མར་པ་དང་ཁོང་གི་མཛའ་མོ།

དེད་དཔོན་གྱི་བུ་མོ་སྔོ་བསང་མ། །
མཚན་ལྡན་གྱི་ཕྱག་རྒྱར་བསྟེན་བསྟེན་ནས། །
འབྲལ་མི་ཕོད་པ་ལ་དེ་གཅིག་བྱུང་། །

—མར་པའི་མགུར།

ཀླུ་སྨྱོན།

ཉིན་དེར་དཔལ་མེ་ཏོག་མདངས་ཅན་གྱི་དགོན་པའི་ཁོར་ཡུག་ཧ་ཅང་ལྷིངས་འཇགས་སུ་གནས་ཡོད། རྒྱང་རིང་གི་ཡུལ་ལྗོངས་སྨུག་ཤིག་གེར་ཡོད་ལ། ཉེ་འགྲམ་གྱི་ཞིང་ཁའི་ནང་དུ་བུད་མེད་ཚོས་འབྲས་ཀྱི་སོན་རྩ་འདེབ་བཞིན་འདུག པཎ་ཆེན་ནྰ་རོ་པས་ཉེ་ཆར་ཁོང་གི་ཕྱག་རྒྱ་མས་བསྙལ་བའི་འབྲས་ཆང་ཞིམ་པོ་དེ་ལས་ཕོར་བ་གང་ཞབས་བཏགས་བསྐྱོན་ཚར་ཏེ་ཉིན་གུང་གི་གཟིམ་མལ་བསྟེན་པར་བྱོན་ཟིན། གཙུག་ལག་ཁང་གི་ནང་དུ་ཁོང་གི་སློབ་བུ་རེ་ཟུང་གིས་སྒོམ་གྱི་ཏིང་ངེ་འཛིན་སྟེན་བཞིན་ཡོད་ལ། དཔེ་མཛོད་ཁང་ཆུང་ཆུང་དེའི་ནང་དུ་རྗེ་མར་པ་སོགས་བོད་ནས་བསླེབས་པའི་ལོ་ཙྰ་པ་སྐོར་ཞིག་གིས་ལེགས་སྦྱར་གྱི་དཔེ་ཆ་སྐོར་ཞིག་བོད་ཡིག་ཏུ་ཇི་ལྟར་སྒྱུར་བའི་སྐོར་ལ་གྲོས་བསྡུར་བྱེད་བཞིན་ཡོད།

ཙིར་ཞེས་སྒོ་ཕྱེས་པའི་སྒྲ་ཞིག་དང་ལྷན་དུ་བུ་མོ་ལོ་ཉི་ཤུར་སོན་ཙམ་པ་ཤ་རྩ་ཅུང་སྔོ་བསང་དང་བཞིན་རས་ཤིན་ཏུ་མཛེས་པ་ཞིག་གིས་ཞོ་དང་འབྲས་ལྡ་ལི་སོགས་ཁྱེར་ཡོང་ནས་མར་པ་སོགས་ལ་དྲངས་སོང་། བཞེས་ལག་ཟིན་པའི་རྗེས་སུ་མར་པས་བུ་མོ་དེར། ངའི་ཉལ་ཁང་ཕེབས་དང་ང་ལ་སྐད་ཆ་ཞིག་ཡོད། ཅེས་གསུངས་རྗེས། བུ་མོ་དེའི་ལྡེམ་ལྡེམ་ཁྱུག་ཁྱུག་གི་གོམ་སྟབས་དང་མཉམ་དུ་ཁོང་གི་གཟིམ་ཤག་ཏུ་ཕེབས་སོང་། ་་་ ་་་
རྗེ་མར་པས་པཎ་ཆེན་ནྰ་རོ་བའི་དྲུང་ནས་གདམས་པ་དཔག་ཏུ་མེད་པ་ཞུས་ཚར་བའི་རྗེས་སུ། ནྰ་རོ་བས་ཁོང་གི་ཉམས་སད་ཀྱི་ཆེད་དུ་སྤྲུལ་པ་ཐེངས་ཤིག་བསྟན། དེ་ནི་ཚེས་བཅོ་ལྔའི་མཚན་དཀྱིལ་ཞིག་སྟེ། ཟླ་བ་དཀར་པོ་ཞིག་ནམ་མཁའི་ཨི་ཁུང་བཞིན་དཀར་ཆེམ་མེར་མཁའ་དབྱིངས་སུ་དཔྱངས་འདུག་ཅིང་། ཁྲ་ཆིལ་དགུ་ཆིལ་གྱི་སྐར་ཚོགས་ནི་དེང་སང་གི་ལྡི་ལིའི་མཚན་མོའི་གློག་སྒྲོན་དང་ཤིན་ཏུ་མཚུངས། མེ་ཏོག་མདངས་ཅན་གྱི་དགོན་པའི་གཡས་ཕྱོགས་སུ་རྒྱུགས་ཆུ་ཆུང་ཆུང་ཞིག་ཡོད་པ་དེ་ཟླ་འོད་འོག་ཏུ་ཁྲ་སིལ་སིལ་འབྲས་ཞིང་ཆེན་པོ་ཞིག་གི་དཀྱིལ་ནས་རྒྱང་རིང་དུ་བཞུར་གྱིན་མཆིས།
ནམ་རྒྱུན་མར་པ་སྐབས་རེར་ཁོང་གི་མཛའ་མོའི་་ཁྱིམ་དུ་གཟིམ་པ་ཡིན་ན་ཡང་། མི་རིང་བར་ཁོང་བོད་ལ་ཕེབས་རྒྱུ་ཡིན་པས། དེང་སྐབས་པཎ་ཆེན་ནྰ་རོ་བ་དང་ཁོང་རྣམ་གཉིས་ཀྱིས་རྟག་པར་མཚན་ཕྱེད་བར་དུ་སྒྲ་སྒྱུར་དང་དབང་ལུང་ཁྲིད་གསུམ་སོགས་ཀྱི་ཆེད་དུ་བཞུགས་པ་རེད། དོ་དགོང་ཡང་ཁོང་རྣམ་གཉིས་དཔལ་དགྱེས་པ་རྡོ་རྗེའི་སྐོར་གྱི་བཀའ་མོལ་ཞིག་ལ་དབུ་འཁོར་ནས་མཚན་ཕྱེད་བར་དུ་བཞུགས་ཤིང་། དེ་ནས་རྗེ་མར་བ་བླ་མའི་བཀའ་བཞིན་ནྰ་རོ་བའི་གཟིམ་ཁང་དུ་གཟིམས། མཚན་ཕྱེད་ཙམ་ལ། གློ་བུར་དུ་མར་པ་མར་པ། ཞེས་ནྰ་རོ་བའི་གསུང་གདངས་མཐོན་པོས་བོས་གནང་མཛད་དེ་མར་པ་གཟིམ་ལས་དཀྲོགས། ཁོང་གི་སྐུ་སྟོད་ཡར་བཀྱགས་ཏེ་གཟིགས་པ་ན། མདུན་གྱི་ནམ་མཁར་ཁོང་གི་ཡི་དམ་གྱི་ལྷ་མཆོག་དཔལ་དགྱེས་པ་རྡོ་རྗེ་ལྷ་དགུའི་དཀྱིལ་འཁོར་ཁྲ་ལམ་ལམ་མེར་བཞུགས་འདུག་ཅིང་། དཔལ་ནྰ་རོ་པ་ཡང་དཀྱིལ་འཁོར་གྱི་འཁྲིས་དེར་བཞུགས་འདུག དེར་ནྰ་རོ་པས། ངའི་སྙིང་གི་བུ་མཆོག་མར་པ་ལགས། ཁྱེད་ཀྱིས་དོ་ནུབ་ཁྱེད་ཀྱི་ཡི་དམ་གྱི་ལྷ་དཔལ་དགྱེས་པ་རྡོ་རྗེའི་དཀྱིལ་འཁོར་མངོན་སུམ་དུ་མཇལ་བ་རེད། ཁྱེད་ཀྱིས་རང་གི་བླ་མར་ཕྱག་འཚལ་ལམ་ཡི་དམ་དགྱེས་པ་རྡོ་རྗེ་ལ་ཕྱག་འཚལ། ཞེས་གསུངས་པས། མར་པའི་ཐུགས་ལ་ངས་རང་གི་བླ་མ་ཉིན་རྟག་པར་མཇལ་ཐུབ་ཀྱང་ཡི་དམ་མཇལ་བ་ད་རེས་ཙམ་ཡིན་པས། ཡི་དམ་ལ་ཕྱག་འཚལ་དགོས་དགོངས་ནས་ཕྱག་དགུ་ཕྲུགས་ཤིག་ཡི་དམ་དགྱེས་པ་རྡོ་རྗེ་ལ་བཙལ་བས། ནྰ་རོ་པས། བླ་མ་མེད་པའི་གོང་རོལ་ན།། སངས་རྒྱས་བྱ་བའི་མིང་ཡང་མེད།། བསྐལ་པ་སྟོང་གི་སངས་རྒྱས་ཀྱང་།། བླ་མ་དག་ལ་བསྟེན་ནས་བྱུང་།། གསུངས་ཏེ་སེ་གོལ་ཞིག་མཛད་པས། ཡི་དམ་དགྱེས་པ་རྡོ་རྗེའི་དཀྱིལ་འཁོར་ཡང་དཔལ་ནྰ་རོ་བའི་ཐུགས་ཀར་ཐིམ་སོང་། དེར་མར་པ་ཤིན་ཏུ་འགྱོད་ནས་རང་གི་བླ་མར་ཕྱག་མང་པོ་བཙལ་ཏེ་དགོངས་པ་མ་ཚོམས་ཞེས་ཞུས་པ་ན། ནྰ་རོ་པས། ཆོས་བརྒྱུད་ཆུ་བོའི་གཞུང་ལས་རིང་།། རིགས་བརྒྱུད་ནམ་མཁའི་མེ་ཏོག་ཡལ།། ཞེས་གསུངས་རྗེས་ཡབ་སྲས་གཉིས་རང་རང་སར་སྔར་བཞིན་གཟིམས་པ་རེད།
སང་ཉིན་ཞོགས་པའི་ཉི་ཟེར་ཤར་ཕྱོགས་ཀྱི་མཁའ་མཐའ་ནས་འཕྲོས་པ་ན་མར་པ་གཟིམ་ལས་སད་ཅིང་། མདང་དགོང་གི་དོན་དག་དེས་རྐྱེན་བྱས་ཏེ་ཁོང་སྐུ་ཁམས་ཤིན་ཏུ་མི་བདེ་བ་ཞིག་བྱུང་བ་དང་། ཉིན་མང་པོའི་རིང་ཐུགས་སྐྱོ་ནས་བཞེས་པ་མཆོད་མི་འདོད་པ་དང་སྐུ་གཟུགས་བཀྲུ་འདོད་ཀྱང་མེད་པ། ཐ་ན་རང་གི་སྙིང་ཉེ་བའི་མཛའ་མོར་ཡང་ཐུག་འཕྲད་གནང་འདོད་མེད་པ་སོགས་བྱུང་། ཉིན་ཤས་རྗེས་མར་པ་སྐུ་ཤིན་ཏུ་བསྙུུངས་པས་ནྰ་རོ་པ་དང་མར་པའི་ཆོས་གྲོགས་རྣམ་པ། ཁོང་གི་མཛའ་མོ་སོགས་ལ་ཐུགས་འཚབ་ཧ་ཅང་ཆེན་པོ་བྱུང་སྟེ་སྨན་དཔྱད་རིམ་གྲོ་སོགས་ཐབས་བརྒྱ་ཇུས་སྟོང་གིས་མར་པའི་སྐུ་གཟུགས་ཕྱིར་སོས་ཡོང་ཐབས་ལ་འབད་བརྩོན་གནང་། ཟླ་བ་རེ་ཟུང་གི་རྗེས་སུ་མར་པའི་སྐུ་གཟུགས་སྔར་བཞིན་སོས་ཤིང་ཐུགས་ཀྱང་ཇེ་བདེར་དགའ་རབ་ཕེབས་ཏེ་བོད་ལ་ཕེབ་རྒྱུའི་གྲ་སྒྲིག་གནང་། ཁོང་བོད་ལ་ཕེབས་པར་མགུར་གླུ་གྲགས་ཆེན་ཞིག་བཞེངས་ཤིང་། མགུར་གླུ་དེའི་ཁྲོད་ནས་ང་ཚོའི་ཁོང་གིས་རང་གི་བླ་མར་བཅངས་པའི་དད་གུས་དང་མཛའ་མོར་བཅངས་པའི་བརྩེ་དུང་སོགས་མཇལ་ཐུབ། རྗེ་མར་པ་བོད་དུ་ཕེབས་རྗེས་ཀྱང་རང་གི་མཛའ་མོ་དེ་ཐུགས་ནས་མ་བརྗེད་པར་རྟག་ཏུ་དྲན་གསོ་གནང་བ་དང་། སྐབས་རེར་བོད་ནས་རྒྱ་གར་ཡུལ་དབུས་སུ་བསྐྱོད་མཁན་ཚོར་རང་གི་མཛའ་མོར་བོད་ཀྱི་ཡུལ་ནས་བཟོས་པའི་གསེར་གྱི་ཚིགས་ཁེབས་དང་གཡུ་གི་དོ་ཤལ་སོགས་ལེགས་སྐྱེས་སུ་བསྐུར་གནང་བ་རེད།
ཉེ་ལམ་ཁོ་བོ་རྒྱ་གར་ཡུལ་དབུས་ཀྱི་མེ་ཏོག་མདངས་ཅན་གྱི་རི་བོའི་དགོན་པར་བོད་དགོན་གསར་བཞེངས་ཀྱི་རབ་གནས་མཛད་སྒོར་ཆེད་འབོད་བཞིན་ཕྱིན་སྐབས། ཉེ་འཁྲིས་ཀྱི་གྲོང་གསེབ་ཅིག་ནས་རྗེ་མར་བའི་མཛའ་མོའི་ཁྱིམ་བརྒྱུད་ཅིག་དང་འཕྲད་ཅིང་། ཁྱིམ་དེར་ད་དུང་ཡང་ལོ་ངོ་དགུ་བརྒྱའི་སྔོན་རྗེ་མར་པས་ཁོང་གི་མཛའ་མོར་བསྐུར་པའི་གསེར་གྱི་ཚིགས་ཁེབས་དང་གཡུའི་མགུལ་རྒྱན་ཉར་འདུག ཁོ་བོས་གསེར་གྱི་ཚིགས་ཁེབས་དེའི་ནང་ལོགས་སུ་ཞིབ་བལྟ་བྱེད་དུས། མར་པ་ཞེས་པའི་བོད་ཡིག་གསལ་ལ་མི་གསལ་བ་ཞིག་མཐོང་བྱུང་བས། ཚིགས་ཁེབས་དེ་རྗེ་མར་པས་ཁོང་གི་མཛའ་མོར་བསྐུར་པའི་ཚིགས་ཁེབས་དེ་ཡིན་པའི་ཡིད་ཆེས་ཆེན་པོ་ཞིག་རྙེད། ་་་ ་་་