བསམ་གླིང་ཚེ་རིང་ལྷ་མོ།
འཇམ་དབྱངས་མཁྱེན་བརྩེའི་རྡོ་རྗེ་རྣོན་པོ་ཡིས།།
འགྲོ་བའི་རྨོངས་མུན་རྫ་ཤེལ་ཕུག་པ་དང།།
གང་ལ་གང་གསལ་ལྷ་ཡི་ལུས་ཐོབ་སྟེ།།
འགྲོ་རྣམས་གདུང་བའི་གནས་ལས་གྲོལ་གྱུར་ཅིག
པད་མ་གཞོན་ནུ་འབུམ་གྱིས་མ་དོ་བའི།།
ཚངས་སྲས་མ་ཁྱེད་ཞབས་སེན་འོད་ཆགས་ཅན།།
གང་གི་སྐལ་ལྡན་གདུལ་བྱའི་ཚོགས་རྣམས་ལ།།
ཐབས་དང་ཤེས་རབ་མྱུར་དུ་སྩལ་དུ་གསོལ།།
ཐབས་དང་ཤེས་རབ་ཟབ་མོས་བརྒྱུད་བསྐུལ་ཏེ།།
ལས་ངན་སྡིག་སྒྲིབ་འབྲས་བུ་དུས་ཐུང་ནང།།
དཀའ་བ་ལྕི་མོས་དཔྱིས་ཕྱིན་དག་པ་དང།།
ལྷ་དང་ལྷ་མོའི་སྐྱེ་གནས་ཐོབ་པར་ཤོག
ལྷ་ལུས་ཡིད་འོང་ལག་སོར་པད་མ་ཡིས།།
འཇམ་དབྱངས་མཁྱེན་བརྩེ་དབང་པོའི་ཞབས་བསིལ་ཆབ།།
གསེར་སྐྱོག་དྭངས་མའི་ཡུ་བར་བཟུང་བྱས་ཏེ།།
དལ་བུའི་སོར་མོས་བསིལ་བའི་དཔལ་ཐོབ་ཤོག
སྐུ་ཡི་མཚན་བཟང་དཔེ་བྱད་རྒྱན་རྣམས་གང།།
ཐུགས་བརྩེས་འགྲོ་དོན་སྒྲུབ་ལ་མཐུ་ལྡན་ཕྱིར།།
ལྷ་དང་ལྷ་མོའི་མིག་གི་དབང་པོ་རུ།།
རོ་བརྒྱའི་བཅུད་བཞིན་ལོངས་སྤྱོད་ཉིད་གྱུར་ཅིག
ལྷ་མོ་འབུམ་ཕྲག་གར་ལ་རོལ་བཞིན་དུ།།
ཚངས་སྲས་མ་ཡི་ཞབས་ཟུང་སྤྱི་བོར་བླངས།།
གང་གི་དབྱངས་སྙན་དམ་ཆོས་བདུད་རྩིའི་གསུང་།།
ཐོས་པ་ཙམ་གྱིས་སྒྲིབ་ཀུན་སེལ་བར་ཤོག
མཁྱེན་བརྩེའི་ནུས་པའི་བྱིན་རླབས་ཆབ་རྒྱུན་གང།།
ལྷ་དང་ལྷ་མོའི་སྙིང་ཁར་ཐིམ་བྱས་ཏེ།
སྐུ་བཞིའི་འབྲས་བུ་མངོན་དུ་འགྲུབ་གྱུར་ནས།།
རིགས་དྲུག་གནས་ལས་ངེས་པར་ཐར་བར་ཤོག
ཐར་པ་ཐོབ་ནས་མ་གྱུར་སེམས་ཅན་ཆེད།།
བདེ་ཞིང་ལྷོད་པར་སྐད་ཅིག་མ་ཆགས་པར།།
ཆོས་ལྡན་བོད་ཀྱི་རྒྱལ་ཁབ་སླར་གསོའི་ཆེད།།
ལུས་བརྒྱར་སྤྲུལ་ཏེ་རང་བཙན་ལེན་པར་ཤོག
རང་བཙན་བླངས་ནས་ཇི་སྲིད་འཚོ་ཡི་བར།།
གྲངས་མེད་སྤྲུལ་པས་འཕགས་མཆོག་སྤྱན་རས་གཟིགས།།
བཀའ་བཞིན་སྒྲུབ་པའི་མཆོད་པས་མཉེས་བྱས་ཏེ།།
ཆོས་ལྡན་རྒྱལ་ཁབ་དབུ་འཕང་འདེགས་པར་ཤོག
ནམ་ཞིག་སྐྱེ་བོ་རང་བཞིན་ངན་པ་ཡིས།།
ཆོས་ལྡན་ཞིང་འདིར་མ་རིག་མ་ཚུལ་བའི།།
ལས་ངན་སྦྱོར་བ་ཇི་ལྟར་བརྩམ་གྱུར་ཀྱང།།
ཐབས་ཤེས་ཟུང་གིས་ལོག་ལམ་ཁེགས་པར་ཤོག
ཇི་སྲིད་མར་གྱུར་འགྲོ་བ་འཁོར་བ་ནས།།
དག་པའི་ཞིང་དུ་ཆ་ཚང་མ་སླེབས་བར།།
ཆོས་ལྡན་རྒྱལ་ཁབ་ལེགས་པར་སྐྱོང་བ་ཡི།།
དབུ་འོག་དཔུང་འདེགས་གང་ནུས་འགྲུབ་ཐུབ་ཤོག
ཐུགས་རྗེའི་བདག་ཉིད་སྟོན་པའི་དམ་ཆོས་འོད།།
འཛམ་བུའི་གླིང་འདིར་དར་ཞིང་འཕྲོས་པ་ཡིས།།
དཀར་ནག་མི་ཡི་རིགས་ཅན་ཐམས་ཅད་ལ།།
བྱིན་གྱིས་རླབས་ནས་ཐར་པར་འཁྲིད་པར་ཤོག
སྤྲུལ་པ་གྲངས་མེད་འགྲོ་བ་སྐྱོང་བའི་སླད།།
མཐུ་རྩལ་ཆེན་པོས་བོད་ཀྱི་ཁོར་ཡུག་རྣམས།།
སྲུང་ཞིང་བཙོག་སྐྱོན་སྤུ་ཙམ་མེད་གྱུར་ནས།།
དྭངས་བསིལ་ཆབ་ཀྱིས་རྒྱལ་ཁམས་སྐྱོབ་པར་ཤོག
ཁྲོ་ལ་གཏུམ་པའི་སྟག་གཟིག་ཤ་ཟན་རྣམས།།
བྱམས་པའི་སེམས་ཀྱིས་དམར་དད་ཞི་བ་དང།།
གཅིག་གིས་གཅིག་ལ་མ་བུའི་འདུ་ཤེས་ཀྱིས།།
བྱམས་དང་བརྩེ་བས་ཕན་ཚུན་སྐྱོང་བར་ཤོག
དུད་འགྲོ་འབུ་སྲིན་ངན་འགྲོའི་རིགས་ཀུན་ཀྱང།།
རིམ་བཞིན་དལ་འབྱོར་མི་ལུས་ཐོབ་གྱུར་ནས།།
འཕགས་པ་སྤྱན་རས་གཟིགས་ཀྱི་བདེན་པའི་མཐུས།།
སྡིག་ལམ་བྲལ་ནས་ཐར་པར་འཁོད་པར་ཤོག
རབ་བྱུང་སྡེ་རྣམས་རྟོགས་པ་མཐོར་འདེགས་ཤིང།།
མྱུར་དུ་སངས་རྒྱས་དབུ་འཕང་ཐོབ་ནས་ཀྱང།།
ལྷ་དང་ལྷ་མོའི་གཟུགས་སུ་སྤྲུལ་བྱས་ནས།།
གངས་ཅན་སྐྱོང་བར་མཐུ་དང་ལྡན་པར་ཤོག
ནམ་ཞིག་འཇིག་རྟེན་བསྐལ་བ་བརྗེ་བ་དང།།
ད་དུང་མ་རྣམས་ལྷག་མ་ཡོད་གྱུར་ན།།
བར་དོའི་འཕྲང་ནས་དམ་ཆོས་བདུད་རྩི་ཡིས།།
དམྱལ་བའི་འཕྲང་གི་ལམ་སྣེ་འགོག་པར་ཤོག
བདག་སོགས་དཀར་པོ་དགེ་བར་རབ་མོས་པའི།།
གངས་ཅན་པ་ཡིས་བསོད་ནམས་གང་སྒྲུབ་པ།།
རྒྱལ་དབང་ཕྱག་ན་པད་མོའི་ཐུགས་བཞེད་ཀུན།།
ལྷུན་གྱིས་འགྲུབ་པའི་རྒྱུ་རུ་བསྔོ་བར་ཤོག
དེ་ལྟར་གསོལ་འདེབས་གདུང་ཤུགས་དྲག་པོ་ཡིས།།
མཆོག་གསུམ་ཐུགས་རྗེ་རིང་ནས་བསྐུལ་བའི་མཐུས།།
བདག་ཅག་གངས་ཅན་བོད་ཀྱི་རྒྱལ་ཁམས་ནས།།
འཛམ་གླིང་ཀུན་ལ་བདེ་ལེགས་ཁྱབས་པར་ཤོག
ཁྱེད་ཀྱི་ཐུགས་སྨོན་བཞིན་འགྲུབ་གྱུར་ཅིག།
སངས་རྒྱས་སྐུ་གསུམ་བརྙེས་པའི་བྱིན་རླབས་དང་།།
ཆོས་ཉིད་མི་འགྱུར་བདེན་པའི་བྱིན་རླབས་དང་།།
དགེ་འདུན་མི་ཕྱེད་དད་པའི་བྱིན་རླབས་ཀྱིས།།
བསྔོ་བ་སྨོན་ལམ་ཡོད་ཚད་གྲུབ་པར་ཤོག།
སྙན་ངག་མཁན་མོའི་བསམ་དོན་འགྲུབ་པའི་མཐུན་གྱུར་དུ་དོལ་སྨྱོན་ནས་ཕུལ།
ཇི་སྲིད་སྐལ་བ་མ་འཇིག་དེ་སྲིད་དུ།།
འགྲོ་བའི་རྨོངས་མུན་སེལ་བའི་འོད་དཀར་ཅན།།
༸ལྷ་གཅིག་ཕྱག་ན་པདྨོ་༸གོང་ས་མཆོག།།
འགྲོ་བའི་མུན་སེལ་དཔལ་དུ་བཞད་རྒྱུར་ཅིག།།
ཡངས་པའི་ས་གཞི་མ་ལུས་པ།།
ཤ་དང་རུས་པའི་ཡོངས་སུ་ཁེངས་པ་དང།།
ཆུ་ཆེན་ཁྲག་ལ་བསྒྱུར་བའི་མི་སྡུག་པ།།
བོད་ཡུལ་ས་ཆེན་འདི་ནས་གཙང་སེལ་ཤོག།།
ལག་ཏུ་འཕྲེང་པ་ཐོགས་པའི་རྒན་པོའི་སར།།
མེ་མདའི་མཆུ་རིང་གཏད་པའི་དམག་ལུ་དང་།།
མ་ཎི་གདངས་ལ་གྱེར་བའི་དོ་ཟླ་རུ།།
བོའུ་སྐད་བརྒྱབས་གྲགས་པ་ལ་སོགས་རྩ་ཡལ་ཤོག།།
ཐོག་མར་བཀུར་འོས་རྡོར་དབང་ལགས་སུ་ཐུགས་རྗེ་ཆེ་ཞུ་བ་དང།
བཀུར་འོས་དྲ་གྲོགས་རྣམ་པར་གུས་མོ་དུས་ཐོག་ཏུ་མ་འབྱོར་བར་དགོངས་གལ་མེད་པ་ཞུ།
བཀུར་འོས་དྲ་གྲོགས་རྨ་ཆུ་སྐལ་བཟང་ལགས་ཕེབས་ནས་ཐུགས་སྨོན་གནང་བར་བཀྲིན་ཆེ།
བཀུར་འོས་དྲ་གྲོགས་དོལ་སྨྱོན་ལགས་ནས་སྨོན་ལམ་མཐུན་འགྱུར་གནང་བར་བཀྲིན་ཆེ་ཞུ་བ་ཡིན།
བཀུརའོས་དྲ་གྲོགས་ཨ་འདུས་མིག་ཆུ་ལགས་ནས་སྨོན་ཚིག་མཐུན་འགྱུར་གནང་བར་བཀྲིན་ཆེ་ཞུ་བ་ཡིན།
ཨོཾ་འགྲུབ་པར་གྱུར་ཅིག སྲས་བཅས་རྒྱལ་བའི་ཞིང་སྦྱོང་སྨོན་ལམ་དང་། །རྗེས་མཐུན་བསམ་སྦྱོར་བཟང་པོའི་དགེ་བའི་མཐུས། །མཐོང་ཐོས་དྲན་རེག་འགྲོ་བ་མ་ལུས་པ། །སྲིད་ལས་རྣམ་གྲོལ་བྱང་ཆེན་མྱུར་ཐོབ་ཤོག །དྲི་མེད་པས། །
ཡེ་ཤེས་སྤྱན་ལྡན་སངས་རྒྱས་འཕགས་པའི་ཚོགས། །གནས་སྐབས་གདོངས་གྲོགས་འཇིག་རྟེན་དྲེག་པའི་ཚོགས། །བཙན་བཤེད་ཅན་གྱི་རྒྱ་དམར་དཔུང་ཚོགས་རྣམས། །བརྩེ་བའི་ངང་ནས་བསམ་གླིང་བསམ་འགྲུབ་མཛོད།
བཀུར་འོས་དྲ་གྲོགས་དྲི་མེད་ལྷག་བསམ་ལགས།
ཕེབས་པར་འཚམས་འདྲི་དང། སྨོན་ལམ་གྱི་མཐུན་འགྱུར་གནང་བར་བཀྲིན་ཆེ་ཞུ་བ་ཡིན།
བཀུར་འོས་དྲ་གྲོགས་འབྲོང་བུ་སོག་ཚ་ལགས།
ཕེབས་པར་འཚམས་འདྲི་དང། སྨོན་ལམ་གྱི་མཐུན་འགྱུར་གནང་བར་བཀྲིན་ཆེ་ཞུ་བ་ཡིན།
ཡི་ཤེས་སྤྱན་ལྡན་འཕགས་པའི་ཚོགས་རྣམས་མཐུས།།
བཙན་ཤེད་ཅན་གྱི་རྒྱ་དམར་དཔུང་གི་ཚོགས།།
སྡུག་པའི་བསམ་པ་ཞི་ནས་རང་གཞན་ཀུན།།
བདེ་ལ་འཁོད་པའི་བྱམས་སེམས་སྐྱེས་པ་ཤོག
བསམ་གླིང་ལགས་ནས་བསམ་གླིང་གི་རིགས་རུས་མདོར་བསྡུས་ཤིག་གསུང་རྒྱུ་བྱུང་བར་ཞུ་བ་འབུལ། །
བཀུར་འོས་དྲ་གྲོགས་དྲི་མེད་ལྷག་བསམ་ལགས། མ་གཞི་བྱས་ན་རིགས་རུས་དེ་གལ་ཆེན་པོ་གང་ཡང་མེད་པར་འདོད་ཀྱི་འདུག འོན་ཀྱང་དྲ་གྲོགས་ཉིད་ནས་བཀའ་འདྲི་གནང་ན། གཅིག་བྱས་ན་ཉན་རིན་ཡོད་པ་ཞིག་དང་། གཅིག་བྱས་ན་ཉན་རིན་གང་ཡང་མེད་པ་ཞིག་ཡོད། གུས་མོས་སྐབས་གཞན་ཞིག་ལ་ངོ་སྤྲོད་ཞུ་རྒྱུ་ཡིན།
དྲི་མེད་ལྷག་བསམ་འདིས། བསམ་གླིང་ཚེ་རིང་ལྷ་མོའི་རིགས་རུས་སོགས་དྲིས་ཡོང་གི་འདུག དེས་ཅི་བྱེད། མག་པ་འགྲོ་ངེས་ཡིན་པས། བསམ་གླིང་ཚེ་རིང་ལྷ་མོ་ངས་ཁྱོད་ལ་ངོ་སྤྲོད་བྱེད། མོ་རིང་བསམ་གླིང་རྡོ་རྗེ་ཕག་མོ་ཟེར་བ་དེའི་སྤྲུལ་སྐུ་རེད། ད་ལོ་དགོངས་ལོ་ཉེར་དྲུག་རེད། པེ་ཅིན་མི་རིགས་སློབ་གྲྭ་ཆེན་མོ་ན་རིག་གནས་རབ་འབྱམས་པ་སྦྱང་བཞིན་པའི་སྒང་རེད། མོ་རིག་པ་ཡག་ལ། ངག་སྒོ་ཡངས་པ། ད་དུང་ཕོ་བརྒྱའི་སེམས་པ་ཤོར་འགྲོ་བའི་སྐྱེས་གཟུགས་ཡོད་པ་རེད། འོན་ཀྱང་གནའ་སྔ་མོ་ནས་འཁོར་བ་ལ་ཞེན་པ་ལོག་ནས། ངེས་འབྱུང་གིས་རྒྱུ་བྱས་ནས་རབ་ཏུ་བྱུང་ཡོད་པ་རེད་ཟེར་ནས། ངའི་གྲོགས་པོ་ཞིག་གིས་ང་ལ་ངོ་སྤྲོད་བྱས་སོང་། ངའི་གྲོགས་པོ་ཁོང་ཡང་པེ་ཅིན་མི་རིགས་སློབ་གྲྭ་ཆེན་མོ་ན་ཡོད་པ་རེད། དེ་ཙམ་ཡིན། མང་པོ་ཤེས་འདོད་ན་ངས་དེ་ལས་མང་ཙམ་དྲིས་ནས་གནས་ཚུལ་ཁ་གསལ་བཀོད་ཡོང་།
བསམ་གླིང་ཚེ་རིང་ལྷ་མོའི་ཚིག་བཅད་སྙིང་རྗེ་བོ་བྲིས་འདུག འོན་ཀྱང་སྙན་ངག་མེ་ལོང་གི་སྐྱོན་སེལ་ལྟར་ན། སྐྱོན་རྩ་ནས་མེད་པ་མིན་ཏེ། གོང་གི་ཚིག་བཅད་ཁ་ཤས་དེའི་ནང་ན་ལྷ་དང་ལྷ་མོ་ཟེར་བ་དེ་མང་དྲག་འདུག ཕལ་ཆེར་ཚིག་བཅད་རེ་རེ་ལ་ལྷ་དང་ལྷ་མོ་ཟེར་བ་དེ་ཡང་ཡང་བྲིས་འདུག སྒྲ་རྒྱན་ནི་མ་རེད། ཟུང་ལྡན་ནི་མ་རེད། གང་ཤེས། མོ་རང་ལྷ་དང་ལྷ་མོ་མང་ས་ཞིག་ཏུ་སླེབས་པའམ། ཡང་ན་ལྷ་དང་ལྷ་མོ་ཟེར་བའི་མིག་ཚིག་དེ་གོང་ཁེ་པོ་བྱས་ནས་རེག་པ་ཡིན་ས་རེད། ཧཧཧ
འོ་མ་རེད་མ་རེད། བསམ་གླིང་ཚེ་རིང་ལྷ་མོ་འདི་པེ་ཅིན་ནས་ཡིན་ས་མ་རེད། འདིའི་ཡི་གེ་ཚང་མའི་མགོ་ན་བཀུར་འོས་དང་བཀུར་འོས་མང་པོ་འདུག བཀུར་འོས་དང་བཀུར་འོས་ཟེར་བ་འདི་རྡ་རམ་ས་ལའི་བོད་སྐད་ཅིག་ཡིན་ས་ཡོད། ཕལ་ཆེར་འདི་ཡང་རྡ་རམ་ས་ལ་ཡིན་ན་ཅིག་ནས་ཡིན་ས་རེད་ཀོ
རྒྱལ་སྲས་སྨོན་ལམ་གངྒྰའི་ཀླུང་རྣམས་ནི། །
དམ་ཆོས་འཛིན་པའི་སྨོན་ལམ་ནང་འདུས་པར། །
གསུངས་ཕྱིར་དགེ་རྩ་ཇི་སྙེད་བསགས་པ་གང་། །
ཀུན་ཀྱང་ཐུབ་བསྟན་རྒྱས་པའི་ཆེད་དུ་བསྔོ། །
སེམས་ཅན་ཐམས་ཅད་བདེ་དང་ལྡན་གྱུར་ཅིག །
ངན་འགྲོ་ཐམས་ཅད་རྟག་ཏུ་སྟོངས་པ་དང་། །
བྱང་ཆུབ་སེམས་དཔའ་གང་ན་སུ་བཞུགས་པ། །
དེ་དག་ཀུན་གྱི་སྨོན་ལམ་འགྲུབ་གྱུར་ཅིག །
བསམ་གླིང་ལྷ་མོ་ལགས། ང་ནི་རིགས་རུས་དང་སྐུ་དྲག་སྐོར་ལ་དཔྱད་པ་བྱེད་པར་དགའ་མཁན་ཞིག་ཡིན། །འོན་ཀྱང་རིགས་རུས་ཀྱི་གཙང་གཙོག་གི་བསམ་བློས་སྒོ་ནས་དཔྱད་པ་མིན། རིགས་རུས་སུ་ཞིག་ཡིན་ནའང་རང་རང་གི་རིན་ཐང་ཡོད་པས་མཐོ་དགའ་དམའ་གནོན་ནི་ནོར་འཁྲུལ་ལ་ངོས་འཛིན་བྱེད་གྱིན་ཡོད། མི་རིགས་ཀྱི་་འབྱུང་ཁུངས་དང་། རང་རེའི་བོད་ཀྱི་སྤྱི་ཚོགས་ཀྱི་གྲས་སུ་སྡོད་མཁན་ཚོའི་གནས་ཚུལ་དང་། མི་རིགས་རིགས་པའི་ལོ་རྒྱུས་ཤེས་འདོད་པས་སོ། །
གཞོན་ནུ་ཟླ་མེད་ལགས། །བཀའ་ལན་གནང་བ་ལ་ཐུགས་རྗེ་ཆེ། ཉིད་ཀྱིས་གསུང་པའི་བསམ་གླིང་ཟེར་བ་དེ། བསམ་ལྡིང་རྡོ་རྗེ་པག་མོ་ཡིན་ནམ། དེ་ཡིན་ན་ཤངས་པ་བཀའ་བརྒྱུད་ཀྱི་གདན་ས་ཆེན་པོ་གཉིས་ཀྱི་ཡ་གྱལ་ཡིན་པས་ང་ལ་ཡང་དུང་པ་ཡོད། ཤངས་པའི་བླ་མ་གོང་མ་ཚོ་ས་དེར་སླེབས་དུས་མཁའ་འགྲོ་གཉིས་མ་སྨད་ཀྱི་རྣམ་པས་རྗེས་སུ་བཟུང་རབས་ཀྱི་ལོ་རྒྱུས་མང་། ཁྱོད་ཀྱིས་ཀྱང་ཐུག་པ་ཕོར་རེ་ཨེ་རག་ལྟོས་དང་རྗེས་སུ་བཟུང་ཡོང་། །ང་ཡང་དེ་ལ་དགའ། མ་གཞི་ང་ལ་ད་དུང་ལྟ་སྤྱོད་མཐུན་པའི་གྲོགས་མོ་ཞིག་ཐོབ་མ་སོང་། །མག་པར་བཞག་ཀྱང་འཔྲོད་མིན་མི་ཤེས། དགོས་པའི་དུས་ཀྱང་ཡོད་སྲིད། །ཉིད་ཀྱིས་འབད་བརྩོན་གནང་བར་བཀའ་དྲིན་ཆེ། སྐུ་ཚེ་རིང་། །
བསམ་གླིང་བུ་མོ་གདུང་བས་ཆེར་གཡོས་པའི།།
སྙན་པའི་ངག་རིག་སྨོན་པའི་གདང་ཅན་གྱི།།
དགོས་འདུན་ཚིག་ལ་མཆོག་གསུམ་སྙན་མ་སྲ།།
རེ་བའི་འདུན་མ་མདུན་དུ་མངོན་རྒྱུག་ཤོག།
བཀུར་འོས་ཞུས་ན་གཞན་གོང་དུ་བཀུར་བའི་དོན་ལས། རྡ་སར་སྐད་དེ་འདྲ་བརྒྱབ་པ་ཞིག་གོ་མ་བྱུང་ལགས།
བཀུར་འོས་གཞོན་ནུ་ཟླ་མེད་ལགས། སྐུ་ཉིད་ནས་གུས་མོ་ངོ་སྤྲོད་ཡག་པོ་ཞིག་གནང་འདུག
ཐུགས་རྗེ་ཆེ།
ཡང་ང་རང་ནས་ངོ་སྤྲོད་ཁ་སྣོན་ཞིག་ཞུས་ན། ཆུང་དུས་ལྷ་སྒྲུང་ཀློག་རྒྱུ་མང་དྲགས་ནས་དེང་སང་ཡང། སྣང་བར་འཆར་ཚད་ཀྱང་ལྷ་དང་ལྷ་མོ་རེད་འདུག
བཀུར་འོས་སྐུ་ཞབས་ཀླུ་སྨྱོན་ལགས་ནས། སྨོན་ལམ་གྱི་མཐུན་རྒྱུར་རྩ་ཆེན་ཞིག་གནང་བར་ཐུགས་རྗེ་ཆེ།
བཀུར་འོས་དྲ་གྲོགས་དྲི་མེད་ལྷག་བསམ་ལགས། སྐུ་ཉིད་ཀྱི་མཚན་དེ་རང་ལ་དཔྱད་པ་ཙམ་གྱིས། རིགས་རུས་མཐོ་དགའ་དམའ་གནོན་དང། ཕྱོགས་འཛིན་གནང་མཁན་མིན་པ་ཞིག་གསལ་ལྷང་ངེར་རྟོགས་ལགས།
གོང་ཞུས་བཞིན་གུས་མོས་སྐབས་གཞན་ཞིག་ལ་ངོ་སྤྲོད་རྒྱས་ཙམ་བྱ་ངེས་ཡིན་ལགས། དེ་ཡང་སྤོབས་པ་དང་གསང་བ་གང་ཡང་མིན། དེ་དུས་ཞུས་ན་བྲོ་བ་ཆེ་བ་ཡོང་རྒྱུ་རེད་སྙམ་པ་ལགས།
གུས་ཕུལ།
བཀུར་འོས་དྲ་གྲོགས་ཆོས་གྲུབ་ལགས་ནས། སྙན་ཚིག་གི་ལེགས་སྐྱེས་ཤིག་གནང་བར་བཀྲིན་ཆེ།