པདྨ་བཟང་པོ་ནས་བྲིས།
མདོ་སྨད་ལོ་རྒྱུས་ཆེན་མོའི་གླེགས་བམ་དང་པོ་ལོ་རྒྱུས་སྤྱིའི་གཞུངས་ཤིང་གི་ཤོག་གྲངས་ ༤༦༨ ནས་རྗེ་ཙོང་ཁ་པས་རིག་གཞུང་གསར་བརྗེ་དང་བོད། ཅེས་པ་ཞིག་བཤད་ཡོད་པའི་སྐབས་འདིར་དཔྱད་གཞི་ཤིན་ཏུ་ཆེ་ཞིང༌། ལོ་རྒྱུས་སྤྱིའི་གཞུང་ཤིང་འདིའི་ཤོགས་གྲངས་ ༤༧༣ པ་ལས། བོད་སྔ་རབས་པ་དག་གིས་མདོ་སྔགས་ཟུང་འབྲེལ་བྱར་མེད་པར་འདོད་པ་ལ། ཕྱི་རུ་ཉན་ཐོས་སྤྱོད་བསྐྱངས་ཤིང༌། །ནང་དུ་འདུས་པ་ལ་རབ་དགའ། གསུངས་པ་ལྟར་ཕྱི་འདུལ་བའི་ཀུན་སྤྱོད་གཙང་མར་གནས་བཞིན་དུ་ནང་བདེ་སྟོང་ཡེ་ཤེས་ལ་རོལ་ནུས་པའི་ལམ་སྲོལ་བླ་ན་མེད་པ་གངས་རིའི་ཁྲོད་འདིར་གསར་བཏོད་གནང་བ་ཡིན་ལ། ཞེས་པའི་ཚིག་འདི་ལ་ལྟོས་དང་རྒྱུ་མཚན་མེད་པར་བོད་སྔ་རབས་པ་དག་ལ་སྐུར་འདེབས་མི་བཟད་པ་འདི་ལྟ་བུ་ཁྱོད་ལ་ལོག་པའི་བཤེས་གཉེན་སུ་ཞིག་གིས་བསླབ་པ་རེད། བོད་ཁ་བ་གངས་ཅན་གྱི་ལྗོངས་འདིར་མཁན་སློབ་ཆོས་གསུམ་གྱི་སྐུས་དུས་ནས་བཟུང་ཆོས་ལུགས་རིས་མེད་ཀྱི་མཁས་གྲུབ་རྣམས་མདོ་སྔགས་ཟུང་འབྲེལ་དུ་ཉམས་བཞེས་གནང་མཁན་ཤ་སྟག་མ་གཏོགས་གཅིག་ཀྱང་མེད་ཅེས་བརྗོད་ཀྱང་ལུང་རིག་གིས་སྒྲུབ་པར་བྱེད་ནུས་ལ། དཔེར་ན་གངས་ཅན་བསྟན་པའི་ཉི་མ་མཁན་ཆེན་ཞི་འཚོའི་ཞལ་ནས། སོ་སོར་ཐར་བའི་མདོ་འདི་ནི། །སྟོན་པ་མྱ་ངན་འདས་འོག་ཏུ། །དགེ་འདུན་རྣམས་ཀྱི་སྟོན་པར་གསུངས། །འདི་ལ་ཤིན་ཏུ་གུས་པར་གྱིས། །ཞེས་དང༌། བདག་གིས་བསླབ་པ་དེ་བཞིན་དུ། །ཕྱི་ལྟར་འདུལ་ཁྲིམས་མ་ཉམས་ཤིང༌། །ནང་ལྟར་བྱང་ཆུབ་སེམས་སྦྱང་བ། ། གསང་བ་སྔགས་ཀྱི་རིམ་གཉིས་སྒོམས། །ཞེས་དང༌། སྟོན་པའི་བསྟན་པ་རིན་ཆེན་འདི། །གངས་ཅན་ལྗོངས་སུ་ངས་གསལ་བྱས། །བདག་གི་རྗེས་སུ་ཞུགས་ནས་ཀྱང༌། །སྟོན་པའི་བསྟན་པ་མཆོག་ཏུ་ཟུངས། །ཞེས་དང༌། དེ་བཞིན་ཨོ་རྒྱན་ཆེན་པོ་པདྨ་འབྱུང་གནས་ཀྱི་ཞལ་ནས ཕྱི་ལྟར་ལག་ལེན་མདོ་སྡེའི་ལུགས་སུ་སྤྱད།།རྒྱུ་འབྲས་སྤང་བླང་ཞིབ་པའི་དགོས་པ་ཡོད། །ནང་ལྟར་གསང་སྔགས་ཐུན་མོང་ལུགས་སུ་སྤྱད། ། བསྐྱེད་རྫོགས་དོན་དང་འབྲེལ་བའི་དགོས་པ་ཡོད། །གསང་བར་གསང་ཆེན་ཨ་ཏིའི་ལུགས་སུ་སྤྱད། །ཚེ་གཅིག་འོད་སྐུར་གྲོལ་བའི་དགོས་པ་ཡོད། །ཅེས་དང༌། ཕྱི་ངུར་སྨྲིག་དགེ་སློང་གི་ཆ་ལུགས་འཛིན། །ནང་གསང་སྔགས་བླ་མེད་ཀྱི་རྣལ་འབྱོར་པ། །ཞེས་སོགས་གསུངས་པས་མཚོན་བོད་སྔ་རབས་པའི་མཁས་གྲུབ་རྣམས་ཀྱི་གསུང་མང་དུ་དྲངས་རྒྱུ་ཡོད་ཀྱང་འདིར་མི་སྤྲོ་ལ། ཁོ་བོ་རྗེ་ཙོང་ཁ་པ་ལ་མི་གུས་པ་མིན་ན་ཡང་རྗེས་འཇུག་ཁ་ཅིག་ལ་བོད་སྔ་རབས་པའི་སྟེང་དུ་འདི་ལྟ་བུའི་སྙིང་ནད་ཅིག་ཡོད་པ་ཅིའི་ཕྱིར་ཡིན་སྙམ། ཡང་ལོ་རྒྱུས་སྤྱིའི་གཞུང་ཤིང་གི་ཤོག་གྲངས་ ༤༧༤ དང་ ༤༧༥ པ་ལས། དེར་བརྟེན་བོད་སྔ་རབས་པ་མང་པོ་ཞིག་གིས་སྟོང་ཉིད་ཀྱི་དོན་ཅི་ཡང་མེད་པ་ཞིག་ཏུ་བཟུང་བ་ནི། དགེ་མི་དགེ་དང་ལས་འབྲས་སོགས་ཀྱང་གཏན་མེད་དུ་འདོད་དགོས་པས་ཡང་དག་པའི་ལམ་ལས་གོལ་བ་ཡིན་ལ། ཡང་ལ་ལ་ཞིག་གིས། སྟོང་ཉིད་བདེན་གྲུབ་དང༌། དེ་ཀུན་རྫོབ་པའི་ཆོས་གཞན་གྱིས་སྟོང་བ་སྟོང་ཉིད་དུ་འདོད་ཀྱང༌། དེ་ནི་རྟག་ལྟར་འགྱུར་བས་མ་དག་པ་ཡིན ། ལ་ལས་ཡོད་ཙན་བཟུང་ན་མཚན་འཛིན་དུ་འགྱུར་བས་ཆོས་ཐམས་ཅད་ཡོད་པའང་མིན། མེད་པའང་མིན་པས་འཇོག་སྒོམ་གྱི་སྐབས་སུ་བདག་ཡོད་མེད་དང་སྟོང་མི་སྟོང་སོགས་གང་ཡང་ཡིད་ལ་མི་བྱེད་པ་ཙམ་སྒོམ་དུ་འདོད་མོད། ཅི་ཡང་ཡིད་ལ་མི་བྱེད་སྙམ་པ་དེ་ག་རང་ཡིད་ལ་བྱེད་པར་འགྱུར་བ་སོགས་ཀྱི་སྐྱོན་འབྱུང་བས་དེ་ཡང་མ་དག་པ་དང༌། ཡང་ལ་ལས་རིག་པའི་རྗེས་སུ་འབྲངས་བའི་དཔྱད་པ་དང་རྟོག་དཔྱོད་གང་ཡང་
མི་དགོས་པར། སེམས་འདས་པའི་རྗེས་མི་གཅོད། མ་འོངས་པ་སྔོན་མི་བསུ། ད་ལྟ་མངོན་དུ་གྱུར་པའི་ཤེས་པ་སོ་མ་ལ་བཅོས་མི་བྱེད་པར་རྣམ་རྟོག་གི་སྤྲོས་པ་མཐའ་དག་དོར་ནས། སེམས་བདེ་འབོལ་ལེ། ལྷོད་ཤིག་གེར་བཞག་པས་སེམས་ཉིད་ཆོས་སྐུའི་ངོ་བོ་གཅེར་རྗེན་དུ་མཐོང་བར་བཤད་ཀྱང༌། གང་ཡང་ཡིད་ལ་མ་བྱས་པར་བསྡད་པ་ལ་ཅི་ཡང་མཁྱེན་པའི་སངས་རྒྱས་ཀྱི་ཡི་ཤེས་རྩོལ་མེད་དུ་འོང་ན། མི་མཐུན་པའི་རྒྱུ་ལས་མི་མཐུན་པའི་འབྲས་བུ་འབྱུང་བར་འགྱུར་བས་རྒྱུ་འབྲས་ཀྱི་རྣམ་གཞག་མཐའ་དག་འཆོལ་བས་དེ་ཡང་མ་དག་པ་སྟེ་མདོར་ན། གོང་སྨོས་དེ་དག་གིས་དོན་དམ་དཔྱོད་བྱེད་ཀྱིས་རིགས་པས་དཔྱད་པ་ན་དགག་བྱ་མ་ལུས་པ་ཁག་ཀྱང༌། དགག་བྱ་དེ་བཀག་པའི་ཤུལ་དུ་ལས་འབྲས་བྱ་བྱེད་སོགས་སྣང་སྟོང་ཉིས་ཚོགས་འཇོག་མ་ཤེས་པས་ནོངས་པ་ཡིན་ནོ། ཞེས་བྲིས་འདུག དེ་ལྟར་བོད་སྔ་ཕྱིའི་ཤིང་རྟ་ཆེན་པོ་དག་གི་བཞེད་པ་ལ་དགག་བཞག་བྱེད་རྒྱུ་དེ་ལས་སླ་བོ་ཞིག་མིན་ཞིང་དྲྭ་ཐོག་ཏུ་ཡིག་གེ་མང་པོ་འབྲི་བ་ལ་དགོས་པ་མ་མཐོང་བས་རྒྱས་པར་གླེང་བར་མི་བྱ་ཞིང༌། མདོར་བསྡུས་ཏེ་བརྗོད་ན་གོང་དུ་སྨྲོས་པ་དེ་དག་ནི་བོད་སྔ་རབས་པ་འགའ་ཞིག་དང༌། ས་སྐྱ་པ། བཀའ་བརྒྱུད་དང་ཇོ་ནང་གི་གཞན་སྟོང༌། རྙིང་མ་པ་གཙོས་པའི་བོད་སྔ་རབས་པའི་དབུ་མའི་ལྟ་བ། འདོད་པ་ཐ་མ་དེ་རྫོགས་པ་ཆེན་པོའི་ལྟ་བ་ཡིན་པར་གསལ། དེ་ལྟར་ཁྱོད་ཀྱིས་བརྗོད་པའི་རིག་པ་ལྟར་སྣང་དེ་ཙམ་གྱིས་སྒྲུབ་བརྒྱུད་ཤིང་ལྟ་དག་གི་དགོངས་པ་ལ་ཕྱོགས་ཙམ་ཡང་གནོད་པར་མི་ནུས་ལ་དེའི་ཚུལ་རྒྱས་པར་མཁས་གྲུབ་སྔ་མ་རྣམས་ཀྱིས་ལྟ་གྲུབ་ཀྱི་ཡིག་ཆ་ཁག་ཏུ་ལེགས་པར་བཤད་ཟིན་པས་གངས་ལྗོངས་རིག་པ་སྨྲ་བ་རྣམས་ཀྱིས་མཁྱེན་བཞིན་པ་རེད། དེས་ན་ཁོ་བོས་དེ་རིང་འདིར་མང་པོ་འབྲི་བའི་ངལ་བ་མི་བྱ་རྒྱུ་མིན། ཡང་ལོ་རྒྱུས་སྤྱིའི་གཞུང་ཤིང་གི་ཤོག་གྲངས་ ༤༩༦ དང་ ༤༩༧ པར་འདི་ལྟར་བཤད་དེ། སྐབས་དེའི་དབུས་གཙང་ཡོངས་རྫོགས་ཧྲིལ་གྱིས་བཟུང་བའི་ས་སྐྱ་བ་དང་བཀའ་བརྒྱུད་པ། རྙིང་མ་བ། ཇོ་ནང་བ།བོ་དོང་བ་སོགས་བསམ་གྱིས་མི་ཁྱབ་པའི་མཁས་གྲུབ་ཀྱི་སྐྱེས་ཆེན་དེ་དག་ཕལ་ཆེར་གྱིས་རྗེ་འདིའི་ཞབས་ལ་གཏུགས་ནས་གཞུང་ལུགས་གསན་པ་སྟེ། རང་རང་ཐར་བའི་གོ་འཕང་བགྲོད་བྱེད་ལ་ཡིད་ཆེས་བྱེད་པའི་སྔར་ཡོད་ཀྱི་གྲུབ་མཐའི་ལམ་པོ་ཆེ་དེ་དག་གཏན་དུ་བསྐྱུར་བའམ། དེས་མ་ཚིམ་པར་གསར་དུ་བྱུང་མ་ཐག་པའི་དགེ་ལུགས་པའི་གྲུབ་མཐའ་ངོས་ལེན་ཉམས་བཞེས་གནང་བ་དེས་ཅི་ཞིག་མཚོན་གྱི་ཡོད་དམ་ཞེ་ན། ཞེས་བཤད་འདུག་པའི་ལུང་ཚིག་དུམ་བུ་འདིས་ནི་རྩོམ་པ་པོ་ཕྱོགས་རིས་ཀྱི་གདོན་ཆེན་པོ་ཞིག་གིས་བཏབ་ཡོད་པ་གསལ་བོར་བསྟན་ཡོད། སྤྱིར་ཧོར་འཇིགས་ལ་སོགས་པ་ཨ་མདོའི་གྲྭ་ལོག་ལ་ལ་ཞིག་གིས་ཧ་ཅང་ཚད་ལས་བརྒལ་བའི་སྐད་ཆ་ཉག་ཉོག་མང་པོ་ཤོད་ཀྱིན་འདུག་པ་འདི་ཚོ་སྔར་བླ་བྲང་བཀྲ་ཤིས་འཁྱིལ་དུ་བླ་རྒན་ཕྱོགས་རིས་ཅན་རྣམས་ཀྱིས་ཀུན་གཞིའི་ཁམས་ལ་བག་ཆགས་ངན་པ་བགོས་པའི་རྐྱེན་ལས་བྱུང་བ་ཞིག་ཡིན་པར་ཤེས་དགོས། རྗེ་ཙོང་ཁ་པ་ལས་ཆོས་གསན་པ་རྣམས་ཀྱིས་སྔར་ཡོད་ཀྱི་གྲུབ་མཐའ་གཏན་དུ་བསྐྱུར་བར་ཁས་བླངས་པ་དེས་རྗེ་ཙོང་ཁ་པ་ལ་བསྟོད་པར་རློམ་ན་ཡང་དོན་དུ་སྨད་པའི་ཚིག་ཏུ་འགྱུར་ཉེན་ཆེ་བས་ཕྱིན་ཆད་འདི་ལྟ་བུ་མ་སྨྲ་ཞིག བོད་འདིར་སངས་རྒྱས་ཀྱི་བསྟན་པ་དར་ཁྱབ་བྱུང་བ་ནི་བསྟན་འཛིན་གྱི་སྐྱེ་བུ་སྔ་མ་དག་གི་བཀའ་དྲིན་ཉག་གཅིག་ཡིན་པ་སྨྲོས་མ་དགོས་པ་ཡིན་མོད་སྡུག་པའི་ཕྲུ་གུ་མ་ཡི་གཤེད་དུ་ལང་པ་ཁྱོད་ལ་ཕྱོགས་ལྷུང་གི་དུག་ཆུ་ངན་པ་འདི་སུས་བླུད་པ་རེད་ལེགས་པར་སོམས་ཤིག དོན་དངོས་ལ་རྗེའི་བླ་མའི་དགོངས་པ་ནི་བོད་སྔ་རབས་པ་དང་གཅིག་པ་ཡིན་ཚུལ་བཤད་རྒྱུ་ཡོད་ཀྱང་འདིར་ཡི་གེ་མང་པོ་བྲིས་ན་དྲྭ་གྲོགས་ཚོ་ཉོབ་ཀྱི་རེད་བསམ་ནས་མང་པོ་བྲིས