བྱང་ཨ་རིའི་དོན་གཅོད་འཕོ་འགྱུར་ལ་མི་འདོད་པའི་ལས་འགུལ་ལས་འཕྲོས་པའི་གཏམ།

དཔལ་འབྲུག་མོ།

ཐེངས་འདིའི་བྱང་ཨ་རིའི་སྐུ་ཚབ་དོན་གཅོད་འཕོ་འགྱུར་གྱི་གནད་དོན་གྱི་ཐོག་ལ་བོད་པ་འདུས་སྡོད་ས་ཁུལ་གང་སར་མི་འདོད་པའི་རྣམ་འགྱུར་སྟོན་མཁན་དང་། དེ་འགྲིག་མི་འདུག དྲང་བདེན་མ་རེད་ཅེས་བཤད་མཁན་གྲངས་ལས་འདས་མོད། མངོན་གསལ་དོད་པོའི་སྒོ་ནས་ཤོག་སྨྱུག་ལས་བརྒལ་ནས་མདུན་ལ་ཐོན་ཏེ་ངོ་རྒོལ་བྱེད་མཁན་དེ་ཙམ་མི་མང་། ཕྱི་རྒྱལ་ཡུལ་གྲུ་ཁག་གི་བོད་ཀྱི་གཞོན་ནུ་ཚོགས་པ་སོགས་མི་སྒེར་ལ་འདིའི་ཐད་ལབ་གླེང་བརྒྱུད་དུས་ཁོང་ཚོས་ཀྱང་སྲིད་སྐྱོང་གི་བྱེད་ཕྱོགས་ལ་མི་འདོད་པའི་རྣམ་འགྱུར་སྟོན་གྱིན་འདུག   ཡིན་ནའང་ལས་འགུལ་ནང་མཉམ་ཞུགས་བྱས་མ་སོང་། སྤྱིར་ཕྱི་རྒྱལ་ནས་འཚར་བའི་བོད་པ་ཞིག་ཡིན་ན་ནམ་རྒྱུན་ཡང་དག་པ་དང་བདེན་པའི་གནས་ལ་ཕྱོགས་རྒྱུར་དགའ་མོས་བྱེད་མཁན་ཡིན་ཟེར་མོད། ད་ཐེངས་གི་སྤྱོད་སྟངས་ལ་གཞིགས་ན་ཁ་བཤད་དང་ལག་ལེན་མི་མཚུངས་པ་གང་མང་བྱུང་སོང་བ་དེ་བཞིན་ནོ།། གང་ལྟར་ལས་འགུལ་ལ་ཞུགས་མཁན་ཚོ་སྙིང་ཆུང་ལྡིང་ཞོར་ལ་ལས་འགུལ་དུ་ཞུགས། འདི་ལྟ་བུའི་ལས་འགུལ་ལ་ཞུགས་དགོས་པ་ནི་རང་ཉིད་ཀྱི་ཁ་རྒྱབ་ཀྱི་ཆེད་དུ་མིན་མོད། སྲིད་སྐྱོང་བློ་བཟང་སེང་གེ་ཡི་ཕྱོགས་གཏོགས་པ་ཚོས་ནམ་་རྒྱུན་དྲྭ་ལམ་ནས་སྤེན་ཚེའི་རྒྱབ་ཏུ་ལང་མཁན་ཚོ་ལ་ལྟོས་ཤིག་དང་། གསོད་ཀྱི་ཡིན་རབས་སོགས་ཀྱི་འཇིགས་སྐུལ་བྱས་པ། ལས་འགུལ་ནང་ཞུགས་མཁན་གྱི་བུ་མོ་ཚོར་སྨད་འཚོང་མ་དང་རྒྱ་ཁྱི་སོགས་བརྙས་སྨོད་ཚད་བརྒལ་སྣ་ཚོགས་བྱས། མི་ལ་ལ་དེ་ཁོ་ནར་སྐྲག་ནས་ལས་འགུལ་དུ་ཞུགས་གྱིན་མེད་པའང་གསལ་བོ་རེད། གང་ལྟར་དེ་དང་དེ་ལ་སོགས་ཀྱི་གོང་གི་འགོ་ཁྲིད་དབང་ཆ་ལོག་སྤྱོད་དང་ཕྱོགས་གཏོགས་པའི་གླེན་རྟགས་སོགས་ལ་གཞིགས་ན་མཐའ་གཅིག་ཏུ་འདི་ལྟར་བཤད་ཆོག ད་ལྟའི་བློ་སེང་གི་རྗེས་འབྲང་བ་དག་ནི་བདེན་ལུགས་རྒྱབ་ཏུ་བསྐྱུར་པའི་ནག་ཚོགས་ཤིག་དང་ཁྱད་གང་ཡང་མི་འདུག སྲིད་སྐྱོང་གི་ཕྱོགས་གཏོགས་ཚོ་ནི་དྲ་ལམ་ནས་ངོ་གདོང་སྦས་པའི་ནག་ཚོགས་ཀྱི་དྲྭ་འབུ་དག་ལ་ངོས་འཛིན་བྱས་ཆོག

སྤྱིར་ང་ནི་གསར་འགྱུར་གྱི་ལས་རིགས་གཉེར་མྱོང་མཁན་ཞིག་དང་། དེང་སང་གཙོ་བོ་རྩོམ་རིག་གི་ཕྱོགས་སུ་མོས་མཁན་དང་། དེ་ལ་ཧུར་ཐག་གིས་འབད་བཞིན་པའི་སྤྱི་ཚོགས་དྲྭ་ལམ་རྩོམ་པ་པོ་ཞིག་ཡིན།  འདས་པའི་ལོ་ཟླའི་ནང་ལ་ཆབ་སྲིད་ལ་དོ་སྣང་ཟུར་ཙམ་ཡོད་པ་ལས་དེ་ལ་མཉམ་ཞུགས་དང་ཚོགས་སྡེ་གང་རུང་ལ་ཞུགས་ནས་ལས་འགུལ་དང་བྱ་བྱེད་གང་ཡང་བྱེད་མ་མྱོང་། ལྷག་པར་དུ་ཆོལ་ཁའི་འཐེན་འཁྱེར་ལ་དེ་བས་ཀྱང་མོས་མཁན་ཞིག་མིན་པས་མདོ་སྨད་ཀྱི་ས་གནས་རྒྱུན་ལས་ཙམ་ལའང་ཞུགས་མ་མྱོང་། རང་འདོད་ཀྱིས་སྣང་བ་སྐྱིད་པོ་བྱས་ནས་སྒྱུ་རྩལ་རྩོམ་རིག་ཁོ་ན་འཐམས་པ་དེ་འདྲ་ཡིན། འོན་ཀྱང་། སྐད་འཕྲིན་ལ་ཞུགས་རྒྱུར་དགའ་བོ་ཡོད་ལ། སྲིད་དོན་དང་འབྲེལ་བའི་སྐད་འཕྲིན་ཚོགས་པ་ཁ་ཤས་ནང་ཞུགས་པ་ཡིན། 

དེ་དག་གི་བགྲོ་གླེང་ལ་མདོར་བསྡུས་ཙམ་ཉན་པ་ཡིན། སྐབས་དེར་ཏག་ཏག་ཨ་རིའི་སྐུ་ཚབ་དོན་གཅོད་ལས་མཚམས་འཇོག་པའི་བརྡ་ཡིག་དེ་ཁྱབ་ཀྱི་འདུག   མི་མང་གི་སེམས་འཚབ་དྲག་ཏུ་འཕར་བྱུང་ལ་སྐྱེས་ཕོ་མོའི་དབྱེ་བ་མེད་པར་སྲིད་སྐྱོང་བློ་བཟང་སེང་གེས་སྣེ་ཁྲིད་པའི་བཀའ་ཤག་དང་སྲིད་སྐྱོང་ལ་ངོ་རྒོལ་གནང་གི་འདུག སྲིད་སྐྱོང་གིས་ནམ་རྒྱུན་རྒྱལ་བ་རིན་པོ་ཆེའི་བཀའ་གསུང་ཅི་སྒྲུབ་དང་ཐུགས་ཀྱི་བཞེད་དོན་སྒྲུབ་མཁན་ཡིན་ཟེར་བའི་ནམ་འགྱུར་སྟོན་མཁན་ཞིག་ཡིན་མོད། 

ད་ཐེངས་སྲིད་སྐྱོང་གིས་དོན་གཅོད་སྤེན་པ་ཚེ་རིང་ཨ་རིར་བསྡད་པའི་རིང་ལ་སྲིད་སྐྱོང་གི་དངུལ་འབོར་ས་ཡ་གཅིག་དང་ཕྱེད་ཀའི་བུ་ལོན། ལྐོག་ཟ་རུལ་སུངས་ཀྱི་བྱ་སྤྱོད་མང་པོ་འཐེར་འདོན་བྱེད་ཨེ་ཡོང་ངམ་སྙམ་པའི་འཚེར་སྣང་གིས་ཁུངས་ལུང་མེད་པའི་བཀའ་ཤག་གི་དོན་ཚན་བཅུ་ཞེས་བསྒྲགས་གཏམ་ཞིག་སྤེལ་ནས་ཨ་རིའི་དོན་གཅོད་གནས་འབྱུང་བཏང་བ་མ་ཟད་དྲྭ་ལམ་ཁག་དུ་ཁྱབ་བསྒྲགས་བྱས། དེ་དུས་མི་མང་གི་ངོས་ནས་དོན་ཚན་བཅུ་ཡི་ནང་དོན་དེ་ལྟ་བུ་ཙམ་གྱིས་མི་བུ་བྱས་རྗེས་ཅན་ཞིག་གནས་འབྱུང་གཏོང་དགོས་པ་ལ་ཐུག་མི་འདུག་ཅེས་མ་འཐད་པའི་རྣམ་འགྱུར་གྱིས་ལས་འགུལ་སྣ་མང་སྤེལ། ལྷག་པར་དུ་སྲིད་སྐྱོང་བློ་བཟང་སེང་གེ་སྐྱོད་སའི་བོད་མི་གནས་པའི་ཕྱི་རྒྱལ་གྱི་ཡུལ་ལུང་གང་སར་སྤེལ་བ་དང་། དྲྭ་ལམ་ནས་ཀྱང་མི་འདོད་པའི་དཔྱད་བརྗོད་རྩོམ་ཡིག་གང་མང་སྤེལ་དགོས་བྱུང་། ད་དུང་དེར་མ་ཟད་དོན་གཅོད་ཟུར་བ་སྤེན་པ་ཚེ་རིང་ལགས་ཀྱིས་ཀྱང་དོན་ཚན་བཅུ་ལ་བདེན་དཔང་ཁུངས་སྐྱེལ་དང་བཅས་གསར་འགོད་གསལ་བསྒྲགས་ཀྱིས་གསལ་བཤད་གནང་། 

མི་མང་ཚོས་དངོས་གནས་བློ་སེང་དྲང་བདེན་མ་རེད་ཅེས་སྐད་འབོད་གནང་མཁན་ཇེ་མང་ནས་ཇེ་མང་དུ་གྱུར། བློ་བཟང་སེང་གེ་ཡི་ཕྱོགས་གཏོགས་པ་ཕ་ཡུལ་གཅིག་ཡིན་ཟེར་མཁན་ཁ་ཤས་ཀྱིས་ཞེན་ཁོག་སྐམ་པོའི་དྲྭ་ལམ་གྱི་ཚོགས་པ་སོགས་ནས་སྲིད་སྐྱོང་ལ་ངོ་རྒོལ་གནང་མཁན་ཚོར་གསོད་ཀི་ཡིན་སོགས་འཇིགས་སྣང་སྐུལ་བ་དང་། དྲྭ་ལམ་ནས་ཀྱང་པར་རྫུན་དང་མིང་རྫུན་བཀོལ་བའི་དྲྭ་འབུ་ཁ་ཤས་ཀྱིས་སྲིད་སྐྱོང་གི་བྱ་བྱེད་ངན་པར་མི་འཐད་པའི་རྣམ་འགྱུར་སྟོན་མཁན་གྱི་ཨ་ཅག་ཚོའི་པར་རེ་རེར་བཏོན་ཏེ་དོལ་རྒྱལ་བ་དང་རྒྱ་ཁྱི་རེད་ཟེར་བའམ། ཡང་ན་སྨད་བཙོང་མ་རེད་ཟེར་བ་སོགས་ཚིག་ངན་བྲིས་པ་དང་། མཐའ་ན་ཨ་ཅག་དེ་ཚོའི་བྱིས་པའི་ཨ་ཕ་སུ་དང་གང་ཡིན་པ་སོགས་ལའང་ཇུས་གཏོགས་ཀྱིས་འཆལ་གཏམ་བཀྲམ། དེ་དང་དེ་ལ་སོགས་པ་ཡི་བློ་བཟང་སེང་གེ་ལ་རྒྱབ་སྐྱོར་བྱེད་མཁན་དྲྭ་འབུ་དག་ནི་དྲྭ་ལམ་གྱི་ནག་ཚོགས་མིན་ན་ཅི། གང་ལྟར་ད་རུང་གྱོན་པ་རྫིག་པོ་རེ་གྱོན་ནས་བོད་མི་འཛོམས་སར་ཇ་ཁ་ཆང་ཁ་ཡི་ཁ་བརྡ་ཙམ་ལས་བཤད་མི་ཤེས་པའི་ཁ་བདེ་བློ་བཟང་སེང་གེ་ངོ་མ་ཚར་སོང་། ཁོ་བ་བོད་ཀྱི་ལོ་རྒྱུས་ཀྱི་སྒང་གི་ནག་ཉེས་ཅན་པ་ཆགས་སོང་། ཁོའི་བྱ་སྤྱོད་ཀྱིས་ཆོལ་ཁ་གསུམ་དཀྲུགས་སོང་། མ་ཟད་གྲོགས་དང་གྲོགས་མོའི་མཛའ་སེམས་ཀྱང་བརླགས་སོང་། མཐའ་ན་ཁྱོ་ག་ཁམས་པ་ཡིན་ན་སྐྱེས་དམན་ཨ་མདོ་ཡིན་མཁན་གྱི་བཟའ་ཚང་ཀྱང་གཏོར་སོང་། དེ་ལྟ་ནའང་ཁོ་ད་རུང་ཕྱིའི་ངོ་བོ་ནས་རྫིག་མདོག་རེ་སྟོན་ཞོར་ཕ་ཡུལ་གཅིག་པ་དང་ཁོ་ལ་གནས་སྐབས་རེ་དགོས་པའི་གཞུང་ཞབས་པ་རྐུབ་སྟེགས་འཛིན་མཁན་གྱི་རང་གཅེས་པ་ཁ་ཤས་ལ་བརྟེན་ནས་གནས་སྐབས་རང་འཚོ་འདུག   

མ་འོངས་པར་ལོ་རྒྱུས་ནང་དུ་དུས་རབས་ཉེར་གཅིག་པར་རྒྱལ་དབང་སྐུ་ཕྲེང་བཅུ་བཞི་བ་དང་བཀའ་ཁྲི་ཟུར་བ་ཟམ་གདོང་རིན་པོ་ཆེ་སོགས་ཀྱིས་ཞི་བདེ་ལྷིང་འཇགས་དང་། འཛམ་གླིང་ལའང་བཙན་བྱོལ་བོད་གཞུང་ཞེས་ངེས་དོན་གྱི་ཚད་མཐོན་པོ་ཡོད་པའི་དུས་སྐབས་ལ་བློ་བཟང་སེང་གེ་ཞེས་པའི་སྲིད་སྐྱོང་བཀྲ་མི་ཤིས་པ་ཞིག་བྱུང་མྱོང་ཡོད་པ་རེད་ཅེས་ལོ་རྒྱུས་ཡིག་ཚང་དུ་འགོད་ཡོང་བ་གདོན་མི་ཟ། དེ་ནི་ངས་བྲིས་པའི་རྩོམ་ཡིག་འདི་ལྟ་བུས་ཀྱང་་ཁག་ཐེག་བྱེད་ངེས། ཡིན་ནའང་དེ་ལ་རྐྱེན་བྱས་ནས་བོད་འབངས་ཚོའི་སེམས་པ་ཁོ་ཆད་དགོས་མ་རེད། བློ་བཟང་སེང་གེ་ཚར་བ་རེད་མ་གཏོགས་བཙན་བྱོལ་བོད་གཞུང་ཚར་ཡོད་མ་རེད་ལ། ཚར་ཡང་སྲིད་པ་མ་རེད། མ་ཟད་དེ་ལས་ཇེ་བརྟན་དུ་འགྲོ་གི་རེད། རྒྱུ་མཚན་ནི་ད་ཐེངས་ཀྱི་དམངས་གཙོའི་ཚད་བཀོལ་ནས་སྲིད་སྐྱོང་གི་བྱ་བྱེད་མ་འགྲིག་པ་ལ་རྣམ་འགྱུར་མངོན་གསལ་དོད་པོ་ཐོན་པ་དེས་མ་འོངས་པར་བཙན་བྱོལ་བོད་གཞུང་ལ་སྲིད་སྐྱོང་གསར་བ་ག་འདྲ་ཞིག་སླེབས་པ་ཡིན་ནའང་དྲང་བདེན་གྱི་སྒོ་ནས་སྲིད་དབང་སྐྱོང་རྒྱུར་ཕན་གྱི་རེད། རྒྱུ་མཚན་མི་མང་ཀློའུ་མ་རེད། ཉན་བྱེད་ཀྱི་རྣ་བ་དང་དཔྱོད་བྱེད་ཀྱི་ཀླད་པ་ཡོད་རེད། དེ་བས་རྐྱེན་ངན་གྲོགས་སུ་འགྲོ་ཟེར་བའི་དཔེ་ཡོད་པ་བཞིན་མ་འོངས་པའི་བཙན་བྱོལ་བོད་གཞུང་ནི་དྲང་བདེན་དང་འོད་སྟོང་ལྡན་པ་ཞིག་ཆགས་པའི་རེ་བ་ཡོད། མཇུག་མཐར། ༸གོང་ས་རྒྱལ་བ་རིན་པོ་ཆེའི་སྐུ་ཚེ་ཁྲི་ལོར་བརྟན་པར་སྨོན། 

༢༠༡༨/༢/༡