བོད་ལུགས་གསོ་རིག་གི་ལུས་སེམས་བདེ་ཐང་སྐོར་གྱི་བགྲོ་གླེང་ཚོགས་ཆེན།

འཚོ་བྱེད་བུས་བརྒྱུད་འགོད་བྱས།

 
བོད་ལུགས་གསོ་རིག་ཆེད་ལས་ཚོགས་པའི་རིག་གཞུང་ལོ་ཚོགས་སྐབས་གསུམ་པ་ལུས་སེམས་བདེ་ཐང་བགྲོ་གླེང་ཚོགས་ཆེན་ཕྱི་ལོ་ ༢༠༡༧ ཟླ་ ༡༠ ཚེས་ ༦ དང་ ༧ རེས་གཟའ་པ་སངས་དང་སྤེན་པ་ཉིན་གཉིས་རིང་ཨ་རི་སྦོ་སི་ཊོན་གྲོང་ཁྱེར་དུ་རྟེན་གཞི་བྱས་པའི་ཧར་ཝར་ཌི་གསོ་རིག་སློབ་གླིང་གི་ Harvard Medical School Joseph B. Martin Conference Center གྲོས་ཚོགས་ཁང་དུ་ཚོགས་གཏན་འཁེལ་ཡོད་པ་ལྟར། ཐེངས་འདིའི་ལོ་ཚོགས་ཀྱི་དམིགས་ཡུལ་ནི་འཛམ་གླིང་ཤར་ནུབ་ཀྱི་བོད་ཀྱི་གསོ་རིག་ཆེད་མཁས་དང་། ཕྱི་ལུགས་གསོ་རིག་ཆེད་མཁས། ཉམས་ཞིབ་པ། ཚན་རིག་པ་སོགས་མཉམ་འཛོམས་ཀྱིས་ཕན་ཚུན་བར་བོད་ཀྱི་གསོ་རིག་གཞུང་བཤད་ལག་ལེན་དང་འབྲེལ་བའི་བསམ་བློ་བརྗེ་རེས་དང་། བོད་ཀྱི་གསོ་རིག་གི་འཛིན་སྐྱོང་སྤེལ་གསུམ་དང་ད་ལྟའི་གནས་སྟངས། ནད་བཅོས་དང་སྨན་རྫས་ཞིབ་འཇུག་མཉམ་ལས་ལ་སྐུལ་འདེད། བོད་ལུགས་གསོ་རིག་གིས་བདེ་ཐང་ལ་ཐོན་པའི་ནུས་པ་འདོན་སྤེལ། བོད་ཀྱི་གསོ་རིག་རྒྱལ་སྤྱི་རང་བཞིན་དུ་འཕེལ་རྒྱས་འགྲོ་བར་རམ་འདེགས་བྱེད་ཚུལ་བཅས་ཡིན་པ་དང་། ལོ་ཚོགས་འདིའི་སྟེང་འཛམ་གླིང་གི་གྲགས་ཆེན་སློབ་གཉེར་ཁང་དང་སྨན་ཁང་ཁག་གི་བོད་ལུགས་སྨན་པ་དང་། ཕྱི་ལུགས་གསོ་རིག་གི་སྨན་པ། སེམས་ཁམས་རིག་པ་བ། ཚན་རིག་པ། ལོ་རྒྱུས་ཞིབ་འཇུག་པ། ཡིག་ཚང་ཞིབ་འཇུག་པ། མིའི་རིགས་པའི་ཞིབ་འཇུག་པ་སོགས་གདན་འདེན་བྱས་ཡོད་པ་དང་། ལྷག་པར་དུ་བོད་ཕྱི་ནང་གཉིས་ནས་བོད་ལུགས་གསོ་རིག་ཆེད་མཁས་སྨན་པ་དང་ཞིབ་འཇུག་པ་མང་པོ་ཞིག་ཆེད་ཕེབས་གནང་གི་ཡོད་པ་མ་ཟད། ཚོགས་ཆེན་ཉིན་གཉིས་ཀྱི་ཚོགས་ཐུན་ཚང་མར་བོད་ཀྱི་གསོ་རིག་དང་འབྲེལ་བའི་ཞིབ་འཇུག་དང་ལག་ལེན་ལ་སྤྲོ་བ་ཡོད་མཁན་དང་དོན་གཉེར་ཅན་ཐམས་ཅད་རིན་མེད་ཐོག་ངོ་བཅར་ཚོགས་ཞུགས་བྱེད་ཆོག་གི་ཡོད་པ་རེད།

གནས་ཚུལ་ཞིབ་ཕྲ་ཚོགས་ཆེན་དྲ་ཚིགས་ལ་གཟིགས་རོགས།

https://www.tibetanmedicineconference.org/mission-3

Harvard Medical School Joseph B. Martin Conference Center