རྔ་བ་ཀུན་བཟང་།
ཆང་མ་མཚལ་ཕྱུ་མའི་སྙོམས་གདུང་གདུང་གི་སེམས་པ་དང་། རྟ་ནག་འབྲོག་ར་ཡི་རིག་གསར་གཉིས་ཁ་ཐུག་དུས། ད་གཟོད། བརྩེ་དུང་ཟེར་བ་མེ་ལྕེ་བཞིན་འབར་ནས། ལུས་སེམས་གཉིས་ཀ་གཉིས་མེད་རོ་གཅིག་ལ་གྱུར་ལ། རྟོགས་འཆར་ཀྱི་ཞགས་ཐག་བར་ནས་གཡའ་ལྷང་ལྷང་དང་གྲང་ཤུར་ཤུར་གྱི་འཚོ་བ་ཡོད་ཚད་ལྗང་མདོག་ལྟ་བུའི་བྱིས་པའི་ལོ་ཟླ་ལ་ཁ་འཁོར་འགྲོ། སྐབས་དེ་དུས་ཁྱེད་བརྩེ་དུང་གི་ཞགས་ཐག་བར་ན་བསྐོན་ཟིན།
མཚལ་ཕྱུ་མའི་བདེ་སྐྱིད་ཀྱི་ཞིང་ཁམས་ལ་རྨི་ལམ་གྱི་རོལ་མྱོང་བྱེད་དུས། ཁྱེད་ཕྱོགས་ཀུན་ནས་དྲན་འཆར་གྱི་གློག་དམར་གཡོ་ནས། ངོ་མཚར་ཆེ་བའི་རྟོག་བཟོ་བ་དུ་མ་ཞིག་ཁྱེད་སྙིང་ཁ་ན་འཚང་ཀ་ཤིག་ཤིག་ཡོང་ལ། བག་ཡངས་ཀྱི་སྤྲོ་སྣང་ཡོད་ཚད་དལ་ཤིག་ཤིག་དང་། མིག་ལམ་གྱི་སྐར་མའི་འཛུམ་མདངས་ཀྱང་ལྷོད་ཤིག་ཤིག་ལ་འགྲོ་དུས། ཁྱེད་དམར་ཆུང་དཀྱིལ་ནས་བརྩེ་དུང་གི་ས་བོན་སྐྱེས་བའི་དུས་ཡིན། སྐབས་དེ་དུས། ཁྱེད་མཐོང་བ་དང་མྱོང་བ་ཡོད་ཚད་ཟས་ཀྱི་ཕུད་ཡིན། སྙིང་གི་ཚིལ་ཡིན། སྲོག་གི་རྟེན་ཡིན། རུས་ཀྱི་རྐང་ཡིན། གདོང་གི་མིག་ཡིན།
དེ་ཙམ་རྒྱུས་མངའ་ཡོང་དུས། ཚ་གྲང་གི་རོལ་གར་བསྒྱུར་ནས། ལུས་སེམས་གཉིས་ཀ་ལྕགས་བསྲེགས་ཀྱིས་གཅར་རྡུང་བྱེད་ཀྱང་། ཚོར་ངད་ཀྱི་ནུས་པ་མ་ཉམས་ནས། སོག་ལེ་འདྲ་བའི་བརྩེ་དུང་གིས་ལུས་སེམས་གཅད་དུས། ཁྱེད་མཚལ་ཕྱུ་མ་གཞན་གྱི་རུམ་ཁ་ལ་ཤོར་ནས། རང་ཉིད་གཅིག་པོ་མུན་ནག་གི་གྱང་རྩིག་བར་ལ་ཉལ་དུས། ཁྱེད་གློ་སྙིང་བྲང་གསུམ་ཆུ་རྙོགས་ལ་གྱུར། སྐབས་དེ་དུས། ཁྱེད་ལ་ཕྱི་དབུག་ཡོད་ཀྱང་ནང་དབུག་ཆད་པའི་དུས་ཡིན།
2022/01/10