འབའ་སྲས། ༼སྔོན་མའི་འཕྲོས།༽
༼རྒྱ་གར་གྱི་བུ་མོ་མཱུ་ངྷ་དང་ཁྱི་ཡི་གཉེན་སྒྲིག་ལ་སྦྱར་བའི་གཏམ་རྒྱུད་འཇིག་རྟེན་སྐྱེ་བོ་ཀུན་མཚར་ཞེས་བྱ་བ།༽
ཡབ་གང་རྣ་བ་མཛེས་བྱེད་དུ།།
གཏམ་གྱི་མེ་ཏོག་ཨུཏྤལ་ཕྲེང་།།
བཞད་པས་རྒན་རབས་མེས་པོ་ཚོའི།།
རྣ་བ་དག་ཀྱང་མཛེས་པར་བྱས།།
འོན་ཀྱང་བུ་མོ་མཱུ་ངྷའི་ལས་དབང་ཆུ།།
དུག་དང་བ་ཚས་རྙོག་པར་གྱུར་བ་ཡིས།།
མི་དབང་ལྷ་དཀར་དགའ་བའི་ཞིང་ས་རུ།།
འདྲེན་པར་མི་རིགས་ཡབ་དང་མེས་པོས་གླེང་།།
གང་དུ་མཚན་མ་ངན་པའི་རྟགས་མཆིས་ན།།
དེ་ཡང་བཟློག་པའི་ཐབས་ཀྱང་མང་བ་སྟེ།།
མངོན་ཤེས་ལྡན་པའི་དྲང་སྲོང་དག་ལ་ནི།།
ལུང་བསྟན་ཞུ་འོས་ཕ་མ་གཉིས་ཀ་མཐུན།།
གྲོང་གསེབ་དེ་ལས་རྒྱང་ཐག་མི་རིང་བར།།
ཏིང་འཛིན་བསྟི་གནས་ཞེས་པར་འབོད་པ་ཡི།།
ནགས་ཚལ་སྟུག་པོ་དེ་ཡི་དགའ་ཚལ་དུ།།
གནས་བཅོས་དྲང་སྲོང་ཆེན་མོའི་ཚོགས་ལ་དྲིས།།
ལས་ཀྱི་མེ་ལོང་གཟིགས་པའི་དྲང་སྲོང་ཚོས།།
མཱུ་ངྷའི་ལག་རིས་འཁྱོག་པའི་མཚན་མ་ལས།།
དང་བོར་ཁྱི་ཞིག་གཉེན་དུ་སྦྲེལ་བའི་རྗེས།།
སྐྱེ་བོ་སུ་ཡི་བདག་མོར་གྱུར་ལ་རུང་།།
འདི་ལྟར་བགྱིས་པས་བར་ཆད་བཟློག་པ་དང་།།
དཀར་ཕྱོགས་དགེ་བའི་ལེགས་ཚོགས་འཕེལ་འགྱུར་ལ།།
ཚེ་དང་བསོད་ནམས་སྟོབས་ཀྱང་སྨིན་པ་ཡིས།།
འདི་ཕྱི་ཀུན་ཏུ་བཀྲ་ཤིས་འབྱུང་ཞེས་གསུངས།།
ཀྱེ་ཧུད་མཱུ་ངྷའི་ལས་ཀྱི་སྨྱུག་མའི་ཤིང་།།
མུ་སྟེགས་དྲང་སྲོང་དག་གིས་གཞུ་རུ་བཀུགས།།
རིགས་ལས་མཐོ་བ་མི་ཡི་ལུས་རྟེན་མདའ།།
ཆེས་དམན་སྤང་ཁྱི་འབེན་ལ་འཕེན་དགོས་བྱུང་།།
གཏམ་དེ་ཐོས་པས་མཱུ་ངྷ་དང་།།
ལྷ་དཀར་རྒྱལ་བོ་ཕན་ཚུན་དུ།།
རྨི་ལམ་ནང་གི་འདོད་པ་ལས།།
མངོན་སུམ་ཐོབ་པ་ཡོད་མ་གྱུར།།
མཱུ་ངྷའི་མཚན་མ་མེ་ཏོག་གསར་བཞད་མི་ཡི་སྦྲང་མར་མ་རུང་ཡང་།།
འདོམས་ཀྱི་ཁ་སྒོ་ཤ་དམར་ཅན་དེ་སྤང་ཁྱི་དག་ལ་ཤིན་ཏུ་ཞིམ།།
དུག་དང་ལྡན་པའི་བཏུང་བ་གང་ཞིག་མི་ཡི་ཟས་སུ་རུང་མིན་མོད།།
གཙུག་ཕུད་ལྡན་པའི་རྨ་བྱ་དག་ལ་དུག་ལྡན་ཁོ་ན་ཟས་ཀྱི་མཆོག །
མཱུ་ངྷའི་ལས་དབང་ཟླ་དཀར་ནི།།
མུ་སྟེགས་དྲང་སྲོང་གཟའ་ཡིས་ཟོས།།
ལྷ་དཀར་རྒྱལ་བོར་མུན་པ་དང་།།
སྤང་ཁྱི་ཡུལ་ལ་ཉི་མས་འཁྱུད།།
གང་ཞིག་ཉིན་འགའ་འདས་པ་ན།།
མཱུ་ངྷས་འཚོལ་བའི་བདག་པོ་ནི།།
ཁྱི་ལས་མི་ལ་མེད་དོ་ཞེས།།
གཏམ་དེ་ཁྱི་རྒན་དག་གིས་ཐོས།།
ཁྱི་ཡི་གྲོང་ན་ཁྱི་ཡི་རྒྱལ་བོ་སྟེ།།
སེངྒེའི་སྣ་ཅན་སྡེར་མོ་རྣོ་བ་ཅན།།
མིག་རྩ་དམར་ཞིང་སྤུ་མདོག་སེར་བ་ཡི།།
མདོག་ལྡན་དེ་ཡིས་ཁྱི་ཡི་འཁོར་ལ་དྲིས།།
བདེན་ནོ་ཁྱི་ཡི་བསོད་ནམས་ནི།།
དལ་འབྱོར་བ་དང་མཉམ་པ་ཉིད།།
ཁྱི་ཡི་ས་སྲུང་ཁྱོད་ལ་ནི།།
མཱུ་ངྷ་ཁོ་ན་འོས་སོ་ཞུས།།
གཏམ་དེ་ཐོས་པ་འགའ་ཞིག་ལ།།
རྣ་བར་ཨུཏྤལ་ཉིད་དུ་མཛེས།།
ཅིག་ཤོས་དེ་ལས་ལྡོག་པ་སྟེ།།
སྙིང་ལ་མདུང་ཐུང་བསྣུན་པ་འདྲ།།
སྤང་ཁྱི་དག་ལ་དགའ་གྱུར་དེས།།
ཁྱི་མོའི་ཚོགས་ལ་མྱ་ངན་བྱིན།།
ལྷན་ཅིག་རྒྱལ་བོ་ལྷ་དཀར་དང་།།
བུ་མོ་མཱུ་ངྷ་གདུང་བས་བཅོམ།།
༼མུ་འགོད།༽
སྙན་ངག་གསུང་གི་གསུང་གི་འཕུར་ཐལ། ད་ཡིན་ན། གཅིག་ལ་མི་གོ་འི། རྒན་ཕེབས་ཨ།
ད་ཡང་འབའ་སྲས་ཟེར་བ་འདིས་རྫོབ་རྟགས་བསྟན་འདུག
ད་རང་མདོག་བསྟན་འོང་གི་འདུག
ད་སྲོལ་རྒྱུན་གྱི་ལད་མོ་མ་བྱས་ན་ལེགས་པོ་འདུག སྙན་ངག་ཆ་གེ་ཆག་གེ་དེ་འདྲ་བྲིས་ན་ལན་པོ་འདུག
མ་གཞི་ནས།
སྙན་ངག་ཀློག་ཡ་ལ་ཤེས་ཚད་དང་བསམ་བློ། མཐོང་རྒྱ་དགོས་ཀྱི་རེད། དེ་རིགས་མེད་མཁན་ཚོར་སྐད་ཤོར་གྱི་རེད། དེ་ནི་འཇིག་རྟེན་གྱི་ཆོས་ཉིད་ཅིག་རེད། མཁྱེན་སོང་ངམ།