མ་བཅོས་སྒེར་གྱི་རང་གཤིས།

རྩོམ་པ་པོ། བླ་མ་བསྟན་འཛིན་དབང་རྒྱལ།

 
མ་བཅོས་རྣལ་མའི་སེམས་ཀྱི་རང་གཤིས་དེ་ནི་རང་རྒྱུད་ཡར་རྒྱས་འགྲོ་བའི་རྨང་གཞི་ཞིག་ཡིན་པས་དེ་ལ་སྣང་མེད་དང་མཐོང་ཆུང་ནམ་ཡང་བྱེད་མི་རུང་བ་ཡིན། འགྲོ་བ་མི་ཡི་ལུས་སེམས་ཀྱི་བདེ་ཐང་དང་ཡར་རྒྱས་ཀྱི་རྩ་བ་ཙམ་དུ་མ་ཟད། ཆོས་ཕྱོགས་ནས་གསུངས་པའི་རང་རྒྱུད་འདུལ་བ་དང་སྨིན་པ་དང་གྲོལ་བ་གསུམ་ཡང་དེར་ཐུག་ཡོད། གང་ཟག་སོ་སོའི་རྣལ་མའི་སེམས་ཀྱི་རང་གཤིས་ལ་བརྩི་བཀུར་མ་བྱས་པར་གཞན་དབང་སྟབས་བསྟུན་གྱི་མི་ཚེ་སྡུག་གིས་བཙོན་པ་བཞིན་བསྐྱལ་བའི་སྐྱེས་བུ་མང་པོ་ཡོད་པ་ནི་ཤིན་ཏུ་ཡིད་སྐྱོ་བའི་གནས་ཞིག་ཡིན།
དཔེ་འགའ་ཞིག་ཞུས་ན། འཛམ་གླིང་ཤར་ཕྱོགས་ཀྱི་རྒྱལ་ཁབ་མང་པོ་ཞིག་ཏུ་ཁྱིམ་ཚང་ཕ་མའི་ཡོང་འབབ་ཀྱི་ཚོང་ལས་གང་ཡིན་པ་དེ་དང་འབྲེལ་བའི་ཤེས་ཡོན་ཞིག་དང་བསྟུན་ཏེ་བཙན་དབང་གིས་ཕྲུ་གུ་ལ་སློབ་སྦྱོང་བྱེད་དུ་འཇུག་པ་ལས། གང་ཟག་སོ་སོའི་སྒེར་གྱི་གཤིས་དང་སེམས་ཁམས་ཀྱི་ནུས་པ་ལ་མ་བསྟུན་ནས་བཙན་དབང་གིས་སློབ་སྦྱོང་བྱེད་པའི་རྐྱེན་གྱིས་ནང་མི་བུ་ཕྲུག་གི་དབར་དཀའ་ངལ་ཤིན་ཏུ་ཆེ།

མཚམས་རེ་དཀའ་ངལ་བཟོད་དཀའ་བས་ཕྲུ་གུ་རང་མེད་གཏོང་མཁན་ཀྱང་མང་པོ་ཡོད།། ང་ཚོའི་བོད་པའི་སྤྱི་ཚོགས་གསར་རྙིང་གང་ལའང་ཆ་བཞག་ན་ཁྱིམ་ཚང་ནང་མི་རེ་ནས་བུ་རེ་རེ་ལུས་སེམས་ཀྱི་འཚར་ལོངས་ཆ་ཚང་མ་བྱུང་སྔོན་དུ་ཕ་མའི་འདོད་དབང་གིས་དགོན་པར་བཅུག་པ་དང་རྗེས་སུ་ལོ་ན་སོན་པའི་སྐབས་སུ་ཡང་རང་ངོས་ནས་འདོད་མོས་ཡོད་མེད་ལ་མ་བསྟུན་པར་བཙན་དབང་གིས་མུ་མཐུད་ནས་དགོན་པར་སྡོད་དགོས་པ་དང་རབ་བྱུང་དང་དགེ་སློང་གི་སྡོམ་པ་ཞུ་དགོས་པ་སོགས་མཐོང་རྒྱུ་ཡོད། མཚམས་རེར་བྱི་ལའི་སྐྱག་པ་རྡོ་ཐོག་འཁེལ་ཞེས་པའི་དཔེ་ལྟར་འགའ་རེར་དགེ་འདུན་པ་ཚད་ལྡན་སྐྱབས་སུ་འགྲོ་ཆོག་པ་ཞིག་ཀྱང་ཡོང་གི་ཡོད་པ་ཞུ་མ་དགོས།

དེ་བས་མང་པོ་ཞིག་ནི་ཕྱི་ལ་དགེ་འདུན་པའི་གོས་གྱོན་པ་ཙམ་ལས་ནང་ན་འདུལ་ཁྲིམས་གཙང་མ་མེད་པ། རྫུན་གྱི་ལུས་ལ་བདེན་པའི་འབག་བྱོན་ནས་མི་ཚེ་ཡར་མེད་མར་མེད་བར་དོའི་རྣམ་ཤེས་ལྟར་འཕྲོ་བརླག་འགྲོ་མཁན་ཡང་མང་པོ་མཐོང་། ཁྱད་པར་དུ་གྲྭ་བཙུན་མང་དག་ཅིག་དེང་སང་དགོན་པར་མི་གནས་པར་ཁྱིམ་པའི་འཇིག་རྟེན་གྱི་ཁྲོད་དུ་གནས་སྡོད་གནང་མཁན་རྣམས་ལ་དཀའ་ངལ་ཆེན་པོ་ཡོད། འགའ་ཤས་མི་དཀྱུས་མ་ལས་ཀྱང་ཀུན་སྤྱོད་ངན་པའང་མང་པོ་མཐོང་། འདོད་པ་མེད་ཀྱང་གྲྭ་བཙུན་མུ་འཐུད་ནས་དགོས་པའི་རྒྱུ་མཚན་གཙོ་བོ་ནི་གཞན་དབང་སྟབས་བསྟུན་གནང་ནས་བཞུགས་དགོས་པ་དེ་ཡིན། དཔེར་ན། རང་གི་དགེ་རྒན་ལ་འཇིགས་པ་དང་ཕ་མའི་སེམས་མི་ཕམ་པའི་ཐབས་དང་། སྤྱི་ཚོགས་ཀྱི་དམའ་འབེབས་ལ་དྭོགས་པ་དང་། དཀོར་དང་གདུལ་བྱ་སོགས་མི་ཐོབ་བསམ་པ་སོགས་ལ་བརྟེན་ནས་མི་འདོད་བཞིན་དུ་དགེ་འདུན་གྱི་གྲལ་དུ་མུ་མཐུད་ནས་བཞུགས་མཁན་མང་པོ་ཡོད། དེ་དག་ལ་ཡང་ཐུགས་ཁག་ཡོད་མ་རེད། འདི་ཁོང་རྣམ་པ་ཁོ་ནའི་སྐྱོན་མིན། ང་ཚོ་བོད་ཀྱི་སྤྱི་ཚོགས་ཀྱི་བསམ་ཚུལ་དང་ལྟ་སྟངས་ལས་བྱུང་བ་ཡིན་པས་དེ་རིགས་འགྱུར་བ་ཞིག་གཏོང་དགོས་པ་ཤིན་ཏུ་གལ་ཆེ་བ་མཐོང་། སྤྱི་ཚོགས་ནང་གི་ནུས་ཤུགས་དང་བསམ་ཡོད་ཕུག་རྒྱང་མཐོང་མཁན་གྱི་བླ་མ་དང་དཔོན་པོ་རྣམས་མཉམ་འབྲེལ་གྱིས་དེ་ལྟར་གནང་ཐུབ་པའི་རེ་བ་ཆེན་པོ་བཅང་བཞིན་ཡོད།།

ཡང་དེ་དང་འབྲེལ་བའི་སྐྱོན་གཞན་ཞིག་ལ། ང་ཚོ་བོད་ཀྱི་ཆོས་བརྒྱུད་ཁག་གི་བསམ་ཚུལ་དང་ལྟ་སྟངས་ནང་གྲྭ་བ་མ་བྱུང་སྐྱ་སར་བབས་ན། མཐོང་ཆུང་དང་དམའ་འབེབས་བྱེད་སྲོལ་ཡོད་པ་འདི་ལ་ཡང་བསྐྱར་དུ་ཐུགས་བཞེས་ལེགས་པར་གཏོང་དགོས་པ་གལ་ཆེན་པོར་མཐོང། ལྟ་ཚུལ་འདི་ཡིས་སྤྱི་ཚོགས་ལ་ད་བར་ཕན་པའི་ལམ་བཀག་ཅིང་གནོད་པའི་སྒོ་མང་པོ་ཕྱེས་ཡོད་པ་དངོས་ཡོད་གནས་ཚུལ་རེད། སྐྱེས་བུ་སོ་སོའི་རང་གཤིས་བཟང་པོའི་རིན་ཐང་དང་། ལོ་མང་རིང་རྣམ་དཀར་གྱི་དགེ་བར་འདུན་ཏེ་དགོན་པའི་སྒྲིག་ཁྲིམས་ཁུར་ཞིང་ཚོགས་བསགས་ཉམས་ལེན་བྱས་པར་མཐོང་སྟངས་དང་། སྤྱི་ཚོགས་ལ་ཞབས་ཞུ་བསྒྲུབས་པའི་ལས་ཀ་དང་ཉམས་མྱོང་ལ་བརྩི་བཀུར་དང་། ཐོས་བསམ་སྒོམ་གསུམ་གྱི་སྒོ་ནས་བཀའ་རབ་འབྱམས་པ་དགེ་བའི་གཤེས་གཉེན་ཆེན་མོའི་མཚན་རྟགས་ཐོབ་པ་ལ་གདེང་འཇོག་ཚད་དང་མཐུན་པ་གང་ཡང་མེད་པར་གྲྭ་བའི་སྡོམ་པ་ཉམས་པ་དང་མཉམ་དུ་མི་ཚེ་ཧྲིལ་པོར་སྦྱངས་པའི་ཡོན་ཏན་ཀུན་ཉམས་ནས་མེད་པར་ཕྱིན་པའི་མཐོང་ཚུལ་འདི་ཤིན་ཏུ་ཐབས་སྐྱོ་བ་དང་སྤྱི་ཚོགས་ལ་གྱོང་གུད་ཆེན་པོ་ཞིག་ཡིན་པ་སྨྲོས་མི་དགོས།

དེང་སང་ནུབ་ཕྱོགས་སུ་ཆོས་བརྒྱུད་ཚང་མའི་ནང་དུའང་རང་གི་འདོད་མོས་ཀྱི་ལམ་ནས་སྐྱ་སར་བབས་པའི་གྲྭ་བ་དང་བཙུན་མ། བླ་མ་དང་སྒྲུབ་དཔོན། མཁན་པོ་དང་དགེ་བཤེས་མང་པོ་མཐོང་། ཁོང་རྣམ་པའི་སེམས་ལ་ནག་ཉེས་ཅན་གྱི་ཚོར་སྣང་དང་རང་ཁོངས་སྤྱི་ཚོགས་ནས་མར་བུད་པའི་ཚོར་སྣང་སོགས་ཡོང་གི་ཡོད། རང་གི་མི་ཚེར་བསགས་པའི་ཡོན་ཏན་དང་ལེགས་ཆ་རྣམས་རྩལ་དུ་བཏོན་ནས་ལས་ཀ་བྱེད་འདོད་ཡོད་ཀྱང་། རང་ཁོངས་ཆོས་བརྒྱུད་དང་སྤྱི་ཚོགས་ཀྱིས་རྒྱབ་རོགས་མེད་པ་ཙམ་མ་ཟད་དངོས་ཤུགས་གཉིས་ཀའི་ཐོག་ནས་སྐྱོན་བརྗོད་གནང་བའི་རྐྱེན་གྱིས་སེམས་ཀྱི་ནུས་པ་ཞུམ་ནས་རང་གི་ལུས་ངག་ཡིད་གསུམ་གྱི་བྱ་བ་གང་སྒྲུབ་པ་ལ་བར་ཆད་མང་པོ་ཡོང་བ་མཐོང་། འདི་ནི་ང་ཚོའི་སྤྱི་ཚོགས་འདིར་མཁོ་གལ་དང་ཕན་རླབས་ཆེ་བའི་མི་སྣ་མང་པོ་ཞིག་འཕྲོ་བརླག་འགྲོ་དང་འགྲོ་བཞིན་པ་མཐོང་བ་ནི་ཤིན་ཏུ་ཡིད་ཕམ་པའི་གནས་ཡིན།

དེས་ན་ང་ཚོའི་སྒེར་དང་སྤྱི་ཚོགས་ཀྱི་བསམ་ཚུལ་དང་ལྟ་སྟངས་ལ་འགྱུར་བ་གནང་རྒྱུ་ཤིན་ཏུ་གལ་ཆེན་པོ་མཐོང་། གལ་སྲིད་སྤྱི་ཚོགས་ཀྱི་བསམ་ཚུལ་དེ་ལས་ལྡོག་སྟེ་རྒན་པས་སློབ་གསོ་དང་ལམ་སྟོན། ཕ་མས་བྱམས་བརྩེ་དང་སེམས་གསོ། སྤྱི་ཚོགས་ནས་རོགས་སྐྱོར་སོགས་གནང་པ་ཡིན་ན་སྐྱེས་བུ་དེ་རྣམས་ཀྱིས་བསྟན་དང་འགྲོ་བའི་དོན་དུ་ལས་འགུལ་མང་པོ་སྤེལ་ཐུབ་པ་དང་། རང་ཁོངས་སྡེ་དགོན་དང་སྤྱི་སྒེར་གྱི་བདེ་སྐྱིད་ལ་ཕན་པ་ཆེན་པོ་འབྱུང་བ་ཞུ་མ་དགོས་པ་རེད། དེས་ན་མ་བཅོས་རྣལ་མའི་སེམས་ཀྱི་རང་གཤིས་ལ་བརྩི་བཀུར་བྱས་ན་གོང་ཞུས་ཀྱི་གནས་ཚུལ་དེ་དག་ཡོང་དགོས་དོན་མེད།

ངོས་ཀྱི་མི་ཚེའི་ཉམས་མྱོང་ལས་ཞུས་ན། ཆུང་བྱིས་པའི་དུས་སུ་དམིགས་གསལ་གྱི་གྲྭ་བ་བྱེད་འདོད་ཀྱི་བསམ་ཚུལ་ཤུགས་ཆེན་གང་ཡང་མེད། དེ་བས་འཁོར་བ་བཟུང་བསམ་པ་དང་བུ་ཕྲུག་སྐྱོང་བསམ་པའི་འཆར་གཞི་གང་ཡང་མེད། འོན་ཀྱང་བསྐོས་པའི་ལས་ལ་བྲོས་པའི་ཐར་པ་མེད་ཅེས་པའི་དཔེ་ལྟར། ད་ལྟ་བུ་ཕྲུག་གི་ཕ་དང་བཟའ་ཟླ་ཞིག་དང་ལྷན་དུ་དོན་ལྡན་གྱི་འཚོ་བ་ཞིག་རོལ་བཞིན་པ་འདི་ལ་དགའ་བ་ལས་འགྱོད་དགོས་པ་གང་ཡང་མེད། རང་ཉིད་སྔོན་ལས་བཟང་པོའི་མི་ཚེ་འདིའི་ནང་དགེ་རྒན་བཀའ་དྲིན་ཅན་གྱི་དྲུང་ནས་སློབ་སྦྱོང་དང་དགེ་བཤེས་གྱི་མཚན་རྟགས་ཆེན་མོའི་བསོད་སྐལ་མཆོག་དུ་ཐོབ་པ་དང་། ཆུང་དུས་ནས་བྱམས་སྙིང་རྗེའི་བཤད་ཁྲིད་ཞུས་ནས་སྔོན་འགྲོ་བསགས་སྦྱངས་སོགས་བྱས་པའི་བྱིན་རླབས་ཆེ་ཡང་། རང་ཉིད་ལ་ཕ་མ་བུ་ཕྲུག་བར་གྱི་བརྩེ་གདུང་ལས་བྱུང་བའི་འབྲེལ་བ་ཟབ་མོ་འདི་ཡང་ཉམས་ལེན་གལ་ཆེན་པོ་ཞིག་ཀྱང་ཆགས་ཡོད།
ཕ་མ་བུ་ཕྲུག་གི་འབྲེལ་བ་ཟབ་མོ་འདི་ནི་འཇིག་རྟེན་འདི་ཡི་འགྲོ་བ་ཀུན་གྱི་ཕྱོགས་རིས་དང་ཆོས་ཀྱིས་མ་བཅིངས་པ། དབང་སྟོབས་ཆེ་ཆུང་དང་ཕྱུག་དབུལ་གྱི་ནུས་པས་ལྷད་མ་ཞུགས་པ། མི་རིགས་དབྱེ་འབྱེད་མེད་པའི་དུང་བ་མ་བཅོས་པའི་འབྲེལ་བ་ཡང་དག་པ་འདི་ནི་རིན་ཐང་ཅན་ཡིན་པར་ཞུ་མ་དགོས་པ་རེད། ཆོས་ཕྱོགས་ནས་འདི་ལ་ཞེན་ཆགས་དང་འཛིན་པ་རེད་བརྗོད་ལོས་ཆོག། སྤྱིར་ན་བཟང་ངན་གྱི་རྟོག་པ་གཉིས་ཀ་ཞེན་པ་དང་། སྟོང་ཉིད་རྟོགས་པའི་རྗེས་དཔག་ཀྱང་ཞེན་པ་ཡིན་པས་ཞེན་པ་ཡིན་པ་ཙམ་གྱི་སྡུག་རྒྱུ་གང་ཡང་མེད། ཁྱིམ་ཚང་ཕ་མའི་འབྲེལ་བ་འདི་ནས་ཀྱང་རང་རྒྱུད་ལ་སྔར་དགོན་པའི་ཉམས་མྱོང་ལས་ཕན་པ་མ་ཆེ་ནའང་མི་ཆུང་བ་ཞིག་ཏན་ཏན་བྱུང་བའི་ཚོར་སྣང་བྱུང་།

རང་ལ་ཉམས་ལེན་དུ་འགྲོ་ཚུལ་ནི་བཟའ་ཚང་ཕན་ཚུན་བར་གྱི་ཚིག་མཐོ་དམན་ཤོར་བ་ལ་བཟོད་སྒོམ། ལས་མཐོ་དམན་བྱུང་བ་ལ་མཐུན་ལམ། རྒྱུ་ལ་ཆགས་ཞེན་ཆེ་བའི་སྐབས་སུ་གཏོང་ཕོད། དུས་བཟང་ངན་གྱི་དགའ་རོགས་དང་སྡུག་རོགས། སེམས་འགྱུར་བའི་དྭོགས་འཆར་དང་ཐེ་ཚོམ་སྐབས་སུ་ཡིད་ཆེས་སོགས་ཆོས་ཀྱི་མིང་ཆེན་པོ་དང་སྙན་པོ་མེད་ཀྱང་། ཁ་ཡོད་ལག་ཡོད་ངོ་ཐོག་གི་མྱོང་ཚུལ་འདི་རྣམས་རང་གཤིས་མ་བཅོས་པ་དང་འབྲེལ་བ་དེ་ལ་ཉམས་ལེན་དུ་བརྩིས་ནས་ངན་པ་ལ་འགྱུར་བ་གཏོང་རྒྱུ་དང་། བཟང་པོ་ཡར་རྒྱས་གང་ཐུབ་གཏོང་ཐུབ་ན་རང་རྒྱུད་གོང་འཕེལ་འགྲོ་བའི་ཉམས་ལེན་དེ་རེད།།
གཞུང་ལུགས་རྣམས་ལས་རྒྱུན་དུ་རྒྱུད་འདུལ་བ་དང་རྒྱུད་སྨིན་པ་དང་རྒྱུད་གྲོལ་བ་སོགས་གསུངས་ཀྱི་ཡོད་པའི་རྒྱུད་དེ་ནི་སྒེར་གྱི་གཤིས་ཀ་ཞིག་ལ་གསུང་གི་ཡོད། མ་བཅོས་རྣལ་མའི་རང་གཤིས་དེ་ལ་འགྱུར་བ་གཏོང་ཐུབ་ན་ཆོས་ཀྱི་ཉམས་ལེན་གལ་ཆེན་པོ་ཆགས་ཀྱི་ཡོད། ཡིན་ལུགས་ཀྱི་རང་རྒྱུད་དང་འབྲེལ་བ་མེད་ཅིང་དེ་མིན་རང་བཟོ་བྱེད་པའི་ང་འཛིན་ཞིག་གིས་མི་ངོས་ལ་ཆོས་དང་ཉམས་ལེན་གྱི་རྣམ་འགྱུར་བསྟན། བདེ་སྐྱིད་མེད་པའི་གཞན་དབང་སྟབས་བསྟུན་གྱི་མི་ཚེ་བསྐྱལ་ན་བློ་ཕམ་ཆེན་པོ་རེད། དཔེར་ན། མ་ཚོར་བའི་སྡུག་བསྔལ་དང་མ་མཐོང་བའི་སེམས་ཅན་ལ་དམིགས་ནས་སྙིང་རྗེ་ཆེན་པོ་སྒོམ་གྱི་ཡོད་མདོག་གིས་ཙམ་གྱིས་དུས་ཚོད་མང་པོ་ཞིག་བསྐྱལ་ཀྱང་རང་གཞན་གང་ལའང་ཕན་པ་དེ་ཙམ་ཨེ་ཡོད་བསམ།

སྔོན་ནས་འབྲེལ་བ་ཡོད་པའི་ནང་མི་དང་ངོ་ཤེས་རྣམས་ལ་སྡང་སེམས་དང་རྒྱུས་མེད་འབྲེལ་མེད་ཀྱི་སེམས་ཅན་ཐམས་ཅད་ལ་སྙིང་རྗེ་སྒོམ་གྱི་ཡོད་མདོག་བྱེད་ན་ཕན་པ་ཨེ་ཡོད་བསམ། རྒྱུ་མཚན་ནི། མ་བཅོས་པའི་རང་གཤིས་སམ་རང་རྒྱུད་དང་འབྲེལ་བ་དང་ཚོར་བ་མེད་པའི་ཉམས་ལེན་ཡིན་པས་སོ། །དེང་སང་བྱང་ཆུབ་སེམས་དང་གཞན་ཕན་བྱེད་ཅེས་པའི་ཚིག་འདི་ནི་མཐོ་དམན་ཚང་མའི་ཁ་ལ་མ་ཎི་བགྲང་བགྲང་ཡིན་པ་དང་། མ་བཅོས་སྒེར་ཐོག་གི་སེམས་ཟུག་དང་དཀའ་ངལ་འཕྲད་དུས་གཞན་ཕན་ཕར་བཞག་གཞན་གྱི་བསམ་ཚུལ་མི་མཐུན་པ་ཙམ་ལའང་གུས་བཀུར་ཐོག་ནས་ཉན་ཙམ་ཡང་མི་ཐུབ་པ་མང་པོ་མཐོང་།

མ་བཅོས་རྣལ་མའི་སེམས་ཀྱི་རང་གཤིས་བཟང་ངན་གང་ཡིན་པའི་ཀུན་རྫོབ་ཤེས་བྱའི་ཡིན་ལུགས་དེ་ལ་གདོང་ལེན་དང་ལེགས་ཆ་མཐོང་དགོས་པ་གལ་ཆེ། དཔེར་ན། སྤྱིར་བཏང་ང་ཚོའི་བསམ་ཚུལ་ཕལ་ཆེ་བ་ལ། བཟང་ངན་གཉིས་རང་བཞིན་གྱི་འགལ་བ་ལས་ང་ཚོའི་ལྟ་སྟངས་ལ་ཐུག་པར་མི་མཐོང་། ངན་པ་ཅི་ལྟར་ཡིན་རུང་དེ་ལའང་ལེགས་ཆ་ཞིག་དང་བཟང་པོ་ཇི་ལྟར་ཡིན་རུང་དེ་ལ་ཡར་རྒྱས་གཏོང་སའི་གོ་སྐབས་ཡོད་པ་སོགས་ལ་དོ་སྣང་ཡོད་མཁན་དཀོན་པོ་རེད།། གང་ཟག་སོ་སོའི་དགའ་སྡུག་གི་ཚོར་སྣང་དེ་ཡང་ཀུན་རྫོབ་ཤེས་བྱའི་ཡིན་ལུགས་ཤིག་ཡིན་པ་དང་དེ་ངོ་ཤེས་ནས་མདོ་སྔགས་སེམས་གསུམ་གྱི་ཐབས་ཟབ་མོ་སྤང་སྒྱུར་གྲོལ་བའི་ལམ་ནས་ཉམས་ལེན་བྱ་རྒྱུ་ནི་ཞུ་མ་དགོས་པ་རེད།། དེ་ལྟར་མ་ནུས་ན་ཡང་རང་གི་མ་བཅོས་པའི་ལུས་ངག་ཡིད་གསུམ་ཀྱི་སྤྱོད་ཚུལ་དང་ཟུག་རྣམས་ངོས་ལེན་བྱས་ནས་དེ་ཡི་རྒྱུ་ཕལ་ཆེ་བ་རང་གཞན་གྱི་མཐུན་འབྲེལ་ལ་ཐུག་གི་ཡོད་པས་དེ་ལ་དོ་སྣང་གནང་དགོས་པ་གལ་ཆེ། འོན་ཀྱང་ང་ཚོས་དེ་ལྟར་མི་ཐུབ་པ་ཙམ་མ་ཚད་ལྷག་བསམ་རྣམ་དག་གི་ཐོག་ནས་ཨེ་ཐུབ་ལྟ་མཁན་ཡང་དཀོན་པོ་རེད།

བོད་པའི་སྤྱི་ཚོགས་ནང་ངོ་གདོང་ཐུག་ནས་བཟང་ངན་གྱི་སྐད་ཆ་སྤྱི་དང་ཁྱད་པར་དུ་ཡུན་རིང་བསགས་པའི་སེམས་ཀྱི་ན་ཟུག་དང་། བསམ་ཚུལ་མི་མཐུན་པ་རྣམས་ངོ་གདོང་ཐུག་ནས་ཕན་ཚུན་ལ་གུས་བཀུར་ཐོག་ཁ་བརྡ་གནང་མཁན་ཤིན་ཏུ་དཀོན་པོ་རེད། འདི་ཡང་ཕན་ཚུན་སྒེར་གྱི་ཚོར་སྣང་ལ་བརྩི་བཀུར་མེད་པ་དང་ངོ་མ་ཤེས་པའི་རང་རྒྱུད་ཀྱི་ང་འཛིན་ཆུང་རུ་གཏོང་མ་ཐུབ་པའི་རྟགས་རེད། འདི་ཡིས་ང་ཚོ་བོད་ཀྱི་མཐོ་དམན་གྱི་སྤྱི་ཚོགས་ཚང་མའི་ནང་གནོད་པ་ཆེན་པོ་ཡོང་གི་ཡོད། དཔེར་ན། བླ་མ་དང་བླ་མའི་དབར། དཔོན་པོ་དང་དཔོན་པོའི་དབར། ནུས་ཤུགས་ལྡན་པའི་སྤྱི་ཚོགས་ཀྱི་འགོ་ཁྲིད་དབར། ཆུང་ས་ལ་ཕ་མ་སྤུན་གཉེན་ཕན་ཚུན་དབར་བདེ་སྡུག་གི་དཀའ་ངལ་དང་ཁྱད་པར་དུ་འདས་པའི་སེམས་ཚོར་གྱི་ན་ཟུག་རྙིང་པ་རྣམས་འབྲེལ་ཡོད་ལ་ངོ་ཐུག་ནས་བཤད་མི་ཐུབ་པ་དང་། ལྐོག་ཏུ་རང་དང་བློ་མཐུན་པའི་ཉེ་སྐོར་གྱི་མི་རྣམས་དང་ནང་ཚགས་ཡིན་ཁུལ་གྱིས་ལྐོག་ལབ་གནང་བ་དང་། ཡང་ན་མང་ཚོགས་ནང་གཏམ་བཤད་སོགས་ཀྱི་སྐབས་ཞར་དང་ཞོར་ནས་ཐད་ཀར་བརྗོད་མ་ནུས་པའི་སེམས་ཀྱི་ན་ཟུག་རྣམས་དབང་མེད་ཀྱི་ངག་ལམ་ནས་ཟུར་རྒྱག་ཡང་ཡང་ཤོར་བ་དེ་དག་གིས་རྐྱེན་བྱས་ནས་གཤམ་འོག་མི་མང་དབར་དུམ་བུ་ཐོར་ནས་གདབ་གསེག་ཆེན་པོ་དངཕྱོགས་རིས་ཀྱི་གཞིར་ཆགས་ཀྱི་ཡོད། ཞབས་འོག་ངོ་དགའ་ཅན་གྱི་མི་ངན་བསམ་མེད་རྣམས་ཀྱིས་ཀྱང་དེ་ལ་གོ་སྐབས་བཟུང་ནས་རང་ཁེ་གཞན་ཕམ་གྱི་ཀུན་སློང་ངན་པས་སྒྲོ་བཏགས་ནས་དོན་མེད་ཀྱི་འཆལ་གཏམ་ཆེ་རུ་བཟོ་གི་ཡོད།

དེ་དག་གི་རྐྱེན་བྱས་ནས་ང་ཚོའི་སྤྱི་ཚོགས་ནང་། ཆོས་ལུགས་དང་ཆོལ་ཁ། ཕ་ཡུལ་དང་ལུང་ཚན་སོགས་ཀྱི་ཕྱོགས་རིས་ཆེ་རུ་འགྲོ་གི་ཡོད་པ་དང་། བོད་རིགས་ཕན་ཚུན་དབར་ཡུན་རིང་གསོ་མི་ཐུབ་པའི་སེམས་ཀྱི་ན་ཟུག་རྣམས་ཀྱང་དེ་ལས་བྱུང་། འགྱུར་བ་གཏོང་བའི་ཐབས་ལམ་ནི། ང་ཚོའི་འགོ་ཁྲིད་རྣམས་ཀྱི་ནང་ཕན་ཚུན་དབར་མ་བཅོས་སྒེར་གྱི་སེམས་ཀྱི་ཚོར་སྣང་། སྙིང་གི་ན་ཟུག་རྣམས་ངོ་ཤེས་ནས་གྲོལ་ཐབས་ལ། མཐོ་ས་ཕན་ཚུན་དབར་གདོང་ཐུག་ནས་བཀའ་མོལ་བརྗེ་ལེན་དགོས་པ་གལ་ཆེ། དེ་ལྟར་མ་བྱུང་ན་མ་འོངས་ཡུན་རིང་དམངས་ཁྲོད་དུ་དོན་མེད་ཀྱི་དཀའ་ངལ་མང་པོ་འཕྲད་དང་འཕྲད་བཞིན་པ་རྣམས་ཇེ་ཆེ་ཇེ་ཆེ་འགྲོ་རྒྱུ་ངེས་པ་རེད། གཞན་ཡང་ཕན་ཚུན་དབར་ལ་འདས་པ་མ་ཉེན་པའི་གཞན་སྐྱོན་རྣམས་བཤད་རྒྱུ་ཉུང་རུ་གཏོང། ད་ལྟ་རང་གི་མ་བཅོས་པའི་སེམས་ཀྱི་བློ་ཕམ་གྱི་ཚོར་སྣང་དང་སྙིང་གི་ན་ཟུག་རྣམས་གུས་བཀུར་ཐོག་ནས་ཕན་ཚུན་ཐད་ཀར་གང་ཐུབ་ཞུ་རེས་བྱེད། གཞན་གྱི་དཀའ་ངལ་དང་ན་ཟུག་རྣམས་ངོས་བཟུང་ནས་བྱམས་བརྩེས་ཐོག་ནས་གསན་བསམ་ཐུབ་པ་དང་། སེམས་དང་སེམས་ཀྱི་དབར་འབྲེལ་བ་འཇོག་ཐུབ་པ་དང་། ཕན་ཚུན་དབར་ལ་ལྐོག་ནས་སྐྱོན་བརྗོད་ཟུར་ཙམ་ཡང་གླེང་སློང་མི་བྱ་བ་སོགས་ནི་ཐབས་ཤེས་གལ་ཆེ་བ་ཡིན།།

དེང་སང་བོད་ཀྱི་སྤྱི་ཚོགས་ནང་དགོན་པ་ང་ཆེ་ཁོ་ཆེ་དང་གྲྭ་བ་ང་མང་ཁོ་མང་སོགས་ཀྱི་ཆགས་སྡང་བསམ་མནོ་འདི་འདྲ་ཡོད་བཞིན་པའི་སྐབས་སུ་མི་དམངས་ཕལ་གྱི་འཚོ་གོས་དང་དཔལ་འབྱོར། སློབ་སྦྱོང་དང་འཕྲོད་བསྟེན། ཁྱད་པར་དུ་བྱིས་པ་དང་བུད་མེད་ཀྱི་འཕྲོད་བསྟེན་སོགས་ལ་དོ་སྣང་གནང་མཁན་ཉུང་ཉུང་ཡིན་པ་འདི་བློ་ཕམ་གྱི་གནས་རེད།

བོད་ཆོས་ལྡན་གྱི་རིག་གཞུང་ཞིག་ཡིན་པའི་ཆ་ནས་དམངས་ཀྱི་དཀའ་ངལ་ལ་སྙིང་རྗེས་ཕན་ཐོགས་དགོས་ཀྱང་དེ་ལ་སྙིང་ནས་དོ་སྣང་གནང་མཁན་གྱི་བླ་མ་དང་དཔོན་པོ་དེ་ཙམ་མ་མཐོང་།། དགོན་པའི་བདེ་སྐྱིད་ནི་མི་དམངས་ཀྱི་བདེ་སྐྱིད་དང་མི་དམངས་ཀྱི་བདེ་སྐྱིད་ནི་དགོན་པའི་བདེ་སྐྱིད་ཡིན། འདི་གཉིས་ཀྱི་དབར་དཔལ་འབྱོར་དང་དབང་ཚད་ཀྱི་ནུས་པ་ཆ་མི་མཉམ་པའི་ཁྱད་པར་ཆེན་པོ་འགྲོ་དང་འགྲོ་བཞིན་པ་འདི་ཡིས་མ་འོང་པར་ང་ཚོའི་སྤྱི་ཚོགས་ནང་དཀའ་ངལ་ཆེན་པོ་འཕྲད་སྲིད།

རང་ཉིད་ཀྱི་རེ་བ་ཆེ་བ་ཞིག་ལ། ཆོས་ལུགས་དང་ཆོལ་ཁའི་ཕྱོགས་རིས་མེད་པའི་ང་ཚོའི་བོད་ཀྱི་འགོ་ཁྲིད་གཞོན་པ་རྣམས་དང་། ཁྱད་པར་དུ་གནའ་དེང་གི་ཤེས་ཡོན་ལྡན་པའི་བླ་སྤྲུལ་ནུས་པ་ཅན་རྣམས་ཀྱིས་མི་དམངས་ཀྱི་བདེ་དོན་ལ་དོ་སྣང་ཆེ་རུ་འགྲོ་བའི་རེ་བ་ཆེན་པོ་ཞུ་བཞིན་ཡོད། ཡར་མཆོད་པ་དང་མར་སྦྱིན་པའི་དབར་ཁྱད་པར་ཆེན་པོ་མི་ཤོར་བ་དཔེར་ན་། ཆོས་ཕྱོགས་སུ་དགོན་པ་ལ་དཔལ་འབྱོར་གྱི་འགྲོ་སོང་བཏང་བ་དེ་བཞིན་མི་དམངས་ཀྱི་བདེ་དོན་ལ་དེ་བས་ཀྱང་གཟིགས་སྐྱོང་གནང་བའི་རེ་བ་ཆེན་པོ་ཡོད། དེ་ལྟར་གནང་མཁན་རྣམས་ནི་སྐྱ་སེར་ཀུན་གྱི་རྗེས་སུ་ཡིད་རང་བའི་གནས་དང་། དངོས་ལྡན་གྱི་མིང་དོན་མཚུངས་པའི་ཆོས་པ་ཉམས་ལེན་པ་རེད། ཨ་རིའི་རྒྱལ་སྤྱི་ལིག་མི་རྐྱའི་ཚོགས་གནས་ནས་གུས་བསྟན་འཛིན་དབང་རྒྱལ་གྱིས་བྲིས།།

ཕྱི་ལོ།༢༠༡༦ ཟླ་བ་༡༠ ཚེས་༡༤ ལ།

(ཁྲི་གཡུང་དྲུང་གིས་འོས་སྦྱོར་ཞུས།)