མཚན་ཉིད་རིག་པའི་སྐོར་གྱི་དཔྱད་རྩོམ། ༼༢༽

གོང་དཀར་ངག་རྣམ། ས་རཱ།
 

མཚན་ཉིད་རིག་པའི་སྐོར་གྱི་དཔྱད་རྩོམ།
< Analysis Of Philosophy >

(༣) དངོས་གཙོ་དང་སེམས་གཙོའི་རིང་ལུགས་ཀྱི་འགལ་ཟླ་དངོས།

མག་སེས་དངོས་པོའི་འཕེལ་འགྲིབ་ཀྱི་ཁྱད་པར་ནི་དཀོན་མཆོག་ལྟ་བུ་ཕྱིའི་ནུས་ཤུགས་ཀྱི་དབང་ལས་མིན་པར་དེ་ནི་དངོས་པོ་རང་ཉིད་ལ་རང་ཆས་སུ་གྲུབ་པའི་འགྱུར་བ་ཞིག་ཡིན་པར་འདོད་པ་དེ་རེད། མག་སེའི་རྩོད་གྲུབ་ཀྱི་རིག་པ་འདི་འཇར་མན་གྱི་མཚན་ཉིད་རིག་པ་བ་སྐུ་ཞབས་Hegel ལས་བྱུང་བ་ཡིན་ནའང་དོན་དངོས་ཐོག་ལྟ་གྲུབ་དེ་གཉིས་འགལ་ཟླར་འགྲོ་གི་ཡོད། ཧི་གྷལ་གྱིས་འཛམ་གླིང་གི་འཁྲུག་རྩོད་ནི་དོན་དངོས་ཐོག་བསམ་བློའི་འཁྲུག་རྩོད་ཅིག་ཡིན་པ་དང་། མག་སེས་དེ་དང་འགལ་བར་མིའི་བསམ་བློའི་འགལ་ཟླ་ཞེས་པ་ནི་ཕྱི་དངོས་པའི་ནུས་ཤུགས་དང་དཔལ་འབྱོར་གྱི་གནས་སྟངས་བྱུང་བས་ཁོང་གཉིས་ཀྱི་ལྟ་ཚུལ་ནི་མི་འདྲ་བ་ཙམ་མ་ཟད་དངོས་སུ་འགལ་བ་ཡིན་པར་ཁས་ལེན་བྱས་ཡོད།

ཁོང་གཉིས་དབར་འགལ་བ་ཡོང་གཞི་གཅིག་ནི་ཧི་གྷལ་གྱིས་རྩོད་སྒྲུབ་སེམས་གཙོའི་རིང་ལུགས་ནང་(Abslolute spirit)ཞེས་པ་ལྟ་བུའི་དེབ་བྲིས་ཏེ་ཡེ་ཤུའི་ཤུགས་རྐྱེན་ཐེབས་ཡོད་པ་དེ་རེད། མག་སེ་རང་ཉིད་ཀྱིས་རྩོད་སྒྲུབ་དངོས་གཙོའི་རིང་ལུགས་ནི་དཀོན་མཆོག་དང་བདག་རང་རྐྱ་བ་མེད་པར་ལྟ་བའི་ཚུལ་ལས་བརྩམས་པ་ཞིག་ཡིན་པར་འདོད་པ་སྟེ། ཡེ་ཤུའི་ཆོས་ལུགས་ཀྱིས་བདག་རང་རྐྱ་བ་དང་ལུས་ཀྱི་ཁྱད་པར་ཕྱེས་ཏེ། མི་ལ་ཚེ་དུ་མ་ཡོད་པར་བཤད་ནས་བསམ་ངོའི་བདེ་བའམ་དོན་ལ་མེད་པའི་བདེ་བ་ཞིག་ཡོད་ཁུལ་བཤད་པ་ལ་བརྟེན་ནས་མག་སེས་(The opium of People)ཞེས་ཆོས་ལུགས་ནི་མི་མང་ལ་གནོད་རྒྱུའི་དུག་ཏུ་བརྩིས་ཡོད། དེ་བས་སྤྱི་ཚོགས་ལེགས་བཅོས་ཆ་ཚང་བ་ཞིག་ཡོང་བར་ཆོས་མེད་རིང་ལུགས་ཤིག་དགོས་གལ་ཆེ་བར་བཤད་ཡོད།

རྒྱུ་མཚན་དེར་བརྟེན། དངོས་གཙོ་སྨྲ་བ་རྣམས་ཀྱིས་དཀོན་མཆོག་གམ་འཇིག་རྟེན་བཀོད་པ་པོ་ཞེས་པ་ཞིག་མི་འདོད་པའི་དེ་ཡོད་པར་སྒྲུབ་པའི་སེམས་གཙོའི་རིང་ལུགས་ལ་དགག་པ་བྱེད། སེམས་གཙོའི་རིང་ལུགས་སྨྲ་བས་འཇིག་རྟེན་བཀོད་པ་པོ་སྒྲུབ་ཚུལ་ནི། དཔེར་ན། བྷི་ཤོབ་བྷར་ཁེ་ལིས་(Bishop Berkeley(1685-1753) སྤྱིར་བཏང་གི་ཡུལ་ལྗོན་ཤིང་གཅིག་དཔེར་བཞག་ནས་བརྗོད་གསལ། (དངོས་པོ་རྣམས་ང་ཚོས་མཐོང་བའམ་མྱོང་བའི་སྒོ་ནས་འཕྲལ་དུ་ཤེས་རྟོགས་ཡོང་གི་ཡོད། ལྗོན་ཤིང་ཡང་འཆར་སྣང་ལས་གྲུབ་པ་དང་། ལྗོན་ཤིང་དེ་ང་ཚོས་མ་མཐོང་བ་དང་མ་མྱོང་བ་དེ་སྲིད་དུ་ལྗོན་ཤིང་སྟེང་དུ་བདེན་པའི་ཆ་ཅུང་ཟད་ཙམ་ཡང་མེད་པའི་ཁས་ལེན་བྱེད་ཀྱི་ཡོད། ང་ཚོས་མིག་བཙུམས་པའམ་ཡང་ན་ལྗོན་ཤིང་གི་ཉེ་འཁྲིས་སུ་མི་སུ་གང་ཡང་མེད་ཀྱང་དེ་མུ་མཐུད་དེ་གནས་དགོས། འོན་ཏེ། དེའི་རྒྱུན་གནས་ཐུབ་པའི་དོན་དངོས་ཀྱི་རྒྱུ་མཚན་ནི་དཀོན་མཆོག་གིས་དེ་དག་གཟིགས་ཀྱི་ཡོད་པས་ཡིན། ང་ཚོས་གཟུགས་ཅན་གྱི་ཡུལ་དུ་འདོད་པའི་ལྗོན་ཤིང་དངོས་གནས་དེ་དཀོན་མཆོག་གི་སེམས་ནང་དུ་གྲུབ་པའི་འཆར་སྣང་ཡིན། )ཞེས་པ་ལྟ་བུ་རེད།

འདིར་ཤེས་དགོས་རྒྱུ་ཞིག་ནི། གོང་ས་མཆོག་གིས། སྤྱི་ཚོགས་ཀྱི་ཆབ་སྲིད་རིག་པའི་ཐོག་ནས་བཤད་ན་ངོས་རང་མག་སེའི་མཚན་ཉིད་རིག་པ་སྨྲ་བ་ཡིན། “As far as social-economic theory is concerned I am still a Marxist” ཞེས་གསུངས་པ་དེ་ནི་མག་སེའི་སྲིད་དོན་མཚན་ཉིད་རིག་པའི་གཞི་རྩའི་ཀུན་སློང་དང་འཆར་གཞིར་གཞིགས་ནས་གསུངས་པ་ཞིག་ལས་ཁོང་གི་དྲག་པོའི་འཐབ་རྩོད་ཀྱི་ཐབས་ལམ་དང་མིའི་དཀའ་ངལ་ཡོངས་རྫོགས་དཔལ་འབྱོར་ཁོ་ནར་ཐུག་ཡོད་པའི་ལྟ་ཚུལ་ལ་གཟིགས་ནས་གསུངས་པ་དེ་འདྲ་མིན་སྙམ།

འདིའི་སྐོར་ ༸གོང་ས་མཆོག་གིས་མཛད་པའི་<<ཤེས་ཡོན་ལམ་སྟོན།>>ཞེས་པའི་དཔེ་དེབ་ཏུ།

“མར་ཁེ་སི་ནི་བརྒྱ་ཕྲག་བཅུ་དགུ་པའི་ནང་བྱུང་སྟེ། ཁོ་རང་གི་དུས་སྐབས་ལ་བཟོ་ལས་འཛུགས་སྐྲུན་ཡར་རྒྱས་ཡོང་སྐབས་བཟོ་པ་ཚོ་དངོས་གནས་དཀའ་ངལ་ཆེན་པོ་ཞིག་གི་འོག་ལ་བསྡད་པ་ཞིག་དང་། བཟོ་པས་དཀའ་ངལ་བྱས་པའི་གྲུབ་འབྲས་དེ་བཟོ་པའི་སྦྱིན་བདག་ཉུང་ཤས་ཤིག་གིས་བེད་སྤྱོད་བྱེད་པའི་གནས་ཚུལ་འདི་འདྲ་ཞིག་ཆགས་ཡོང་བར་བརྟེན། གནས་ཚུལ་འདིའི་ཆེད་དུ་སྦྱིན་བདག་དེ་དག་ལ་མཐེ་བོང་ཀེར་ནས་གཟབ་གཟབ་བྱེད་རོགས། བྱམས་པོ་བྱེད་རོགས་ཞེས་བརྗོད་ན་ཉན་གྱི་མ་རེད། འོ་ན། གང་ཞིག་བྱེད་དགོས་སམ་ཞེ་ན། འདིའི་ཆེད་དུ་ཐབས་ཤེས་བཙལ་དགོས་ལ། ཐབས་ཤེས་དེ་གང་འདྲ་ཞིག་དགོས་ཟེར་ན། སེམས་ཅན་ཐམས་ཅད་མ་ཡིན་ནའང་། ཉམ་ཐག་མི་མང་པོ་ཞིག་བཙན་གནོན་གྱི་འོག་ཏུ་གནས་ཡོད་པའི་གནས་སྟངས་འདིའི་འོག་ནས་བསམ་བློ་ཞིག་གཏོང་སྐབས། སྤྱིར་བཏང་བྱ་བ་གང་འདྲ་ཞིག་ཡིན་རུང་ཐོག་མར་སྐད་ཆའི་འོག་ནས་གོ་བསྡུར་ལམ་སྟོན་དང་། དེ་ནས་དངོས་སུ་ལག་ལེན་གྱི་ཐོག་ནས་འགྲོ་དགོས། དེའི་སྔོན་ལ་རང་གི་སེམས་ལ་གསལ་པོ་བྱས་ནས་བསམ་བློ་གཅིག་འཆར་དགོས་ཀྱི་ཡོད།

བསམ་བློའི་འཁྱེར་སོའམ་ལྟ་བ་ཞིག་མེད་པར་བྱ་བ་ཡོང་ཐབས་མེད། འདི་ལ་བརྟེན་ནས་མཚན་ཉིད་རིག་པ་ཡོང་གི་ཡོད་པ་རེད། མཚན་ཉིད་རིག་པས་རང་གི་འཚོ་བར་ཕན་པ་མེད་ཀྱང་། མཚན་ཉིད་རིག་པར་བརྟེན་ནས་མང་ཚོགས་ཀྱི་འཚོ་བར་ཕན་ཐོགས་བྱེད་ཐུབ་ཀྱི་ཡོད། མར་ཁེ་སིའི་མཚན་ཉིད་རིག་པས་ལམ་སྟོན་ཇི་འདྲ་བྱས་ཡོད་ཅེ་ན། གོང་སྨོས་གནས་སྟངས་འདིའི་འོག་ལ་མང་ཚོགས་ཀྱི་བསམ་བློའི་ནང་ལ་ལམ་ལུགས་སྒྱུར་བཅོས་བྱེད་པའི་བློ་སྟོབས་སྐྱེ་དགོས་ལ། བློ་སྟོབས་མེད་ན་སྒྱུར་བཅོས་བྱེད་ཐབས་མེད། བློ་སྟོབས་སམ་སྤོབས་པ་ཇི་ལྟར་བཟོ་དགོས་སམ་ཞེ་ན་བདེ་སྡུག་ཚང་མ་སོ་སོའི་ལག་པར་ཡོད་པར་འདི་བསྟན་དགོས་པ་རེད། ངས་མར་ཁེ་སིའི་ལམ་ལུགས་ལ་སློབ་སྦྱོང་མ་བྱས་པས་ཡག་པོ་ཤེས་ཀྱི་མེད་ཀྱང་། ཚང་མ་སོ་སོའི་ལག་པར་ཡོད་པ་འདི་སྟོན་གྱི་ཡོད།” ཅེས་གསུངས་འདུག