འདབ་པ་ཚེ་དབང་མགོན་པོ།
སྤྱིར་བོན་པོ་ཞེས་པའི་ཐ་སྙད་འདི་ནི། ལོ་ངོ་ཉིས་སྟོང་གི་གོང་ནས་བྱུང་བའི་བརྡ་ཆད་ཅིག་ཡིན་པ་མ་ཟད། དོན་གྱི་འཇུག་ཡུལ་ཡང་ཤིན་ཏུ་ནས་ཁྱབ་ཆེ་བ་ཞིག་ཡིན་པར་མངོན་སུམ་གྱིས་གྲུབ་སྟེ། ཡ་ཐོག་བོད་ཀྱི་རིག་གནས་སྤྱི་དང་། བྱེ་བྲག་ཏུ་ཆོས་ལུགས་ཡོད་ཚད་ཀྱི་ཐ་སྙད་ཅིག་ཡིན། འོན་ཀྱང་དེ་སྔོན་མཁས་པའི་གོ་ས་ལ་ཤི་འཐམ་རོ་འཐམ་བྱེད་མཁན་རྣམས་ཀྱང་བོན་པོ་ཞེས་པའི་ཐ་སྙད་འདི་ནི། ཡ་ཐོག་བོད་ཀྱི་རིག་གནས་སྤྱི་དང། བྱེ་བྲག་ཏུ་སྲོང་བཙན་ཡན་གྱི་ཆོས་ལུགས་སྤྱིའི་ཐ་སྙད་ལ་མི་སེམས་པར། ཉི་མ་དང་ཟླ་བ་སོགས་ལ་ལྷ་རུ་འཁྲུལ་ཏེ་དམར་མཆོད་བྱེད་མཁན་གྱི་བརྡོལ་བོན་དང་། ལྷ་དབང་ཕྱུག་ཆེན་པོའི་རྗེས་སུ་འབྲངས་པའི་ཁྱབ་བོན་དང་། གཞི་ལམ་འབྲས་གསུམ་གྱི་རྣམ་བཞག་ཡོངས་རྫོགས་ལྡན་པའི་གཡང་དྲུང་བོན་གྱི་ཐ་སྙད་ཡིན་ལུགས་སོགས་བཤད་དེ། མི་ཚེ་རྫོགས་པ་མ་གཏོགས་དོན་ལ་གནས་པའི་འགྲེལ་བཤད་རྒྱག་མཁན་གཅིག་ཀྱང་བྱུང་མི་འདུག་མོད། སྤྱིར་མི་སུམ་ཅུར་བསམ་པ་སུམ་ཅུ་དང་། མཛོ་སུམ་ཅུར་ར་ཅོ་དྲུག་བཅུ་ཞེས་བཤད་པ་ལྟར། དེ་ཤོད་དང་འདི་མ་བཤད་ཅེས་པའི་ས་མཚམས་མེད་སྟབས། གང་ཟག་སོ་སོའི་ཞལ་གྱི་མཆུ་སྒྲོས་བར་ནས་གནད་ལ་མ་ཁེལ་བའི་བཤད་ཚུལ་འདི་དག་བྱུང་བར་སོམ་ཉི་ཅི་ཡོད།
དེའི་ཕྱིར་བོན་པོ་ཞེས་པའི་ཐ་སྙད་འདི་ནི། དེང་སང་འུ་ཚོས་བཀོལ་སྤྱོད་བྱེད་བཞིན་པའི་ཆོས་ལུགས་ཞེས་པའི་ཐ་སྙད་འདི་དང་གཅིག་མཚུངས་ཡིན། དཔེར་ན། དེང་སང་ཆོས་ལུགས་ཞེས་པའི་ཐ་སྙད་འདིའི་ཁྱབ་ཁོངས་སུ། ཁ་ཆེ་དང་། ཡེ་ཤུ། ཧིན་འདུ། ནང་པ་བཅས་ཚུད་ཡོད་པ་བཞིན་དུ། དེ་སྔོན་བོད་ཀྱི་རྒྱལ་ཕྲན་སིལ་མ་བཅུ་གཉིས་སམ་བཞི་བཅུའི་མས་ནས་མགོ་བཟུང་སྟེ། གནམ་གྱི་ཁྲི་སྲོང་བཙན་ཡན་ཆད་ཀྱི་ཆོས་ལུགས་སྤྱིའི་ཐ་སྙད་ཅིག་ཡིན་པར་གྲུབ་སྟེ། དཔེར་ན་ཤར་ནུབ་གཉིས་སུ་རྩོམ་རིག་ཅེས་པ་འདི་ཡང་། སྔར་རིག་གནས་སྤྱི་ཁོག་ཙམ་ལ་གོ་བ་མ་གཏོགས། ད་ཆར་བཀོལ་སྤྱོད་བྱེད་བཞིན་པའི་རྩོམ་རིག་དོན་ལ་མི་འཇུག་པ་དང། དེ་བཞིན་སྒྱུ་རྩལ་ཞེས་པའི་ཐ་སྙད་འདི་ཡང་སྒྱུ་རྩལ་སྟོན་བྱེད་ཀྱི་ཐབས་ལམ་མ་གཏོགས། སྒྱུ་རྩལ་གྱི་དོན་ལ་འཇུག་པ་མིན།
དེ་ནས་ཕྱིས་སུ་དུས་རབས་བཅུ་བཞི་པ་དང་བཅོ་བརྒྱད་པའི་ནང་ནས་མགོ་བཟུང་སྟེ། རྩོམ་རིག་ཅེས་པའི་ཐ་སྙད་འདིའི་འཇུག་ཡུལ་འཕོ་འགྱུར་ཕྱིན་ནས་ད་ཆར་རྩོམ་རིག་གི་དོན་ལ་འཇུག་པ་དང་། སྒྱུ་རྩལ་ཞེས་པ་ཡང་རྗེས་སུ་སྒྱུ་རྩལ་གྱི་དོན་ལ་འཇུག་པ་བཞིན་དུ། བོན་པོ་ཞེས་པའི་ཐ་སྙད་འདི་ཡང། གཡུང་དྲུང་བོན་ཙམ་གྱི་ཐ་སྙད་ཉིད་ལ་འགྱུར་བ་ཡིན་པས། བཙན་པོ་སྲོང་བཙན་དང། མངའ་བདག་ཁྲི་སྲོང་། ཁྲི་རལ་པ་རྣམས་ཀྱིས་དེ་སྔོན་མེས་པོའི་ཆོས་ལུགས་ཅི་ཐུབ་བསྣུབས་ནས། རྒྱ་གར་གྱི་ཆོས་ལུགས་གསར་པ་ཤཱཀྱ་རིང་ལུགས་པའི་ཐེག་པ་ཆེ་ཆུང་སྔགས་དང་བཅས་པ་བོད་ལ་ནང་འདྲེན་བྱས་ཏེ་དར་འཕེལ་བཏང་བ་དང་། སྔར་བོན་པོ་ཞེས་པའི་བརྡ་ཆད་འདིའི་ཁྱབ་ཁོངས་སུ་གནས་པའི་ཆོས་ལུགས་ཡོངས་རྫོགས་བསྣུབས་ཏེ། མཐར་གཤེན་རབ་མེས་བོ་ཆེའི་རིང་ལུགས་ཙམ་གྱི་མ་གཏོགས་ཐམས་ཅད་རྩད་ནས་ཕམ་པར་བྱས་པ་དང་། མ་ཟད་གཤེན་རབ་མེ་བོ་ཆེའི་རིང་ལུགས་འཛིན་པའི་གཡུང་དྲུང་ཅེས་པ་འདི་ཉིད་མ་བསྣུབས་དགོས་དོན་དང་། ཆོས་ལུགས་གཞན་རྣམས་བསྣུབས་དགོས་པ་སོགས་ནི། རྩ་བའི་གྲུབ་མཐའ་དང་གཞུང་ལུགས་གཏིང་ཟབ་མོ་ཡོད་པའི་ཆོས་ལུགས་དེ་ལ། ཅུང་ཟད་ཀྱིས་གཅེས་སྤྲས་བྱས་ཁུལ་བགྱིས་ཏེ་མ་བསྣུབས་པ་དང་། གཞུང་ལུགས་མེད་པའི་ལུགས་སྲོལ་ཙམ་ལ་ཞེན་ནས་སྡོད་མཁན་དེ་དག་རྩ་མེད་དུ་བཟོས་པ་ཡིན་པར་སྣང་།
དེས་ན་བོན་པོ་ཞེས་པའི་ཐ་སྙད་འདིའི་ཁྱབ་ཁོངས་སུ་གཏོགས་པའི་ཆོས་ལུགས་ཕལ་མོ་ཆེ་ནུབ་ཚར་དུས། བོན་ཞེས་པའི་ཐ་སྙད་འདིའི་དབང་ཆ་ཡོངས་རྫོགས་གཡུང་དྲུང་བོན་ལ་རག་པ་དང་། མ་ཟད་རྗེས་སུ་གཡུང་དྲུང་བོན་གྱིས་དེ་སྔོན་གཞུང་ལུགས་དང་གྲུབ་མཐའ་མེད་མཁན་ཆོས་ལུགས་ཡོངས་རྫོགས་ཐ་སྙད་འདིའི་ཁྱབ་ཁོངས་སུ་ཕུད་ནས། ཡ་ཐོག་གི་སྐབས་སུ་བརྡོལ་བོན་གྱི་ཆོས་ལུགས་མེད་ལུགས་དང་། ཁྱབ་བོན་གྱི་ཆོས་ལུགས་མེད་ལུགས་སོགས་བཤད་དེ། ཐ་སྙད་འདིའི་དབང་ཆ་བདག་བཟུང་དང། ཆོས་ལུགས་ཙམ་གྱི་སྐད་དོད་བོན་པོ་ཞེས་པའི་ཐ་སྙད་འདིའི་སྐྱོན་དང། ཉེས་པའི་ཆ་སོགས་ཇི་ཡོད་རྣམས་གཙང་སེལ་བྱེད་ཀྱིན་ཡོད།
དེ་ནས་བོན་པོའི་རྗེས་འབྲངས་ཕྱི་རབས་པ་རྣམས་ཀྱི་སྣང་ངོར་ཡ་ཐོག་གི་སྐབས་སུ་ཆོས་ལུགས་ཞེས་པའི་སྐད་དོད་ལ། བོན་པོ་ཡིན་པར་མ་གོ་ནས་བརྡོལ་བོན་དང་། ཁྱབ་བོན་གཉིས་ཀ་བོན་པོའི་གྲལ་ནང་མཐར་བསྐྲད་བཏང་བ་དང་། དེ་ནི་ཁོང་ཚོའི་བསམ་པར་སྟོན་པ་གཤེན་རབ་ལས་ཆད་པའི་བོན་པོའི་བརྒྱུད་པ་མཐའ་དག་བརྡོལ་བོན་དང་། ཁྱབ་བོན་གཉིས་ཀྱིས་དམའ་འབེབས་པར་བསམས་ཏེ། སྲོང་བཙན་ཡན་ཆད་ཀྱི་སྐབས་སུའང་གཡུང་དྲུང་བོན་ཞེས་པ་མ་གཏོགས། གཞན་བརྡོལ་བོན་དང་ཁྱབ་བོན་སོགས་མེད་ཅེས་བཤད་པ་ཡིན། དེའི་ཕྱིར་བོན་པོ་ཞེས་པའི་ཐ་སྙད་འདི་ནི་བོད་གདོད་མའི་ཆོས་ལུགས་སྤྱི་ལ་ཁྱབ་པའི་བརྡ་ཆད་ཡིན་ཡང་། ད་ཆར་གཤེན་རབ་མེས་བོ་ཆེའི་རྗེས་སུ་འབྲངས་པའི་གཡུང་དྲུང་བོན་ཙམ་གྱི་ཐ་སྙད་ཁོ་ན་ལ་འགྱུར་བར་སྣང་ཞིང། དེ་ནི་དུས་ཚོད་འཕེལ་འགྲིབ་ཀྱི་དབང་གིས་སྤྱི་སྒྲ་བྱེ་བྲག་ལ་འཇུག་པའི་ཐ་སྙད་ཀྱི་གཤིས་སུ་གྲུབ་པར་སེམས་སོ། འདི་དང་ཅི་མཚུངས་སུ་ཡིན་པའི་དུས་ཚོད་འཕེལ་འགྲིབ་དབང་གིས་ཐ་སྙད་ལ་འགྱུར་ལྡོག་འགྲོ་བ་ཤིན་ཏུ་ནས་མང་སྟེ། ད་ཆར་ཆབ་སྲིད་ཀྱི་དབང་ཆ་སྒེར་འཛིན་པ་རྣམས་ལ། བོད་པས་དམར་ཕྱོགས་ཞེས་པའི་མིང་འབོད་ཅེས་ཡོད་པ་བཞིན་ནོ།
འོན་ཀྱང་དབང་ཆ་སྒེར་འཛིན་ཡིན་ཚད་ལ་དམར་ཕྱོགས་ཡིན་མི་དགོས་ཏེ། སྔར་ཨེ་ཊ་ལིའི་འགོ་འཛིན་པ་མ་སི་ལིང་ཉིད་ཀྱི་ཆབ་སྲིད་ལམ་ལུགས་དེ་ཕག་ཤིན་རྫུན་གྱི་རིང་ལུགས་ཡིན་པ་མ་ཟད། དབང་ཆ་སྒེར་འཛིན་དང་། གདུག་རྩུབ་ཀྱི་ལམ་ལུགས་འདི་ལྟ་བུ་དེ་སྔོན་སའི་གོ་ལར་བྱུང་མྱོང་མེད་པ་དང་། འཇར་མུ་ནེའི་མགོ་འཛིན་པ་ཧི་ཊི་ལའི་ཆབ་སྲིད་ཀྱི་ལམ་ལུགས་ནག་རྫི་སི་ཡིན་པ་དང་། དེའི་དབང་ཆ་ཇི་ལྟར་ཡིན་མིན་འཇེ་ཤུའི་མི་རིགས་ཀྱི་མནར་གཅོད་ལ་བལྟ་ཆོག་པ་དང་། འཇར་པན་གནམ་འོག་གོང་མའི་ཆབ་སྲིད་ཀྱི་ལམ་ལུགས་ཅི་འདྲ་ཡོད་མེད། འཇར་པན་གྱི་དམག་མི་དང། འགོ་བྱེད་རྣམས་ཀྱིས་ནོར་འཁྲུལ་ཤོར་ཚེ་རང་ཤི་བརྒྱབ་དགོས་པ་སོགས་ལ་བལྟས་ན་ཤེས་ནུས་པ་དང་། ཨུ་རུ་སུའི་འགོ་འཛིན་པ་ལི་ཉིད་ཀྱི་ཆབ་སྲིད་ལམ་ལུགས་དེ་དམར་ཕྱོགས་ཡིན་པ་དང་། དེའི་བྱ་སྤྱོད་དང་མནར་གཅོད་ཇི་ལྟར་ཡོད་མེད། ད་ལྟ་འུ་ཚོས་ཤེས་བཞིན་པ་ཡིན་པར་མ་ཟད། འདི་དག་གི་ཆབ་སྲིད་ལམ་ལུགས་དེ་དབང་ཆ་སྒེར་འཛིན་ཡིན་པར་མཚུངས་ཀྱང་།
ད་དུང་ངོ་བོ་དང་བྱེད་ལས་མང་པོའི་ས་ནས་ཁྱད་པར་ཆེ་ཞིང་། ད་ཆར་དེ་རྣམས་ནུབ་སྟེ་དབང་ཆ་སྒེར་འཛིན་པའི་ཐ་སྙད་འདི་ཉིད་དམར་ཕྱོགས་རང་ལ་འཇགས་པ་བཞིན་དུ། དུས་ཚོད་འཕེལ་འགྲིབ་ཀྱི་དབང་གིས་མིང་དང་ཐ་སྙད་བརྡ་ཆད་སོགས་ལ་འགྱུར་ལྡོག་འགྲོ་བ་ཧ་ཅང་མང་ལ། དེ་བཞིན་འབྱུང་འགྱུར་ཆོས་ལུགས་ཕལ་མོ་ཆེ་ནུབ་ནས། ཆོས་ལུགས་ཞེས་པའི་ཐ་སྙད་འདི་ཡང་ཡེ་ཤུ་དང་། ཁ་ཆེ་གང་རུང་གི་མིང་ལ་འགྱུར་བར་སོམ་ཉི་མི་དགོས་པ་དང། མ་ཟད་བོད་བརྒྱུད་ནང་དོན་གྱི་གྲུབ་མཐའ་ས་སྐྱ། བཀའ་བརྒྱུད། ཇོ་ནང་བཅས་རིམ་གྱིས་ནུབ་སྟེ། བོད་བརྒྱུད་ནང་དོན་ཞེས་པའི་ཐ་སྙད་འདི་ཡང་། ཅུང་ཕྱི་ཙམ་དུ་ལྷག་ཁུལ་བྱེད་པའི་ཆོས་བརྒྱུད་བྱེ་བྲག་རྙིང་མ་དང་། དགེ་ལུགས་གང་རུང་གི་མིང་ལ་འགྱུར་བར་བཤད་དུ་ཅི་དགོས།
་་་་་་་་ སྲོང་བཙན་ཡན་ཆད་ཀྱི་སྐབས་སུའང་གཡུང་དྲུང་བོན་ཞེས་པ་མ་གཏོགས། གཞན་བརྡོལ་བོན་དང་ཁྱབ་བོན་སོགས་མེད་ཅེས་བཤད་པ་ཡིན། དེའི་ཕྱིར་བོན་པོ་ཞེས་པའི་ཐ་སྙད་འདི་ནི་བོད་གདོད་མའི་ཆོས་ལུགས་སྤྱི་ལ་ཁྱབ་པའི་བརྡ་ཆད་ཡིན་ཡང་། ད་ཆར་གཤེན་རབ་མེས་བོ་ཆེའི་རྗེས་སུ་འབྲངས་པའི་གཡུང་དྲུང་བོན་ཙམ་གྱི་ཐ་སྙད་ཁོ་ན་ལ་འགྱུར་བར་སྣང་ཞིང། དེ་ནི་དུས་ཚོད་འཕེལ་འགྲིབ་ཀྱི་དབང་གིས་སྤྱི་སྒྲ་བྱེ་བྲག་ལ་འཇུག་པའི་ཐ་སྙད་ཀྱི་གཤིས་སུ་གྲུབ་པར་སེམས་སོ། ་་་་་་་་་་་
ཚིག་ཆོ་ལོ་མོ་ལོ་ཟེར་བ་འདི་འདྲ་རང་ཡིན་རྒྱུ་རེད་བ། ཚིག་ཚོགས་གོ་མེད་ཙམ་ལས་དོན་ལ་གནད་པས་གཏམ་ཞིག་རེད་མིན་འདུག ཡང་་་་ཆོས་ལུགས་ཕྱོགས་ཞེན་གྱི་བཟི་བའི་ལྟེ་བོ་ཞིག་གིས་བོད་ཀྱི་ཕ་ཆོས་གཡུང་དྲུང་བོན་ལ་དམའ་འབེབས་གཏོང་ཐབས་རད་འདུག ཐབས་སྐྱོ་བ་ལ་ཨང་། བོན་ཆོས་འདི་བསྐྱར་དུ་སྣུབ་དགོས་བསམ་པ་འདྲ། ད་འདུག
་་་་་་་ཉི་མ་དང་ཟླ་བ་སོགས་ལ་ལྷ་རུ་འཁྲུལ་ཏེ་དམར་མཆོད་བྱེད་མཁན་གྱི་བརྡོལ་བོན་དང་། ལྷ་དབང་ཕྱུག་ཆེན་པོའི་རྗེས་སུ་འབྲངས་པའི་ཁྱབ་བོན་དང་། གཞི་ལམ་འབྲས་གསུམ་གྱི་རྣམ་བཞག་ཡོངས་རྫོགས་ལྡན་པའི་གཡང་དྲུང་བོན་གྱི་ཐ་སྙད་ཡིན་ལུགས་སོགས་བཤད་དེ། མི་ཚེ་རྫོགས་པ་མ་གཏོགས་དོན་ལ་གནས་པའི་འགྲེལ་བཤད་རྒྱག་མཁན་གཅིག་ཀྱང་བྱུང་མི་འདུག་་་་་་་
ཡང་།
ཡུལ་མཐའ་འཁོབ་བོད་ཀྱི་རྒྱལ་ཁམས་འདིར། །
མི་མཁས་པ་སླེབས་པའི་སྔོན་མ་ཡིན། །
བོད་ཁ་བ་ཅན་གྱི་མི་རྣམས་ལ། །
ང་ཐོན་མི་བཀའ་དྲིན་མི་ཆེའམ། །
ཞེས་པ་འདི་བོན་ལུགས་སུ་ཇི་ལྟར་འགྲེལ་ལམ། ལགས།
འཆལ་གཏམ།། སྒྲུང་གཏམ།། རྡོ་ཆག་བཙན་སྒྲིགས།།