འབའ་པ་ཡེ་ཤེས།
༡ སྐུ་བལྟམས་པའི་མཛད་པ།
ཀ་ཁ་ག་ངའི་རིག་གཞུང་དར་ཡུལ་གངས་རིའི་བསྐོར་བའི་ཡུལ་ལྗོངས་སུ།།
ཁ་བ་རི་པའི་སྐྱེ་རྒུ་རྨོངས་ཅན་འདོད་པའི་བྲན་གཡོག་འགྲོ་བ་དང།།
ག་ན་པ་ཌའི་བསྟན་པ་ཕྱིར་ཏུ་ལྟག་མཚེར་ཡུལ་དུ་སྐུ་འཁྲུངས་པ།།
ང་ཡི་བླ་མ་འདི་ཕྱིའི་༸སྐྱབས་མགོན་བསྟན་འཛིན་རྒྱ་མཚོར་སྙིང་ནས་བཏུད།།
༢ ངུར་སྨྲིག་འཆང་བའི་མཛད་པ།
ཅ་ལག་འབྱོར་པའི་ཕུན་ཚོགས་དང་ནི་གཉེན་ཚན་སྐུ་འཁོར་རྒྱང་བསྐྱུར་ནས།།
ཆ་རྫོགས་༸སྐུ་འཕྲེང་གོང་མའི་རྣམ་ཐར་སྐྱོང་ཕྱིར་ངུར་སྨྲིག་མཚན་དཔེ་འཆང།།
ཇ་ཧོང་དམར་སེར་ཁ་དོག་མཛེས་པའི་ཕོ་བྲང་དམར་པོའི་གསེར་ཁྲིའི་སྟེང།།
ཉ་རྒྱས་ཟླ་བཞིན་མངོན་པར་མཚར་བའི་རྒྱལ་བསྟན་ཁུར་བོ་ཕྲག་ཏུ་བཞེས།།
༣ ལུགས་གཉིས་ཀྱི་མངའ་དབང་བཞེས་པའི་མཛད་པ།
ཏ་ལེར་བཞེད་པའི་བཙན་པོ་གོང་མའི་ལུགས་གཉིས་གསེར་གྱི་གཉའ་ཤིང་དེ།།
ཐ་ཕྱོགས་དགུང་ལོ་བཅུ་དྲུག་ཙམ་ལས་མ་སོན་བདག་གིར་བཞེས་པའི་དུས།།
ད་ལྟ་ནང་བཞིན་མཚན་སྙན་མེད་ཀྱང་བོད་ཁམས་བདེ་བའི་ཐབས་ཀྱིས་བསྐྱངས།།
ན་སོ་ཆུང་ཡང་ཐུགས་ཀྱི་དཀྱེལ་ཆེ་ཟབ་ཡངས་འགྲན་མེད་ཀུན་ལས་རྒྱལ།།
༤ ལྷ་རམས་པའི་མཚན་གནས་བཞེས་པའི་མཛད་པ།
པ་ལོ་བྲེགས་པའི་ཚོགས་ཀྱི་ཆེན་པོ་འབྲས་དཀར་སྤུངས་པའི་ཆོས་སྡེ་ན།།
ཕ་མཐའ་བྲལ་བའི་གཞུང་ལུགས་ཆེ་མོར་རིགས་པས་སྲང་གིས་འབྱེད་མཛད་ནས།།
བ་སོ་ཕྲེང་བ་གྲལ་ལྟར་སྒྲིག་པའི་མཁས་གྲུབ་ཚོགས་པའི་ལྷ་ལྡན་དུ།།
མ་ཕམ་གཡུ་མཚོའི་སྙན་གྲགས་བཞིན་དུ་ལྷ་རམས་དམ་སྐོར་ལེགས་བཞེས་མཛད།།
༥ ཡུལ་གྱར་དུ་ཕེབས་པའི་མཛད་པ།
ཙ་ར་ངན་པའི་ང་དགུའི་ལོ་ལ་ནག་ཕྱོགས་བདུད་ཀྱིས་མཆེ་བཙིར་ནས།།
ཚ་གྲང་དམྱལ་ཁམས་བོད་ལ་དྲངས་ཏེ་ཟུངས་ཁྲག་དམར་པོས་ས་གཞིར་བརླན།།
ཛ་དྲག་དུས་ངན་མེ་ལྕེའི་འོག་ཏུ་བདེན་པའི་རང་དབང་སླར་གསོའི་ཆེད།།
ཝ་མོ་འཁྱམས་པའི་གངས་སུལ་བརྒྱུད་ནས་འཕགས་པའི་ཡུལ་དུ་ཞབས་རིས་བཀོད།།
༦ དྲག་པོ་ལ་ཞི་བའི་གཉེན་པོ་བསྟན་པའི་མཛད་པ།
ཞ་སྒྲེའི་ལོག་ཚོགས་པེ་ཅིན་དམག་ལ་འཇིགས་པའི་སྐྲག་པ་མ་མཆིས་ཤིང།།
ཟ་ཧམ་ཆེ་བའི་གུན་ཁྲན་ཇག་ཚོགས་སྤྲུལ་དམག་གཅིག་གིས་བཅོམ་ནུས་ཀྱང།།
འ་ཆད་འུ་ཐུག་འཚེ་བ་དོར་སྟེ་ཀུན་ཕན་བྱམས་བརྩེའི་འོད་དཀར་གྱིས།།
ཡ་མཚན་ཆེ་བའི་ཞི་བའི་ལམ་བཟང་སྔོན་མེད་དཔེ་ཞིག་སྲིད་འདིར་འཇོག །
༧ ཞི་བདེའི་གཟེངས་རྟགས་བཞེས་པའི་མཛད་པ།
ར་བ་གངས་རིའི་གཅེས་སྲོག་ཕྲ་མོ་དུས་ཀྱི་མཐའ་ལ་གཏུགས་ན་ཡང།།
ལ་ལུང་ཆོད་པའི་ཕྱི་གླིང་ཡུལ་ནས་ཞི་བའི་དོན་ཚན་དབྱར་རྔ་བསྒྲགས།།
ཤ་རུས་མི་གཅིག་འཛམ་གླིང་ཁྱོན་ནས་སྙན་པའི་གྲགས་པ་འབར་བ་ན།།
ས་སྟེང་འདི་ཡི་གཙུག་ན་མཛེས་པའི་ཞི་བདེའི་གཟེངས་རྟགས་མགུལ་བར་བརྒྱན།།
༨ འཇིག་རྟེན་ཀུན་ཁྱབ་ཀྱི་མཛད་པ།
ཧ་ཅང་མཁོ་བའི་ཀུན་ཕན་བྱམས་བརྩེ་འཛམ་གླིང་ཡོངས་ལ་དར་ཁྱབ་མཛད།།
ཧ་ཅང་བཟང་བའི་གྲོས་མོལ་ལམ་ནས་འཇིག་རྟེན་བདེ་བའི་ཐབས་མཛད་པ།།
ཨ་ལགས་ཆེན་པོ་༸སྐྱབས་མགོན་མེད་ན་འཛམ་གླིང་ཞི་བདེ་སུ་ཡིས་སྐྱོབས།།
ཨ་འཐས་ཆེ་བའི་༸སྐྱབས་མགོན་མེད་ན་ཆོལ་གསུམ་བོད་མི་སུ་ལ་རེ།།
༢༠༡༣། ༧། ༦ ཉིན།