་ན་ཡང༌།།གཞན་ལ་ཁྱད་གསོད་བརྙས་པ་ཆུང་བར་མཛོད།།རང་ཉིད་ནོར་ལ ་ཆགས་ཞེན་ཆེ་ན་ཡང༌།།གཞན་གྱི་ནོར་ལ་ཧབ་ཤ་ཆུང་བར་མཛོད།།རང་ཉིད་ལས་ཐབས་འདུན་མ་མཁས་ན་ཡང༌།།སྤྱི་ཡི་ཁྲིམས་ལ་ས་ཆོད་ཆུང་བར་མཛོད།།རང་ཉིད་བསགས་པའི་ནོར་རྫས་ཡིན་ན་ཡང༌།།མང་པོའི་གསེབ་ཏུ་ལྐོག་ནོར་ཆུང་བར་མཛོད།།རང་ཉིད་ཀུན་གྱིས་ཚད་མར་ཁུར་ན་ཡང༌།།ངའོ་སྙམ་པའི་ང་རྒྱལ་ཆུང་བར་མཛོད།།རང་ཉིད་ཀུན་ལས་ཁྱད་པར་འཕགས་ན་ཡང༌།།ཆེ་བའི་ང་རྒྱལ་ཅུང་ཟད་མེད་པར་མཛོད། །རང་ཉིད་དགེ་བའི་བཤེས་སུ་གསོལ་ན་ཡང༌།།མཁས་དམན་ཀུན་ལ་བརྙས་པ་ཆུང་བར་མཛོད།།རང་གི་གོང་ན་ཆེ་བ་གཞན་མེད་ཀྱང༌།།འོག་ཏུ་ཞུགས་ལ་འཇུག་པ་བདེ་བར་མཛོད།།གཞན་གྱི་ཚོགས་དཔོན་ཇི་ལྟར་ངན་ན་ཡང༌།།གུས་པའི་ཚུལ་གྱིས་ཕྱག་དང་ཕྱག་ལན་མཛོད།།རང་དང་མཉམ་པའི་གང་ཟག་སུ་བྱུང་ཡང༌།།མགོ་ཡང་མཐོ་བའི་བཀུར་སྟི་གུས་པར་མཛོད།།མཛེ་སྤྲང་ལ་སོགས་སུ་ཡིས་ཆོས་ཞུས་ཀྱང༌།།ཀུན་གྱི་ དབུས་སུ་གདམས་ངག་ལྷུག་པར་སྟོན།།གལ་ཏེ་མཐོ་འཚམས་ཁ་ཚོད་ལྟ་ན་ཡང༌།།ཧ་ཅང་ཕུལ་དུ་ཕྱིན་པས་ལྷག་པར་སྟོན།།ཚོགས་དང་བསྙེན་བཀུར་སོགས་ཀྱིས་མཆོད་འོས་ཀྱང༌།།དེ་ལ་མ་ལྟ་ཀུན་ལ་ཐང་མོ་རྡོལ།།ངེས་པར་གང་ལ་གསང་བར་འོས་པ་རྣམས།།ལྐུགས་པའི་ཚུལ་གྱིས་ཁ་རོག་དབེན་སར་བཞུགས།།དེ་ཡང་རགས་པ་སྤྱི་ཡི་རྣམ་གཞག་ཡིན།།ད་དུང་སྙིང་གཏམ་ལགས་པས་གསན་མཛོད་དང༌།།འགྲོགས་ལུགས་དགྲ་ ལ་འཚོལ་དང་ཟབ་པ་ཡིན།།སྙིང་གཏམ་བུ་ལ་གསོང་དང་བརྟན་པ་ཡིན།།ཁ་འདོན་གྲེ་བར་བསྐྱིལ་དང་བཙུན་པ་ཡིན།།མཚང་གཏམ་བར་དུ་གསོང་དང་མཁས་པ་ཡིན།།གཞན་མཚང་ལྷོད་ལ་ཞོག་དང་དགེ་བ་ཡིན།།བློ་གཏད་སྙིང་གིས་སྐྱོང་དང་ངོ་མཚར་ཆེ།།སྙིང་གཏམ་ལགས་པས་ད་དུང་གསན་མཛོད་དང༌།།འཕྲད་མ་ཐག་ཏུ་སྙིང་གཏམ་འཆད་པ་མཚང༌།།མ་བརྟག༼བརྟགས ༽པ་ལ་བློ་གཏད་བྱེད་པ་མཚང༌།།བརྟགས་ནས་འཁྲུལ་ན་ད་རུང་བྱེད་པ་མཚང༌།།བག་མེད་མི་ལ་བྱ་བྱེད་འཚོལ་བ་མཚང༌།།ཤ་མི་ཚ་ལ་ཕུག་བསྲེ་ཆོལ་བ་མཚང༌།།དད་པ་མེད་ལ་སློབ་མར་བསྟེན་པ་མཚང༌།།སྙིང་རྗེ་མེད་ལ་བླ་མར་ཁུར་བ་མཚང༌།།ཁྲེལ་གཞུང་མེད་ལ་གྲོགས་པོར་བསྟེན་པ་མཚང༌།།མི་ཉན་པ་ལ་ཁ་ཏ་བྱེད་པ་མཚང༌།།མི་ཤེས་པ་ལ་གྲོས་ཕུགས་འདྲི་བ་མཚང༌།།མཚང་དུ་ཤེས་ནས་ད་རུང་མི་འདོར་ ན།།རང་ཉིད་སྨྱོན་པ་ཡིན་པར་ཤེས་པར་བྱ།།སྙིང་གཏམ་ལགས་པས་ད་དུང་གསན་མཛོད་དང༌།།བཟའ་བཏུང་ཟ་དུས་ཐམས་ཅད་བཀའ་སློབ་བདེ།།ཞག་གསུམ་འགྲོགས་ནས་རང་མཚང་སྟོན་པ་མང༌།།ཉེ་རིང་ཡོངས་ལ་ལོ་གཅིག་མ་བརྟེན་པར།།བྱ་བྱེད་བཅོལ་ན་མྱུར་དུ་ནོངས་པར་འགྱུར།།རང་ལ་བརྟེན་པའི་མཚང་གཏམ་ངན་པ་ཡིན།།གཅིག་གི་སེམས་ལ་ཤར་ན་གཏོར་འགོང་ཡིན།།གཏམ་དེ་གཉིས་ལ་གྲགས་ན་ཕུང་བྱེད་ཡིན།།གས ུམ་ལ་གྲགས་ན་གཏམ་ངན་རླུང་ཁྱེར་ཡིན།།མི་མངོན་དབྱིངས་སུ་ཡལ་ན་མཁས་པ་ཡིན།།ངག་མཚང་་ཐབས་ཀྱིས་ཤེས་ན་གད་མོ་འཆོར།།དགོས་པ་རང་གིས་བསུས་ན་བདུད་རིགས་དགའ།།ཕུང་བྱེད་གྲོགས་སུ་བསྒྱུར་ན་མཚང་རེ་ཆེ།།སྙིང་གཏམ་ལགས་པས་ད་དུང་གསན་མཛོད་དང༌།།ཟས་ལ་ཞེན་པ་མ་ཆེ་མི་ལ་བྱིན།།ནོར་ལ་སེར་སྣ་མ་ཆེ་ཆོས་ལ་མཆོད།།བཞིན་ལ་འགྱུར་ལྡོག་མ་མང་འཛུམ་གྱིས་བསུས།།དགྲ་ཟུན་བཤའ་ར ལ་མ་མང་སྤྱི་སྙོམས་སྟེན།།འཁོར་ལ་བསྟོད་ར་མ་མང་བློ་ཁོག་སྡོམས།།མྱུར་དུ་སྨད་ར་མ་མང་ཐབས་ཀྱིས་སྤོང༌།།སུ་ལ་ཁས་ལེན་མ་མང་ལག་ལེན་སྐྱོངས།།གང་ལའང་ཉེས་ཁ་མ་འདིངས་གྲོས་ཁ་སྐྱེད།།ཉེས་ན་འགྱོད་ཐལ་མ་བྱེད་ཕྱིས་འབྱུང་སྡོམས།།སྙིང་གཏམ་ལགས་པས་ད་དུང་གསན་མཛོད་དང༌།།སྡུག་ཁ་དགྲ་ཡི་གཡབ་མོ་ལེགས་པར་ཆོད།།བྱ་མང་བྱུར་གྱི་སྣ་འདྲེན་ལེགས་པར་ཆོད།།བློ་མང་འདུན་མའ ི་དཀྲུག་ཤིང་ལེགས་པར་ཆོད།།གཤིས་ངན་དགྲ་བོའི་ཚོགས་པ་ལེགས་པར་ཆོད།།རྣམ་རྟོག་སྡུག་འདྲེའི་ཕོ་ཁྲོམ་ལེགས་པར་ཆོད།།འཁོར་ངན་གཏམ་གྱི་གཞི་མ་ལེགས་པར་ཆོད།།གྲོགས་ངན་འགྱོད་པའི་རྩ་བ་ལེགས་པར་ཆོད།།ཡུལ་ངན་སྡུག་གི་འཁོར་བ་ལེགས་པར་ཆོད།།མི་ཆོས་རྐང་བའི་ཐི་གུ་ལེགས་པར་ཆོད།།སྙིང་གཏམ་ལགས་པས་ད་དུང་གསན་མཛོད་དང༌།།དུས་ངན་སྙིགས་མ་ལྔ་རུ་བདོ་བའི་དུས།།ཆོས་པ་ཡ ོངས་ཀྱི་བགེགས་འདྲེ་ཆགས་སྡང་གནོད།།གང་དུ་ཕྱིན་ཀྱང་ཆགས་སྡང་ཆུང་བར་མཛོད།།ཇི་ལྟར་བགྱིས་ཀྱང་དམན་ཆ་བླང་བར་འཚལ།།ཐག་རིང་བལ་བོའི་ཐང་ནི་ཚད་པ་ཆེ།།ཁ་སྐོམ་བཏུང་བའི་ཚོགས་ལ་གཟབ་པར་འཚལ།།ལ་སྟོད་ལྷོ་ཡི་ཕྱོགས་ནི་དགྲ་འཇིགས་ཆེ།།ཞེ་སྡང་ངན་སྔགས་ཚོགས་ལ་གཟབ་པར་འཚལ།།ཉང་ཤབ་བྱང་གི་ཕྱོགས་ནི་སྨྲེ་མཆུ་མང༌།།ལོང་གཏམ་ཚིག་གི་ཚོགས་ལ་གཟབ་པར་འཚལ།།པུར་རྒྱལ་བོད ་ཀྱི་ཡུལ་ནི་ཁྲེལ་གཞུང་ངན།།ཡིད་འབྱུང་ཁོང་ཁྲོའི་ཚོགས་ལ་གཟབ་པར་འཚལ།།དེང་དུས་སྐྱེ་བོའི་ཚོགས་ནི་གསར་འགྲོགས་ཆེ།།བསླུ་བྲིད་འཁོར་གྱི་ཚོགས་ལ་གཟབ་པར་འཚལ།།སྙིང་གཏམ་ལགས་པས་ད་དུང་གསན་མཛོད་དང༌།།ཡི་དམ་ལྷ་ལ་རེ་ལྟོས་མ་ཤོར་བར།།དུང་ངན་མི་ལ་རེ་ལྟོས་ཆུང་བར་མཛོད།།འགྲོགས་པའི་མི་ལ་ཁྲེལ་གཞུང་མ་ཆུང་བར།།ལེགས་ཉེས་གང་ལ་བཤད་གཞུང་ཉུང་བར་མཛོད།།དཀར་པོ་ཆ ོས་ལ་ཕྱི་བཤོལ་མ་འདིངས་པར།།དམ་པའི་ཆོས་ལ་སྦྱོར་བ་ཐོབ་པར་མཛོད།།འདུན་མ་ཡོངས་ལ་སྐྱིད་འདོད་མ་ཆེ་བར།།བླ་མའི་ཕྱོགས་སུ་སྒོམ་གསུམ་གུས་པ་མཛོད།།མདོར་ན་མཐོ་བ་ཐམས་ཅད་ཞྭ་བཞིན་ཁུར།།དམའ་བ་རལ་གྲིའི་སོ་བཞིན་ཀུན་ནས་སྐྱོངས།།མཉམ་པ་རྨོས་དོར་བཞིན་དུ་དགའ་བར་འགྲོགས།།བྱ་བ་གང་ལའང་རང་འདོད་ཆུང་བར་མཛོད།།འདུན་མ་ཡོངས་ལ་སྤྱི་སྙོམས་ཆེ་བར་མཛོད།།འདི་ལྟར་ཁྱོ ད་ལ་བསླབ་བྱ་གདམས་པ་འདི།།བྱིའུ་སྒོ་ངའི་འདུ་ཤེས་མ་ཤོར་བར།།ལེགས་བཤད་འདི་དག་ལ་ཉྩའི་ཡི་གེར་བཀོད།།དབེན་པའི་གནས་སུ་ལྟད་མོ་ཆེ་བར་ལྟོས།།ཡུན་དུ་བསྲིངས་ན་ཤིན་ཏུ་འཕྲོད་པར་གདའ།།འདི་ནས་བཟུང་སྟེ་སྐྱེ་བ་ཐམས་ཅད་དུ།།འཕྲིན་ལས་མཉམ་དུ་འགྲོ་བ་འདྲེན་བྱེད་ཅིང།།ཀུན་ཏུ་བཟང་བོའི་སྨོན་ལམ་ཇི་ལྟ་བ།།དགའ་བའི་སྨོན་ལམ་གཅིག་ཏུ་གདབ་པར་བགྱི།།ཞེས་འབྲོམ་སྟོན་ པ་རྒྱལ་བའི་འབྱུང་གནས་ཀྱིས་གསུངས་སོ།།།།
གཉན་གཡག་ཕྲུག་གིས་འོས་སྦྱོར་བྱས།
སྒུར་དང་མ་སྒུར་དམ་པའི་ཆོས་ལ་སྒུར།།
གྲྭ་བ་ཇོ་མོ་སྟོང་བ་སྟོད་སྒུར་རེད།
སྤང་དང་མ་སྤང་འཇིག་རྟེན་འཁོར་བ་སྤངས།།
མི་སྤང་བླ་དགེ་ཚང་མ་མཛོད་བདག་རེད།
གསང་དང་མ་གསང་ཆོས་སྡོམ་ཤོར་བ་གསང་།།
འདི་ཕྱི་གཉིས་ལ་མི་སྐྲག་རྐྱང་རྐྱང་རེད།
མི་ཆོས་འདི་ལ་གོ་བ་བླངས་བླངས་ནས།།
ཀུར་བར་འདོད་ན་སྤྱོད་པ་ཀན་མོ་རེད།
སྨད་ལ་འདོད་ན་བསླབ་བྱ་འདི་མོ་རེད།
མི་རྐྱང་འགྲོ་ས་འཕག་ས་མེད་ས་རེད།
ཨོཾ་ཨཱ་ཧཱོུཾ། དེ་རང་ཁ་བླས་སོང་།
མི་ཆོས་གནད་ཀྱི་འཕྲེང་བ་འདི། །
པུར་རྒྱལ་བོད་ཀྱི་མི་རྣམས་ལ། །
བསླབ་བྱ་སྟོང་གི་ཉིང་བཅུད་དང་། །
ལག་ལེན་བརྒྱ་ཡི་རྩ་བར་ཐུག །