མཁའ་འགྲོ་དགྱེས་པའི་གད་རྒྱང་མི་རྐང་གླིང་བུ་ཞེས་བྱ་བ། །

ཤྲྰི་སྨྱོན་ཨེ་མ་ཧོས།

ན་མོ་གུ་རུ་བུདྡྷ་ཛྙྰ་ན་པདྨ་ཀ་ར་ཡེ། །

ལྷན་སྐྱེས་ཆོས་སྐུའི་མཁའ་འགྲོ་ཀུན་བཟང་གི་བདག་མོ། །
སྔགས་སྐྱེས་ལོངས་སྐུའི་མཁའ་འགྲོ་བདེ་ཆེན་གྱི་རྒྱལ་མོ། །
ཞིང་སྐྱེས་སྤྲུལ་སྐུའི་མཁའ་འགྲོ་རྣམ་འདྲེན་གྱི་དབང་མོ། །
ཡེ་ཤེས་མཁའ་འགྲོའི་ཚོགས་ལ་སྒོ་གསུམ་གྱིས་འདུད་དོ། །

བཅོམ་ལྡན་ཐུབ་དབང་ཀུན་བཟང་ཆོས་མཆོག་གི་རྒྱལ་པོ། །
རྡོ་རྗེ་འཆང་དབང་ཕྱོགས་དུས་རྒྱལ་སྲས་ཀྱི་བདག་པོ། །
པདྨ་ཀ་ར་གསང་ཆེན་རིག་འཛིན་གྱི་དཔང་པོ། །
ཀུན་འདུས་བླ་མ་ཡིད་བཞིན་ནོར་བུ་ལ་འདུད་དོ། །

དཀོན་མཆོག་རིན་ཆེན་གསུམ་གྱི་སྣང་བ་དང་མ་བྲལ། །
ལྷར་བཅས་འགྲོ་བའི་མཆོད་གནས་སྡོམ་གཙང་གི་སྐྱ་སེར། །
ང་རྒྱལ་ངོམ་ཆོས་མེད་པའི་འདོད་ཆུང་གི་བླ་མ། །
གསུམ་ལྡན་རྡོ་རྗེ་འཛིན་རྣམས་སྙིང་དབུས་ནས་འདུད་དོ། །

ཉེར་གཅིག་ཏྰ་ར་ལ་སོགས་ཡེ་ཤེས་ཀྱི་མཁའ་འགྲོ། །
ཞིང་སྐྱེས་སྤྲུལ་པའི་ཚོགས་ལ་སྒོ་གསུམ་གྱིས་བཏུད་ནས། །
མཁའ་མཉམ་འགྲོ་བའི་ལས་ཉོན་གཞན་དབང་གི་སེམས་ཅན། །
མི་ཚངས་སྤྱོད་པའི་སྒྲིབ་གཉིས་རྣམ་དག་ཏུ་སྨོན་ནོ། །

ཉོན་མོངས་རང་མཚན་སྤངས་པ་མཁས་གྲུབ་ཀྱི་ཁྱད་ཆོས། །
དུག་ལྔ་ཅི་དགར་སྤྱོད་པ་སྤྱི་མཐུན་གྱི་འགྲོ་དྲུག །
ལྟ་བ་མ་རྟོགས་ཐོ་ཅོའི་སྤྱོད་པ་དག་མཐོང་ཚེ། །
ཐོལ་བྱུང་དོ་ཧ་མི་འཐེན་རང་དབང་ཞིག་མ་བྱུང་། །

ཐེག་ཆེན་སེམས་བསྐྱེད་འགྲོ་དྲུག་ཕ་མ་ཡི་རང་བཞིན། །
མ་ཤེས་དྲིན་དྲན་མན་ངག་བདུན་ལྡན་ཞིག་མཁྱེན་ན། །
མ་རྒན་མི་ཚངས་སྤྱོད་པ་དུད་འགྲོ་ཡི་ངང་ཚུལ། །
བསམ་ན་ཚངས་སྤྱོད་གནས་པར་དཀའ་ལས་རང་མེད་ཐལ།

གསང་ཆེན་བསྟན་པར་མ་མོ་མཁའ་འགྲོ་ཞེས་སྣང་བར། །
དག་མཉམ་བདེན་པས་སྣང་གྲགས་རིག་པ་རུ་གོ་བས། །
བསྐྱེད་རྫོགས་དམ་པས་སྣང་སྲིད་རྣལ་འབྱོར་ལ་སྤྱོད་པ། །
ཐབས་ལམ་ཟླ་བྲལ་སྤྱོད་ན་བླ་མེད་ཀྱི་བརྟུལ་ཞུགས། །

དངོས་རིག་ལས་ཀྱི་ཕྱག་རྒྱའི་གསང་ལམ་ཞིག་ཡོད་ཀྱང་། །
སྙིགས་དུས་བསོད་ནམས་ཟད་པའི་སྐལ་ངན་ཚོ་བསམ་ཚེ། །
བདུད་བཞིའི་གཞན་དབང་མ་གྱུར་འཕགས་ཆེན་རྣམས་མ་གཏོགས། །
བདེ་ཆེན་ཡེ་ཤེས་བརྙེས་པར་ཉིན་སྐར་ལས་དཀོན་ཐལ། །

འདུལ་ཁྲིམས་བསྟན་པ་ཉམས་པའི་དུས་ངན་གྱི་སྐབས་སུ། །
འདུལ་ལུང་སྡེ་བཞི་སྒྲུང་གཏམ་ཡམས་ལ་བཞག་ནས། །
དགའ་བྲིད་བདུད་ཀྱིས་བསླུས་པ་ཉུང་ཉུང་ཞིག་མ་མཐོང་། །
རྒྱལ་འགོང་དམ་སྲིའི་བསླུས་པའི་རང་རྟགས་ཞིག་སྟོན་ཐལ། །

སྐད་ཅིག་ཟག་བདེའི་འདོད་པ་ཡིད་ཡུལ་ལ་བླངས་ནས། །
གྲངས་མེད་བསྐལ་བའི་ངན་སོང་སྡུག་བསྔལ་དེ་བརྗེད་ན། །
དྲན་ཤེས་བག་ཡོད་ཉམས་པའི་ཚུལ་འཆལ་དུ་ཐལ་བས། །
ལྷ་བདུད་གང་སྣང་རང་བློ་རང་ཉིད་ལ་དྲིས་ཞིག །

འཁོར་བར་དགྲ་བགེགས་མཐོང་བའི་ངེས་འབྱུང་ཞིག་མེད་ན། །
མྱང་འདས་སྐུ་ཆས་གྱོན་པ་རྟགས་ཙམ་གྱི་བསྟན་འཛིན། །
འདོད་སྲེད་མེ་ལྟར་འབར་བའི་ལས་ཉོན་ལ་བསམ་ཚེ། །
ཐབས་གྲོལ་ཡེ་ཤེས་ཡོད་མེད་ལྐོག་གྱུར་ཞིག་མིན་ཐལ། །

འདོད་ཆགས་ལས་ཀྱི་རྒྱ་མཚོ་ཆེས་ཆེར་རུ་འཕེལ་ནས། །
འདོད་རྔམས་ལན་ཚྭའི་ཆུ་བཞིན་ངོམས་མེད་དུ་སྤྱོད་ན། །
མུ་མེད་འཁོར་བའི་གནས་ལས་ཐར་ཐབས་ཞིག་མེད་པས། །
རང་ཉིད་རང་གིས་བསླུ་བའི་མགོ་སྐོར་དེ་མ་གནང་། །

ཞེན་འཛིན་ཆགས་པའི་སེམས་ཀྱི་ཨ་ལུང་གི་རྟེན་འབྲེལ། །
དགའ་བྲིད་བདུད་ཀྱི་ལྕགས་ཀྱུས་དབང་མེད་དུ་བཟུང་བས། །
གཟུང་འཛིན་ལྕགས་སྒྲོགས་དམ་པོས་གཞན་དབང་དུ་གྱུར་ནས། །
ཉེ་འཁོར་བཅུ་དྲུག་འདམ་དུ་དྲངས་བར་རང་འགྱུར་རོ། །

ཐར་མེད་འཁོར་བའི་རྒྱ་མཚོ་སྡུག་བསྔལ་གྱི་དོང་རིང་། །
མི་འདོད་རང་གིས་ཉོས་པའི་རྣམ་སྨིན་དེ་མྱོང་ཚེ། །
ཤུགས་དྲག་འགྱོད་པའི་བློ་ལ་ཡིད་ཆད་ཅིག་ཡོད་ཀྱང་། །
ལས་ཉོན་མནར་བའི་འགྲོ་བར་བཅོས་ཐབས་ཞིག་དཀའ་ཐལ། །

སྒྱུ་ལུས་འབྱུང་བཞིའི་དྭངས་མ་ལུས་བཅུད་ཀྱི་སྙིང་པོ། །
དབང་མེད་ཏིལ་ཙམ་ཤོར་བས་ཁམས་དབང་ཡང་ཉམས་ནས། །
གསང་ཆེན་མཁའ་འགྲོ་སྟོང་གི་ངུ་འབོད་ལ་སོམས་དང་། །
ཡང་གསང་ཧེ་རུ་ཀ་ཡང་དགྱེས་ཐབས་རང་མེད་ཐལ། །

ལས་ཉོན་བུད་མེད་བསྟེན་པའི་སྔགས་གཟུགས་ཀྱི་ཚོགས་རྣམས། །
གནོད་སྦྱིན་ཤ་ཟ་སྲིན་མོ་འགྲོག་པ་ལས་ཐུ་བ། །
འདི་ཕྱི་གཉིས་མེད་ངོ་ཚ་ཁྲེལ་མེད་དུ་གྱུར་ནས། །
ངན་སོང་སྡུག་བསྔལ་དགའ་བའི་བླུན་པོ་ཞིག་སྲིད་དམ། །

ཀུན་མཁྱེན་རྒྱལ་བའི་གསུངས་ལ་གུས་བཀུར་ཅིག་ཡོད་ན། །
འདུལ་ཁྲིམས་ཉིས་བརྒྱ་ལྔ་བཅུར་ཐུགས་བསམ་ཞིག་བཞེས་དང་། །
རྩ་བ་ཡན་ལག་ཉམས་པའི་ཕམ་ལྷག་གི་ཉེས་ལྟུང་། །
སྡོམ་ཤོར་ཚུལ་ཁྲིམས་ཉམས་པ་ག་ཚོད་ལ་ཕྱིན་ཐལ། །

ཚུལ་འཆལ་ཉེས་པ་སྡེ་སྣོད་གསུམ་པོ་རུ་གསལ་ཞིང་། །
ཁྲིམས་ལྡན་དགེ་བར་བསྟན་འགྲོའི་ཕན་བདེ་རུ་གསུངས་ན། །
ལེགས་ཉེས་དཔྱོད་པའི་ཤེས་རབ་དྲི་མེད་ཅིག་བསྟེན་ནས། །
བླ་དོར་མ་ནོར་འབད་འབྲས་རང་དོན་ལ་སོམས་ཞིག །

སངས་རྒྱས་གཉིས་པའི་རྒྱལ་ཚབ་ཀུན་མཁྱེན་གྱི་ཡབ་སྲས། །
སྨིན་གྲོལ་ཡོན་ཏན་ལྡན་པའི་རྣལ་འབྱོར་ཞིག་ཡིན་ན། །
ཐབས་གྲོལ་ཡེ་ཤེས་གང་བསྟེན་བདེ་ཆེན་གྱི་མཁའ་འགྲོ། །
དམ་གཙང་ཨུ་དུམ་ཝྰ་ར་ཞིང་གཞན་དུ་མེད་ཐལ། །

འདི་སྨྲས་དགེ་བས་བདག་གཞན་མཁའ་ཁྱབ་ཀྱི་སེམས་ཅན། །
ཚེ་རབས་ཀུན་ཏུ་ཚུལ་ཁྲིམས་རྣམ་དག་ཏུ་གྱུར་ནས། །
ཏིང་འཛིན་གཡོ་མེད་ཤེས་རབ་དྲི་མེད་ཀྱི་སྣང་བ། །
ནམ་ཡང་མི་ཉམས་དམ་ཚིག་རྣམ་དག་ཏུ་སྨོན་ནོ། །

(ཞེས་པ་འདི་ཡང་རབ་རྒྱན་ལྕགས་སྟག་སྨིན་ཟླའི་རྫོགས་པ་དང་པོར་ཟིན་བྲིས་ཞིག་གིས་

རྐྱེན་ལས་ཅི་འཆར་དུ་ཤྲྰི་སྨྱོན་ཨེ་མ་ཧོས་དབྱིན་གླིང་ལྷག་ལྷའི་རི་ཁྲོད་ནས

ཕུལ་བ་དགེའོ། །ཤྲྰི་སརྦ་ལོ་ཀ་བི་ཛ་ཡནྟུ། །)