མདང་ནུབ་ཆར་པ་བབས་བྱུང་།

བཀྲ་ཤིས་དོན་འགྲུབ། 

ལང་ལོང་སྤྲིན་ནག་དྲན་ནས་གང་འཚམ་འགོར་སོང་།།
འབྲུག་སྒྲ་ཡིད་ལ་བསྒོམས་ནས་ཡུན་རིང་ཕྱིན་སོང་།།
ཆར་ཆུའི་བརླན་ཤར་བསྒུགས་པ་ཡུན་ཐུང་མ་ཡིན།།
ཉི་མས་འཇིག་རྟེན་བསྲེགས་པར་ཚོད་ཅིག་མི་འདུག།

མཚོ་དང་མཚེའུ་ཉི་མའི་འོད་ཀྱིས་འཐུང་སོང་།།
ཉ་དང་སྦལ་པ་བེམ་རོ་བསྐྱུར་ནས་ཕེབས་ཐལ།།
རྩ་དང་རྩི་ཤིང་ཐལ་མདོག་བཀླུབས་ནས་བཞུགས་འདུག།
འགྲོ་བ་མང་པོ་ཚ་བས་གདུང་ནས་ལུས་འདུག།

ཉི་མ་ནུབ་ལ་བཞུད་ཀྱང་སྐྱོ་སྣང་མི་འདུག།
ཟླ་བ་ཤར་ནས་འཆར་ཡང་སྤྲོ་སྣང་མི་འདུག།
འོད་དང་འོད་ཟེར་དག་ལ་སུན་སྣང་སྐྱེ་གི།
དྲོད་དང་དྲོད་ཁོལ་དག་ལ་ཁོང་ཁྲོ་ཟ་གི།

ཉི་མ་འདི་ནི་འཇིག་རྟེན་མིག་ཡིན་ཟེར་གི།
ཟླ་བ་དེ་ནི་བསིལ་ཟེར་ཅན་རེད་ཟེར་གི།
འོད་དང་ཟེར་གྱིས་སེམས་པ་སྲེག་ཚུལ་བསམས་ན།།
དགོས་མེད་ཆོ་ལོ་དེ་ཚོར་སྙིང་རླུང་ལངས་ཡོང་།།

སྤྲིན་ནག་ལང་ལོང་འཁྲིགས་པའི་དགོང་མོ་ཞིག་ལ།།
ཉི་ཟླའི་དྲེགས་པ་བཅོམ་པའི་སྲ་སྲོས་ཤིག་ལ།།
ལྷོ་རླུང་འཇམ་པོ་བསིལ་བསིལ་བསིལ་ལ་ལྡང་བྱུང་།།
ཆར་ཐིགས་མཉེན་མོ་ཟིམ་ཟིམ་ཟིམ་ལ་བབས་བྱུང་།།

བྱ་དང་བྱེའུས་གླུ་ཆུང་གང་སར་ལེན་གི།
ཉ་དང་ཉེའུས་དགའ་བའི་མིག་ཆུ་འདོན་གི།
རི་དྭགས་མང་པོའི་སྐོམ་གདུང་ཡུད་ཀྱིས་སེལ་བཞག།
ལྗང་ལོ་གསར་པས་མཛེས་སྡུག་ལྷོད་ཀྱིས་ངོམ་བྱུང་།།

ལྷ་ཡི་བྱབ་ཁྲུས་འདྲ་བའི་གཤེར་གཟུགས་ཐིགས་པ།།
བསིལ་བདེའི་རེག་བྱ་ཁུར་བའི་རོལ་དབྱངས་འཁྲོལ་བཞིན།།
ལྗང་མྱུག་མང་པོར་ལང་ཚོ་གསར་པ་བསྩལ་བས།།
མེ་ཏོག་མང་པོས་འཛུམ་ཞལ་ལྷུག་ལྷུག་ངོམ་བྱུང་།།