བོད་ཀྱི་དགུ་བཅུ་གསུམ་ལས་འགུལ་ཚོགས་པ།
༄༅།། མཁྱེན་ཡངས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྐབས་བདུན་པའི་ཚོགས་གཙོ་རེ་མཱི་གྷ་སེ་ཨེག་ཁཱེ་ལེ་སི་ཧན་ཛལ་(Remigiusz Achilles Henczel)མཆོག་གི་༸ཞབས་དྲུང་དུ།
གུས་ཞུ།
བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ངོས་ནས་ཕྱི་ལོ་༢༠༡༣ ཟླ་བ་༡༡ ཚེས་༣ ནས་ཚེས་༥ ཉིན་བར་ཉིན་གྲངས་གསུམ་རིང་བཞུགས་སྒར་དྷ་རམ་ས་ལའི་གཙོས་ཉེ་འགྲམ་གྱི་ས་ཁུལ་ཁག་གསུམ་ནས་ཁྱོན་མཚན་རྟགས་ཉིས་སྟོང་ལྷག་བསྡུ་རུབ་ཞུས་ཡོད་པ་དང་། ཐེངས་འདིའི་མཚན་རྟགས་བསྡུ་རུབ་ཀྱི་གྲངས་འབོར་དེ་འདྲ་མང་པོ་ཞིག་མིན་ན་ཡང་། ཐེངས་འདིའི་ལས་འགུལ་གྱི་དམིགས་ཡུལ་གཙོ་བོ་ནི་དེ་སྔ་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྐབས་བདུན་པའི་ཚོགས་མིའི་ནང་འོས་བབ་མེད་པའི་རྒྱ་ནག་གཞུང་འཛུལ་ཞུགས་བྱས་ཡོད་ཀྱང་། དེས་རྒྱ་ནག་རང་གི་འགྲོ་བ་མིའི་ཐོབ་ཐང་གནས་བབ་དྲག་ཏུ་ཕྱིན་མེད་པར་དེ་བས་སྡུག་རྩུབ་དང་། དྲག་གནོན་བྱེད་ཤུགས་ཆེ་རུ་བཏང་ཡོད་ཅིང་། ཕྱི་ལོ་༢༠༡༣ ཟླ་༡༡ ཚེས་༡༢ ཉིན་སླར་ཡང་རྒྱ་ནག་གཞུང་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྐབས་བརྒྱད་པའི་ཚོགས་མིའི་ནང་འཛུལ་ཞུགས་བྱ་འཆར་ཡོད་པ་དེ་ཉིད་ལ་དྲང་བདེན་གྱི་ཐོག་ནས་རྒྱ་ནག་གཞུང་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མིར་འོས་བབ་མེད་པའི་རྣམ་འགྱུར་གསལ་སྟོན་བྱེད་པའི་ཆེད་དུ་ད་ཐེངས་ཀྱི་ལས་འགུལ་འདི་སྤེལ་བ་ཡིན།
དེ་ཡང་འདས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་སྐབས་བདུན་པའི་དུས་ཡུན་སྟེ་ཕྱི་ལོ་༢༠༠༦ ལོ་ནས་༢༠༡༢ ལོའི་བར་ལ་སྤྱིར་རྒྱ་ནག་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་གནས་སྟངས་ཚད་གཞི་ཅི་ཙམ་ཞིག་ཡོད་པ་ས་རིས་ཐང་གསལ་དང་། ལྷག་པར་བོད་དང་ཡུ་གུར་མི་རིགས་ཀྱིས་གཙོས་པའི་གྲངས་ཉུང་མི་རིགས་སྟེང་སྤེལ་བའི་རྒྱ་ནག་གཞུང་གི་སྲིད་ཇུས་དང་སྡུག་རྩུབ་ཆེ་བའི་དྲག་པོའི་བཙན་གནོན་ཇི་བྱས་འཛམ་གླིང་རྒྱལ་ཁབ་ཁག་གི་མི་མང་ཚང་མས་གསལ་པོ་མཁྱེན་བཞིན་ཡོད་པས། འདི་ནས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་མཁན་གྱི་སྲིད་གཞུང་ཞིག་འགྲོ་བ་མིའི་ཐོབ་ཐང་ཐོག་ལྟ་རྟོགས་བྱེད་མཁན་གྱི་ཚོགས་ཁོངས་སུ་འཛུལ་ཞུགས་བྱེད་རྒྱུར་ངོ་རྒོལ་མཐའ་གཅིག་ཏུ་ཡོད་པའི་རྣམ་འགྱུར་གསལ་སྟོན་བྱེད་ཀྱི་ཡོད་ན། འགྲོ་བ་མིའི་ཐོབ་ཐང་ཐོག་ཐུགས་འཁུར་དང་འགན་འཁུར་གནང་མཁན་གྱི་རྒྱལ་ཁབ་ཁག་དང་། དབུ་འཁྲིད་རྣམ་པ། ལྷག་པར་དུ་ལྷན་ཚོགས་འདིའི་ཚོགས་མི་རྣམས་པས་ཐེངས་འདིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མིའི་ཁོངས་འོས་བབ་གང་ཡང་མེད་པའི་རྒྱ་ནག་གཞུང་འཛུལ་ཞུགས་མི་ཆོག་པའི་དགག་བྱ་མཐའ་གཅིག་ཏུ་གནང་རོགས་ཞེས་འབོད་སྐུལ་ཞུ་བཞིན་ཡོད།
བོད་ཀྱི་དགུ་བཅུ་གསུམ་ལསའགུལ་ཚོགས་པ་ནས། ཕྱི་ལོ་ ༢༠༡༣ ་ལོའི་ཟླ་བ་ ༡༡ ཚེས་ ༦ ཉིན།
ངོ་བཤུས་འབུལ་ཡུལ།
རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མི་རྒྱལ་ཁབ་བརྒྱ་དང་དགུ་བཅུ་གོ་གཉིས།
(བསྡུ་རུབ་ཞུས།)
(སྡུག་རྩུབ།) འདི་ཚོ་ག་རེ་རེད། འདི་ཚོགས་པ་ཚོགས་ཆེན་ཞིག་ལ་བཏང་བའི་སྙན་ཞུ་ཡིན་མདོག་རེད་པ་ཨ།
མཉམ་འབྲེལ་རྒྱལ་ཚོགས་ཚང་གིས། སོ་སོས་སོ་སོ་གང་ཞིག་གི་ཆེད་དུ་ལངས་ཡོད་པ་ཤེས་གལ་ཆེ། རྒྱ་རྒན་ཚང་གི་སྨྱོ་ཧམ་ལ་གདོང་གཏུག་ཕོད་པའི་དྲང་ལྡན་སྲུང་དགོས།